རྒྱ་ནག་སྤྱི་མང་བདེ་འཇགས་ལྷན་ཁང་གིས་ཐའེ་ཝན་གྱི་ཡུལ་མི་ ༤༥ རྒྱལ་ཁབ་ཀྱི་གློག་འཕྲིན་སྐུལ་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱས་པའི་དོགས་གཞིའི་འོག་ཁྲིམས་བཤེར་བྱ་རྒྱུ་ཡིན་ལུགས་བཤད་འདུག
དེ་རིང་ཧྥ་རན་སིའི་གསར་ཁང་ (AFP) གིས་གནས་ཚུལ་སྤེལ་བ་ལྟར་ན། ཨ་ཧྥི་རི་ཁའི་རྒྱལ་ཁབ་ཁིན་ཡ་ (Kenya) ཉེན་རྟོག་ཁང་གིས་དེ་སྔོན་རྒྱ་ནག་གི་གློག་འཕྲིན་སྐུད་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱས་པའི་དོགས་གཞིའི་འོག་མི་ ༦༧ འཇུ་བཟུང་བཀག་བསྐྱིལ་བྱས་ཡོད་པ་ཟླ་འདིའི་ཕྱི་ཚེས་ ༢༠ ཉིན་ཕྱིར་རྒྱ་ནག་གཞུང་ལ་རྩིས་སྤྲོད་བྱས་ཡོད་པ་དང་། རྒྱ་གཞུང་གིས་དོགས་ཡོད་མི་སྣ་དེ་ཚོའི་གྲས་ཀྱི་ཐའེ་ཝན་གྱི་ཡུལ་མི་ ༤༥ ཕྱིར་ཐའེ་ཝན་ནང་འགྲོ་རུ་མ་བཅུར་པར་ཁོ་ཚོ་རྒྱ་ནག་གི་གློག་འཕྲིན་སྐུད་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱེད་པའི་ཚོགས་པ་ཞིག་དང་འབྲེལ་བ་ཡོད་པའི་དོགས་གཞིའི་ཐོག་ནས་བཀག་བསྐྱིལ་དང་ཁྲིམས་བཤེར་བྱ་རྒྱུ་ཡིན་ལུགས་བཤད་སྟབས། གནས་ཚུལ་དེའི་ཐད་ཐའེ་ཝན་གཞུང་གིས་པེ་ཅིན་གཞུང་གིས་ཐའེ་ཝན་གྱི་ཡུལ་མི་ཚོ་བཀག་བསྐྱིལ་དང་ཞིབ་བཤེར་བྱེད་པ་དེ་ནི་ཐའེ་ཝན་མི་མང་ལ་དམའ་འབེབས་བྱས་པ་ཞིག་ཡིན་སྐོར་བརྗོད་ཡོད་པ་མ་ཟད། ཐའེ་ཝན་མཚོ་འགག་གི་སྐུ་ཚབ་ཅིག་པེ་ཅིན་དུ་མངགས་ཏེ་རྒྱ་ནག་གི་ཉེན་རྟོག་པ་དང་གྲོས་མོལ་བྱེད་ཀྱི་ཡོད་འདུག
རྒྱ་ནག་སྤྱི་དམངས་བདེ་འཇགས་ལྷན་ཁང་གི་ཞིབ་བཤེར་བ་ཁྲུན་ཧྲི་ཆུའུ་ (Chen Shiqu) ཟེར་བ་ཞིག་གིས། ཐའེ་ཝན་གྱི་ཡུལ་མི་ ༤༥ ཡིས་སོ་སོའི་ནག་ཉེས་ཁས་ལེན་བྱས་ཡོད་ལུགས་དང་། ཁོ་ཚོས་རྒྱ་ནག་སྐམ་ས་ཆེན་མོའི་མི་མང་དམིགས་འབེན་དུ་བཟུང་སྟེ་རྒྱ་ནག་སྐམ་ས་ཆེན་མོར་གནོད་འཚེ་བཟོས་ཡོད་ལུགས། ཉེས་ཅན་པ་དེ་ཚོའི་གྲས་ཀྱི་མང་པོ་ཞིག་རྒྱ་ནག་སྐམ་ས་རང་གི་ཡུལ་མི་ཡིན་སྟབས། ཁོ་ཚོར་ཡང་རྒྱ་ནག་སྐམ་ས་ཆེན་མོའི་རྩ་ཁྲིམས་གཞིར་བཟུང་ཐོག་ཐའེ་ཝན་གྱི་ཡུལ་མི་དང་གཅིག་མཚུངས་ཀྱི་ཁྲིམས་བཤེར་བྱ་རྒྱུ་ཡིན་ལུགས་སོགས་བཤད་འདུག
ཐའེ་ཝན་ནང་རྒྱ་ནག་དོན་གཅོད་ཁང་གི་དཔོན་རིགས་ཨན་ཌི་རའོ་ཧ་ཤེ་ཡ་ (Andrew Hsia) ཟེར་བ་ཞིག་གིས། ཐའེ་ཝན་མཚོ་འགག་གིས་རྒྱ་ནག་གི་གློག་འཕྲིན་སྐུད་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱས་པའི་དོགས་ཡོད་མི་སྣ་ཚོར་ཁིན་ཡ་ཉེན་རྟོག་ཁང་གིས་ཞིབ་བཤེར་བྱས་ཏེ་ནག་ཉེས་མེད་པ་ར་སྤྲོད་བྱུང་ནའང་། པེ་ཅིན་གཞུང་གིས་དེ་དོན་སྣང་མེད་ལ་བཏང་ཡོད་སྐོར་དང་། ཐའེ་ཝན་མཚོ་འགག་གི་དཔོན་རིགས་ཚོས་རྒྱ་ནག་ནང་སྐུ་ཚབ་མངགས་ཏེ་ཉིན་གསུམ་རིང་གནད་དོན་འདིའི་ཐད་གྲོས་མོལ་ཡོང་བའི་རེ་བ་ཡོད་སྐོར། དེ་བཞིན། ཁིན་ཡ་སྲིད་གཞུང་གི་དཔོན་རིགས་ཚོས་ཁྲིམས་སྲོལ་ལ་བརྩི་འཇོག་མ་བྱས་པར་ཐའེ་ཝན་གྱི་ཡུལ་མི་འཇུ་བཟུང་བཀག་བསྐྱིལ་བྱས་པ་མ་ཟད། སྒེར་ཐོག་ནས་རྒྱ་ནག་སྐམ་ས་ཆེན་མོར་འབྲེལ་གཏུག་བྱས་ཏེ་དོགས་ཡོད་མི་སྣ་ཚོ་ཐད་ཀར་རྒྱ་ནག་གཞུང་ལ་རྩིས་བྱེད་དུ་བཅུག་ཡོད་སྐོར་སོགས་བརྗོད་འདུག
གནས་ཚུལ་ལྟར་ན། རྒྱ་ནག་སྤྱི་མང་བདེ་འཇགས་ལྷན་ཁང་ཟེར་བ་དེས། རྒྱ་ནག་སྐམ་ས་ཆེན་མོར་གནད་དོན་འདིའི་ཐད་ཁྲིམས་བཤེར་བྱ་བའི་དབང་ཆ་ཡོད་ལུགས་དང་། རྒྱ་ནག་གི་གློག་འཕྲིན་སྐུད་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱས་པའི་རྐྱེན་གྱིས་ལོ་རེར་རྒྱ་ནག་དབུས་གཞུང་དང་ཉེན་རྟོག་ཁང་། མི་མང་དངུལ་ཁང་དང་ཉེན་སྲུང་མ་འཇོག་ཚོང་གཉེར་ཁང་སོགས་ཀྱི་དངུལ་ལོ་བརྒྱུད་གཏོང་དང་མི་སྒེར་གྱི་གསང་བའི་ཡིག་ཚགས་མང་པོ་རྐུན་ལ་ཤོར་བའི་གྲངས་འབོར་དམངས་སྒོར་ཐེར་འབུམ་ ༡༠ ཙམ་ཟིན་ཡོད་ལུགས་བཤད་འདུག
ཕྱི་ལོ་ ༡༩༤༩ ལོ་ནས་བཟུང་ཐའེ་ཝན་མཚོ་འགག་དེ་རང་སྲིང་རང་སྐྱོང་གི་ཚུལ་དུ་འཚོ་ཞིང་གནས་ནའང་། རྒྱ་ནག་གཞུང་གིས་ནམ་རྒྱུན་ཐའེ་ཝན་མཚོ་འགག་དེ་བཞིན་རྒྱ་ནག་གི་ཞིང་ཆེན་ཞིག་ཡིན་ལུགས་ནན་བཤད་བྱེད་ཀྱི་ཡོད་པ་དང་། སྲིད་དོན་དབྱེ་ཞིབ་པ་ཁ་ཅིག་གིས་རྒྱ་ནག་གཞུང་གོམ་གང་མདུན་སྤོས་ཀྱིས་ན་ནིང་ཕྱི་ཟླ་ ༥ བའི་ནང་ཚུགས་པའི་ཐའེ་ཝན་མཚོ་འགག་གི་སྲིད་འཛིན་འོས་འདེམས་སྐབས་སུ། ད་ལྟ་ཐའེ་ཝན་མཚོ་འགག་གི་སྲིད་འཛིན་དུ་གྱུར་བའི་ལྕམ་ཚའེ་ཡེན་ཝན་ལ་དངོས་ཤུགས་བརྒྱུད་གསུམ་ནས་གནོན་ཤུགས་སྤྲད་དོན། པེ་ཅིན་སྲིད་གཞུང་ལྕམ་ཚའེ་ཡེན་ཝན་གྱི་ལོ་རྒྱུས་རིང་བཞིན་ལྡན་པའི་ཐའེ་ཝན་རང་བཙན་ལངས་ཕྱོགས་ལ་དོགས་གཞི་ཡོད་པས་ཡིན་སྐོར་བརྗོད་འདུག
གསར་འགོད་པ། པདྨ་རྒྱལ།
