བྱང་ཀོ་རི་ཡས་རྡུལ་ཕྲན་བཟོ་སྐྲུན་དང་ཚོད་ལྟ་དེ་ལྷོ་ཀོ་རི་ཡའི་ཤི་གསོན་དང་འབྲེལ་བའི་གནད་དོན་ཞིག་ཡིན་པ་རྒྱ་ནག་གཞུང་གིས་ངེས་པར་ཤེས་དགོས་ཟེར།
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ལྷོ་ཀོ་རི་ཡའི་ཕྱི་འབྲེལ་སྤྱི་ཁྱབ་བློན་ཆེན་ཞེན་བྷོམ་ཆུལ་ (Shin Beomchul) ཟེར་བ་ཞིག་གིས། བྱང་ཀོ་རི་ཡས་རྡུལ་ཕྲན་བཟོ་སྐྲུན་བྱས་ཏེ་ལྷོ་ཀོ་རི་ཡར་ཚུར་རྒོལ་བྱེད་སྲིད་པའི་ཉེན་ཁ་འགོག་སྲུང་གྲ་སྒྲིག་དགོས་ཤིང་། གནད་དོན་དེ་ལྷོ་ཀོ་རི་ཡའི་ཤི་གསོན་དང་འབྲེལ་བ་ཡོད་པ་རྒྱ་ནག་གཞུང་གིས་ངེས་པར་ཤེས་དགོས་པ་མ་ཟད། པེ་ཅིན་གཞུང་གིས་ཨ་རིའི་རྡུལ་ཕྲན་བཟོ་སྐྲུན་སྔོན་འགོག་གི་སྒྲིག་འཛུགས་གསར་བའི་ཐད་གྲོས་མོལ་དགོས་སྐོར་བཤད་འདུག
ཞེན་བྷོམ་ཆུལ་གྱིས་རྒྱལ་སྤྱིའི་དམག་དོན་ཞིབ་འཇུག་ལྟེ་གནས་ཁང་ལ་བརྗོད་རྒྱུར། རྒྱ་ནག་གཞུང་གིས་བྱང་ཀོ་རི་ཡའི་འཇིགས་སྐུལ་ཐད་ཀྱི་ལྷོ་ཀོ་རི་ཡའི་དངངས་འཚབ་ལ་ངེས་ཤེས་བསྐྱེད་པའི་རེ་བ་ཡོད། བྱང་ཀོ་རི་ཡའི་འཇིགས་སྐུལ་དེ་ནི་རྒྱུན་ལྡན་ཞིག་མ་ཡིན་པར་དེ་རྡུལ་ཕྲན་མཚོན་ཆའི་འཇིགས་སྐུལ་ཞིག་རེད། དེ་ཉེན་ཚབས་ཆེན་པོ་རེད། དེང་སྐབས་ང་ཚོ་ཤི་གསོན་གྱི་གནས་སྟངས་ཤིག་གི་འོག་འཚོ་བཞིན་ཡོད། ང་ཚོས་ཕན་ཚུན་བར་ཐེབས་པའི་གོ་ནོར་གྱི་རྩོད་རྙོག་སེལ་དགོས། ཡིན་ནའང་གཞི་རྩའི་གནད་དོན་གཙོ་བོ་ང་ཚོའི་རྒྱལ་ཁབ་སྲུང་སྐྱོབ་བྱ་རྒྱུ་དེ་རེད་ཅེས་སོགས་བརྗོད་འདུག
ལྷོ་ཀོ་རི་ཡའི་ཕྱི་སྲིད་བློན་ཆེན་གཞོན་པ་ཁེམ་ཧོང་ཙེན་ (Kim Hyoung-zhin) ཟེར་བ་ཞིག་གིས། འཛམ་གླིང་རྒྱལ་ཁབ་ཡོངས་ཀྱིས་རྒྱལ་སྤྱིའི་དཔལ་འབྱོར་ཉེས་ཆད་ལག་བསྟར་བྱས་ཏེ། བྱང་ཀོ་རི་ཡའི་རྡུལ་ཕྲན་བཟོ་སྐྲུན་དང་ཚོད་ལྟ་མཚམས་འཇོག་གི་གནོན་ཤུགས་སྤྲོད་དགོས། བལྟས་ཚོད་ཀྱིས་བྱང་ཀོ་རི་ཡ་སྲིད་གཞུང་གིས་རྒྱལ་སྤྱིའི་གནོན་ཤུགས་ལ་མ་བལྟས་པར་རྡུལ་ཕྲན་གསར་བཟོ་དང་ཚོད་ལྟ་མཚམས་འཇོག་འཆར་མེད་པ་འདྲ། གལ་ཏེ་གནད་དོན་འདི་རྙོག་འཛིང་ཆགས་པ་ཡིན་ན། བྱང་ཀོ་རི་ཡ་སྲིད་གཞུང་གིས་རྡུལ་ཕྲན་བཟོ་སྐྲུན་མཚམས་མ་བཞག་པར་དུ་འཇིག་རྟེན་འདིར་འཚོ་ཐབས་མེད་པ་ཤེས་དགོས། ང་ཚོས་བྱང་ཀོ་རི་ཡའི་རྡུལ་ཕྲན་བཟོ་སྐྲུན་དང་ཚོད་ལྟ་འགོག་སྲུང་གི་སྒྲིག་འཛུགས་ (THAAD) གསར་བའི་ཐད་གྲོས་མོལ་བྱེད་དགོས་མོད། ཡིད་སྐྱོ་བ་ཞིག་ལ་པེ་ཅིན་གཞུང་གིས་ང་ཚོའི་དཔོན་རིགས་ཚོར་ཐུག་འཕྲད་བྱེད་འདོད་མེད་པ་དང་གནས་ཚུལ་འདིར་ཉན་འདོད་མེད་པ་རེད་ཅེས་སོགས་བརྗོད་འདུག
གནས་ཚུལ་ལྟར་ན། བྱང་ཀོ་རི་ཡས་རྡུལ་ཕྲན་གསར་བཟོ་དང་ཚོད་ལྟ་ཐེངས་བཞི་བ་བྱས་རྗེས། ཨ་རི་དང་ལྷོ་ཀོ་རི་ཡ་གཉིས་ཀྱིས་བྱང་ཀོ་རི་ཡའི་རྡུལ་ཕྲན་བཟོ་སྐྲུན་དང་ཚོད་ལྟ་འགོག་སྲུང་གི་སྒྲིག་འཛུགས་གསར་བ་ཞིག་གཏན་འབེབས་བྱས་ཏེ། ལས་གཞི་དེའི་ཐད་འཛམ་གླིང་རྒྱལ་ཁབ་ཁག་ཚང་མ་མཉམ་རུབ་ཀྱིས་གྲོས་བསྡུར་བྱ་འཆར་ཡོད་ནའང་། རྒྱ་ནག་གཞུང་གིས་ལས་དོན་དེར་ངོས་ལེན་བྱེད་ཀྱི་མེད་འདུག
གཞན། ཨ་རིའི་ (ABC) གསར་ཁང་གིས་སྤེལ་བའི་གནས་ཚུལ་ཞིག་གི་ནང་། ལྷོ་ཀོ་རི་ཡའི་སྲིད་འཛིན་ཕར་ཀི་ཇུན་ཧེ་ (Park Geun-hye) ཡིས་བྱང་ཀོ་རི་ཡས་རྡུལ་ཕྲན་བཟོ་སྐྲུན་དང་ཚོད་ལྟ་ཐེངས་བཞི་བའི་སྐབས་ཀྱི་རྒྱལ་སྤྱིའི་དཔལ་འབྱོར་ཉེས་ཆད་དང་དེའི་གནོན་ཤུགས་ལ་མ་བལྟས་པར་མུ་མཐུད་རྡུལ་ཕྲན་གསར་བཟོ་དང་ཚོད་ལྟ་ཐེངས་ལྔ་བ་བྱ་འཆར་ཡོད་སྐོར་བརྗོད་ཡོད་འདུག
སྲིད་དོན་དབྱེ་ཞིབ་པ་ཁག་ཅིག་གིས་བྱང་ཀོ་རི་ཡའི་རྡུལ་ཕྲན་ཚོད་ལྟའི་ལས་གཞི་དེ་ན་ནིང་ཕྱི་ཟླ་ ༥ བའི་ནང་འགོ་བཙུགས་ཡོད་པ་དང་། དེ་ཡང་བྱང་ཀོ་རི་ཡའི་སྲིད་འཛིན་ཁེམ་ (Kim) གྱིས་རང་ཉིད་རང་རྒྱལ་གྱི་དབུ་ཁྲིད་དབང་ཤུགས་ཅན་ཞིག་གི་སྣང་བརྙན་བསྐྲུན་ཐབས་ཤིག་དང་རང་ཉིད་ཀྱི་དབང་སྒྱུར་སྲིད་དབང་སྲ་བརྟན་ཡོང་ཐབས་ཤིག་ཡིན་སྐོར་བརྗོད་འདུག
གསར་འགོད་པ། པདྨ་རྒྱལ།
