ལི་ལི་གསར་འབྱོར་བོད་མིའི་གྲོང་སྡེ་དབུ་འབྱེད་གནང་སོང་།

དེ་རིང་སྦིར་གསར་འབྱོར་བོད་མིའི་གྲོང་སྡེ་གསར་པ་དབུ་འབྱེད་དང་སྦྲགས་ནང་སྲིད་བཀའ་བློན་མཆོག་ནས་སྡོད་ཁང་གསར་པའི་ནང་འདུག་མཁན་ཚོས་ཁང་པར་བདག་པོ་ཡག་པོ་རྒྱག་རྒྱུ་གལ་ཆེན་པོ་ཡིན་པ་དང་། ནམ་ཞིག་ལ་ཁང་པ་དེ་མ་དགོས་པ་ཡིན་ན་ཕྱིར་བོད་མིའི་སྒྲིག་འཛུགས་ལ་རྩིས་སྤྲོད་དགོས་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༠ པ་ཙམ་ལ་སྦིར་གསར་འབྱོར་བོད་མིའི་གྲོང་སྡེ་གསར་པའི་སྤང་ཐང་དུ། ལི་ལི་གྲོང་སྡེ་གསར་པ་འཛུགས་སྐྲུན་ལེགས་འགྲུབ་བྱུང་བའི་དབུ་འབྱེད་ཀྱི་མཛད་སྒོ་ཚོགས་སོང་བ་དང་། མཛད་སྒོའི་ཐོག་སྲིད་སྐྱོང་བློ་བཟང་སེང་གེ་མཆོག་དང་ནང་སྲིད་བཀའ་བློན་རྒྱ་རི་སྒྲོལ་མ་མཆོག རི་མགོ་མཆོག་སྤྲུལ་རིན་པོ་ཆེ། དེ་བཞིན། བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས་ཀྱི་གཙོས་སྤྱི་འཐུས་རྣམ་པ་དང་། སྦིར་ཁུལ་གྱི་གཞིས་ཆགས་ཁག་གསུམ་གྱི་ས་གནས་མགོ་འཛིན་དང་ལས་བྱེད། ཉེ་འཁོར་དགོན་པ་ཁག་གི་སྐུ་ཚབ་དང་ས་འཐུས་རྣམ་པ། གཞན་ཡང་། སྦིར་གསར་འབྱོར་ཚོགས་པའི་ཚོགས་གཙོ་ཚོགས་ཟུར་དང་ས་གནས་སེར་སྐྱ་མི་མང་བཅས་མི་གྲངས་ ༣༠༠ ཡས་མས་འཛོམས་འདུག

མཛད་སྒོའི་ཐོག་མར་སྲིད་སྐྱོང་བློ་བཟང་སེང་གེ་མཆོག་ནས་གྲོང་སྡེ་གསར་པའི་སྒོ་བྱང་གི་ཡོལ་བ་ཕྱེས་ཤིང་སྒོ་ཆེན་གྱི་དར་སྐུད་གཏུབས་ཏེ་དབུ་འབྱེད་གནང་བ་དང་སྦྲགས། ཁྱིམ་མིའི་གྲངས་འབོར་ལྟར་སྡོད་ཁང་གི་ཆེ་ཆུང་རིམ་པ་བཞི་རུ་དབྱེ་ནས་འཛུགས་སྐྲུན་གནང་ཡོད་པ་རྣམས་ལ་དངོས་སུ་གཟིགས་ཞིབ་གནང་གྲུབ་རྗེས། ཚང་མ་བཞུགས་གྲལ་དུ་ཕེབས་ཏེ་སྐུ་མགྲོན་གཙོ་བོ་རྣམས་ནས་གྲོང་སྡེ་གསར་པའི་འཛུགས་སྐྲུན་དང་འབྲེལ་བའི་གསུང་བཤད་རིམ་པར་གནང་སོང་བ་མ་ཟད། གྲོང་སྡེ་གསར་པའི་སྡེ་ཚན་བཞི་ཡི་ཁང་པའི་ལྡེ་མིག་རྣམས་གསར་འབྱོར་ཚོགས་པའི་ཚོགས་གཙོ་ལགས་ལ་གནང་སོང་། གཞན་ཡང་། མཛད་སྒོ་དང་སྟབས་བསྟུན་སྲིད་སྐྱོང་མཆོག་ནས་གྲོང་སྡེ་གསར་པའི་ཨར་ལས་འཆར་འགོད་པ་དང་ཨར་ལས་བཟོ་སྐྲུན་པ་རྒྱ་གར་བ་གཉིས་ལ་ཐུགས་རྗེ་ཆེ་ཞུའི་གསོལ་རས་གནང་སོང་ལ། དེ་བཞིན་རི་མགོ་མཆོག་སྤྲུལ་རིན་པོ་ཆེ་དང་གསར་འབྱོར་ཚོགས་པའི་ངོས་ནས་སྲིད་སྐྱོང་བློ་བཟང་སེང་གེ་མཆོག་དང་ནང་སྲིད་བཀའ་བློན་རྒྱ་རི་སྒྲོལ་མ་མཆོག ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་བཅས་ལ་ཐུགས་རྗེ་ཆེ་ཞུའི་ཞལ་ཐང་སོགས་ལེགས་འབུལ་ཞུས་སོང་།

མཛད་སྒོའི་ཐོག་ནང་སྲིད་བཀའ་བློན་མཆོག་ནས་གྲོང་སྡེ་གསར་པ་འཛུགས་སྐྲུན་གྱི་ལས་གཞི་ངོ་སྤྲོད་གནང་བ་དང་འབྲེལ་གྲོང་སྡེ་གསར་པའི་ནང་སྡོད་མཁན་ཚོར་འབོད་སྐུལ་ཁག་ཅིག་གནང་དོན། ཁང་པ་འདི་ཚོ་བདག་པོ་ཡག་པོ་རྒྱག་རོགས། དེ་སྔོན་རོགས་ཚོགས་ཁོང་རང་ཚོ་འདིར་ཕེབས་པའི་སྐབས་ལའང་གསུངས་ཡོད་པ་རེད། གཅིག་ནས་གྲོང་སྡེ་འདིའི་མིང་ལ་ལི་ལི་ཞེས་འདོགས་དགོས་དོན་དེ་རོགས་ཚོགས་ཀྱི་དངུལ་ཡོང་སའི་གཞི་ཆེ་ཤོས་ཀྱི་སྦྱིན་བདག་གི་མཚན་ལ་ལི་ལི་ཟེར་གྱི་ཡོད་སྟབས། ང་ཚོས་ཁོང་ལ་དགའ་བསྟོད་ཀྱི་རྣམ་པ་མཚོན་ཆེད་གྲོང་སྡེའི་མིང་ལ་ལི་ལི་ཞེས་བཏགས་པ་ཞིག་ཆགས་ཡོད་པ་རེད། དེ་ནས་རོགས་ཚོགས་ཡོང་སྐབས་ཁྱེད་རྣམ་པ་ཚང་མར་སྡོང་ཁང་སྙིང་རྗེ་བོ་དང་གཙང་མ་བྱས་ནས་ཉར་རོགས་ཞེས་ཞེ་དྲགས་ཞུས་ཡོད་སྟབས། འདི་ལོའི་ཕྱི་ཟླ་ ༡༠ པའི་ཁོང་རྣམ་པ་འདིར་ཆིབས་བསྒྱུར་གནང་གི་རེད། དེ་དུས་ཁོང་ཚོ་ཡིན་ནའང་དངུལ་བཏང་བ་ཡིན་ཏེ་གཏོང་ས་ནོར་མི་འདུག་འགྲིག་འདུག་ཅེས། དེ་སྔོན་ཚོར་བ་བྱུང་བ་ནང་བཞིན་ཞིག་ཁྱེད་རྣམ་པས་ངེས་པར་དུ་ཁོང་ཚོར་བསྐྲུན་ཐུབ་པ་གནང་རོགས་ཞེས་འབོད་སྐུལ་ཞུ་ཡི་ཡོད། གང་ཡིན་ཟེར་ན། རོགས་ཚོགས་དེ་འདི་གཅིག་པུ་མ་རེད་ང་རང་ཚོའི་རོགས་ཚོགས་ཆེན་པོ་ཞིག་རེད། རོགས་ཚོགས་ཚོས་ང་ཚོས་ལས་གཞི་ཡག་པོ་འགྲུབ་ཐུབ་ན་མུ་མཐུད་ང་ཚོར་རོགས་པ་བྱེད་པར་སེམས་ཤུགས་མང་བ་འཕར་གྱི་འདུག ང་ཚོས་རང་བཞིན་གྱིས་ལས་ཀ་བྱེད་སྟངས་མ་འགྲིག་པ་དང་། ཡང་ན་ཁོང་རྣམ་པས་དངུལ་བཏང་བཞག་པ་དེ་ཚོ་བེད་མེད་དུ་ཕྱིན་སོང་བསམ་པ་ཞིག་བྱུང་ན། མ་འོངས་པར་གནོད་སྐྱོན་ཡོང་སྲིད་པ་རེད། དེར་བརྟེན་ཕྱི་ཟླ་ ༡༠ པའི་ནང་ཁོང་ཚོ་ཕེབས་སྐབས་ཁྱེད་རྣམ་པས་དངོས་གནས་དྲང་གནས་འགྲིག་སོང་ཨཱ་བསམ་པའི་ཚོར་བ་ཞིག་ངེས་པར་དུ་བསྐྲུན་ཐུབ་པ་གནང་རོགས་ཞེས་ཞུ་རྒྱུ་ཡིན། དེ་ནས་ད་ལྟ་བར་དུ་དཀའ་ངལ་ཡོད་སྐབས་ཁྱེད་རང་ཚོས་ཚོགས་པ་བཙུགས་ཏེ་རྡོག་གཅིག་ཏུ་སྒྲིལ་ནས་ཡག་པོ་བྱུང་བ་རེད། ད་དོན་དག་འགྲུབ་ཚར་བའི་རྗེས་ལ་ད་དུང་ཁྱེད་རང་ཚོས་དགའ་སྤོབས་ཆེན་པོ་གནང་རོགས་ཞེས་ཞུ་རྒྱུ་ཡིན། ནང་ཁུལ་འཆམ་པོ་བྱས་ན་ཁྱེད་རང་ཚོ་སྐྱིད་པོ་ཡོད་པ་རེད། ནང་ཁུལ་འགྲིག་དང་མ་འགྲིག་བྱས་བསྡད་ན་སྐྱིད་པོ་མེད་པ་ཆགས་འགྲོ་བ་ཡིན་སྟབས། ད་ལྟ་ཁྱེད་རང་ཚོ་ག་འདྲ་ཡོད་པ་ཡིན་ནའང་ནང་ཁུལ་འཆམ་པོ་བྱོས། དེ་ནས་ལི་ལི་གྲོང་སྡེ་འདི་སྡེ་དགེ་ས་གནས་མགོ་འཛིན་གྱི་ཁྱབ་ཁོངས་སུ་ཡོད་པའི་སྡེ་ཚན་ཞིག་ཆགས་ཀྱི་ཡོད་སྟབས། འགྲོ་སྟངས་འགྲོ་ལུགས་གང་ཅིའི་ཐོག་ནས་དེ་ལ་བརྩི་བཀུར་གནང་གི་རེད་དེ། ངས་དེ་རིང་འགན་ཡོད་པའི་ཐོག་ནས་རྣམ་པ་ཚོར་ཞུ་དགོས་པ་གལ་ཆེན་པོ་གཅིག་དེ་ཡིན། མ་གཞི་འབྲེལ་ཡོད་ལས་བྱེད་ཚོས་ཁྱེད་རང་ཚོར་མངགས་ཡོད་པ་རེད་ལ། འགྲེལ་བཤད་བརྒྱབ་ཡོད་པ་རེད་དེ། ཁང་པའི་ནང་སྡོད་མཁན་ཞིག་ལ་ཁང་པ་མི་དགོས་པའི་ཉིན་མོ་དེར་ངེས་པར་དུ་ཁང་པ་གཞུང་ལ་ཚུར་འབུལ་དགོས་པ་རེད། གང་ཡིན་ཟེར་ན། ད་ལྟའི་སྐབས་ལ་ཁྱེད་རང་གི་ཡིན་པ་ནང་བཞིན་གྱི་གནས་སྟངས་ཡོད་པ་དེས་བོད་མི་གཞན་ཞིག་ལ་ཕན་འགྲོ་ངེས་རེད། དེར་བརྟེན་མ་འོངས་པར་ཁྱེད་རང་ཚོ་ཡག་པོ་ཆགས། འདི་ལས་དྲགས་ཀྱི་འགྲོ་ས་དེ་འདྲ་རག་ན་བཀྲ་ཤིས་བདེ་ལེགས་རེད། ཉིན་མོ་དེར་ངེས་པར་དུ་ཁང་པ་ཚུར་གཞུང་ལ་གནང་དགོས་པ་རེད། སོ་སོ་ལྷག་པའི་སྐབས་ལ་ཡིན་དང་ཡིན་ཁང་པ་རྣམས་ཁྱེད་རང་ཚོར་ཕུལ་ཡོད་པ་རེད། ཁྱེད་རང་ཚོའི་ཆེད་དུའང་རེད་ལ། བེད་སྤྱོད་ག་འདྲ་གཏོང་མིན་ཡང་ཁྱེད་རང་ཚོར་རག་ལས་བ་རེད། ཅེས་སོགས་གསུངས་སོང་།

སྲིད་སྐྱོང་མཆོག་གིས་བོད་མིའི་སྒྲིག་འཛུགས་ནས་ཕ་མ་ལྟར་བོད་ནས་ཡོང་བའི་གསར་འབྱོར་བ་ཚོར་གང་ཐུབ་ཅི་ཐུབ་ཀྱིས་གཟིགས་རྟོག་གནང་བཞིན་ཡོད་པའི་སྐོར་གསུང་བཤད་གནང་སྐབས། བོད་ནས་གསར་དུ་འབྱོར་མཁན་ཚོར་ག་དུས་ཡིན་ནའང་ང་རང་དང་ཕྱག་རོགས་བཀའ་བློན་རྣམ་པ། དེ་བཞིན་འཛིན་སྐྱོང་ནས་ཡིན་ནའང་རྣམ་པ་ཚོར་གཟིགས་རྟོག་གནང་དགོས་པའི་འགན་ཕ་མ་དེ་མ་སོང་ན་བཀའ་ཤག་ལ་ཡོད་པ་དང་། བཀའ་ཤག་གི་ཐོག་ནས་བྱེད་དགོས་པ་རེད་བསམ་པའི་ཐོག་ནས་དེ་རིང་ངས་དཔེ་མཚོན་དུ་ཞུས་པའི་ཆབ་སྲིད་བཙོན་ཟུར་དང་ཤེས་རབ་དགའ་ཚལ་གླིང་། དེ་བཞིན་དྷ་རམ་ས་ལ་སོགས་ས་གནས་ཁག་ལ་ཟབ་སྦྱོང་སྤྲོད་པ་དང་ལག་ཤེས་བསླབ་རྒྱུ་དེ་ཚོར་འབད་བརྩོན་བྱས་དང་བྱེད་མུས་ཡིན། ཞེས་དང་།

ཡང་ཁོང་གིས། རྒྱ་གར་གཞུང་དང་རྒྱ་གར་མི་མང་ལས་ང་ཚོར་བཀའ་དྲིན་ཆེ་བ་སུ་གང་ཡོད་པ་མ་རེད། རྒྱ་གར་ལས་ལྷག་རྒྱལ་ཁབ་གཞན་སུ་གཅིག་གིས་ཀྱང་ང་ཚོར་གནང་ཡོད་པ་མ་རེད། ང་ཚོ་རྒྱ་གར་དུ་བསྡད་དེ་རྒྱ་གར་ཡུལ་མི་དང་མཉམ་དུ་ཁྱིམ་མཚེས་བྱས་ནས་སྡོད་སྐབས་མཚམས་རེར་རང་བཞིན་གྱིས་མཐུན་མ་མཐུན་ཡོང་གི་ཡོད་ལ། རྒྱ་གར་གྱི་ཡུལ་མིས་ང་ཚོར་ཚུར་བཀའ་གཏོང་བའི་ཚབ་ལ་ང་ཚོས་ཕར་བཀའ་གཏོང་བའི་གནས་ཚུལ་དེ་འདྲའང་ཡོང་གི་ཡོད་པ་རེད། དེ་འདྲ་རྩ་བ་ནས་གནང་རྒྱུ་ཡོད་པ་མ་རེད་བསམ་གྱི་འདུག རྒྱ་གར་གཞུང་མང་ལས་ལྷག་པའི་བོད་མིའི་སྒྲིག་འཛུགས་དང་བོད་མིར་བཀའ་དྲིན་ཆེ་བའི་ལུང་པ་སུ་གང་ཡོད་པ་མ་རེད། དེར་བརྟེན་རྒྱ་གར་གཞུང་དེ་ཕར་ཞོག སོ་སོའི་ཐག་ཉེ་སར་ཡོད་པའི་མི་མང་ལ་གུས་ཞབས་དང་བརྩི་བཀུར་བྱེད་དགོས་པ་དེ་ཤིན་ཏུ་གལ་ཆེན་པོ་རེད་ལ། ཁོང་ཚོ་མཉམ་དུ་མཐུན་པོ་བྱེད་དགོས་པ་དེའང་ཧ་ཅང་གལ་ཆེན་པོ་རེད། གང་ཡིན་ཟེར་ན། ས་ཆའི་བདག་པོ་དངོས་གནས་དེ་ཁོང་རང་ཚོ་རེད། ང་ཚོར་སོ་སོའི་བོད་མིའི་སྒྲིག་འཛུགས་ཡོད་པ་རེད་དེ། རྒྱ་གར་གཞུང་གི་སྒྲིག་འཛུགས་འོག་ལ་གནས་བསྡད་ཡོད་པ་རེད། རྒྱ་གར་གཞུང་གི་ཁྲིམས་དང་སྒྲིག་གཞི་དེ་འཁུར་དགོས་པ་ཤིན་ཏུ་གལ་ཆེན་པོ་རེད། དེ་མ་འཁུར་བར་ཁྲིམས་འགལ་བྱས་འདུག་ཅེས་རྙོག་དྲ་འདྲ་བསླངས་བ་ཡིན་ན། བོད་མི་ཨ་ཅང་ཅང་བོད་སྤྱི་པའི་རྩ་དོན་ལ་ཕུགས་ནས་གནོད་པའི་ཉེན་ཁ་ཡོད་པ་རེད། དེ་བཞིན་༧གོང་ས་མཆོག་ཡིན་ནའང་ཐུགས་ཕམ་སྲིད་པ་ཞིག་ཡིན་སྟབས། རྒྱ་གར་གྱི་ཁྲིམས་འཁུར་དགོས་པ་དེ་གལ་ཆེན་པོ་དང་། རྒྱ་གར་གྱི་ཡུལ་མི་མཉམ་དུ་མཐུན་སྒྲིལ་གནང་དགོས་པ་དེ་ཤིན་ཏུ་གལ་ཆེན་པོ་རེད། དེ་ངེས་པར་དུ་རྣམ་པ་ཚོས་ཐུགས་ལ་ཉར་རོགས། ཞེས་སོགས་གསུངས་སོང་། དེ་ནས་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་གྲུབ་རྗེས། སྡེ་དགེའི་བྲོ་ཆེན་སོགས་སྒོར་བྲོ་དང་རྐྱང་གཞས་སོགས་གཟིགས་འབུལ་ཞུས་ཏེ་སྔ་དྲོའི་མཛད་སྒོ་གྲོལ་སོང་།

གསར་འབྱོར་ཚོགས་པའི་ཚོགས་ཟུར་སྐལ་བཟང་ཤེས་རབ་ལགས་ཀྱིས་ཚོགས་པ་དེ་ག་དུས་བཙུགས་ཡོད་པ་དང་། ཚོགས་མི་རྣམས་ལ་སྡོད་ཁང་བགོ་བཤའ་རྒྱག་སྟངས་སོགས་ཀྱི་སྐོར་ངོ་སྤྲོད་གནང་སྐབས། ཕྱི་ལོ་ ༢༠༠༨ ལོར་བོད་ནང་དུ་ཞི་རྒོལ་ཆེན་མོ་བྱུང་སྐབས་རང་དབང་ལུང་པའི་ནང་ཡོད་མཁན་ཚོ་རང་དགར་མི་སྡོད་པར་རྒྱ་གར་གྱི་རྒྱལ་ས་ལྡི་ལིར་ངོ་རྒོལ་ལས་འགུལ་ཞིག་སྤེལ་རྒྱུའི་འཆར་གཞི་བཟོས་ཏེ། མི་མང་པོ་མཉམ་དུ་འཛོམས་པ་བརྒྱུད་ཚོགས་པ་དེ་གསར་དུ་བཙུགས་ཞིང་། ཚོགས་ཁོངས་སུ་བོད་ཆོལ་ཁ་གསུམ་ནས་མི་གྲངས་ ༢༡༥ ཙམ་ཡོད་པ་དང་། ཚོགས་མི་གཅིག་གཉིས་ཙམ་མ་གཏོགས་ཚང་མར་སྡོད་ཁང་ཐོབ་ཡོད་ལ། དེ་ཡང་མི་གྲངས་མང་ཉུང་ལྟར་ཕྱེས་ནས་རྒྱན་འཕངས་ཏེ་དྲང་པོ་དྲང་བཞག་དང་དཔེ་མི་སྲིད་པའི་ཡག་པོ་བྱུང་ཡོད་སྐོར་བརྗོད་བྱུང་།

གསར་འགོད་པས་སྡོད་ཁང་ཆེ་ཤོས་ཐོབ་ཡོད་པའི་ཁྱིམ་མི་བཅུ་ཅན་གྱི་ཚེ་འགྲུབ་ལགས་ལ་བོད་ནས་ག་དུས་ཡོང་བ་དང་། ད་ལྟ་སྡོད་ཁང་གསར་པ་རག་དུས་ཚོར་སྣང་ག་འདྲ་འདུག་དྲིས་པར་ཁོང་གིས། ང་ཕ་ཡུལ་ནས་ཕྱི་ལོ་ ༡༩༩༣ ལོར་ཡོང་བ་དང་། ནང་མི་ཚོ་ཕྱི་ལོ་ ༢༠༠༤ ལོར་བསླེབས་པ་རེད། རྒྱ་གར་ནང་འགྲོ་ས་ཅི་གང་མེད་དུས་དགོན་པ་རང་དུ་ལས་ཀ་འདྲ་བྱས་ནས་བསྡད་པ་ཡིན། ད་ལྟ་ང་ལ་འཁྲུ་ཁང་གཙང་སྤྱོད་གཉིས་བཅས་བསྡོམས་ན་ཁང་མིག་ ༦ ཅན་ཞིག་ཐོབ་ཡོད་པ་རེད། སྔོན་མ་ཡིན་ན་ང་ལ་ཁང་པ་གང་ཡང་ཡོད་པ་མ་རེད། ད་ལྟ་ང་རང་གི་སེམས་ནང་དཔེ་མི་སྲིད་པའི་དགའ་ཚོར་ཆེན་པོ་བྱུང་ཞེས་ཟེར།

ཡང་ཁྱིམ་མི་བཞི་ཅན་གྱི་ཚེ་བཀྲ་ལགས་ཀྱིས་སྡོད་ཁང་གསར་པ་རག་པ་དེས་མ་འོངས་པར་ཕན་ཐོགས་ཅི་ཡོད་སྐོར་བརྗོད་དོན། ང་ཕྱི་ལོ་ ༡༩༩༣ ལོར་བོད་ནས་རྒྱ་གར་ནང་བསླེབས་པ་དང་། འཛུལ་ཞུགས་བྱེད་སའི་གཞིས་ཆགས་མང་པོ་ཞིག་ལ་བཅར་ཏེ་སྙན་ཞུ་བརྒྱབ་ཀྱང་གང་ཡང་རག་ཡོད་པ་མ་རེད། དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་མཐུན་འགྱུར་དང་རོགས་རམ་འོག ད་ལྟ་ང་ཚོར་དགའ་བའི་ཉིན་མོ་ཟེར་ན་འདྲ། སྐྱིད་པའི་ཉིན་མོ་ཟེར་ནའང་འདྲ། དངོས་གནས་གཞིས་ཆགས་ཚོ་དང་གཅིག་པ་གཅིག་རྐྱང་གིས་གཞི་ཆགས་སའི་ཁང་པ་དང་ལྟ་ས་ཉལ་ས་ཡོད་པ་རེད། ཁང་པ་ཡོད་པ་ཟེར་དུས་དོན་དག་ཁང་རིན་སྤྲོད་མི་དགོས་པ་དེ་རེད། གསར་འབྱོར་ཚོར་གཙོ་བོ་ཁང་རིན་གྱི་ཐོག་ནས་དཀའ་ངལ་ཞེ་དྲགས་འཕྲད་བསྡད་ཡོད་པ་རེད། ང་ཚོ་གཅིག་པུ་མ་རེད་རྒྱ་གར་ལྷོ་ཕྱོགས་དང་སིམ་ལ། དྷ་རམ་ས་ལ། དེ་བཞིན་བསམ་ཡས་གླིང་སོགས་གང་དུ་བལྟས་པ་ཡིན་ནའང་ཁང་གླ་སྤྲད་ཚར་རྗེས། སོ་སོའི་ཟའི་སོང་དང་ཕྲུ་གུའི་སློབ་ཡོན་སོགས་ཀྱི་ཐད་དཀའ་ངལ་ཞེ་དྲགས་འཕྲད་ཀྱི་ཡོད་པ་རེད། ཁང་པ་འདི་ལ་བརྟེན་ནས་མ་འོངས་པར་ང་ཚོས་ཧ་ལམ་གཞིས་ཆགས་ཚོ་དང་མཉམ་དུ་གོམ་པ་སྤོ་ཐུབ་པ་ཞིག་དང་། བུ་ཕྲུག་རྣམས་མ་འོངས་བོད་ཀྱི་སོན་རྩ་ཡིན་པས་ཁོང་ཚོ་ཡིན་ནའང་ཤེས་ཡོན་སོགས་གང་ཅིའི་ཐད་ནས་གོམ་པ་འདྲ་འདྲ་སྤོ་ཐུབ་པའི་གོ་སྐབས་ཡོད་པ་རེད་བསམ་གྱི་འདུག ཅེས་བརྗོད་བྱུང་།

མཇུག་ཏུ་ཁང་མིག་གཉིས་ཅན་ཐོབ་པའི་ཨ་ཅག་ནོར་མཚོ་ལགས་སུ་རང་བདག་གི་སྡོད་ཁང་ཐོབ་དུས་ཚོར་སྣང་ག་འདྲ་འདུག་དྲིས་པར་མོས། ང་བོད་ནས་རྒྱ་གར་ལ་རྩེབས་པ་ཡིན། བོད་མིའི་སྒྲིག་འཛུགས་ཀྱི་བཀའ་དྲིན་གྱིས་ཁང་པ་ཡག་པོ་ཐོབ་སོང་། ནང་ལ་མ་ཎི་བགྲངས་ནས་མཚམས་ལ་བསྡད་ནའང་ཆུ་སོགས་ཅ་ལག་ཚང་མ་ནང་དུ་འདུག ཕྱི་ལ་འགྲོ་དགོས་ན་ཡང་སྒོ་འགྲམ་བར་དུ་རླངས་འཁོར་གྱི་ལམ་ཀ་ཡོད་པ་རེད། ད་འཚོ་བ་དཔེ་སྐྱིད་པོ་བྱུང་སོང་། སྔོན་མ་ལོ་གཅིག་ཅན་གྱི་ཕྲུ་གུ་ཆུང་ཆུང་ཞིག་རྒྱབ་ལ་ཁུར། ལོ་བཞི་ཅན་གྱི་ཕྲུ་གུ་ཆུང་ཆུང་ཞིག་ལག་པས་ཁྲིད་དེ་སྡོད་ས་མ་རག་པར་དགོན་པའི་བ་མོ་འཚོས་ནས་བསྡད་པ་རེད། ཕྱིས་སུ་ངའི་ཕྲུ་གུ་གཅིག་ཕྱི་རྒྱལ་དུ་ཕྱིན་པ་དང་། ཕྲུ་གུ་གཅིག་གིས་རྒྱ་གར་གཞུང་གི་ཡིག་ཚད་ནང་ཨང་དང་པོ་རག་ནས་སློབ་ཆེན་དུ་འགྲོ་བཞིན་ཡོད་པ་རེད། ད་ལོ་ང་ཚོར་སྡོད་སའི་ཁང་པ་ཡག་པོ་རག་ནས་དཔེ་སྐྱིད་པོ་བྱུང་སོང་། ཞེས་ཟེར།

སྦིར་གསར་འབྱོར་བོད་མིའི་སྡོད་ཁང་གསར་རྒྱག་གི་ལས་གཞི་དེ་ཕྱི་ལོ་ ༢༠༡༡ ལོར་ས་གནས་གསར་འབྱོར་བ་ཚོས་སྲིད་སྐྱོང་མཆོག་ལ་ཁོང་ཚོར་འཚོ་བའི་ཐད་དཀའ་ངལ་ཆེན་པོ་ཡོད་ལ། ཆེས་མ་མཐའ་ཡང་རྐང་པ་འཛུགས་སའི་ས་ཆ་ཞིག་དགོས་ཀྱི་ཡོད་སྐོར་ཞུས་པ་ལྟར། ཕྱི་ལོ་ ༢༠༡༤ ལོར་བོད་མིའི་སྒྲིག་འཛུགས་ནས་སྦིར་གཞིས་ཆགས་ནང་ས་ཆ་ཉོས་ཡོད་པ་དང་། ཨེ་ཊ་ལི་ཡི་ལི་ལི་རོགས་ཚོགས་དང་སྒྲོལ་མ་རོགས་ཚོགས་སོགས་ཀྱི་མཉམ་རུབ་མཐུན་འགྱུར་འོག་ཁྱོན་བསྡོམས་ཧིན་སྒོར་འབུམ་ ༨༠༠ མ་ཟིན་ཙམ་བཏང་ནས་གསར་རྒྱག་གནང་ཡོད་འདུག སྤྱིར་སྦིར་གསར་འབྱོར་ཚོགས་པའི་ནང་གསར་འབྱོར་བ་ ༢༠༠ ལྷག་ཡོད་པ་དང་། སྡོད་ཁང་་བགོ་བཤའ་རྒྱག་སྐབས་ཐོག་མར་ཁྱིམ་མིའི་གྲངས་འབོར་གྱི་ཐོག་ནས་དབྱེ་བ་བཞི་རུ་ཕྱེས་རྗེས་རྒྱན་བརྒྱབ་ཡོད་པ་དང་། གཙང་སྤྱོད་འཁྲུ་ཁང་ཕུད་པའི་ཁྱིམ་མི་གཅིག་ཅན་ལ་ཁང་མིག་གཅིག་དང་། ཁྱིམ་མི་ ༢ ནས་ ༤ ཅན་ལ་ཁང་མིག་ ༢། ཁྱིམ་མི་ ༥ ནས་ ༨ ཅན་ལ་ཁང་མིག་ ༣། ཁྱིམ་མི་ ༡༠ དང་ ༡༠ ལས་བརྒལ་བ་རྣམས་ལ་ཁང་མིག་ ༤ བཅས་ཡོད་པའི་ཁྱོན་བསྡོམས་སྡོད་ཁང་ ༧༤ གསར་དུ་བརྒྱབ་ཡོད་པ་དང་། སྡོད་ཁང་སོ་སོའི་ནང་གློག་འཐེན་ཚར་རྗེས་ཁྱིམ་ཚང་ ༧༤ དེ་གང་མགྱོགས་ཀྱིས་ཁང་པ་གསར་པའི་ནང་སྤོར་རྒྱུ་ཡིན་འདུག

གསར་འགོད་པ། པདྨ་མཚོ།