རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་ལ་རྟོགས་ཞིབ་བྱ་རྒྱུ་ནི་ཁྲིམས་འགལ་ཡིན་ལུགས་བཤད་དེ་འཇར་མན་གྲོས་ཚོགས་ཀྱི་སྐུ་ཚབ་བོད་ནང་བསྐྱོད་རྒྱུ་བཀག་འགོག་བྱས་ཡོད་འདུག
ཁ་སང་འཇར་མན་རྒྱལ་ཡོངས་བརྙན་འཕྲིན་ཁང་ (DW) གིས་གནས་ཚུལ་སྤེལ་བ་ལྟར་ན། འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་འགན་འཛིན་སྐུ་ཞབས་མེ་ཆལ་བྷ་རན་ཌི་ (Michael Brand) ཞུ་བ་ཞིག་གིས་རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སྐྱོན་བརྗོད་བྱས་སྟབས་པེ་ཅིན་གཞུང་གིས་ཁོ་རྒྱ་ནག་ནང་བསྐོར་བསྐྱོད་བྱེད་དུ་བཅུག་མེད་སྐོར་བརྗོད་འདུག
སྐུ་ཞབས་བྷ་རན་ཌི་ལགས་ཀྱིས་རྒྱ་ནག་གཞུང་ཚབ་ཁང་གིས་ང་ལ་བཙན་ཤུགས་ཀྱིས་ངའི་དྲ་ཚིགས་སྟེང་བཀོད་པའི་བོད་ནང་གི་གནས་ཚུལ་ཁག་ནག་གསུབ་དགོས་ཟེར། མི་སྒེར་གྱི་དྲ་ཚིགས་ལ་གང་འདོད་དུ་ཞིབ་བཤེར་ཆོག་གི་མ་རེད། རྒྱ་ནག་གཞུང་གི་བཙན་སྐུལ་དེ་ནི་རྒྱུ་མཚན་གནས་ལུགས་མེད་པ་ཞིག་རེད། རྒྱ་ནག་གཞུང་གིས་ནམ་རྒྱུན་ང་ཚོའི་གྲོས་ཚོགས་ཀྱི་ཚོགས་ཆུང་ཚོང་འབྲེལ་ཆེད་རྒྱ་ནག་ནང་འགྲོ་འོང་བྱེད་དུ་འཇུག་གི་ཡོད་པ་མ་རེད། མ་ཟད་རྒྱ་ནག་གཞུང་ཚབ་ཁང་སྔར་བས་སྡུག་པོ་ཆགས་འདུག ཨུ་རུ་སུ་དང་ཊུར་ཀེ རྒྱ་ནག་ལྟ་བུའི་སྲིད་གཞུང་ཁག་གིས་མི་སྒེར་གྱི་གནས་འཕྲིན་བརྒྱུད་ལམ་ཁག་བཀག་སྡོམ་དང་ཞིབ་བཤེར་དགོས་པའི་བཙན་སྐུལ་དེ་འདྲ་ང་ཚོས་ངོས་ལེན་བྱེད་ཐབས་མི་འདུག སྤྱིར་འགྲོ་བ་མིའི་ཐོབ་ཐང་གི་གནད་དོན་དེ་རྒྱ་ནག་ནང་ཁུལ་གྱི་དོན་དག་ཙམ་མིན་ནའང་། པེ་ཅིན་གཞུང་གི་དམ་དྲག་འོག་རྒྱ་ནང་འགྲོ་བ་མིའི་ཐོབ་ཐང་གི་གནད་དོན་ལ་རྟོགས་ཞིབ་བྱ་ཐབས་མི་འདུག རྒྱ་ནག་གཞུང་ཚབ་ཁང་གིས་ང་ཚོ་བོད་ནང་བསྐོར་བསྐྱོད་ལ་བཀག་སྡོམ་བྱས་ཏེ་ཡང་ནས་བསྐྱར་དུ་བོད་ནང་བསྐྱོད་པ་ནི་ཁྲིམས་འགལ་ཡིན་ལུགས་ནན་བཤད་བྱེད་ཀྱི་འདུག དེ་ཐབས་སྐྱོ་བོ་རེད། ཅེས་སོགས་བརྗོད་འདུག
རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་ཀེ་མུ་ལིར་ (Kai Mueller) ཞུ་བ་ཞིག་གིས་རྒྱ་ནག་གཞུང་ཚབ་ཁང་གིས་བོད་ནང་བསྐོར་བསྐྱོད་བྱ་རྒྱུ་ནི་ཁྲིམས་འགལ་འཇིགས་སྐུལ་ཡིན་ལུགས་བཤད་པ་དེ་པེ་ཅིན་གཞུང་གིས་བོད་ནང་འགྲོ་བ་མིའི་ཐོབ་ཐང་གི་གནད་དོན་ཐད་ཀྱི་སྐྱོན་བརྗོད་རིགས་འགོག་པའི་འཐབ་ཇུས་ཤིག་ཡིན་སྐོར་བརྗོད་འདུག
གནས་ཚུལ་ལྟར་ན། ཕྱི་ཟླ་ ༥ བའི་ཟླ་མཇུག་ཙམ་ནང་འཇར་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་བོད་ནང་བསྐོར་བསྐྱོད་བྱ་འཆར་ཡོད་ཀྱང་། རྒྱ་ནག་གཞུང་ཚབ་ཁང་གིས་སྐུ་ཚབ་ཚོགས་ཆུང་དེ་བོད་ནང་བསྐྱོད་རྒྱུ་བཀག་འགོག་བྱེད་ཀྱི་ཡོད་སྟབས། འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་འགན་འཛིན་སྐུ་ཞབས་མེ་ཆལ་བྷ་རན་ཌི་ལགས་ཀྱིས་འཇར་མན་ཕྱི་སྲིད་བློན་ཆེན་ས་ཊིན་མིར་ (Steinmeier) ལ་དཀའ་རྙོག་དེའི་ཐད་འགྲེལ་བརྗོད་དགོས་པའི་འབོད་སྐུལ་ཞུས་ཡོད་པ་རེད། མ་ཟད་འཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་དེས་ལོ་མང་རིང་བོད་ནང་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་ལ་རྟོགས་ཞིབ་བྱ་འཆར་ཡོད་ཀྱང་། རྒྱ་ནག་གཞུང་གིས་དེ་དོན་ངོས་ལེན་བྱེད་ཀྱི་མེད་འདུག
གསར་འགོད་པ། པདྨ་རྒྱལ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
