རྒྱ་གར་ལྷོ་ཕྱོགས་དཔལ་ལྡན་རྒྱུད་སྨད་གྲྭ་ཚང་དུ་ལོ་ལྟར་འཚོགས་བཞིན་པའི་དབྱར་ཀའི་གུང་གསེང་སྐབས་འཚོགས་བཞིན་པའི་སློབ་ཕྲུག་ཚོའི་བོད་ཡིག་ཟུར་སྦྱོང་འཛིན་གྲྭ་དེ་མགོ་འཛུགས་གནང་ཡོད་འདུག
ཟླ་འདིའི་ཚེས་ ༦ ཉིན་ནས་བཟུང་། རྒྱ་གར་ལྷོ་ཕྱོགས་ཧུན་སུར་རབས་རྒྱས་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་རྒྱུད་སྨད་གྲྭ་ཚང་གི་གངས་ཅན་རིག་གནས་སློབ་གྲྭ་རུ། རྒྱ་གར་བོད་སློབ་འཛིན་ཚོགས་ཁྱབ་ཁོངས་ཀྱི་བོད་པའི་སློབ་ཕྲུག་ཚོར་དབྱར་ཀའི་གུང་གསེང་དང་བསྟུན་ཏེ། ལོ་ལྟར་གོ་སྒྲིག་གནང་བཞིན་པའི་སློབ་ཁྲིད་འཛིན་གྲྭ་སྐབས་དྲུག་པ་དེ་མགོ་འཛུགས་གནང་ཡོད་འདུག
འདི་ལོའི་ཟུར་སྦྱོང་འཛིན་གྲྭར་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་ནས་སློབ་ཕྲུག་ ༥༠ དང་སྦེལ་ཀོབ་ནས་སློབ་ཕྲུག་ ༢༠ ། ཧུན་སུར་ནས་སློབ་ཕྲུག་ ༩༠ བཅས་འཛིན་རིམ་ལྔ་པ་ནས་བཅུ་གཉིས་བར་གྱི་སློབ་ཕྲུག་ཁྱོན་ ༢༠༠ ལ་ཉེ་བ་ཡོད་འདུག ཐེངས་འདིའི་ཟུར་སྦྱོང་དེ་ཟླ་བ་རྗེས་མའི་ཚེས་ ༦ ཉིན་བར་དུས་ཡུན་ཟླ་བ་གཅིག་ཡིན་པ་དང་། དེའི་རིང་བོད་ཀྱི་སྐད་ཡིག་དང་རིགས་ལམ། ནང་ཆོས་ངོ་སྤྲོད་སོགས་གནང་རྒྱུ་དང་ཕྱི་དྲོར་རིགས་ལམ་གྱི་རྩོད་པ་སོགས་གནང་འཆར་ཡོད་པ་རེད།
གངས་ཅན་རིག་གནས་སློབ་གྲྭའི་སློབ་དགེ་ཡོན་ཏན་ལགས་ཀྱིས་གསར་འགོད་པར་འགྲེལ་བརྗོད་གནང་བ་ལྟར་ན། ཟུར་སྦྱོང་འཛིན་གྲྭ་འདིའི་སློབ་ཁྲིད་བྱེད་ཐབས་ནི། འཛིན་རིམ་ཁག་གསུམ་ལ་ཆ་བགོས་ཀྱིས་སློབ་འཁྲིད་གནང་གི་ཡོད་པ་མ་ཟད། ཉིན་དང་པོའི་དབུ་འཛུགས་སྟེང་སློབ་སྤྱི་དང་དགེ་རྒན་ཚོས་སྒྲིག་ལམ་ཀུན་སྤྱོད་སོགས་ཉིན་རེའི་བྱེད་སྒོ་ཁག་ངོ་སྤྲོད་དང་རྒྱུད་སྨད་གྲ་ཚང་ལ་མཆོད་མཇལ་སོགས་གནང་ཡོད་འདུག
ཁོང་གིས་མུ་མཐུད་དུ་ངོ་སྤྲོད་གནང་བར། རྒྱུད་སྨད་གྲ་ཚང་གངས་ཅན་རིག་གནས་སློབ་གྲྭའི་བོད་ཀྱི་རིག་གནས་ཟུར་སྦྱོང་འཛིན་གྲྭ་འདི་༧གོང་ས་མཆོག་གི་བཀའ་དགོངས་ལྟར་ ༢༠༡༠ ལོ་ནས་དབུ་འཛུགས་ཀྱིས་ད་བར་ལོ་ངོ་དྲུག་འགྲོ་བཞིན་ཡོད་དང་། དབྱར་ཀའི་གུང་གསེང་སྐབས་བོད་སློབ་འཛིན་ཚོགས་ཁྱབ་ཁོངས་བོད་པའི་སློབ་གྲྭ་ཁག་གི་སློབ་ཕྲུག་ཚོར་ཉིན་ ༥༠ རིང་སློབ་འཁྲིད་དང་། དགུན་ཁའི་གུང་གསེང་སྐབས་བོད་ཕྲུག་ཁྱིམ་སྡེའི་ཁྱབ་ཁོངས་སློབ་གྲྭ་ཁག་གི་སློབ་ཕྲུག་ཚོར་སློབ་འཁྲིད་གནང་གི་ཡོད་པ་མ་ཟད། སློབ་རྒྱུན་རིང་གི་ཞལ་ལག་དང་བཞུགས་གནས་ཡོངས་རྫོགས་རིན་མེད་ཐོག་གོ་སྒྲིག་གནང་གི་ཡོད་འདུག
རྒྱ་གར་ལྷོ་ཕྱོགས་གསར་འགོད་པ་དོན་གྲུབ་བཀྲ་ཤིས།
གུང་གསེང་སྐབས་བོད་ཡིག་སྦྱོངས་ཨཱ།