སྤྱི་འཐུས་གངས་ལྷ་མོ་ལགས་ནས་བོད་སྒྱུར་བྱས་པའི་འཛམ་གླིང་ཤར་ནུབ་ཀྱི་བུད་མེད་གྲགས་ཅན་ ༢༡ གི་མི་ཚེའི་ལོ་རྒྱུས་སྐོར་གྱི་༼འཛམ་གླིང་ཐོག་གི་བུད་མེད་གྲགས་ཅན༽ཞེས་པའི་དེབ་ཅིག་དབུ་འབྱེད་གནང་སོང་།
དེ་རིང་ཕྱི་དྲོའི་ཆུ་ཚོད་ ༤ པ་ཐོག་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། བོད་མི་མང་སྤྱི་འཐུས་གངས་ལྷ་མོ་ལགས་ཀྱིས་རྒྱ་ཡིག་ནས་བོད་སྒྱུར་བྱས་པའི་༼འཛམ་གླིང་ཐོག་གི་བུད་མེད་གྲགས་ཅན༽ཞེས་པའི་དཔེ་དེབ་ཅིག་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་དབུ་འབྱེད་གནང་བ་དང་འབྲེལ། བཙན་བྱོལ་བོད་མིའི་རྩོམ་པ་པོ་དང་ལྷག་པར་དུ་གསར་འགོད་པ་ཚོས་སྤྱི་ཚོགས་ཀྱི་དངོས་ཡོད་གནས་ཚུལ་སྤེལ་ཏེ་འབྲེལ་ཡོད་ནས་ཤེས་ཐུབ་པ་ཞིག་དང་། རྒྱལ་སྤྱིའི་ཐོག་ནས་བོད་ཀྱི་བདེན་དོན་ཤེས་རྟོགས་ཐུབ་པ་ཞིག་བཟོ་དགོས་པ་དེ་ལས་འགན་གཙོ་བོ་ཡིན་སྐོར་གསུངས་སོང་།
སྤྱི་འཐུས་གངས་ལྷ་མོ་ལགས་ཀྱིས་དཔེ་དེབ་དེ་བོད་སྒྱུར་བྱས་པའི་དགོས་དམིགས་སྐོར་བརྗོད་སྐབས། ངས་དེབ་འདི་བསྒྱུར་ནས་ག་རེ་བྱེད་པ་ཡིན་ཟེར་ན། དངོས་གནས་སྤྱི་ཚོགས་ནང་བུད་མེད་ཐོག་ཡིན་གཅིག་མིན་གཅིག་གིས་བུད་མེད་ཀྱི་ཐོབ་ཐང་བཤད་དགོས་ཀྱི་ཡོད་པ་མ་རེད། སྐུ་ངོ་རྒྱ་རི་སྒྲོལ་མ་མཆོག་ནང་བཞིན་སྤྱི་ཚོགས་ནང་ཁ་ཡོད་ལག་ཡོད་ཀྱིས་ལས་ཀ་བྱེད་མཁན་ཚོ་མིག་དཔེ་ལྟ་ས་རེད། དེབ་འདིའི་ནང་བུད་མེད་ ༢༡ ཡོད་པ་དང་། ཁོང་རང་ཚོ་ལོ་རྒྱུས་ཀྱི་ཐོག་ནས་ཡིན་ནའང་ཁྱིམ་ཚང་རྫིག་པོ་དང་། རྒྱུ་དཔལ་འབྱོར་ཆེན་པོ། བུ་མོ་མཛེས་མ་རྐྱང་རྐྱང་གང་ཡང་མ་རེད། ཡིན་ནའང་། བུད་མེད་ ༢༡ དེས་སོ་སོའི་ཆེད་ལས་དང་ཁོར་ཡུག་སོགས་ལ་བརྟེན་ནས་ཧུར་ཐག་འབད་ཐག་བྱས་ཏེ་གྲགས་པ་འབར་ནས་འཛམ་གླིང་དབང་བསྒྱུར་བྱས་པ་རེད་ཟེར་ནའང་འུར་དུ་འགྲོ་ཡི་མ་རེད་བསམ་གྱི་འདུག དེར་བརྟེན་བོད་པའི་བུད་མེད་ཚོས་ཁོང་ཚོའི་ཐོག་ནས་ཚང་མ་ཚུར་ལེན་དགོས་པ་རེད་ཟེར་གྱི་མེད་ཀྱང་། སྙིགས་དོར་བཅུད་ལེན་གྱི་ཐོག་ནས་སོ་སོའི་སེམས་ལ་སྤོབས་པ་བསྐྲུན་ཐབས་དང་། སོ་སོའི་བློ་སྒོ་འབྱེད་པར་ཐབས་ལམ་འདྲ་པོ་དེ་ཚུར་ལེན་ཐུབ་པའི་རེ་བ་ཤུགས་ཆེན་པོ་ཞིག་བཅངས་ཏེ་དེབ་འདི་བསྒྱུར་བ་ཡིན་ལ། མ་འོངས་པར་བོད་པའི་བུད་མེད་ཚོར་ཏོག་ཙམ་ཕན་ཐོགས་ཡོང་ན་བསམ་ནས་བོད་སྒྱུར་བྱས་པ་ཡིན། ཞེས་དང་། ཡང་མོས་བོད་རྒྱ་དབྱིན་གསུམ་གྱི་གཙོས་ཡིག་རིགས་འདྲ་མིན་ཐོག་རྩོམ་ཡིག་འབྲི་མཁན་གྱི་རྩོམ་པ་པོས་རང་ཉིད་རྩོམ་པ་པོ་ཚད་ལྡན་ཞིག་ཡོང་བར་འབད་བརྩོན་བྱེད་དགོས་ལ། རྩོམ་ཡིག་འབྲི་བ་ནི་སོ་སོའི་ཉིན་རེའི་འཚོ་བའི་རྒྱགས་ཕྱེ་ལྟ་བུ་ཞིག་ཏུ་རྩིས་ནས་དངོས་ཡོད་གནས་སྟངས་ཡོངས་རྫོགས་ཡིག་ཐོག་ཏུ་ཕབ་ཐབས་བྱེད་དགོས་པ་མ་ཟད། རྒྱལ་སྤྱིའི་སྡིངས་ཆར་ཁ་ཕྱོགས་ཐབས་ལ་འབད་བརྩོན་བྱེད་དགོས་སྐོར་དང་། དེ་བཞིན་བོད་ཀྱི་ལོ་ཙཱ་བ་ནི་ཕ་སྐད་ཕྱུག་པོ་བཟོ་མཁན་གཙོ་བོ་དེ་ཡིན་པ་ངོས་ཟིན་པའི་ཐོག་ནས་དམིགས་ཡུལ་ངེས་ཅན་བཟུང་སྟེ། གཞུང་དམངས་གཉིས་ནས་འཕྱར་གྲུ་མཉམ་འདེགས་བྱེད་ཐུབ་ན་གྲུབ་འབྲས་ཐོན་པར་རེ་བ་ཆེན་པོ་ཡོད་སྐོར་བཅས་དོན་ཚན་ལྔ་ཡི་ཐོག་ནས་འབོད་སྐུལ་གནང་སོང་།
ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་གངས་ལྷ་མོ་ལགས་ཆབ་སྲིད་བཙོན་ཟུར་ཞིག་ཡིན་པ་དང་། བོད་ནང་རང་ཉིད་ཀྱི་ལུས་སྲོག་བདེ་སྐྱིད་དང་བཅས་པ་བློས་བཏང་སྟེ། རྒྱ་གཞུང་གི་བཙན་གནོན་འོག་སོ་སོའི་མི་རིགས་དང་རྒྱལ་ཁབ་ཀྱི་ཆེད་དུ་ཕྱག་ལས་གནང་མཁན་དཔའ་བོ་དཔའ་མོ་ཚོར་སྙིང་ཐག་པ་ནས་གུས་འདུད་ཆེན་པོ་ཡོད་ལ། ཁོང་རྣམ་པ་ཚོའི་ནང་ནས་ཉུང་ཤས་ཤིག་བཙན་བྱོལ་དུ་བསླེབས་ཐུབ་ཡོད་པ་རྣམས་ནས་མུ་མཐུད་བོད་སྤྱི་པའི་རྩ་དོན་ཆེད་ཁ་ཡོད་ལག་ཡོད་ཀྱིས་ཕྱག་ལས་གནང་བཞིན་པ་དེ། རང་རེའི་སྤྱི་ཚོགས་ཀྱི་ནུས་པ་དང་གཟི་བརྗིད་ཅིག་ལ་ངོས་འཛིན་གནང་བཞིན་ཡོད་པ་དང་། གངས་ལྷ་མོ་ལགས་ལྟ་བུ་ཡིན་ན། བཙན་བྱོལ་དུ་བསླེབས་རྗེས་ཀྱང་དགུ་བཅུ་གསུམ་ལས་འགུལ་ཚོགས་པ་སོགས་ཀྱི་ནང་ཕྱག་ལས་གནང་སྟེ་སྤྱི་ཚོགས་ནང་འགན་འཁུར་ཡོད་པ་དང་། ལྷག་པར་དུ་མི་མང་གི་ངོས་ནས་འོས་འདེམས་བྱས་ཏེ་བོད་མི་མང་སྤྱི་འཐུས་ནང་ཐུགས་འགན་བཞེས་ཐུབ་པ་བྱུང་བ་དེ་ཚོ་ཚང་མ་བོད་ཀྱི་བུད་མེད་ཚོས་སྙིང་སྟོབས་སྐྱེད་སའི་ཡུལ་ཞིག་ཏན་ཏན་ཆགས་ཡོད་སྐོར་གསུངས་བ་དང་འབྲེལ་ཁོང་མོས། ས་ག་ཟླ་བའི་ཚེས་བཅུ་སྟེ་འདི་འདྲའི་ཉིན་མ་བཟང་པོ་ཞིག་ལ། གངས་ལྷ་མོ་ལགས་ནས་བུད་མེད་ཅིག་ཡིན་པའི་ངོས་ནས་འཛམ་གླིང་ནང་གྲགས་ཅན་གྱི་བུད་མེད་ ༢༡ བདམས་ཏེ། ཁོང་ཚོའི་ལོ་རྒྱུས་དེ་ཚོ་དེབ་ཀྱི་ངོ་བོའི་ཐོག་བསྒྱུར་བ་དང་། དེ་ཡང་ང་ཚོའི་མ་སྐད་ནང་ཚུར་བསྒྱུར་ནས་ང་རང་ཚོའི་སྤྱི་ཚོགས་ནང་བསླེབས་ཐུབ་པ་ཡིན་ན། དངོས་གནས་དྲང་གནས་དཔེ་ལྟ་ས་འདྲ་པོ་ཞིག་ཆགས་ཏེ། སྤྱི་ཚོགས་ནང་སེམས་འགུལ་ཐེབས་པའི་ཕན་ཐོགས་ཤིག་ཡོང་གི་རེད་བསམ་ནས་བོད་སྒྱུར་གནང་བ་དེ་བྱ་བ་ཆེན་པོ་རེད་བསམ་གྱི་འདུག་པས། གངས་ལྷ་མོ་ལགས་ནས་ལོ་གཅིག་གི་སྔོན་ནས་འཆར་གཞི་བསྒྲིགས་པ་དང་དེ་ནས་དཀའ་ངལ་མང་པོ་ཞིག་ཏན་ཏན་བྱུང་ཡོད་པ་རེད། དེབ་ཅིག་འདོན་རྒྱུ་དེ་ལས་སླ་པོ་མ་རེད། དེ་རིང་དངོས་སུ་སོ་སོའི་བསམ་པ་ནང་བཞིན་བྱས་ཏེ་འགྲུབ་ཐུབ་པ་བྱུང་བ་དེར་ངས་བཀྲ་ཤིས་བདེ་ལེགས་ཞེས་ཞུ་ཡི་ཡོད་ལ། ང་རང་ཚོའི་སྤྱི་ཚོགས་ནང་གི་ཀློག་མཁན་ཚོས་དགོངས་པ་བཞེས་སྟངས་ཡིན་ནའང་བུད་མེད་དེ་ཚོས་གནང་བ་ནང་བཞིན་ང་ཚོས་བྱེད་མ་ཐུབ་པ་མི་འདུག་བསམ་ནས་སེམས་ཤུགས་སྐྱེད་དགོས་པ་རེད། རྒྱལ་ཁབ་ཅིག་གི་ལོ་རྒྱུས་ནང་བལྟས་པ་ཡིན་ན། ང་ཚོ་ད་ལྟ་ཛ་དྲག་པའི་དུས་སྐབས་ཤིག་ཏུ་གནས་ཡོད་པ་དངོས་འབྲེལ་ཆགས་བསྡད་ཡོད་སྟབས། སོ་སོའི་རྒྱལ་ཁབ་ཀྱི་འཐབ་རྩོད་ཆེད་ཕྱག་ལས་གནང་བར་ཏན་ཏན་ཕོ་མོ་འདྲ་མཉམ་གྱི་ཐོག་ནས་འགན་མཉམ་འཁུར་བྱེད་དགོས་པ་དེ་གལ་ཆེན་པོ་ཞེ་དྲགས་ཆགས་བསྡད་ཡོད་པ་རེད། དེར་བརྟེན་དེབ་འདིས་ཏན་ཏན་ཕན་ཐོགས་ཡོང་གི་རེད་བསམ་པའི་རེ་བ་ཆེན་པོ་བྱེད་ཀྱི་ཡོད་ལ། ཚང་མས་ཐུགས་སྣང་གནང་རོགས། ཞེས་གསུངས་སོང་།
ཡང་བཀའ་བློན་མཆོག་ནས་བཙན་བྱོལ་བོད་མིའི་རྩོམ་པ་པོ་དང་གསར་འགོད་པ་ཚོར་དྲན་སྐུལ་གནང་དོན། དམངས་གཙོའི་སྤྱི་ཚོགས་ནང་རྩོམ་པ་པོ་ཟེར་ན་རེད། ལྷག་པར་དུ་གསར་འགྱུར་བརྒྱུད་ལམ་གྱི་འགན་འཁུར་དང་ནུས་པ་དེ་ཤུགས་ཆེན་པོ་ག་ཚོད་ཡོད་མེད་ང་རང་ཚོ་ཚང་མས་མཁྱེན་གསལ་རེད། དེར་ངས་འགྲེལ་བཤད་ཞེ་དྲགས་ཤིག་རྒྱག་དགོས་པ་མ་རེད། རང་བཙན་བརྩོན་ལེན་བྱེད་པ་དང་རྒྱལ་ཁབ་ཀྱི་ཆབ་སྲིད་ལ་འགྱུར་འགྲོས་ཆེན་པོ་བྱུང་བའི་སྐབས་དེར། གསར་འགྱུར་བརྒྱུད་ལམ་ནང་ཕྱག་ལས་གནང་མཁན་གྱི་ནུས་པའི་ཐོག་ནས་འགྱུར་འགྲོས་ཆེན་པོ་ཕྱིན་ཡོད་པ་དེ་གཟིགས་རྒྱུ་ཡོད་པ་ཞིག་དང་། ལོ་རྒྱུས་ནང་ཀློག་རྒྱུ་ཡོད་པ་དངོས་འབྲེལ་ཆགས་བསྡད་ཡོད་པ་རེད། དེར་བརྟེན་ངས་སྔོན་མ་ཐེངས་ཁ་ཤས་ལ་ཞུས་མྱོང་། ང་རང་ཚོ་བཙན་བྱོལ་ནང་དུ་ཡོད་སྐབས་གསར་འགྱུར་བརྒྱུད་ལམ་ཁག་ཏུ་ཕྱག་ལས་གནང་མཁན་ཚོར་དངོས་གནས་དྲང་གནས་ལས་འགན་ཆེན་པོ་ཞེ་དྲགས་ཡོད་པ་རེད། དངོས་འབྲེལ་གནས་ཚུལ་གང་ཡིན་པ་དེ་ང་རང་ཚོའི་སྤྱི་ཚོགས་ནང་གི་འབྲེལ་ཡོད་ཚོས་མཁྱེན་ཐུབ་པ་བྱེད་དགོས་པ་དེ་གཅིག་ཆགས་ཀྱི་ཡོད་པ་རེད། གཉིས་པ་དེ་ག་རེ་རེད་ལབ་ན། བོད་ཀྱི་རྩ་དོན་འགྲུབ་པའི་ཆེད་དུ་བོད་ཀྱི་བདེན་པའི་གནས་སྟངས་འཛམ་བུ་གླིང་གིས་མཁྱེན་པ་བཟོ་ཐུབ་དགོས་པ་དེ་གཙོ་བོ་ཞིག་ཆགས་བསྡད་ཡོད་པ་རེད། ཅེས་སོགས་གསུངས་སོང་།
ཤོག་གྲངས་ ༤༢༩ ཡོད་པའི་༼འཛམ་གླིང་ཐོག་གི་བུད་མེད་གྲགས་ཅན་༽ཞེས་པའི་དཔེ་དེབ་འདི་དྲ་ལམ་ནས་གནས་ཚུལ་འདེམས་སྒྲུག་བྱས་ཏེ་བོད་སྒྱུར་གནང་བ་ཞིག་ཡིན་ལ། འདིའི་ནང་འཛམ་གླིང་ཤར་ནུབ་ཀྱི་ཆབ་སྲིད་དབུ་ཁྲིད་དང་རྩོམ་པ་པོ། ཚན་རིག་པ། ཆོས་ལུགས་མི་སྣ་སོགས་ཁྱོན་སྙན་གྲགས་ཅན་གྱི་བུད་མེད་ ༢༡ གི་ཀྱག་ཀྱོག་གི་མི་ཚེའི་ལོ་རྒྱུས་དང་དཀའ་སྡུག་ཆེ་བའི་འཐབ་རྩོད་ཀྱི་ལམ་བུ། ཟུང་ཁྲག་དང་འདྲིས་པའི་མཛད་རྗེས་བཅས་བཀོད་འདུག
གསར་འགོད་པ། པདྨ་མཚོ།
