དྲག་ཆས་དམག་དཔུང་མཉམ་འབྲེལ།

རྒྱ་ནག་གཞུང་གིས་ཨ་ཧྥི་གྷ་ནེ་སི་ཐན་དང་ལྷན་དུ་དམག་རྩེད་སྦྱོར་བརྡར་དང་འཇིགས་སྐུལ་དྲག་སྤྱོད་པར་འགོག་རྒོལ་བཅས་ཀྱི་ཐད་མཉམ་འབྲེལ་བྱེད་འདོད་ཡོད་ལུགས་བརྗོད་འདུག

དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། གཟའ་ལྷག་པའི་ཉིན་རྒྱ་ནག་མི་དམངས་བཅིངས་འགྲོལ་དམག་ཁུལ་གྱི་གཙོ་འཛིན་ཧྥན་ཧྥང་ཧཱེ་ (Fang Fenghui) དང་ཨ་ཧྥི་གྷ་ནེ་སི་ཐན་གྱི་ནང་སྲིད་བློན་ཆེན་ཧ་ནེ་ཧྥི་ཨ་ཊི་མར་ (Hanif Atmar)གཉིས་ཐུག་འཕྲད་བྱས་ཏེ། རྒྱ་ནག་གཞུང་གིས་ཨ་ཧྥི་གྷ་ནེ་སི་ཐན་དང་དམག་དོན་འབྲེལ་ལམ་ཇེ་ཟབ་ཏུ་གཏོང་རྒྱུ་མ་ཟད། འཇིགས་སྐུལ་དྲག་སྤྱོད་པར་འགོག་རྒོལ་དང་དམག་རྩེད་སྦྱོང་བརྡར་སོགས་ཀྱི་ཐད་མཉམ་འབྲེལ་བྱེད་འདོད་ཡོད་ལུགས་བཤད་འདུག

ཧྥན་ཧྥང་ཧཱེ་ཡིས་ཨ་ཧྥི་གྷ་ནེ་སི་ཐན་དང་རྒྱ་ནག་གཉིས་བར་དྲག་ཆས་དམག་དཔུང་གི་འབྲེལ་ལམ་བཟང་བོ་ཡོད་ལུགས་དང་། ཕྱོགས་གཉིས་ཀྱི་དམག་དཔུང་མཉམ་འབྲེལ་གྱིས་དམག་རྩེད་སྦྱོང་བརྡར་དང་འཇིགས་སྐུལ་དྲག་སྤྱོད་པར་འགོག་རྒོལ་བཅས་ཀྱི་ཐད་རྒྱ་ནག་གཞུང་གིས་ཨ་ཧྥི་གྷ་ནེ་སི་ཐན་དང་མཉམ་འབྲེལ་བྱེད་འདོད་ཡོད་ལུགས། ད་དུང་རྒྱ་ནག་གཞུང་གིས་སྔར་བས་ཕྱོགས་གཉིས་ཀྱི་རྒྱལ་ཁབ་ཞི་བདེ་དང་བརྟན་ལྷིང་། དཔལ་འབྱོར་འཕེལ་རྒྱས་བཅས་འགན་སྲུང་བྱེད་འདོད་ཡོད་ལུགས་སོགས་བཤད་འདུག

གནས་ཚུལ་ལྟར་ན། འདས་པའི་མི་ལོ་ ༡༥ རིང་ལ་རྒྱ་ནག་གཞུང་གིས་ཨ་རི་དང་པ་ཀི་སི་ཐན་གཉིས་ལྷན་དུ་ཨ་ཧྥི་གྷ་ནེ་སི་ཐན་ནང་རྟེན་གཞི་བཟུང་བའི་ཊ་ལེ་བྷན་འཇིགས་སྐུལ་དྲག་སྤྱོད་ཚོགས་པ་ཁག་ཚར་གཅོད་བྱེད་ཕྱོགས་ཀྱི་ཞི་བདེ་གྲོས་མོལ་སྟེང་མཉམ་ཞུགས་བྱས་ཡོད་ནའང་། ཟླ་སྔོན་མར་རྒྱ་ནག་གི་དྲག་ཆས་དམག་དཔུང་ཨ་རི་དང་པ་ཀི་སི་ཐན་མཉམ་འབྲེལ་དམག་དཔུང་ནང་མཉམ་ཞུགས་བྱས་མེད་པ་དང་། ཕྱི་ལོ་ ༢༠༡༤ ལོའི་ལོ་མཇུག་ནས་ཨ་ཧྥི་གྷ་ནེ་སི་ཐན་ནང་རྟེན་གཞི་བྱེད་པའི་ཨ་རིའི་དམག་དཔུང་ཕྱིར་འཐེན་བྱས་ཡོད་པ་དང་། རྒྱ་ནག་གཞུང་གིས་ཨ་རིའི་དམག་དཔུང་ཕྱིར་འཐེན་བྱས་པ་དེ་ནི་ཨ་ཧྥི་གྷ་ནེ་སི་ཐན་རྒྱལ་ནང་གི་ཟིང་འཁྲུག་ཞོད་འཇགས་ཡོང་ཐབས་ཤིག་མིན་ལུགས་བཤད་དེ། ཨ་ཧྥི་གྷ་ནེ་སི་ཐན་གྱི་རྒྱལ་ཁབ་བསྐྱར་གསོ་ཡོང་ཐབས་སུ་ཕྱོགས་གཉིས་བར་ཚོང་འབྲེལ་བྱེད་རྒྱུ་ཁག་ཐག་བྱས་ཡོད་པ་རེད།

འདས་པའི་ལོ་ངོ་འདི་དག་རིང་རྒྱ་ནག་གཞུང་གིས་ཤིན་ཅང་ཡུ་གུར་མི་རིགས་ས་ཁུལ་དུ་འབྱུང་བཞིན་པའི་ཟིང་འཁྲུག་ཐད་ཨ་ཧྥི་གྷ་ནེ་སི་ཐན་དང་པ་ཀི་སི་ཐན། དེ་བཞིན། ཨེ་ཤེ་ཡའི་དབུས་ཁུལ་བཅས་ཀྱི་ཁ་ཆེ་འཇིགས་སྐུལ་དྲག་སྤྱོད་པའི་རམ་འདེགས་སྲིད་པར་དོགས་གཞི་བྱེད་ཀྱི་ཡོད་ནའང་། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་གིས་ཤིན་ཅང་ཡུ་གུར་མི་རིགས་ས་ཁུལ་དུ་འབྱུང་བཞིན་པའི་ཟིང་འཁྲུག་དེ་ནི་རྒྱ་ནག་གཞུང་གིས་གྲངས་ཉུང་མི་རིགས་ས་ཁུལ་གྱི་ཆོས་ལུགས་རིག་གནས་ཀྱི་བྱེད་སྒོ་ཁག་ལ་དམ་དྲག་ཤུགས་ཆེན་བྱས་པའི་རྐྱེན་གྱིས་ཡིན་སྐོར་བརྗོད་འདུག

 གསར་འགོད་པ། པདྨ་རྒྱལ།