ད་ལྟའི་ཆར་བོད་ཁུལ་དུ་ཉུང་མཐར་དམངས་སྤྱོད་དང་དམག་དོན་ཆེད་སྤྱོད་གནམ་ཐང་ ༡༧ ཡོད་འདུག
མགོ་ལོག་རྨ་ཆེན་རྫོང་དམངས་སྤྱོད་གནམ་གྲུ་འབབ་ཐང་ལེགས་འགྲུབ་བྱུང་སྟེ། དེ་རིང་བོད་ནང་གི་ཞོགས་པའི་ཆུ་ཚོད་ ༩།༥༧ ཐོག རྒྱ་ནག་ཤར་ཕྱོགས་མཁའ་འགྲུལ་ཁང་གི་འགྲུལ་སྐྱེལ་གནམ་གྲུ་ A319 རྟགས་ཅན་ཞིག་གིས་ཚོད་ལྟའི་ཚུལ་དུ་ཐོག་མར་འཕུར་སྐྱོད་བྱས་ཡོད་པ་དང་། འདི་ལོའི་ཕྱི་ཟླ་ ༧ ཚེས་ ༡ ཉིན་ནས་དངོས་སུ་འགྲུལ་བ་སྐྱེལ་འདྲེན་བྱ་རྒྱུ་ཡིན་འདུག
དམངས་སྤྱོད་གནམ་གྲུ་འབབ་ཐང་དེ་རྨ་ཆེན་རྫོང་རྟ་བོ་གྲོང་རྡལ་དུ་ཡོད་པ་དང་། ཕྱི་ལོ་ ༢༠༠༨ ལོར་འཛུགས་སྐྲུན་གྱི་ལས་གཞི་མགོ་བརྩམས་ཤིང་། ཁྱོན་རྒྱ་སྒོར་དུང་ཕྱུར་ ༡༡ ལྷག་བཏང་ཡོད་འདུག འདི་ལོའི་ཕྱི་ཟླ་ ༨ པའི་ནང་ལས་གཞི་ཡོངས་སུ་མཇུག་བསྡུ་རྒྱུ་ཡིན་ལ། ཕྱི་ལོ་ ༢༠༢༠ བར་ཁྱོན་འགྲུལ་བ་ཁྲི་ ༨ དང་། དངོས་ཟོག་ཏུན་ ༢༠༠ སྐྱེལ་འདྲེན་བྱེད་ཐུབ་པའི་དམིགས་འབེན་བཟུང་ཡོད་འདུག
རྒྱ་ནག་གཞུང་ཕྱོགས་ནས་བསྒྲགས་པ་ལྟར་ན། ཕྱི་ལོ་ ༢༠༡༦ ནས་ ༢༠༢༠ བར་ཁྱོན་གནམ་གྲུ་འབབ་ཐང་ ༥༠ གསར་དུ་བརྒྱབ་སྟེ། རྒྱལ་ཡོངས་ཀྱི་གནམ་གྲུ་འབབ་ཐང་གི་གྲངས་འབོར་ ༢༦༠ ལས་བརྒལ་རྒྱུ་ཡིན་ལ། ད་ལྟའི་ཆར་བོད་ཁུལ་དུ་ཉུང་མཐར་དམངས་སྤྱོད་དང་དམག་དོན་ཆེད་སྤྱོད་གནམ་ཐང་ ༡༧ ཡོད་འདུག
གསར་འགོད་པ། པདྨ་མཚོ།
