དེ་རིང་སྤྱི་ཟུར་མགོན་པོ་རྡོ་རྗེ་ལགས་ཀྱི་ལོ་རྒྱུས་དེབ་ཐར་ “དུས་རབས་གསར་རྙིང་གཉིས་ཀྱི་བོད” ཅེས་པ་བོད་ཀྱི་དཔེ་མཛོད་ཁང་ནས་པར་བསྐྲུན་དབུ་འབྱེད་གནང་སོང་།
དེ་རིང་ཕྱི་དྲོའི་ཆུ་ཚོད་ ༤ པའི་སྟེང་། དྷ་ས་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། སྲིད་སྐྱོང་བློ་བཟང་སེང་གེ་མཆོག་གིས། ས་སྐྱའི་ཆོས་གཞིས་སྤེལ་ལེགས་བླ་བྲང་སྤྱི་ཟུར་མགོན་པོ་རྡོ་རྗེ་ལགས་ཀྱིས་བརྩམས་པའི་༼ དུས་རབས་གསར་རྙིང་གཉིས་ཀྱི་བོད༽ ཅེས་པའི་ལོ་རྒྱུས་དེབ་ཐེར་སྟོད་སྨད་གཉིས་དབུ་འབྱེད་གནང་སོང་ལ། དཔེ་དེབ་དབུ་འབྱེད་སྟེང་བོད་མི་མང་སྤྱི་འཐུས་དང་གཞུང་གི་ལས་བྱེད་ཁག་ཅིག དེ་བཞིན་སྤྱི་ཚོགས་ནང་གི་དོ་སྣང་ཅན་སྐོར་ཞིག་བཅས་འཛོམས་སོང་།
བོད་ཀྱི་དཔེ་མཛད་ཁང་གི་དྲུང་ཆེ་ངག་དབང་ཡེ་ཤེས་ལགས་ཀྱིས་རྩོམ་པ་པོ་སྤྱི་ཟུར་མགོན་པོ་རྡོ་རྗེ་ལགས་ཀྱི་མི་ཚེ་ལོ་རྒྱུས་དང་ཐེངས་འདིར་དཔེ་འབྱེད་གནང་བའི་ལོ་རྒྱུས་དེབ་དེ་ངོ་སྤྲོད་མདོ་བསྡུས་ཤིག་གནང་རྗེས། སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གིས་གཏམ་བཤད་གནང་དོན། དེ་རིང་འདིར་དཔེ་མཛོད་དྲུང་ཆེས་གསུངས་བ་ལྟར། མགོན་པོ་རྡོ་རྗེ་ཁོང་བོད་པའི་ལོ་རྒྱུས་ཐོག་གི་མི་སྣ་གལ་ཆེན་ཞིག་ཆགས་ཡོད་པ་རེད། དཔེར་ན། ཁོང་གི་ནང་མིའི་མིང་ལ་སེར་སྲུང་སྔགས་པ་མི་རབས་བཅུ་གཅིག་ཡོད་པའི་ནང་མི་དང་། དེ་བཞིན། ཁོ་རང་ལ་བླ་ཆེན་མང་པོ་ཞིག་ནས་དབང་ལུང་མན་ངག་ཐོབ་མཁན་ཞིག་རེད། མགོན་པོ་རྡོ་རྗེ་ལགས་དགུང་ལོ་བཅུ་བདུན་ནས་བཅུ་དགུའི་རིང་ས་སྐྱའི་ལྷ་ཁང་ཆེན་མོའི་ནང་ཁོང་གིས་སློབ་སྦྱོང་གནང་ཡོད་པ་དང་། རྗེས་སུ་ཁོང་གི་རྩ་བའི་བླ་མ་སྐྱབས་རྗེ་བྱ་བྲལ་སངས་རྒྱས་རྡོ་རྗེ་རིན་པོ་ཆེ་མཆོག་ཡིན་པ་ཡོངས་གྲགས་ཡིན་སྟབས། ཆོས་བརྒྱུད་ཁག་གི་ཐད་ནས་ཀྱང་ཁོང་གནད་འགག་ཅན་གྱི་མི་སྣ་ཞིག་ཆགས་ཡོད། དེ་བཞིན། ༧གོང་ས་མཆོག་གིས་མི་རབས་རྒན་པ་ཚོས་སོ་སོའི་མི་ཚེ་ལོ་རྒྱུས་ཡིག་ཐོག་ཕབ་ཐུབ་ན་ཡག་པོ་འདུག་ཅེས་དུས་རྒྱུན་བཀའ་ཕེབས་ཀྱི་ཡོད་པ་རེད། བཀའ་ཕེབས་པ་བཞིན་མི་རབས་རྒན་པ་དང་གནད་ཡོད་མི་སྣ་མང་པོ་ཞིག་གིས་སོ་སོའི་མི་ཚེ་ལོ་རྒྱུས་ལྗགས་རྩོམ་གནང་གི་ཡོད་པ་རེད། དེ་ཚང་མར་བསྔགས་བརྗོད་ཞུ་བཞིན་ཡོད། གང་ཡིན་ཟེར་ན་མི་རབས་རྒན་པ་ཚོ་རིམ་གྱིས་མེད་པ་ཆགས་ཡོང་སྐབས། མི་རབས་གསར་བ་ཚོར་གནའ་སྔ་མོའི་བོད་དེ་ག་འདྲ་ཞིག་ཡོད་པ་རེད་ཅེས་དོ་སྣང་གནང་མཁན་ཡོད་ན། དེབ་ནང་ནས་བསླབ་བྱ་ལེན་རྒྱུ་ཡོད་པའི་སྟེང་ལ། ལྗགས་རྩོམ་གནང་བའི་དེབ་དེ་དག་གལ་ཆེན་པོ་རེད། མགོན་པོ་རྡོ་རྗེ་ཁོང་གི་དེབ་གཉིས་ལས་གཅིག་ལ་ཤོག་ལྷེ་ ༥༠༦ དང་། གཅིག་ལ་ཤོག་ལྷེ་ ༥༧༡ ཡོད་པའི་དེབ་གཉིས་ལ། དུས་རབས་གསར་རྙིང་གཉིས་ཀྱི་བོད་ཅེས། དུས་རབས་རྙིང་པ་དང་དུས་རབས་གསར་བ་གཉིས་ཀྱི་ལོ་རྒྱུས་ཚད་དང་ལྡན་པ་གཅིག་པུ་ཙམ་མ་ཟད། གཏིང་ཟབ་པོ་དང་དྲ་རྒྱས་པོའི་ཐོག་ནས་བརྩམས་གནང་ཡོད་པ་དེ་ལ་བསྔགས་བརྗོད་ཞུ་རྒྱུ་ཡིན། ཞེས་གསུངས་སོང་།
མཇུག་ཏུ་ཨ་མྱེ་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས། སྤྱི་ཟུར་མགོན་པོ་རྡོ་རྗེ་མཆོག་གི་དེབ་པར་བསྐྲུན་ཞུས་ཚར་བ་དང་། ཁོང་འདི་གར་ཕེབས་པའི་འཆར་གཞི་དང་དེ་ནས་གཟིམ་ཆུང་མཇལ་ཁ་བཅར་རྒྱུའི་འཆར་གཞི་ཡོད་ཀྱང་། སྟབས་མ་ལེགས་པ་ཞིག་ལ་ཟླ་འདིའི་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༦ པའི་སྟེང་ཁོང་སྐུ་གྲོངས་ཡོད་པ་དང་། ཉིན་གུང་ཆུ་ཚོད་དང་པོའི་བར་ཐུགས་དམ་ལ་བཞུགས་ཡོད་སྐོར་སོགས་སོགས་བརྗོད་སོང་།
ལོ་རྒྱུས་དཔེ་དེབ་དབུ་འབྱེད་ཀྱི་གསལ་བསྒྲགས་ནང་། “དུས་རབས་གསར་རྙིང་གཉིས་བོད”ཅེས་པའི་ལོ་རྒྱུས་ཀྱི་དེབ་འདི་ནི་ས་སྐྱའི་སྤྱི་ཟུར་མགོན་པོ་རྡོ་རྗེ་ལགས་ཀྱིས་བརྩམས་ཤིང་། འཛམ་གླིང་གི་ལོ་རྒྱུས་བརྩམས་ཆོས་མང་པོའི་ཁྲོད་ནས་ཀུན་གྱིས་ཡིད་ཆེས་ཆེ་ཤོས་སུ་བརྩི་བའི་གནད་དོན་གཅིག་ནི་ལོ་རྒྱུས་དེའི་བྱུང་རིམ་ནང་རྩོམ་པ་པོ་རང་ཉིད་དངོས་སུ་ཡོད་པ་དེ་ཡིན། ད་ལམ་གྱི“དུས་རབས་གསར་རྙིང་གཉིས་ཀྱི་བོད”ཅེས་པའི་ལོ་རྒྱུས་རྩོམ་པ་པོ་ས་སྐྱའི་སྤྱི་ཟུར་མགོན་པོ་རྡོ་རྗེ་ལགས་ལ་མཚོན་ན། བོད་ཀྱི་བདག་དབང་བོད་མིར་ཡོད་པའི་གནས་སྐབས་དང་། བདག་དབང་རྒྱ་ནག་ལ་ཤོར་བའི་གནས་སྐབས་གཉིས་ཀའི་བྱུང་བའི་ཁྲོད་ཀྱི་མི་སྣ་ཞིག་ཆགས་ཡོད་སྟབས། དུས་རབས་ཉི་ཤུའི་སྨད་ཆའི་ལོ་རྒྱུས་རྣམས་དངོས་མཐོང་དངོས་མྱོང་གི་བྱུང་བ་ཞིག་ཏུ་གྱུར་ཡོད་པས། ལོ་རྒྱུས་ཀྱི་རྡོ་རིང་ཞིག་ཏུ་ངོས་འཛིན་བྱེད་ཆོག་སྐོར་འཁོད་འདུག
སྤྱི་ཟུར་མགོན་པོ་རྡོ་རྗེ་ལགས་ཀྱིས་བརྩམས་པའི“དུས་རབས་གསར་རྙིང་གཉིས་ཀྱི་བོད”ཅེས་པའི་ལོ་རྒྱུས་དེབ་ཐར་སྟོད་སྨད་གཉིས་གྱི་དེབ་པོའི་ནང་ས་བཅད་ ༦ དང་ཤོག་གྲངས་ ༥༧༡ ཡོད་པ་དང་། དེབ་གཉིས་པའི་ནང་ས་བཅད་ ༤ དང་ཤོག་གྲངས་༥༠༦ ཡོད་པ་རེད།
གསར་འགོད་པ། པདྨ་རྒྱལ།
དེབ་འདི་དྲང་མོ་བཤད་ན་ལོ་རྒྱུས་ཀྱི་དེབ་ཞིག་མ་རེད་བསམ། ནང་བསྟན་བོད་ལྗོངས་སུ་ཅི་ལྟར་ཆགས་པའི་ལྷ་འདྲེའི་སྒྲུང་ཞིག་ཡིན་པར་ཐབས། གཅིག་ནས་དྲང་མོ་དྲང་བདེན་ད་ལྟ་དངོས་ཡོད་ཀྱི་རྡོ་རིང་ཡང་ན་ལོ་རྒྱུས་ཡིག་ཚགས་སོགས་གཙུགས་སུ་མ་བཟུང་པར། ཏག་ཏག་ནང་བསྟན་ལ་བོད་ཁུལ་དུ་མཛད་རྗེས་ག་འདྲ་ཞིག་ཐེབས་ཡོད་པའི་ལྕེ་འདེགས་ཙམ་གྱི་སྒྲུང་དེབ་ཞིག་རེད་འདུག། སྙིང་བོ་ཅུང་མི་འདུག
སྐུ་ཉིད་ཀྱིས་གསལ་འདེབས་གནང་བར་བཀའ་དྲིན་ཆེ།
འདི་ཀློག་མ་བདེ་བ་ཧ་ལས་པ་ཞིག་འདུག གསེར་གསུམ་སྔགས་པ་ནི་སེར་སྲུང་ཡིན་རྒྱུ་རེད།