རྒྱ་གཞུང་གིས་མི་ཉག་ལྷ་སྒང་དུ་གཏེར་ཁ་སྔོན་འདོན་བྱས་ནས་ཁོར་ཡུག་དང་རྒྱུག་ཆུར་འབག་བཙོག་བཟོས་རྐྱེན་ཉ་སོགས་སེམས་ཅན་མང་པོར་ཤི་སྐྱོན་བྱུང་གི་ཡོད་འདུག
སྤྱི་ཚོགས་འཕྲིན་ལམ་དུ་གནས་ཚུལ་ཐོན་པ་ལྟར་ན། དཀར་མཛེས་ཁུལ་མི་ཉག་ལྷ་སྒང་དུ་རྒྱ་གཞུང་གིས་བཙན་གྱིས་གཏེར་ཁ་སྔོག་འདོན་བྱས་པར་བརྟེན། ཁོར་ཡུག་ལ་གནོད་སྐྱོན་དང་ས་གནས་ཀྱི་རྒྱུག་ཆུར་འབག་བཙོག་ཆེན་པོ་ཐེབས་ཏེ་ཉ་སོགས་སེམས་ཅན་མང་པོར་ཤི་སྐྱོན་བྱུང་བཞིན་ཡོད་སྟབས། ས་གནས་བོད་མི་ཚོས་རྒྱུག་ཆུ་གཙང་ཉར་ཆེད་ཉ་ཤི་བོ་རྣམས་ཆུ་ལས་བསྒྲུགས་པ་དང་། གསོན་པོར་ལྷག་ཡོད་པའི་ཉ་རྣམས་རྒྱུག་ཆུ་གཞན་དུ་བསྐྱལ་ཡོད་པ་མ་ཟད། ལྷ་སྒང་ཕྱོགས་ཀྱི་བོད་མི་ཚོར་སྲོག་ཉེན་ལ་ཐུག་པའི་ཉ་རྣམས་སྐྱོབ་རོགས་བྱེད་དུ་ཡོང་དགོས་པའི་འབོད་སྐུལ་བྱས་འདུག་ལ། ཁ་སང་ནས་རྒྱ་གཞུང་གིས་གཏེར་ཁ་སྔོག་འདོན་གྱི་ལས་གཞི་དེ་ཡང་བསྐྱར་མགོ་བརྩམས་ཡོད་འདུག
ལྷ་སྒང་ཕྱོགས་ནི་ཡུལ་སྐོར་བ་མང་པོ་ཡོང་སའི་ས་ཆ་ཧ་ཅང་སྐྱིད་པོ་ཞིག་ཡིན་ལ། རྒྱ་ནག་གཞུང་གིས་སྔོན་མ་ནས་ས་ཆ་དེར་ས་བརྐོ་རྡོ་སློག་གི་ལས་གཞི་མང་པོ་སྤེལ་བཞིན་ཡོད་སྟབས། འདི་གའི་གསར་འགོད་པས་ལྷ་སྒང་ཕྱོགས་ནས་ཡིན་པའི་ཕུར་བུ་རྡོ་རྗེ་ལགས་སུ། ས་གནས་དེར་གཏེར་ཁ་སྔོག་འདོན་གྱི་ལས་གཞི་ག་དུས་ཤིག་ནས་བཟུང་སྤེལ་ཡོད་མེད་དྲིས་པར་ཁོང་གིས། དེའི་སྐོར་ལ་ཞིབ་ཕྲའི་གནས་ཚུལ་ཤེས་རྟོགས་བྱུང་མ་སོང་ཡང་། ན་ནིང་ལོར་མི་ཉག་ཕྱོགས་སུ་གཏེར་ཁ་སྔོག་འདོན་བྱས་ཏེ་ཉ་མང་པོ་ཤི་འདུག་ཟེར་ནས་སྤྱི་ཚོགས་འཕྲིན་ལམ་དུ་པར་མང་པོ་བསླེབས་སོང་། ཞེས་བརྗོད་བྱུང་།
གསར་འགོད་པ། པདྨ་མཚོ།
