འདས་པའི་ཉིན་གསུམ་རིང་ཨོ་སི་ཁྲོ་ལི་ཡའི་རྒྱལ་ཡོངས་བོད་རིགས་ཚོགས་ཆེན་ཐེངས་བདུན་པ་ཚོགས་པའི་སྟེང་ ‘ཨོ་གླིང་རྒྱལ་ཡོངས་བོད་རིགས་མི་མང་འདུ་འཛོམས་ཆེན་མོ’ ཟེར་བའི་ཞི་བའི་ལས་འགུལ་ཞིག་སྤེལ་རྒྱུའི་གྲོས་ཆོད་བཞག་ཡོད་འདུག
ཨོ་སི་ཁྲོ་ལི་ཡའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་བདུན་པ་དེ་ཟླ་འདིའི་ཚེས་ ༡༦ ནས་ ༡༨ ཉིན་བར། སི་ནེའི་གྲོང་ཁྱེར་གྱི་བྱང་ཕྱོགས་མཚོ་ངོགས་སུ་ཚོགས་ཡོད་ཅིང་། ཚོགས་འདུའི་སྟེང་ཨོ་སི་ཁྲོ་ལི་ཡའི་སྐུ་ཚབ་དོན་གཅོད་སྐུ་ངོ་ལྷག་པ་མཚོ་སྒོ་མཆོག་དང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་བློ་བཟང་ལུང་རྟོགས་ལགས་དང་དབུས་རྒྱུན་རྣམ་པ། ཨོ་སི་ཁྲོ་ལི་ཡའི་མངའ་སྡེ་ ༦ ནང་ནས་ས་གནས་བོད་རིགས་མཐུན་ཚོགས་ཁག་གི་ཚོགས་གཙོ་ཚོགས་གཞོན་དང་སྐུ་ཚབ། མངའ་སྡེ་སོ་སོའི་མི་མང་ ༢༠༠ ལྷག་མཉམ་ཞུགས་བྱས་ཏེ། ད་ལྟ་དང་མ་འོངས་པའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ལས་དོན་གནང་ཕྱོགས་སྐོར་ལ་གྲོས་བསྡུར་དང་གྲོས་ཆོད་ཁག་ཅིག་བཞག་སོང་།
ཚོགས་ཆེན་གྱི་ཉིན་དང་པོར་རྒྱལ་ཡོངས་ཚོགས་གཙོ་བློ་བཟང་ལུང་རྟོགས་ལགས་ཀྱིས་ཚོགས་ཆེན་གྱི་དམིགས་ཡུལ་སྐོར་ནས་གསུང་བཤད་གནང་དོན། གྲོས་ཆོད་གང་མང་གཏན་འབེབས་བྱས་ཏེ་ཡིག་ཐོག་ཏུ་འཇོག་རྒྱུ་ཙམ་མ་ཡིན་པར་མངའ་སྡེ་སོ་སོ་ནས་ཕེབས་པའི་བོད་རིགས་མཐུན་ཚོགས་ཁག་གི་རྒྱུན་ལས་དང་མི་མང་རྣམས་ས་གནས་གཅིག་ཏུ་འཛོམས་ནས་ཕན་ཚུན་རྒྱུས་ལོན་དང་བསམ་ཤེས། མཐུན་ལམ་རྡོག་རྩ་གཅིག་སྒྲིལ་བྱ་རྒྱུ་ནི་དམིགས་ཡུལ་གྱི་གཙོ་བོ་ཡིན་ལ། དོན་དངོས་ཐོག་ནས་ང་ཚོའི་སྟོབས་ཤུགས་ངོ་མ་དེ་རང་ཡིན་སྟབས། བོད་མི་རེ་རེའི་ངོས་ནས་འགན་ལེན་བྱེད་དགོས་པ་གལ་གནད་ཆེན་པོ་ཡིན་སྐོར་དང་། ཡང་ཁོང་གིས་རྒྱལ་ཡོངས་ཚོགས་ཆེན་འདི་མངའ་སྡེ་སོ་སོའི་བོད་མི་ཚང་མའི་དགོངས་ཚུལ་ཕྱོགས་གཅིག་ཏུ་སྤུངས་སའི་ཚོགས་འདུ་གལ་ཆེན་ཞིག་ཡིན་དུས། ད་ལྟའི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་གནས་བབ་དང་མ་འོངས་པའི་མདུན་ལམ་བཅས་ཀྱི་སྐོར་ལ་ཐུགས་བསམ་ཆེན་པོ་བཞེས་ཏེ་ཆ་ཤས་ལེན་རྒྱུ་གལ་ཆེན་པོ་ཡིན། ཞེས་སོགས་བརྗོད་སོང་།
དེ་རྗེས་སྐུ་ཚབ་དོན་གཅོད་ལྷག་པ་མཚོ་སྒོ་མཆོག་གིས་ཚོགས་ཆེན་དང་འབྲེལ་བའི་གསུང་བཤད་གནང་དོན། རྩ་བའི་དོན་གཅོད་ངོས་ནས་ལས་དོན་བྱེད་ཕྱོགས་ཀྱི་ཁྱབ་ཚད་གལ་གནད་ཆེན་པོ་བཞི་ལ་ངོས་འཛིན་བྱེད་ཀྱི་ཡོད། དང་པོ་རྒྱལ་ཡོངས་བོད་རིགས་སྤྱི་མཐུན་ཚོགས་པ་དང་མངའ་སྡེ་སོ་སོའི་བོད་རིགས་མཐུན་ཚོགས་ཁག གཉིས་པ་བོད་དོན་རྒྱབ་སྐྱོར་ཚོགས་པ་ཁག གསུམ་པ་༸རྒྱལ་བ་རིན་པོ་ཆེ་ཆིབས་བསྒྱུར་དང་འབྲེལ་བའི་ཕེབས་བསུའི་གོ་སྒྲིག་ཚོགས་ཆུང་། བཞི་བ་བོད་བརྒྱུད་ནང་བསྟན་ཆོས་ཚོགས་ཁག་ཡིན་སྐོར་དང་། ཡང་ཁོང་གིས་ཐེངས་འདིའི་ཚོགས་ཆེན་སྐབས་སུ་གྲོས་ཆོད་གང་བཞག་པ་ལ་ས་གནས་བོད་རིགས་ཚོགས་པ་ཁག་དང་ས་གནས་མི་མང་བཅས་ཀྱིས་མཐུན་སྒྲིལ་དང་ནུས་ཤུགས་མཉམ་སྤུངས་བྱས་ཏེ། གྲོས་ཆོད་ཁག་གི་གྲུབ་འབྲས་འཐོན་ཐབས་ལ་འབད་བརྩོན་ཆེན་པོ་བྱེད་དགོས་པ་མ་ཟད། དོན་གཅོད་ངོས་ནས་ཀྱང་ལམ་སྟོན་དང་རམ་འདེགས་གང་ཡོང་དུས་ཐོག་ཏུ་ཞུ་རྒྱུ་ཡིན་སྐོར་གསུངས་སོང་།
ཐེངས་འདིའི་ཚོགས་ཆེན་སྐབས་ཀྱི་གྲོས་གཞི་དོན་ཚན་དང་པོ་ནི། བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་སྲུང་སྤེལ་བྱེད་ཕྱོགས་སྐོར་དང་། གྲོས་གཞི་དོན་ཚན་གཉིས་པ་ནི་རྒྱལ་ཁབ་འདིའི་ནང་བོད་དོན་ཆབ་སྲིད་ཀྱི་ལས་འགུལ་སྤེལ་ཕྱོགས་སྐོར། གྲོས་གཞི་དོན་ཚན་གསུམ་པ་ནི་བོད་རིགས་མཐུན་ཚོགས་ཁག་སྲ་བརྟན་དང་ནུས་ལྡན་བཟོ་ཐབས་སྐོར་དང་། གྲོས་གཞི་དོན་ཚན་བཞི་བ་ནི་༸གོང་ས་མཆོག་གི་ཆིབས་སྒྱུར་སྐབས་རྒྱལ་ཡོངས་སྤྱི་ཚོགས་པ། ས་གནས་བོད་རིགས་མཐུན་ཚོགས་སོ་སོས་ཞུ་སྒོ་ཇི་དགེའི་སྐོར་དང་། སྤྱི་སྨན་དགོངས་འཆར་བཅས་རེད་འདུག
ད་ལོའི་ཚོགས་ཆེན་སྐབས་སུ་ཚོགས་ཆུང་ཁག་བཞི་རུ་བསྐོས་ཏེ་ཚོགས་བཅར་བ་ཡོངས་ཀྱིས་གྲོས་བསྡུར་དང་བགྲོ་གླེང་རིམ་པར་བྱས་ཏེ་གྲོས་ཆོད་དམིགས་བསལ་བ་ཁག་ཅིག་བཞག་ཡོད་འདུག དེའི་ནང་ནས་གྲོས་ཆོད་གཅིག་ནི། ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ངོས་ནས་ཨོ་གླིང་ནང་ཡོད་པའི་བླ་སྤྲུལ་དང་། མཁན་པོ། དགེ་བཤེས། རྩོམ་པ་པོ། ཞིབ་འཇུག་པ། ལོ་ཙཱ་བ། དགེ་རྒན། སྨན་པ། གསར་འགོད་པ། བཟོ་རིགས་ཁེ་ལས་པ་སོགས་ཆེད་ལས་མཁས་པའི་ཚོགས་ཆེན་ཞིག་བསྡུ་བསྐོང་གིས་ཡུལ་གྲུ་འདིའི་ནང་མ་འོངས་པར་བོད་ཀྱི་ཆོས་དང་རིག་གཞུང་མི་ཉམས་གོང་སྤེལ་དང་ཉམས་པ་སླར་གསོ་གནང་ཐབས་ཀྱི་བགྲོ་གླེང་ཞིག་གོ་སྒྲིག་གནང་རྒྱུ་དང་། རིམ་བཞིན་ཨོ་གླིང་གཙུག་ལག་སློབ་ཆེན། ལས་རིགས་འདྲ་མིན་ནང་བཞུགས་པའི་ཨོ་གླིང་བོད་རིག་པ་བ་རྣམས་དང་མཇལ་ནས་བོད་རིག་པའི་སྐོར་ནས་བགྲོ་གླེང་དང་ནུས་པ་མཉམ་འབྲེལ་བྱ་ཐབས་དང་། གྲོས་ཆོད་གཞན་ཞིག་ནི། ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པས་གོ་སྒྲིག་འོག་ཨོ་གླིང་རྒྱལ་ཡོངས་བོད་རིགས་མི་མང་འདུ་འཛོམས་ཆེན་མོ་ཞེས་པའི་ཞི་བའི་ལས་འགུལ་ཞིག་དུས་ཚོད་ངེས་ཅན་ནང་གོ་སྒྲིག་བྱ་ཐུབ་པ་བྱ་རྒྱུ་དང་། དེའི་སྐབས་གནས་ཡུལ་རྒྱལ་ཁབ་ཀྱི་ཆེས་མཐོའི་མི་སྣ་དང་། བོད་དོན་རྒྱབ་སྐྱོར་ཚོགས་པའི་མི་སྣ་སོགས་གདན་འདྲེན་གྱིས་བོད་དོན་དྲིལ་བསྒྲགས་ཤུགས་ཆེན་བྱ་རྒྱུ་སོགས་རེད་འདུག ཚོགས་ཆེན་གསུམ་པའི་ཉིན་གྲོས་ཆོད་ཁག་སྤྱི་མོས་མང་མོས་ཀྱི་སྒོ་ནས་གཏན་འབེབས་བྱས་ཏེ་རྒྱལ་ཡོངས་བོད་རིགས་སྤྱི་མཐུན་ཚོགས་པའི་དྲུང་ཆེ་བསོད་ནམས་ཆོས་སྒྲོན་ལགས་ཀྱིས་མཇུག་སྡོམ་གནང་སྟེ་ཚོགས་ཆེན་གྲོལ་སོང་།
གནས་ཚུལ་གཏོང་མཁན་རྨེའུ་དཀོན་རྒྱམ།
