གླུ་གཞས་འཁྲབ་སྟོན་ལ་བཀག་འགོག

༧གོང་ས་མཆོག་དང་འབྲེལ་བ་ཡོད་པར་སྙད་དེ་ཨ་རིའི་གཞས་མ་གྲགས་ཅན་སི་ལི་ནཱ་གྷོ་མི་ཛི་ལགས་ཀྱི་རྒྱ་ནག་ནང་གི་གླུ་གཞས་འཁྲབ་སྟོན་བཀག་འགོག་བྱས་འདུག

ཟླ་འདིའི་ཕྱི་ཚེས་ ༡༦ ཉིན་ཨ་རིའི་གློག་བརྙན་འཁྲབ་སྟོན་པ་དང་གཞས་མ་གྲགས་ཅན་སི་ལི་ནཱ་གྷོ་མི་ཛི་(Selena Gomez)ལགས་ཀྱིས། འདི་ལོའི་ཕྱི་ཟླ་ ༨ པའི་ནང་རྒྱ་ནག་ཀང་ཀྲུའུ་དང་ཧྲང་ཧེ་གྲོང་ཁྱེར་གཉིས་ཀྱི་ནང་དུ་མོའི་ཆེད་སྒྲིག་བརྙན་འཁོར་ (Revival) གྱི་གླུ་གཞས་སྤྲོ་ཚོགས་བསྡུ་རྒྱུ་ཡིན་སྐོར་མོ་རང་གི་དྲ་རྒྱའི་ཐོག་ཁྱབ་བསྒྲགས་བྱས་ཡོད་ཀྱང་། ཕྱིས་སུ་རྒྱུ་རྐྱེན་གང་ཡིན་མ་བཤད་པར་གནས་ཚུལ་དེ་དྲ་ཐོག་ནས་བསུབས་ཡོད་འདུག

གནད་དོན་དེའི་ཐད་ཉིན་རེའི་མེ་ལོང་(The Daily Mirror)ཚགས་པར་ཁང་གིས། སི་ལི་ནཱ་ལགས་༧གོང་ས་མཆོག་དང་འབྲེལ་བ་ཡོད་པར་བརྟེན། རྒྱ་ནག་གཞུང་གིས་མོའི་གླུ་གཞས་སྤྲོ་ཚོགས་ལ་བཀག་འགོག་བྱས་ཏེ་འཁྲབ་སྟོན་གྱི་ལས་འཆར་མེད་པ་ཆགས་ཡོད་སྐོར་བརྗོད་འདུག་ལ། ཕྱི་ལོ་ ༢༠༡༤ ལོར་ཁ་ན་ཌའི་གྲོང་ཁྱེར་ཝན་ཁོ་ཝིར་གྱི་ནང་ན་གཞོན་གྱི་ནུས་ཤུགས་གོང་སྤེལ་གྱི་ལས་གཞི་སྟེ་ང་ཚོའི་ཉིན་མོ་ (We Day)ཞེས་པའི་ཐོག སི་ལི་ནཱ་ལགས་ཀྱིས་༧གོང་ས་མཆོག་གིས་མོ་ལ་སྐུ་རྩེད་གནང་གི་ཡོད་པའི་སྐུ་པར་ཞིག་ཊི་ཊིར་ཐོག་སྤེལ་ཡོད་པ་མ་ཟད། སྐུ་པར་གྱི་འགྲེལ་བཤད་ནང་བརྗོད་ལས་འདས་ཤིང་རྣམ་དཔྱོད་ལྡན་པའི་གསུང་བཤད་ཞེས་༧གོང་ས་མཆོག་ལ་བསྟོད་བསྔགས་ཞུས་ཡོད་འདུག

རྒྱ་གཞུང་གིས་༧གོང་ས་མཆོག་དང་བཙན་བྱོལ་བོད་མིར་འབྲེལ་བ་ཡོད་པར་སྙད་དེ། རྒྱལ་སྤྱིའི་ཐོག་སྙན་གྲགས་ཡོད་པའི་གློག་བརྙན་འཁྲབ་སྟོན་པ་དང་རོལ་གཞས་བ་མང་པོ་རྒྱ་ནག་ནང་ཡོང་རྒྱུར་བཀག་འགོག་བྱེད་བཞིན་ཡོད་པ་ལྟར། བོད་ནང་ལོ་བདུན་ཞེས་པའི་ཨ་རིའི་གློག་བརྙན་འཁྲབ་སྟོན་པ་གྲགས་ཅན་བྷི་ར་ཌི་ཕེ་ཐི་ (Brad Pitt )ལགས་དང་། བོད་ནང་ལོ་བདུན་ཞེས་པའི་གླུ་གཞས་གཏོང་མཁན་དབྱིན་ཇིའི་རོལ་གཞས་པ་གྲགས་ཅན་ཌཱ་ཝི་ཌི་བྷོ་བེ་(David Bowie)ལགས། དེ་བཞིན། བོད་ཅེས་པའི་གླུ་གཞས་གཏོང་མཁན་ཨེ་སི་ལན་ཌིའི་གཞས་མ་གྲགས་ཅན་ (Björk)སོགས་རྒྱ་ནག་ནང་ཡོང་དུ་འཇུག་གི་མེད་པ་དང་། འདས་ལོ་ཁོ་ནའི་ནང་༧གོང་ས་མཆོག་གི་འཁྲུངས་སྐར་ལ་རྟེན་འབྲེལ་ཞུས་པ་དང་། དེ་བཞིན་བཙན་བྱོལ་བོད་མིའི་བླ་མ་ཞིག་ལ་འབྲེལ་བ་ཡོད་པར་སྙད་དེ། ཨ་རིའི་ (Maroon 5)དང་(Bon Jovi )ཞེས་པའི་རོལ་གཞས་ཚོགས་པ་གཉིས་ཀྱི་རྒྱ་ནག་ནང་གི་གླུ་གཞས་འཁྲབ་སྟོན་ལ་རྒྱ་གཞུང་གིས་བཀག་འགོག་བྱས་ཏེ་རྩིས་མེད་གཏོང་དགོས་ཁེལ་ཡོད་པ་རེད།

གསར་འགོད་པ། པདྨ་མཚོ།