མཉམ་འབྲེལ་རྒྱལ་ཚོགས་ཀྱི་བྱིས་པའི་ཐེབས་རྩ་ཁང་གིས་འཛམ་གླིང་ཤར་ནུབ་རྒྱལ་ཁབ་ཁག་ཅིག་ནང་སློབ་ལོ་རན་པའི་བྱིས་པ་ས་ཡ་ ༧༥ ཟིང་འཁྲུག་གི་འཇིག་ཉེན་ཁྲོད་དུ་སློབ་གྲྭར་ཞུགས་པའི་གོ་སྐབས་མེད་སྐོར་བརྗོད་འདུག
ཁ་སང་ཨ་ར་བྷེན་ (Arabian) གྱི་རྒྱལ་ས་ཌོ་ཧ་ (Doha) ནང་རྟེན་གཞི་བྱེད་པའི་ཨལ་རྗ་ཙི་ར་ (aljazeera) གསར་ཁང་གིས་གནས་ཚུལ་སྤེལ་བ་ལྟར་ན། མཉམ་འབྲེལ་རྒྱལ་ཚོགས་ཀྱི་བྱིས་པའི་ཐེབས་རྩ་ཁང་གིས་འཛམ་གླིང་ཤར་ནུབ་ཀྱི་རྒྱལ་ཁབ་ཁག་ཅིག་གི་དམག་འཁྲུག་དང་རྐྱེན་ངན་གོད་ཆག་ཁྲོད་སློབ་ལོ་རན་པའི་བྱིས་པ་ས་ཡ་ ༧༥ ཙམ་སློག་གྲྭར་འགྲོ་བའི་གོ་སྐབས་རག་གི་མེད་སྐོར་བརྗོད་འདུག
བྱིས་པའི་ཐེབས་རྩ་ཁང་གིས་མུ་མཐུད་དུ། འཛམ་གླིང་ཤར་ནུབ་རྒྱལ་ཁབ་ཁག་ཅིག་གི་དུས་ཟིང་ཁྲོད་སློབ་ལོ་རན་པའི་བྱིས་པ་ས་ཡ་ ༤༦༢ ཡི་བཞི་ཆ་ཞིག་ལ་སློབ་གསོ་མྱོང་བའི་གོ་སྐབས་མེད་ཅིང་། ཟླ་བ་འདིའི་ནང་ཊུ་ཀིའི་རྒྱལ་ནང་དུ་སྐབས་དང་པོའི་རྒྱལ་སྤྱིའི་འགྲོ་བ་མིའི་བདེ་རྩའི་ལྷན་ཚོགས་ཤིག་འཚོགས་འཆར་ཡོད་པ་དང་། ལྷན་ཚོགས་ཀྱི་དགོས་དམིགས་གཙོ་བོ་འབྱུང་འགྱུར་ལོ་ངོ་ ༥ ཡི་ནང་སློབ་གསོ་མ་རག་བའི་བྱིས་པའི་གྲངས་འབོར་ཐེར་འབུམ་ ༤ ནས་ས་ཡ་ ༡༣།༦ དང་ཕྱི་ལོ་ ༢༠༣༠ བར་སློབ་གསོ་མ་རག་པའི་བྱིས་པ་ས་ཡ་ ༧༥ དཀའ་ངལ་སེལ་ཐབས་སྐོར་ཡིན་ཚུལ་བརྫོད་འདུག
མཉམ་འབྲེལ་རྒྱལ་ཚོགས་ཀྱི་བྱིས་པའི་ཐེབས་རྩ་ཁང་གི་འགན་འཛིན་བྷུར་ནེ་ (Bourne) ཟེར་བ་ཞིག་གིས། ཤེས་ཡོན་སློབ་གསོར་བརྟེན་ནས་འགྲོ་བ་མིའི་འཚོ་གནས་ལ་འཕོ་འགྱུར་གཏང་ཐུབ་པ་དང་། རྒྱལ་ཁབ་སོ་སོའི་ནང་ཁྲིམས་འགལ་ཉེས་དོན་དང་འཇིགས་སྐུལ་དྲག་སྤྱོད་ནང་ཞུགས་པ་སོགས་ཀྱི་འཇིག་ཉེན་ལས་བྱིས་པ་སྲུང་སྐྱོབ་བྱེད་ཐབས་གཙོ་བོ་སློབ་འཇུག་བྱེད་རྒྱུ་དེ་ཡིན་པ་དང་། བྱིས་པའི་སློབ་གསོ་སྒྲུབ་རྒྱུ་ནི་རྒྱལ་སྤྱིའི་སྤྱི་ཚོགས་དང་འགྲོ་བ་མིའི་གཞི་རྩའི་བདེ་རྩའི་གནད་ཀ་ཡིན་སྟབས། ཁོ་ཚོའི་འཚོ་གནས་ལ་མཐུན་འགྱུར་དགོས་སྐོར་བརྗོད་འདུག
གནས་ཚུལ་ལྟར་ན། ཟིང་འཁྲུག་གི་རྐྱེན་པས་དེང་སྐབས་དབུས་ཨ་ཧྥི་རེ་ཁ་སྤྱི་མཐུན་རྒྱལ་ཁབ་ (Central African Republic) ནང་སློབ་གྲྭ་ཁྱོན་ཡོངས་ཀྱི་བཞི་ཆ་གཅིག་དང་། སི་རི་ཡ་ (Syria) རྒྱལ་ནང་དུ་སློབ་གྲྭ་ ༦༠༠༠ ལྷག་དྲག་ཆས་དམག་དཔུང་གི་རྟེན་གཞི་དང་ཛ་དྲག་མྱུར་སྐྱོབ་ཀྱི་ལྟེ་གནས་སོགས་སུ་གྱུར་ཡོད་པ་དང་། འདས་པའི་ལོ་ངོ་འདི་དག་རིང་གི་དུས་ཟིང་ཁྲོད་ཕ་མ་ཚོས་སོ་སོའི་བྱིས་པའི་སློབ་གསོ་བསྒྲུབ་རྒྱུ་ནི་གལ་འགངས་ཆེ་སྐོར་བརྗོད་ཡོད་པ་མ་ཟད། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་བདེ་རྩའི་ལས་གཞིའི་ནང་བྱིས་པའི་སློབ་གསོ་གཙོ་བོར་བཏོན་འདུག གཞན། དཀྱིལ་ཤར་ཡུལ་གྲུ་ཁག་གི་ཟིང་འཁྲུག་ཁྲོད་སློབ་ལོ་རན་ཡང་སློབ་གསོ་མ་རག་པའི་བྱིས་པ་ས་ཡ་ ༣༤ ཡོད་པ་མ་ཟད། ཡུལ་ལུང་དེ་དག་ནང་སློབ་ལོ་རན་པའི་བྱིས་པ་བརྒྱ་ཆ་ ༤༠ སློབ་གྲྭར་འགྲོ་བའི་གོ་སྐབས་མེད་ཅིང་། ལྷག་པར་དུ་འཚོ་གནས་ཀྱི་མཐུན་རྐྱེན་ཞན་པའི་སྤྱི་ཚོགས་ཁག་ནང་སློབ་ལོ་རན་པའི་བྱིས་པ་ཞིག་སློབ་གྲྭ་ནས་ཕྱིར་བུད་རྗེས། ཡང་བསྐྱར་སློབ་གྲྭར་ཞུགས་པའི་གོ་མེད་པ་དང་། དཀའ་ངལ་དེ་ཡང་ནམ་རྒྱུན་བུད་མེད་སློབ་ཕྲུག་ཚོར་འཕྲད་ཀྱི་ཡོད་པ་བཅས་ཀྱི་དཀའ་ཁག་ལ་གཞིགས་ཏེ། མཉམ་འབྲེལ་རྒྱལ་ཚོགས་ཀྱི་བྱིས་པའི་ཐེབས་རྩ་ཁང་གིས་ད་རེབ་ཀྱི་ལྷན་ཚོགས་ཐོག་འཛམ་གླིང་རྒྱལ་ཁབ་ཁག་དང་ཁེ་ལས་སྡེ་ཁག ཐེབས་རྩ་ཁག་དང་ཆོས་ཚོགས་ཁག དེ་བཞིན་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལས་དོན་ཁང་བཅས་ཀྱི་རམ་འདེགས་ལ་བརྟེན་ནས་བྱིས་པའི་ཐེབས་རྩ་ཁག་ཅིག་གསར་འཛུགས་བྱས་ཏེ་བྱིས་པའི་སློབ་གསོ་བསྒྲུབ་ཐབས་ཀྱི་ལས་གཞི་ཁག་ཅིག་ལག་བསྟར་བྱ་འཆར་ཡོད་འདུག
གསར་འགོད་པ། པདྨ་རྒྱལ།
