མང་ཚོགས་ཀྱི་ཞི་རྒོལ་ལ་དྲག་གནོན་གྱི་ཉེན་ཁ་འདུག

དཀར་མཛེས་གར་རྒྱས་ཁའི་གཏེར་འདོན་ས་ཚིགས་ཤིག་གི་དུག་ཆ་ཤོར་ཏེ་ཉ་མང་པོ་ཤི་ཡོད་པ་དང་མི་རྒྱུ་གཉིས་ལ་ཉེན་ཁ་ཡོད་སྟབས་མང་ཚོགས་ཀྱིས་ངོ་རྒོལ་བྱས་པར་ཉེན་རྟོག་པས་དྲག་གནོན་བྱེད་འཆར་ཡོད་འདུག

སྤྱི་ཚོགས་དྲ་ལམ་ཁག་ཏུ་གནས་ཚུལ་ཐོན་པ་ལྟར་ན། སི་ཁྲོན་དཀར་མཛེས་དར་མདོ་རྫོང་ལྷ་སྒང་ཡུལ་ཤོག་གར་རྒྱས་ཁ་རུ། རྒྱ་ནག་གི་གཏེར་འདོན་ཚན་པ་ཞིག་གིས་གཏེར་ཁ་སྔོག་འདོན་བྱེད་བཞིན་ཡོད་པ་དང་། ཉེ་ལམ་ལས་གཞི་དེའི་རྫས་འགྱུར་སྤྱད་པའི་དུག་ཆུ་ཤོར་ཏེ་ཉ་མང་པོ་ཤི་ཡོད་པ་མ་ཟད། ས་གནས་དེའི་མི་ཕྱུགས་ལའང་ཉེན་ཁ་ཆེན་པོ་ཆགས་ཡོད་སྟབས། ཟླ་འདིའི་ཚེས་ ༤ ཉིན་ས་གནས་དེའི་མང་ཚོགས་ཚོས་ཕ་ས་ཕ་ཡུལ་ལ་གཏོར་བརླག་གཏོང་མི་ཆོག་པ་དང་། ཁོར་ཡུག་སྲུང་སྐྱོབ་བྱེད་དགོས་པ་བཅས་ཀྱི་རེ་འདུན་འོག་ཞི་བའི་ངོ་རྒོལ་བྱས་ཡོད་སྟབས། དར་མདོ་རྫོང་སྲིད་གཞུང་གི་མངགས་བཀོད་ལྟར། དྲག་མཚོན་ཐོགས་པའི་ཉེན་རྟོག་པ་མང་པོས་མང་ཚོགས་བསྐོར་ཏེ་དྲག་གནོན་བྱེད་རྒྱུར་གྲ་སྒྲིག་བྱེད་བཞིན་ཡོད་འདུག