སྐུ་ཚེ་ཧྲིལ་པོ་བསྟན་འགྲོའི་དོན་དུ་གཏོང་གནང་མཛད་ཡོད།

དེ་རིང་ཉིན་གུང་ཆུ་ཚོད་ ༡༢ སྟེང་། དྷ་རམ་ས་ལའི་གངས་སྐྱིད་གཉའ་ཁྲི་ཚོགས་ཁང་དུ། ཉེ་ལམ་ཕྱི་ཟླ་ ༤ ཚེས་ ༢༩ ཉིན་ས་སྐྱ་ཕུ་ཚོགས་ཕོ་བྲང་གི་འཁོན་རིགས་འཇིགས་བྲལ་བདག་ཆེན་རིན་པོ་ཆེ་མཆོག་དགོངས་པ་ཞི་བར་གཤེགས་པར། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པའི་དབུས་སྤྱི་འཐུས་རྒྱུན་ལས་རྣམ་པ་དང་། གཞུང་ཞབས་ལས་བྱེད་ཡོངས་ཚང་འཛོམས་གནང་སྟེ། མཆོད་འབུལ་སྨོན་ལམ་དང་མྱ་ངན་ཞུས་ཡོད་པ་དང་། ཉིན་རྒྱབ་བོད་མིའི་སྒྲིག་འཛུགས་ཀྱི་ལས་ཁུངས་ཡོངས་རྫོགས་ཀྱིས་ལས་མཚམས་བཞག་སྟེ་མྱ་ངན་ཞུས།

སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་ཡིག་ཐོག་གི་མྱ་ངན་ཞུ་ཚིག་སྒྲོགས་སྦྱང་གནང་དོན། དེ་རིང་འདིར་ལྷན་འཛོམས་གནང་བའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། སྲི་ཞུ་ལས་བྱེད་པ་ཡོངས་ལ་བློ་ཕམ་དང་བཅས་ཏེ་སྙན་གསེང་ཞུ་རྒྱུར། བོད་ཀྱི་བསྟན་འགྲོ་སྤྱིའི་གོད་ཆག་ལྟ་བུར་ཉེ་ཆར་ཕྱི་ལོ་ ༢༠༡༦ ཟླ་ ༤ ཚེས་ ༢༩ དགོང་དྲོ་ཆུ་ཚོད་ ༨།༡༥ ཐོག འཁོན་རིགས་བསྟན་པའི་གསལ་བྱེད་དཔལ་ས་སྐྱ་ཕུན་ཚོགས་ཕོ་བྲང་གི་༸སྐྱབས་མགོན་འཇིགས་བྲལ་བདག་ཆེན་རིན་པོ་ཆེ་མཆོག་དགུང་གྲངས་ ༨༨ ཐོག ཨ་རིའི་གྲོང་ཁྱེར་སི་ཡ་ཊལ་དུ་ངོ་མཚར་བའི་རྟགས་དུ་མ་དང་བཅས་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་ཡིད་སྐྱོའི་གསན་ཚུལ་བྱུང་འདུག་པ་དེར། བོད་མིའི་སྒྲིག་འཛུགས་ཀྱི་ཐོག་ནས་མྱ་ངན་གུས་བཏུད་ཞུ་རྒྱུ་དང་། འཇིགས་བྲལ་བདག་ཆེན་རིན་པོ་ཆེ་དམ་པ་དེའི་གདུང་སྲས་རྣམ་པ་དང་། བདག་མོ་སྐུ་ཞབས། ཕོ་བྲང་གི་སྐུ་འཁོར། སི་ཡ་ཀྲལ་ས་སྐྱ་དགོན་པའི་མཁན་ལས། ཕྱི་ནང་ཡུལ་གྲུ་གང་སར་གནས་པའི་ཞལ་སློབ་བཅས་ཡོངས་ལ། ཕྲན་ནས་བོད་མིའི་སྒྲིག་འཛུགས་སྤྱི་དང་བཀའ་ཤག་གི་ཚབ་ཞུས་ཏེ་ཐུགས་གསོ་གཏིང་ཟབ་ཞུ་རྒྱུ་ཡིན། འཇིགས་བྲལ་བདག་ཆེན་དམ་པ་དེ་ཉིད་ནི། ཉེ་ཆར་དགོངས་པ་ཆོས་དབྱིངས་སུ་ཐིམ་ཚུལ་མ་བསྟན་བར་སྐུ་ཚེ་ཧྲིལ་པོ་བསྟན་འགྲོའི་དོན་དུ་གཏོང་གནང་མཛད་ཡོད་པ་དང་། བསྟན་པ་སྤྱི་དང་ལྷག་པར་དཔལ་ས་སྐྱ་པའི་བསྟན་པ་ལ་བཀའ་དྲིན་ཤིན་ཏུ་ཆེན་པོ་བསྐྱངས་ཡོད་ན། རང་ཅག་ཡོངས་ནས་བཀའ་དྲན་རྗེས་དྲན་ཞུ་རྒྱུ་གལ་ཆེན་ཡིན། ཞེས་འཁོད་འདུག

ཁ་སང་བོད་མི་མང་སྤྱི་འཐུས་ལྷན་ཚོགས་ཀྱིས་མྱ་ངན་ཞུ་ཚིག་ཕུལ་བའི་ནང་། ད་ལམ་དཔལ་ས་སྐྱའི་ཆོས་བརྒྱུད་སྤྱི་འཐུས་མཆོག་ནས་འདི་གར་གནས་ཚུལ་གསན་ཐོས་བྱུང་བར། མཚན་མཆོག་གསུམ་ལྡན་བསྟན་པའི་གསལ་བྱེད་དཔལ་ས་སྐྱ་ཕུན་ཚོགས་ཕོ་བྲང་གི་བདག་ཆེན་གོང་མ་འཇིགས་བྲལ་རིན་པོ་ཆེ་མཆོག་བར་ལམ་སྐུ་ཁམས་བསྙུང་གཞི་བཞེས་ཚུལ་གྱིས་ཉེ་སྔོན་ཕྱི་ལོ་ ༢༠༡༦ ཟླ་ ༤ ཚེས་ ༢༩ ཉིན་དགོངས་པ་ཆོས་དབྱིངས་སུ་ཐིམས་ཚུལ་བསྟན་པའི་ཡིད་སྐྱོའི་གནས་ཚུལ་བྱུང་འདུག་པར། བོད་མི་མང་སྤྱི་འཐུས་རྒྱུན་ལས་རྣམ་པ་ཤིན་ཏུ་ཐུགས་ཕམ་གྱི་གནས་སུ་གྱར། ཞེས་འཁོད་འདུག