རྒྱ་ནག་གི་དཔོན་པོ་ཚོར་གུས་ཞབས་མི་འདུག་ཟེར།

དབྱིན་ཇིའི་རྒྱལ་མོ་ཨེ་ལི་ཛ་བྷི་ཐི་(Elizabeth II)ལགས་ཀྱིས་རྒྱ་ནག་གཞུང་གི་དཔོན་རིགས་ཚོའི་གུས་མེད་ཀྱི་བྱ་སྤྱོད་ལ་སྐྱོན་བརྗོད་གནང་འདུག

དབྱིན་ཡུལ་གྱི་གསར་འགྱུར་བརྒྱུད་ལམ་ཆེ་ཁག་ནས་གནས་ཚུལ་སྤེལ་བ་ལྟར་ན། ཕྱི་ཚེས་ ༡༠ ཉིན་གྱི་དབྱིན་ཇིའི་རྒྱལ་མོའི་ཕོ་བྲང་གི་ལྡུམ་རའི་འདུ་འཛོམས་ཤིག་གི་སྟེང་། རྒྱལ་མོ་ཨེ་ལི་ཛ་བྷི་ཐི་ལགས་དང་ལུན་ཏུན་ཉེན་རྟོག་ཕྱོགས་ཀྱི་དཔོན་པོ་ལུ་སི་ཌོར་སི་(Lucy D’Orsi)ལགས་གཉིས་ཀྱིས། འདས་ལོའི་ཞི་ཅིན་ཕིན་གྱི་དབྱིན་ཡུལ་ནང་གི་རྒྱལ་དོན་སྐོར་སྐྱོད་ཐད་གླེང་མོལ་གནང་སྐབས། རྒྱལ་མོ་ལགས་ཀྱིས་རྒྱ་གཞུང་གི་དཔོན་རིགས་ཚོས་རྒྱ་ནག་ཏུ་ཡོད་པའི་དབྱིན་ཇིའི་གཞུང་ཚབ་བྷར་བྷ་ར་ཝུ་ཌི་ཝིར་ཌི་(Barbara Woodward)ལགས་ལ་ཧ་ཅང་གུས་ཞབས་མེད་པའི་སྤྱོད་ཚུལ་བཟུང་བ་བརྗོད་ཡོད་པ་དང་། ལུ་སི་ཌོར་སི་ཡིས་སྐོར་སྐྱོད་དེའི་ཁྲོད་རྒྱ་གཞུང་གིས་མོ་ལ་ཉམས་ཚོད་ཆེན་པོ་ཞིག་བླངས་བ་མ་ཟད། མོ་རང་དང་གཞུང་ཚབ་པ་བྷར་བྷ་ར་ཝུ་ཌི་ཝིར་ཌི་གཉིས་ལ་རྒྱ་ནག་གི་དཔོན་རིགས་ཚོས་སྐོར་སྐྱོད་ཀྱི་ལས་རིམ་ཕྱིར་འཐེན་བྱོས་ཞེས་བརྗོད་པ་དེ་ཧ་ཅང་གུས་ཞབས་མེད་པ་དང་། འབྲེལ་ལམ་ཐབས་ཇུས་མེད་པ་ཞིག་ཏུ་མཐོང་ཡོད་སྐོར་བརྗོད་པ་ན། རྒྱལ་མོ་ལགས་ཀྱིས་ཀྱང་ཐལ་དྲག་པ་ཞིག་ཡིན་སྐོར་གྱི་སྐྱོན་བརྗོད་གནང་ཡོད་པ་རེད།

ད་ལྟ་བར་དུ་ཞི་ཅིན་ཕིན་གྱི་རྒྱལ་དོན་སྐོར་སྐྱོད་དེ་རྒྱ་ནག་གཞུང་དང་དབྱིན་གཞུང་ཕྱོགས་གཉིས་ཀ་ནས་ཧ་ཅང་ལེགས་འགྲུབ་བྱུང་ཡོད་སྐོར་བསྒྲགས་ཡོད་པ་མ་ཟད། དབྱིན་རྒྱའི་འབྲེལ་བ་གསེར་མདོག་གི་དུས་སྐབས་ཤིག་ཏུ་བསླེབས་ཡོད་སྐོར་བརྗོད་ཡོད་པ་རེད། ཐེངས་འདིའི་རྒྱལ་མོ་ལགས་ཀྱི་སྐད་ཆ་བརྒྱུད་ལམ་དུ་ཁྱབ་རྗེས། རྒྱ་ནག་གི་ཕྱི་འབྲེལ་མགྲིན་ཚབ་པར་དབྱིན་རྒྱའི་འབྲེལ་བ་དངོས་གནས་གསེར་མདོག་གི་དུས་སྐབས་ཤིག་ཏུ་བསླེབས་ཡོད་མེད་དོགས་འདྲི་བྱེད་སྐབས། རྒྱ་ནག་གི་མགྲིན་ཚབ་པས་དཔྱད་བརྗོད་གང་ཡང་བྱས་མེད་པ་རེད།

དབྱིན་རྒྱ་ཕྱོགས་གཉིས་ནས་གསེར་མདོག་གི་འབྲེལ་བ་ཞེས་ཟླ་བ་མང་པོར་བཤད་བསྡད་པ་དེ། པེ་ཅིན་གཞུང་དང་ལུན་ཏུན་གཞུང་གཉིས་ཀྱི་ལྷོ་རྒྱ་ནག་རྒྱ་མཚོའི་གླེང་ཕྲན་འཛུགས་སྐྲུན་ལས་དོན་དང་ཧོང་ཀོང་གི་གནད་དོན་སོགས་སུ་འབྲེལ་བ་ཡོད་པ་རེད། ཞི་ཅིན་ཕིན་གྱི་སྐོར་སྐྱོད་ཟིན་རྗེས་བརྒྱུད་ལམ་ཁག་ཏུ་དཔྱད་རྩོམ་དང་ཟུར་ཟའི་རི་མོ་སྣ་ཚོགས་སྤེལ་ཏེ་ཞི་ཅིན་ཕིན་གྱི་ཁེངས་རློམ་གྱིས་དབྱིན་ཡུལ་གྱི་རྒྱལ་མོ་བཅས་རྡོག་རྫིས་བཏང་ཡོད་སྐོར་བརྗོད་ཡོད་པ་དང་། ཐེངས་འདིའི་རྒྱལ་མོ་ལགས་ཀྱི་སྐད་ཆ་དེས་རྒྱ་ནག་གཞུང་ལ་ཕོག་ཐུག་བཏང་ཡོད་པ་བརྗོད་མི་དགོས་ཀྱང་། ཕྱི་ལོ་ ༡༩༩༧ ལོར་དབྱིན་གཞུང་གིས་ཧོང་ཀོང་རྩིས་སྤྲོད་བྱས་རྗེས་ཀྱི་རྒྱལ་སྲས་ཆར་ལི་ལགས་ཀྱི་སྐད་ཆ་དང་བསྡུར་ན། རྒྱལ་མོའི་སྐད་ཆ་དེར་དེ་ཙམ་གྱིས་རྣོ་ངར་མེད་སྐོར་རྗོད་ཀྱི་འདུག

གསར་འགོད་པ། པདྨ་མཚོ།