པཎ་ཆེན་སྐུ་ཕྲེང་བཅུ་གཅིག་པའི་འཁྲུངས་སྐར་དགའ་སྤྲོའི་ངང་བསུ་བཞིན་ཡོད།

དེ་རིང་བཞུགས་སྒར་དྷ་རམ་ས་ལ་གཙོས་པའི་བཙན་བྱོལ་བོད་མིའི་ས་གནས་ཁག་ཏུ་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་དགུང་གྲངས་ཉེར་བདུན་བཞེས་པའི་སྐུའི་འཁྲུངས་སྐར་སྲུང་གཙི་ཞུ་བཞིན་ཡོད་པ་རེད།

དེ་རིང་ནི་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་སྐུ་བལྟམས་ཏེ་མི་ལོ་ ༢༧ འཁོར་བའི་འཁྲུངས་སྐར་དུས་ཆེན་ཡིན་པ་ལྟར། སྔ་དྲོ་ཆུ་ཚོད་ ༩།༣༠ སྟེང་དྷ་ས་མག་གྷན་སྲང་མདོ་རུ་ས་གནས་གཞོན་ལྷན་དང་ས་གནས་བུད་མེད་ལྷན་ཚོགས་གཉིས་ཀྱི་གོ་སྒྲིག་འོག ༧པཎ་ཆེན་ཆུང་སྲིད་རིན་པོ་ཆེ་མཆོག་གི་འཁྲུངས་སྐར་དུས་ཆེན་སྲུང་གཙི་གནང་སྟེ། ༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱའི་བཙོན་འོག་ནས་མྱུར་དུ་ཀློད་གྲོལ་ཡོངས་ཐབས་སུ་མང་ཚོགས་ལ་རྒྱབ་སྐྱོར་མཚན་རྟགས་བསྡུ་རུབ་དང་མར་མེ་མཆོད་འབུལ། དེ་བཞིན། རྒྱ་གཞུང་གིས་༧ཀུན་གཟིགས་པཎ་ཆེན་མཆོག་མྱུར་དུ་ཀློད་གྲོལ་ཡོང་བའི་འབོད་སྐུལ་བསྒྲགས་གཏམ་སོགས་སྤེལ་སོང་།

དྷ་ས་ས་གནས་བུད་མེད་གཙོ་ཨ་ཅག་གཡང་ལགས་ཀྱིས། དེ་རིང་ཕྱི་ཟླ་ ༤ བའི་ཚེས་ ༢༥ ཉིན་མོ་འདིར་༧ཀུན་གཟིགས་པཎ་ཆེན་རིན་པོ་ཆེ་མཆོག་སྐུ་འཁྲུངས་པའི་ཉིན་མོ་ཡིན་སྟབས། ང་ཚོ་ས་གནས་གཞོན་ལྷན་དང་ས་གནས་བུད་མེད་ལྷན་ཚོགས་གཉིས་མཉམ་རུབ་བྱས་ཏེ་༧པཎ་ཆེན་རིན་པོ་ཆེའི་འཁྲུངས་སྐར་དུས་ཆེན་སྲུང་གཙི་ཞུ་ཡི་ཡོད། དེ་རིང་ང་ཚོས་འདིར་ཕྱི་ལུགས་ཀྱི་ཐོག་ནས་འཁྲུངས་སྐར་སྒོང་བསྲེས་བག་ལེབ་ (Birthday Cake) དང་ནང་ལུགས་ཀྱི་ཐོག་ནས་འབྲས་སིལ་སོགས་ཕུལ་ཏེ་༧པཎ་ཆེན་རིན་པོ་ཆེའི་འཁྲུངས་སྐར་སྲུང་གཙི་གནང་གི་ཡོད་ལ། རྒྱ་ནག་གཞུང་གིས་༧པན་ཆེན་རིན་པོ་ད་སྐབས་གང་དུ་བཞུགས་ཡོད་མེད་གསལ་བཤད་བྱེད་ཀྱི་ཡོད་པ་མ་རེད། ང་ཚོ་དང་འཛམ་གླིང་མི་མང་གིས་༧པཎ་ཆེན་རིན་པོ་ཆེ་མཆོག་འཚོ་བཞུགས་ཡིན་མིན་དང་། ས་ཆ་གང་དུ་བཞུགས་ཡོད་མེད་ཤེས་འདོད་ཆེན་པོ་ཡོད། ཡིན་ནའང་རྒྱ་དམར་གཞུང་གིས་༧པཎ་ཆེན་རིན་པོ་ཆེ་མཆོག་སྦས་སྐུང་བྱས་ནས་བཤད་ཀྱི་མེད་སྟབས། ང་ཚོས་རྒྱ་གཞུང་གིས་༧པཎ་ཆེན་མཆོག་གང་དུ་འཚོ་བཞུགས་བྱས་ཡོད་མེད་ཀྱི་གནས་ཚུལ་གསལ་བཤད་གནང་རོགས་ཞེས་རེ་སྐུལ་ཞུ་བཞིན་ཡོད། ཅེས་བརྗོད་སོང་།

ས་གནས་གཞོན་ལྷན་ཚོགས་གཙོ་དབང་ལྡན་སྐྱབས་ལགས་ཀྱིས། དེ་རིང་ཀུན་གཟིགས་པཎ་ཆེན་རིན་པོ་ཆེ་མཆོག་རྒྱ་ནག་གིས་བཙན་ཁྲིད་བྱས་རྗེས་ཀྱི་འཁྲུངས་སྐར་ཐེངས་ ༢༠ པ་དེ་ཆགས་ཡོད། ང་ཚོས་ཁོང་གི་འཁྲུངས་སྐར་སྲུང་གཙི་བྱེད་དགོས་པ་དེ་གཅིག་ནས་པཎ་ཆེན་རིན་པོ་ཆེ་མཆོག་གི་སྐུ་གོང་མ་དེ་ཚོར་ང་ཚོས་རྗེས་དྲན་ཞུ་ཡ་དང་། དམིགས་བསལ་དེ་ལྟའི་ཆུང་སྲིད་རིན་པོ་ཆེ་མཆོག་དགུང་ལོ་དྲུག་གི་སྟེང་ནས་རྒྱ་གཞུང་གིས་བཙན་ཁྲིད་བྱས་པ་དེའི་སྒང་ལ་ང་ཚོ་ཕྱི་སྡོད་བོད་མི་ཚོས་གདུང་སེམས་མཉམ་སྐྱེད་དང་། དངོས་སུ་ཁོང་ལ་མཇལ་ཐུབ་མ་ཐུབ་དེ་འདྲར་མ་བལྟས་པར་ག་དུས་ཡིན་ཡང་ང་ཚོ་ཁོང་དང་མཉམ་དུ་ཡོད་པའི་བརྡ་ལེན་སྤྲོད་བཞིན་ཡོད། འཁྲུངས་སྐར་སྲུང་གཙི་འདི་ཆབ་སྲིད་དང་འབྲེལ་བ་མེད་པའི་སྒོ་ནས་ནམ་རྒྱུན་ཕྱི་རྒྱལ་རང་གི་འགྲོ་སྟངས་ཀྱི་ཐོག་ནས་གོ་སྒྲིག་ཞུ་བཞིན་ཡོད། ད་ལྟ་ཆུ་ཚོད་ ༡༠།༣༠ སྟེང་བོད་ལུགས་ལྟར་མར་མེ་མཆོད་འབུལ་ཞུ་རྒྱུ་དང་རྒྱལ་སྤྱིའི་འགྲོ་སྟངས་ཀྱི་ཐོག་ནས་འཁྲུངས་སྐར་བག་ལེབ་ (Birthday Cake) སོགས་གོ་སྒྲིག་ཞུས་ཏེ། རྒྱ་ཆེའི་སེར་སྐྱ་མང་ཚོགས་ལ་འབུལ་རྒྱུ་དང་༧པཎ་ཆེན་རིན་པོ་ཆེ་ཁོང་གི་གནས་ཚུལ་འགྲེལ་བརྗོད་སོགས་གོ་སྒྲིག་ཞུ་བཞིན་ཡོད། ཅེས་བརྗོད་སོང་།

དེའི་རྗེས་དབུས་མེད་བུད་ལྷན་ཚོགས་ཀྱི་ཚོགས་གཙོ་ཨ་ཅག་གཡང་སྒྲོན་ལགས་ཀྱིས། ང་ཚོས་༧པཎ་ཆེན་རིན་པོ་ཆེ་ཁོང་རྒྱ་ནག་གི་བཙན་ཁྲིད་འོག་བརླགས་པའི་ངོས་འཛིན་ཞུ་ཡི་མེད། ད་རེབ་ང་ཚོས་ཁོང་གི་འཁྲུངས་སྐར་སྲུང་གཙི་དང་ལས་འགུལ་སྤེལ་བ་དེ་ཁོང་ང་ཚོ་དང་མཉམ་དུ་ཡོད་པ་གཞིར་བཟུང་གིས་ས་གནས་སོ་སོ་ནས་དགའ་དགའ་སྐྱིད་སྐྱིད་ཀྱི་ཐོག་ནས་རྟེན་འབྲེལ་ཞུ་རོགས་གནང་ཞེས་འབོད་སྐུལ་ཞུ་བཞིན་ཡོད། མ་འོངས་པར་ང་ཚོས་མུ་མཐུད་ལས་འགུལ་སྤེལ་རྒྱུ་ཡིན་པ་དང་། ཁོང་མགྱོགས་ནས་མྱུར་དུ་རྒྱ་དམར་གྱི་བཙོན་འོག་ནས་ཐར་བའི་རེ་བ་དང་སྨོན་ལམ་ཡོད། ཅེས་བརྗོད་སོང་།

བོད་ཀྱི་བུད་མེད་ལྷན་ཚོགས་ནས་གསར་འགོད་གསལ་བསྒྲགས་ཤིག་སྤེལ་བའི་ནང་། ༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་ཕྱི་ལོ་ ༡༩༩༥ ལོའི་ཕྱི་ཟླ་ ༥ བའི་ཚེས་ ༡༤ ཉིན་༧རྒྱལ་མཆོག་སྐུ་ཕྲེང་བཅུ་བཞི་བ་མཆོག་ནས་ ༡༩༩༥ ལོའི་ཕྱི་ཟླ་ ༡ པོའི་ཚེས་ ༢༨ ཉིན་སྐུ་གཤེགས་པའི་༧པཎ་ཆེན་སྐུ་ཕྲེང་བཅུ་བའི་ཡང་སྲིད་འཁྲུལ་བྲལ་དུ་ངོས་འཛིན་གནང་བའི་སྐབས་དེར་ཁོང་དགུང་ལོ་དྲུག་ལ་ཕེབས་ཡོད། ཁོང་ངོས་འཛིན་གནང་ནས་ཉིན་གསུམ་གྱི་རྗེས་སུ་རྒྱ་གཞུང་གི་དབང་འཛིན་པས་ཁོང་ནང་མི་དང་བཅས་པ་བཙན་འཁྲིད་བྱས་པ་དང་། དེ་ནས་ཟླ་བ་ ༦ ནང་ཚུད་ལ་རྒྱ་ནག་གཞུང་གིས་མིང་ལ་རྒྱལ་མཚན་ནོར་བུ་ཞེས་པའི་བྱིས་པ་གཞན་ཞིག་༧པཎ་ཆེན་སྐུ་ཕྲེང་བཅུ་གཅིག་པར་ངོས་འཛིན་བྱས་པ་རེད། བོད་མི་རྣམས་དང་མཁས་པ་མང་པོ་ཞིག་གིས་དེ་ནི་རྒྱ་གཞུང་གིས་ཆིག་སྒྲིལ་ལྡན་པའི་བོད་མི་ནང་ཁུལ་སྔར་ལས་ཀྱང་ལྷིང་འཇགས་དང་ཆིག་སྒྲིལ་མེད་པ་བཟོ་རྒྱུའི་ཐབས་ཇུས་ཤིག་དང་། དེ་བརྒྱུད་ནས་༧གོང་ས་སྐྱབས་མགོན་ཆེན་པོ་མཆོག་གི་ཤུགས་རྐྱེན་གཅོག་ཐབས་བྱེད་རྒྱུའི་རེ་ངན་བཅངས་ཡོད་པར་ཡིད་ཆེས་བྱེད་ཀྱི་ཡོད། བོད་མིའི་ལུགས་སྲོལ་གཞིར་བཟུང་བྱས་ན་༧པཎ་ཆེན་རིན་པོ་ཆེ་མཆོག་ནི་༧རྒྱལ་མཆོག་སྐུ་ཕྲེང་རིམ་བྱོན་གྱི་ཡང་སྲིད་ངོས་འཛིན་གནང་མཁན་གཅིག་པུ་དེ་ཡིན་སྟབས་ཁོང་བོད་མི་ཚོ་ལ་མཚོན་ན་ཧ་ཅང་གལ་གནད་ཆེན་པོ་ཆགས་ཡོད། ཅེས་འཁོད་འདུག

གསལ་བསྒྲགས་དེའི་ནང་ད་དུང་། འདི་ལོར་བོད་ཀྱི་བུད་མེད་ལྷན་ཚོགས་ཀྱི་གཙོས་པའི་འཛམ་གླིང་གང་སར་ཡོད་པའི་ས་གནས་ཡན་ལག་ ༥༦ སྤྱི་ཡོངས་ཀྱིས་༧པཎ་ཆེན་སྐུ་ཕྲེང་བཅུ་གཅིག་པ་མཆོག་ལ་དམིགས་བསལ་གྱིས་གསོལ་འདེབས་སྨོན་ལམ་དང་འཚམས་འདྲི་བཀྲ་ཤིས་བདེ་ལེགས་ཞུས་པའི་ཐོག་ནས་ཉིན་མོ་འདི་སྲུང་གཙི་ཞུ་རྒྱུ་ཡིན་ལ། ཁོང་གི་འཁྲུངས་སྐར་ཉིན་ང་ཚོས་དམིགས་བསལ་གྱིས་ཞབས་བྲོ་དང་ཞལ་ཏོག་འབུལ་བ་སོགས་ཀྱི་ལས་རིམ་ཁག་ཅིག་གོ་སྒྲིག་ཞུས་ནས་དགའ་སྐྱིད་བྱེད་ཀྱི་ཡིན། དུས་དྲན་འདི་སྲུང་བརྩི་བྱ་བའི་རྒྱུ་མཚན་ནི་ང་ཚོས་༧པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་གསེར་ཞལ་འཚོ་བཞུགས་ཡིན་པ་དང་ཁོང་ལ་མགྱོགས་མྱུར་དུ་རང་དབང་འཐོབ་ཐུབ་པའི་རེ་སྨོན་མཚོན་པའི་ཆེད་དུ་ཡིན། ཞེས་སོགས་འཁོད་འདུག

གཞན། ས་གནས་གཞོན་ལྷན་ནས་གསར་འགོད་གསལ་བསྒྲགས་ཤིག་སྤེལ་བའི་ནང་། སྐུ་ཉིད་རྒྱ་ནག་དམར་པོའི་སྲིད་གཞུང་གིས་བཙན་ཁྲིད་བྱས་པ་ནས་ང་ཚོ་བོད་མི་ཚོའི་སེམས་ཁུངས་ནས་ཁྱེད་རང་དྲན་བཞིན་ཉིན་མོ་འཁྱོལ་དཀའ་ཞིང་མཚན་མོ་གཉིད་མེད་པའི་སྐྱོ་གདུང་གི་ནང་ལྷག་ཡོད། ང་ཚོ་དེ་རིང་མཉམ་འཛོམ་ཐོག དགའ་དགའ་སྤྲོ་སྤྲོ་ཡི་དུས་ཆེན་སྲུང་གཙི་བྱེད་རྒྱུ་ལས། རང་གི་ལུང་པ་འདི་ནས་སྐུ་ཉིད་ཀྱི་ཚབ་བྱས་ཏེ་མང་ཚོགས་ལ་འཁྲུངས་སྐར་སྒོང་བསྲེས་བག་ལེབ་ (Birdthday Cake) འགྲེམས་བཞིན། སྐར་ཆ་རེ་རེ་བཞིན་ང་ཚོ་སྐུ་ཉིད་དང་ལྷན་དུ་ཡོད་ཅིང་སྐུ་ཉིད་ལ་ལུས་ངག་ཡིད་གསུམ་ནས་དགའ་གུས་གདུང་སེམས་མཉམ་སྐྱེད་བྱེད་བཞིན་ཁྱེད་ཀྱི་འཁྲུངས་སྐར་བསུ་བཞིན་ཡོད། ཅེས་འཁོད་འདུག

གསར་འགོད་པ། པདྨ་རྒྱལ།