དྲག་སྤྱོད་ཚོགས་སྡེ་ཨལ་ཀ་ཌ་ཡིས་སླར་ཡང་གཟའ་འཁོར་འདིའི་ནང་ཨོ་ས་མ་བྷིན་ལ་དྷེན་གྱི་བུ་ཧམ་ཛཱ་བྷིན་ལ་དྷེན་གྱི་སྐད་གདངས་སྒྲིག་འཇུག་བྱས་པའི་བརྙན་ཐུང་ཞིག་འགྲེམ་སྤེལ་བྱས་པར་གཞིགས་ན། ཁོ་པ་དྲག་སྤྱོད་པའི་མགྲིན་ཚབ་བྱེད་པའི་དབང་ཚད་ཇེ་ཆེར་གཏོང་གི་ཡོད་སྲིད་པ་ཞིག་ཡིན།
རེས་གཟའ་ཟླ་བའི་ཉིན་ཨོ་ས་མ་བྷིན་ལ་དྷེན་(Osama bin Laden)གྱི་བུ་ཧམ་ཛཱ་བྷིན་ལ་དྷེན་(Hamza bin Laden) ཟེར་བ་དེས་སེ་རི་ཡའི་ནང་གི་ཨའེ་ཨེ་སེ་ཨའེ་སེ་ (ISIS) དང་། ཨལ་ཀ་ཊ་(al Qaeda) སོགས་མིང་ཐོབ་ལ་རྩོད་འགྲན་བྱེད་བཞིན་པའི་ཁ་ཆེ་ཆོས་ལུགས་སྲུང་སྐྱོབ་དྲག་སྤྱོད་པ་ (Jihadi) རྣམས་རྡོག་རྩ་གཅིག་སྒྲིལ་བྱེད་དགོས་པའི་སྒྲ་ཕབ་ཅིག་འགྲེམས་སྤེལ་བྱས་ཡོད། ཁོ་པས་ཁ་ཆེ་ཆོས་ལུགས་སྲུང་སྐྱོབ་དྲག་སྤྱོད་པ་ཚོས་ཨི་སི་རལ་དང་ཨི་སི་རལ་ལ་རོགས་རམ་བྱེད་མཁན་ཨ་རིའི་ཁ་གཏད་དུ་ལངས་ཏེ། པ་ལི་སི་ཐན་ (Palestine) བཅིངས་འགྲོལ་གཏོང་དགོས་པའི་སྐོར་ཡང་བཤད་ཡོད་པ་རེད།
སྒྲ་ཕབ་འདི་ད་ལོར་འདོན་སྤེལ་བྱས་པ་ཐེངས་གཉིས་པ་དེ་ཆགས་ཡོད་པ་དང་། ཨལ་ཀ་ཌ་དྲག་སྤྱོད་ཚོགས་པས་བྷིན་ལ་དྷན་གྱི་མིང་གྲགས་བེད་སྤྱོད་ཀྱིས་ཚོགས་པའི་ནུས་སྟོབས་སྤེལ་བའི་ཐབས་ཤེས་ཤིག་ཡིན་སྲིད་པ་རེད།
སི་ཨན་ཨན་ (CNN) གསར་ལས་རྒྱལ་ཁབ་སྲུང་སྐྱོབ་དབྱེ་ཞིབ་པ་པི་ཊར་བྷེར་གྷན་ (Peter Bergen) གྱིས་བརྗོད་དོན། “ཧམ་ཛཱ་ལ་ཁྱིམ་རྒྱུད་ཀྱི་མིང་གྲགས་ཤིག་ཡོད་པ་ནི་མངོན་གསལ་དོད་པའི་གནད་དོན་ཞིག་ཡིན། ད་ལྟའི་ཆར་ཁོ་པས་དྲིལ་བསྒྲགས་ཀྱི་ལས་དོན་གཉེར་བཞིན་ཡོད་པ་དང་། ཨལ་ཀ་ཌའི་མགོ་པ་རྒན་གྲས་ལོ་ན་ལྔ་བཅུ་དང་དྲུག་ཅུར་བསླེབས་པ་དེ་དག་དང་ཁོ་པའི་བར་ལོ་ན་ཆེ་ཆུང་གི་ཁྱད་པར་ཆེན་པོ་ཡོད།”
ཧམ་ཛཱ་བྷིན་ལ་དྷེན་ནི་ད་ལྟའི་ཆར་ལོ་ན་ཉི་ཤུ་ཙམ་ཡིན་པ་དང་། འབྱུང་འགྱུར་ཨལ་ཀ་ཌ་མི་རབས་གསར་པའི་སྣེ་ཁྲིད་པ་ཆགས་སྲིད་པའི་ཚོད་དཔག་བྱེད་ཀྱི་ཡོད་པ་རེད། “ཨོ་ས་མ་བྷིན་ལ་དྷེན་གྱིས་ཕྲུ་གུ་དེར་ན་སོ་ཆུང་དུས་ནས་སྦྱོང་བརྡར་སྤྲོད་ཀྱི་ཡོད་པ་རེད། ཧམ་ཛཱ་ལ་ཁ་ཆེ་ཆོས་ལུགས་སྲུང་སྐྱོབ་ཀྱི་བསླབ་བྱ་གཏིང་ཟབ་སྤྲད་པ་ཞིག་ཡིན་སྟབས། དེར་བཅོས་མིན་དད་གུས་བྱེད་མཁན་ཞིག་ཏུ་གྱུར་ཡོད་སྟབས། ཁོ་པར་གདེང་འཇོག་དེ་ལྟར་བྱེད་དོན་ཡང་རྒྱུ་རྐྱེན་དེ་དག་ལ་བརྟེན་ནས་རེད་སྙམ་གྱི་འདུག” ཅེས་ཉེ་དུས་རྒྱལ་སྤྱིའི་ཁ་ཆེ་ཆོས་ལུགས་སྲུང་སྐྱོབ་དྲག་སྤྱོད་ཚོགས་པ་ (United States of Jihad)ཞེས་པའི་དཔེ་དེབ་དཔར་སྐྲུན་བྱེད་པོ་བྷེར་གྷན་གྱིས་འགྲེལ་བརྗོད་བྱས།
༢༠༡༡ ལོར་ཨ་རིའི་ཆེད་ལས་དཔུང་སྡེས་ཧམ་ཛཱ་བྷིན་ལ་དྷེན་གྱི་ཕ་རྒན་སྡོད་ཁང་ལ་བཙན་རྒོལ་བྱས་ཏེ། ཕ་རྒན་དམར་གསོད་གཏོང་སྐབས་ཁོ་པ་གནས་དེར་མེད། སྡོད་ཁང་དེ་ནས་རྙེད་སོན་བྱུང་བའི་ཡིག་ཆའི་ནང་། ཧམ་ཛཱ་ཡི་བུ་སྤུན་ཕ་རྒན་དང་ལྷན་དུ་དམར་གསོད་བཏང་བ་དེ་དང་། ཁོ་པའི་བར་མི་འདྲ་བ་ཞིག་ཡོད་པ་ནི་ཧམ་ཛཱ་དྲག་སྤྱོད་སྦྱོང་བརྡར་བྱེད་པར་ཆེད་གཏོང་བྱས་ཡོད་པ་དེ་རེད།
དྲག་སྤྱོད་རིང་ལུགས་ཉམས་ཞིབ་པ་ཐོ་མ་ས་ཇོ་སི་ལིན་ (Thomas Joscelyn) གྱིས་ “ཨོ་ས་མ་བྷིན་ལ་དྷེན་སྡོད་ཡུལ་དུ་བཙན་རྒོལ་བྱས་པའི་ཟླ་བ་གཅིག་གི་སྔ་རོལ་དུ་བུ་ཧམ་ཛཱ་པ་ཀི་སི་ཐན་དུ་རྟེན་གཞི་བྱས་པའི་ཨལ་ཀ་ཌའི་མགོ་པས་ཚད་མཐོའི་འབར་རྫས་བཟོ་ལས་ཀྱི་སྦྱོང་བརྡར་སྤྲོད་ཀྱིན་ཡོད་པ་རེད།” ཅེས་བརྗོད་ཡོད། འོན་ཀྱང་ཧམ་ཛཱ་བྷིན་ལ་དྷེན་གྱིས་དྲག་སྤྱོད་ཀྱི་ལས་དོན་དངོས་ལ་ཐད་བྱུས་བྱེད་ཀྱི་ཡོད་དང་། ཨལ་ཀ་ཌའི་དྲིལ་བསྒྲགས་ཀྱི་ལས་གཞིར་དམིགས་བཀར་བྱ་ཆ་ཤས་ལེན་གྱི་ཡོད་སྐོར་གསལ་བརྗོད་བྱེད་དཀའ་བའི་གནད་དོན་ཞིག་རེད། ཇོ་སི་ལིན་གྱིས་ “ཨལ་ཀ་ཌ་དྲག་སྤྱོད་པས། འདི་ནི་ཁ་ཆེ་ཆོས་ལུགས་སྲུང་སྐྱོབ་དྲག་སྤྱོད་པའི་མི་རབས་གསར་པའི་མགོ་ཁྲིད་ཡིན། འདི་ནི་མཐར་ཐུག་ང་ཚོའི་ལམ་སྣེ་འདྲེན་པའི་བྷིན་ལ་དྷེན་གཉིས་པ་དེ་ཡིན་ཞེས་ཟེར་གྱི་ཡོད།”ཅེས་བརྗོད།
ཨ་རིའི་གསང་བའི་ལས་དོན་པ་ཞིག་གིས་སི་ཨན་ཨན་གསར་འགོད་པར་བརྗོད་པ་ལྟར་ན། ད་ལྟའི་ཆར་ཧམ་ཛཱ་བྷིན་ལ་དྷེན་ནི་དྲག་སྤྱོད་ཚོགས་པ་དེའི་ལས་དོན་ཆུང་ཚགས་ཅིག་གཉེར་ནས་བསྡད་ཡོད་པ་དང་། ཕྱིས་འབྱུང་ཨལ་ཀ་ཊའི་མགོ་དཔོན་བྱེད་པའི་སྦྱོང་བརྡར་སྤྲོད་ཀྱི་ཡོད་ཚོད་འདུག
བྷེར་གྷན་གྱིས་ “ངའི་བསམ་པར་ཧམ་ཛཱ་སང་ཉིན་རང་ཨལ་ཀ་ཏའི་མགོ་དཔོན་ཆགས་དགོས་དོན་མེད། འོན་ཀྱང་ཁོ་པར་ཁྱིམ་རྒྱུད་ཀྱི་མིང་གྲགས་ཤིག་ཡོད་པ་དང་། ལོ་ན་གཞོན་ལ་དད་གུས་རྣམ་དག་ཡོད་པ་ཞིག་ཡིན། རྒྱུ་རྐྱེན་དེ་དག་གིས་ཁོ་པས་ཨལ་ཀ་ཌ་རྒྱ་སྐྱེད་བྱེད་པར་གལ་ཆེའི་ནུས་པ་འདོན་ཐུབ་ངེས་ཡིན།”ཞེས་ཟེར།
པ་ཀི་སི་ཐན་དུ་རྟེན་གཞི་བྱས་པའི་ཨལ་ཀ་ཌ་ཚོགས་པ་ལྟེ་བའི་མགོ་དཔོན་མང་པོ་ཨ་རིའི་དཔུང་དམག་གི་ལག་འོག་ཏུ་ཚེ་སྲོག་ཤོར་ཏེ་ཚོགས་པར་ཉམས་རྒུད་བྱུང་ཡོད་ཀྱང་། སེ་རི་ཡ་དང། ཡཱ་མན། བྱང་ཨ་ཧྥི་རི་ཀ་སོགས་སུ་ཡན་ཡག་འཕེལ་རྒྱས་འགྲོ་མུས་ཡིན། ཨ་རིའི་གསང་བའི་ལས་དོན་པས་ “ཧམ་ཛཱ་བྷིན་ལ་དྷེན་ངོ་ཤེས་བཟོ་ཐབས་དེ་ནི། ཆག་གྲུམ་ཤོར་བའི་ཨལ་ཀ་ཌ་ཚོགས་པ་མཐུན་སྦྱོར་བྱེད་པའི་འབད་བརྩོན་དང་ཐབས་ཤེས་ཤིག་རེད།”ཅེས་ཟེར།
སི་ཨན་ཨན་CNNགསར་ཁང་གི་གནས་ཚུལ་སྐལ་ལྡན་གྱིས་ཕབ་སྒྱུར་བྱས།
