ཆོས་ལུགས་རང་དབང་གི་སྙན་ཐོ་ནག་པོ།

རྒྱ་ནག་གཞུང་གིས་འཇིགས་སྐུལ་རིང་ལུགས་པ་དང་རྒྱལ་ཁབ་ཀྱི་བདེ་འཇཊ་ལ་འཇིགས་སྐུལ་བྱས་པའི་ཉེས་མིང་འོག་འཛིན་བཟུང་བཙོན་འཇུག་བྱས་པའི་ཆོས་པ་ཚོ་ཀློད་གྲོལ་གཏོང་དགོས་པའི་འབོད་སྐུལ་བྱས་འདུག

ཟླ་འདིའི་ཕྱི་ཚེས་ ༢ ཉིན་ཨ་རིའི་རྒྱལ་སྤྱིའི་ཆོས་ལུགས་རང་དབང་ལྷན་ཚོགས་(United States Commission on International Religious Freedom)ཀྱིས་ཆོས་ལུགས་རང་དབང་སྐོར་གྱི་སྙན་ཐོ་ཞིག་ཕྱིར་བསྒྲགས་བྱས་པའི་ནང་། ཕྱི་ལོ་ ༢༠༡༥ ལོར་འཛམ་གླིང་སྤྱི་ཡོངས་ཀྱི་ནང་ཆོས་ལུགས་ཁག་གི་རང་དབང་ལ་འཇིགས་སྐུལ་བྱས་པའི་གནད་དོན་ལ་དབྱེ་ཞིབ་བྱས་པ་བརྒྱུད། ཕྱི་ལོ་ ༢༠༡༦ ལོར་ཆོས་ལུགས་རང་དབང་ཐད་དམིགས་བསལ་གྱིས་དོ་འཁུར་བྱེད་དགོས་པའི་རྒྱལ་ཁབ་༨ ཐེར་འདོན་བྱས་ཡོད་པའི་ནང་རྒྱ་ནག་ཡང་བསྐྱར་ཚུད་ཡོད་པ་མ་ཟད། ཕྱི་ལོ་ ༢༠༡༥ ལོར་རྒྱ་ནག་ནང་ཆོས་ལུགས་རང་དབང་ལ་བཙན་གནོན་བྱས་པའི་གནས་སྟངས་དེ་མུ་མཐུད་ནས་ཇེ་སྡུག་ཏུ་འགྲོ་བཞིན་ཡོད་ལ། རྒྱ་ནག་གཞུང་གིས་ཕྱོགས་གཅིག་ནས་རྒྱལ་སྤྱིའི་སྤྱི་ཚོགས་ཀྱི་གོ་གནས་བརྟན་བརླིང་ཡོང་བར་ཤུགས་གནོན་བྱེད་ཀྱི་ཡོད་པ་དང་། ཡང་ཕྱོགས་གཞན་ཞིག་ནས་རྒྱ་ནག་ནང་ལོགས་སུ་སྲིད་བྱུས་གཏན་འབེབས་ཀྱིས། དམངས་ཁྲོད་ཚོགས་པ་ཚོའི་འགྲོ་བ་མིའི་ཐོབ་ཐང་གོང་སྤེལ་དང་ཁྲིམས་སྐྱོང་གི་འབོད་སྒྲ་རྩ་མེད་བཟོ་བཞིན་ཡོད་སྐོར་བརྗོད་ཡོད་པ་དང་འབྲེལ། རྒྱ་ནག་ནང་ཆོས་ལུགས་ཆེན་པོ་ལྔ་ཡོད་པའི་ནང་ནས་ཡི་ཤུ་ཆོགས་ལུགས་དང་ནང་ཆོས་ཉམས་ལེན་པ་ཚོར་དམིགས་བསལ་གྱིས་བཙན་གནོན་བྱེད་བཞིན་ཡོད་པ་གསལ་འདོན་བྱས་འདུག

དེ་ཡང་སྙན་ཐོའི་ནང་བོད་ཀྱི་ཆོས་ལུགས་མི་སྣར་བཙན་གནོན་བྱས་པའི་སྐོར་བཀོད་པའི་ནང་། ཕྱི་ལོ་ ༢༠༡༥ ལོར་རྒྱ་ནག་གཞུང་གིས་བོད་ཀྱི་ནང་ཆོས་རྗེས་འཇུག་པ་ཚོར་བཀག་སྡོམ་ནན་པོ་རྒྱུན་སྐྱོང་བྱས་ཏེ། ཁོང་ཚོའི་རིག་གནས་དང་ཆོས་ལུགས་ཀྱི་བྱེད་སྒོར་ལྟ་རྟོག་དང་བཙན་གནོན་ཆེན་པོ་བྱས་ཡོད་པ་མ་ཟད། སྲིད་གཞུང་གིས་སྣེ་འཁྲིད་གཙོ་བོ་བྱས་ཏེ་དགོན་པ་ཁག་ལ་ཞིབ་བཤེར་མུ་མཐུད་བྱེད་བཞིན་ཡོད་པ་དང་། བོད་ཀྱི་ཏང་ཡོན་ལས་བྱེད་པས་དགོན་པའི་ནང་གུང་ཁྲན་ཏང་གི་དྲིལ་བསྒྲགས་སྤེལ་གྱི་ཡོད་སྐོར་དང་། དེ་བཞིན། སྲིད་གཞུང་གིས་ན་གཞོན་གྲྭ་བཙུན་གྱི་སློབ་གསོ་དང་སྤྱོང་བརྡར་ནང་དུའང་ཐེ་གཏོགས་བྱེད་བཞིན་ཡོད་པ་དང་། ཕྱི་ལོ་ ༢༠༠༩ ཟླ་ ༢ ནས་བཟུང་ད་ལྟའི་བར་བོད་མི་ ༡༤༣ གྱིས་རང་ལུས་མེར་བསྲེགས་གནང་ཡོད་པ། རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་ལོ་ ༢༠ ཡི་བཙོན་འཇུག་ཁྲིམས་ཐག་བཅད་དེ་བཙོན་ཁང་དུ་བཅུག་པ་དང་། ཕྱི་ལོ་ ༢༠༡༥ ཟླ་ ༧ པའི་ནང་ཁོང་བཙོན་ཁང་དུ་སྐུ་གྲོངས་བ་དང་། ཁོང་གི་གཅུང་མོ་དང་ཚ་མོ་གཉིས་ཀྱིས་སྐུ་ཕུང་ནང་མིར་རྩིས་སྤྲོད་དགོས་པའི་རེ་འདུན་བཏོན་པར་བརྟེན་བདུན་གཉིས་མ་ཟིན་ཙམ་གྱི་རིང་ཁོང་གཉིས་བཀག་ཉར་བྱས་ཡོད་སྐོར་བརྗོད་འདུག

ཡང་འདས་ལོར་༧གོང་ས་མཆོག་དགུང་གྲངས་ ༨༠ ཕེབས་པའི་འཁྲུངས་སྐར་དང་། རྒྱ་གཞུང་གིས་བོད་ལྗོངས་བདག་འཛིན་བྱས་ཏེ་ལོ་ངོ་ ༥༠ འཁོར་བའི་དུས་དྲན། དེ་བཞིན་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གར་ཡོད་ཅི་བྱུང་མེད་པར་གྱུར་ནས་ལོ་ ༢༠ འཁོར་བའི་དུས་དྲན་སོགས་ལོ་རྒྱུས་ནང་ཤུགས་རྐྱེན་ཆེན་པོ་ཐེབས་པའི་དུས་ཆེན་ཆེ་ཁག་འགའ་ལོ་གཅིག་གི་ནང་ཁེལ་ཏེ་སྲུང་གཙི་བྱས་ཡོད་པ་དང་། པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་ ༦ ཐོག་རྒྱ་གཞུང་གིས་བཀག་ཉར་བྱས་ཏེ་གར་ཡོད་ཅི་བྱུང་མེད་པར་གྱུར་ནས་ལོ་ངོ་ ༢༠ ལྷག་འགྲོ་ཡི་ཡོད་པ་དང་། དེ་བཞིན་༧གོང་ས་མཆོག་ནས་ཁོང་གི་ཡང་སྲིད་ཕེབས་དགོས་དོན་མེད་སྐོར་གསུངས་བ་དེར་རྒྱ་གཞུང་གིས་སྐྱོན་བརྗོད་ཞུས་པ་སོགས་བཀོད་འདུག

ཡང་སྙན་ཐོའི་ནང་རྒྱ་ནག་གཞུང་ལ་ཆོས་ལུགས་རང་དབང་དང་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་ཁག་ཅིག་ཐོག་འབོད་སྐུལ་གནང་བའི་ནང་། རྒྱ་ནག་ནང་གི་ཆོས་ལུགས་རང་དབང་དང་འགྲོ་བ་མིའི་ཐོབ་ཐང་དང་འབྲེལ་བའི་བྱེད་སྟངས་དེ་ཚོ་རྒྱལ་སྤྱིའི་ཁྲིམས་གཞིར་འགལ་གྱི་ཡོད་ལ། རྒྱ་ནག་གཞུང་རྒྱལ་སྤྱིའི་སྡིངས་ཆའི་ཐོག་གདེང་ཚོད་ཆེ་རུ་ཕྱིན་པ་དང་བསྟུན་རྒྱལ་སྤྱིའི་ཁྲིམས་གཞིར་སྣང་མེད་གཏོང་བ་ཤུགས་ཆེ་རུ་འགྲོ་བཞིན་ཡོད་སྟབས། རྒྱ་གཞུང་གི་མགོ་ཁྲིད་ཚོས་ངེས་པར་དུ་ཆོས་ལུགས་རང་དབང་དང་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་ཁག་གི་ཐོག་རྒྱལ་ཁབ་གཞན་དང་མཉམ་འབྲེལ་དམ་ཟབ་ཡོང་ཐབས་ལ་བརྩི་བཀུར་དགོས་སྐོར་དང་། ཨ་རིའི་གཞུང་གིས་རྒྱ་ནག་གཞུང་དང་འབྲེལ་མོལ་གནང་སྐབས་འགྲོ་བ་མིའི་ཐོབ་ཐང་གི་གནད་དོན་དང་དམིགས་བསལ་གྱིས་ཆོས་ལུགས་རང་དབང་སྐོར་ངེས་པར་དུ་གླེང་སློང་དགོས་པའི་རེ་སྐུལ་ཞུས་ཡོད་པ་མ་ཟད། མ་འོངས་པར་མུ་མཐུད་རྒྱ་ནག་དམིགས་བསལ་གྱིས་དོ་འཁུར་དགོས་པའི་རྒྱལ་ཁབ་ཅིག་ཏུ་རྩིས་ཏེ། རྒྱ་ནག་གཞུང་གིས་འཚེ་མེད་ཞི་བའི་ཆོས་པ་ཚོར་འཇིགས་སྐུལ་རིང་ལུགས་པ་དང་རྒྱལ་ཁབ་ཀྱི་འཇིགས་འཇགས་ལ་འཇིགས་སྐུལ་བྱེད་མཁན་གྱི་ཉེས་མིང་འོག འཛིན་བཟུང་བཙོན་འཇུག་བྱས་པའི་བཙོན་པ་རྣམས་ཀློད་གྲོལ་གཏོང་དགོས་པ་མ་ཟད། མ་འོངས་པར་ཉེས་མིང་དེ་འདྲའི་ཐོག་ནས་ཆོས་པ་བཀག་ཉར་འཛིན་བཟུང་བྱེད་མི་ཆོག་པའི་རེ་འདུན་ནན་པོ་འདོན་དགོས་སྐོར་སོགས་བརྗོད་འདུག

གསར་འགོད་པ། པདྨ་མཚོ།