ཡུ་གུར་དམངས་གཙོ་དོན་གཉེར་བ་རྒྱ་གར་ནང་བསྐྱོད་པའི་ཐོངས་མཆན་ཕྱིར་འཐེན།

རྒྱ་ནག་གཞུང་གི་གནོན་ཤུགས་འོག་རྒྱ་གར་གཞུང་གིས་འཛམ་གླིང་ཡུ་གུར་ལྷན་ཚོགས་ཀྱི་ཚོགས་གཙོ་སྐུ་ཞབས་ཨེ་ས་ལགས་ཉིན་གསུམ་རིང་གི་བགྲོ་གླེང་ལ་མཉམ་ཞུགས་བྱེད་པའི་ཐོངས་མཆན་ཕྱིར་འཐེན་བྱས་འདུག

དེ་རིང་ནེའུ་ཡོག་དུས་གསར་ཁང་གིས་གནས་ཚུལ་སྤེལ་བ་ལྟར་ན། རེས་གཟའ་ཟླ་བའི་ཉིན་རྒྱ་ནག་གཞུང་གིས་འཛམ་གླིང་ཡུ་གུར་ལྷན་ཚོགས་ཀྱི་ཚོགས་གཙོ་དང་ཡུ་གུར་མི་རིགས་ཀྱི་དམངས་གཙོ་དོན་གཉེར་བ་སྐུ་ཞབས་ཨེ་ས་ལགས་བོད་མིའི་སྐྱབས་མགོན་༧གོང་ས་མཆོག་ལ་ཐུག་འཕྲད་མི་ཆོག་པ་དང་། རྒྱ་གར་གཞུང་ནས་ཁོ་རྒྱ་གར་ཧི་མ་ཅལ་གྲོང་སྡེ་དྷ་རམ་ས་ལར་འཚོགས་འཆར་ཡོད་པའི་ཉིན་གསུམ་རིང་གི་བགྲོ་གླེང་ཚོགས་འདུའི་སྟེང་མཉམ་ཞུགས་བྱ་བར་ཐོངས་མཆན་སྤྲད་པ་ཕྱིར་འཐེན་བྱེད་དགོས་པའི་འབོད་སྐུལ་བཏང་ཡོད་འདུག

འཇར་མན་རྒྱལ་ནང་དུ་གནས་སྡོད་མཁན“འཛམ་གླིང་ཡུ་གུར་ལྷན་ཚོགས” (WUC) ཀྱི་ཚོགས་གཙོ་ཌོལ་ཀུན་ཨེ་ས་ (Dolkun Isa) ལགས་ཀྱིས། རྒྱ་གར་གཞུང་ལ་དཀའ་ཁག་ཡོད་པ་ངས་གསལ་བོར་ཤེས་རྟོགས་བྱུང་ཡོད། བདག་གི་འགྲུལ་བཞུད་ཀྱི་དོན་དག་ལ་བརྟེན་ནས་ཁྲིམས་མེད་ལུགས་མེད་ཀྱི་རྩོད་རྙོག་འདི་འདྲ་ཞིག་བསླངས་པར་ང་རང་བློ་འགྱོད་སྐྱེས་ཡོད་སྐོར་བརྗོད་འདུག

རྒྱ་ནག་ནང་འགྲོ་བ་མིའི་ཐོབ་ཐང་ལྟ་ཞིབ་ཚན་པའི་འགན་འཛིན་སོ་ཧྥེ་རེ་ཆར་ཌི་སོན་ (Sophie Richardson) གྱིས། རྒྱ་ནག་གི་མགོ་ཁྲིད་ཚོས་པེ་ཅིན་གཞུང་གིས་ཕྱི་མིའི་ཐུག་འཕྲད་དང་ཕྱི་མི་རྒྱ་ནང་དུ་ཡོང་བར་འགོག་རྒོལ་གྱི་གནོན་ཤུགས་སྤྲོད་པར་མོས་མཐུན་བྱེད་ཀྱི་འདུག འདི་ནི་སུ་གང་གིས་ཀྱིས་བཅོས་ཐབས་མེད་ཅིང་བློ་ངོར་མི་ཤོང་བའི་གནས་ཚུལ་ཞིག་སྟེ། རྒྱ་ནག་སྲིད་གཞུང་གིས་རྒྱལ་དོན་གཞན་དག་ཅི་ལྟར་ཐག་གཅོད་བྱ་རྒྱུ་ཡིན་ནམ། ཁོ་ཚོ་དུས་ཡུན་རིང་བོའི་བྱས་ཉེས་ལ་ཞེད་ཀྱི་མེད་པ་ཡིན་ནམ། ཞེས་སོགས་བརྗོད་འདུག

གནས་ཚུལ་ལྟར་ན། ཡུ་གུར་དམངས་གཙོ་དོན་གཉེར་བ་དང་འཛམ་གླིང་ཡུ་གུར་ལྷན་ཚོགས་ཀྱི་ཚོགས་གཙོ་ཨེ་ས་ལགས་བདུན་ཕྲག་འདིའི་ནང་རྒྱ་གར་ཧི་མ་ཅལ་གྲོང་སྡེ་དྷ་རམ་ས་ལར་འཚོགས་འཆར་ཡོད་པའི་ཉིན་གསུམ་རིང་གི་བགྲོ་གླེང་ཚོགས་འདུའི་སྟེང་མཉམ་ཞུགས་གནང་རྩིས་ཡོད་པ་དང་། རྒྱ་གར་གྱི་དཔོན་རིགས་ཚོས་ཀྱང་ཁོ་ལ་ཐོངས་མཆན་སྤྲད་ཡོད་ནའང་། རྒྱ་ནག་གཞུང་གིས་སྔ་རྗེས་སུ་གནོན་ཤུགས་དང་ཛ་དྲག་གི་འབོད་སྐུལ་བྱས་པའི་རྐྱེན་པས། རྒྱ་གར་གཞུང་ནས་ཁོང་གི་འགྲུལ་བསྐྱོད་ཐོངས་མཆན་ཕྱིར་འཐེན་བྱེད་དགོས་བྱུང་ཡོད་འདུག

སྐུ་ཞུབས་ཨེ་ས་ལགས་ནི་ད་ལོར་ལོ་ ༤༨ ཡིན་པ་དང་འཇར་མན་རྒྱལ་ནང་གནས་སྡོད་བྱས་ཡོད་ཅིང་། ཁོ་འཇར་མན་ལྷོ་ཤར་མུ་ནེ་ཆ་ (Munich) གྲོང་ཁྱེར་ནང་རྟེན་གཞི་བྱེད་པའི་འཛམ་གླིང་ཡུ་གུར་ལྷན་ཚོགས་ཀྱི་ཚོགས་གཙོ་ཡིན་སྟབས། རྒྱ་ནག་གཞུང་གིས་ཁོ་ནི་ཁ་ཆེ་འཇིགས་སྐུལ་དྲག་སྤྱོད་པ་དང་ཁོས་ཤིན་ཅང་ཡུ་གུར་མི་རིགས་ས་ཁུལ་དུ་རྒྱལ་ཁབ་ཁ་བྲལ་གྱི་དུས་ཟིང་བསླངས་པའི་སྐྱོན་འཛུགས་བྱེད་ཀྱི་ཡོད་ནའང་། སྐུ་ཞབས་ཨེ་ས་ཡིས་རྒྱ་ནག་གི་སྐྱོན་འཛུགས་དེ་ངོས་ལེན་བྱེད་ཀྱི་མེད་པ་རེད།

ཟླ་འདིའི་ཕྱི་ཚེས་ ༢༣ ཉིན་སྐུ་ཞབས་ཨེ་ས་རྒྱ་གར་ཧི་མ་ཅལ་གྲོང་སྡེ་དྷ་རམ་སར་ཡོང་རྩིས་ཡོད་པའི་གནས་ཚུལ་ཐོས་འཕྲལ། རྒྱ་ནག་ཕྱི་དོན་ལྷན་ཁང་གི་མགྲིན་ཚབ་པ་ཧྭ་ཁྲུན་ཡང་ (Hua Chunying) ཟེར་བ་ཞིག་གིས། འབྲེལ་ཡོད་རྒྱལ་ཁབ་ཚང་མར་ཨེ་ས་ལ་ཁྲིམས་བཤེར་བྱེད་པའི་འགན་འཁུར་ཡོད་ལུགས་བཤད་ཀྱང་། རྒྱ་གར་གཞུང་གིས་ཁོ་ལ་ཐོངས་མཆན་སྤྲད་ཡོད་པ་རེད། ཡིན་ནའང་རེས་གཟའ་སྤེན་པའི་ཉིན་རྒྱ་གར་གཞུང་ཚབ་ཁང་གིས་སྐུ་ཞབས་ཨེ་སར་གློག་འཕྲིན་ཞིག་བཏང་སྟེ། དངོས་ཡོད་གནས་ཚུལ་རེ་འགའ་ཞིག་གིས་དབང་གིས་ཁོ་རྒྱ་གར་ནང་ཡོང་བའི་ཐོངས་མཆན་ཕྱིར་འཐེན་བྱས་སྐོར་བརྗོད་ཡོད་འདུག གནས་ཚུལ་འདིའི་ཐད་རྒྱ་གར་མི་མང་གིས་འཕྲུལ་དྲ་ (twitter) དང་ངོ་དེབ་ (facebook) སོགས་སྤྱི་ཚོགས་བརྒྱུད་ལམ་ཁག་ཏུ་སྲིད་གཞུང་ལ་སྐྱོན་བརྗོད་བྱེད་ཀྱི་ཡོད་འདུག

གསར་འགོད་པ། པདྨ་རྒྱལ།