རྒྱ་དཔོན་གྱི་སྐོར་སྐྱོད་ལ་ངོ་རྒོལ་བྱས།

རྒྱ་ནག་གི་རྒྱལ་ཡོངས་དམངས་ཆེན་རྒྱུན་ལས་མགོ་ཁྲིད་ཀྲང་ཏི་ཅང་ཧོང་ཀོང་ནང་སྐྱོར་སྐྱོད་བྱེད་སྐབས་ཧོང་ཀོང་མི་མང་སྟོང་ཕྲག་མང་པོས་ངོ་རྒོལ་བྱས་འདུག

རྒྱ་ནག་རྒྱལ་ཡོངས་དམངས་ཆེན་རྒྱུན་ལས་ལྷན་ཚོགས་ཀྱི་མགོ་ཁྲིད་ཀྲང་ཏི་ཅང་(Zhang Dejiang)ཁ་སང་དང་དེ་རིང་། སང་ཉིན་བཅས་ཉིན་གསུམ་རིང་ཧོང་ཀོང་ནང་སྐོར་སྐྱོད་བྱེད་བཞིན་ཡོད་པ་དང་། ཀྲང་ཏི་ཅང་ཁ་སང་ཧོང་ཀོང་ནང་འབྱོར་མ་ཐག ཧོང་ཀོང་མི་མང་སྟོང་ཕྲག་མང་པོས་ལག་ཏུ་ཧོང་ཀོང་གི་དར་ཆ་དང་། འབོད་ཚིག་འདྲ་མིན་འཁོད་པའི་འཕྲེད་དར་སོགས་འཕྱར་ཏེ་ངོ་རྒོལ་སྐད་འབོད་བྱས་ཡོད་པ་རེད།

ཐེངས་འདིའི་ངོ་རྒོལ་བའི་ཁྲོད་ཆོས་འཁོར་རྩ་རླུང་སྒོམ་སྒྲུབ་པ་དང་བོད་དོན་རྒྱབ་སྐྱོར་བ་སོགས་ཀྱང་ཡོད་པ་དང་། ངོ་རྒོལ་འཕྲེད་དར་སྟེང་། “རྒྱ་ནག་སྲིད་གཞུང་གིས་ཧོང་ཀོང་མི་མང་གི་རང་དབང་འོས་བསྡུའི་ཐོབ་ཐང་ལ་ཐེ་ཇུས་བྱེད་མི་ཆོག” ཅེས་པ་དང་། “རྒྱ་གཞུང་གིས་རང་དབང་དམངས་གཙོ་དོན་གཉེར་བ་ཚོ་འཛིན་བཟུང་བཀག་བསྐྱིལ་མཚམས་འཇོག་དགོས་བ” “གྲངས་ཉུང་མི་རིགས་ལ་འགྲོ་བ་མིའི་ཐོབ་ཐང་དང་ཆོས་དད་རང་དབང་སྤྲོད་དགོས།” ཞེས་པ་སོགས་ཀྱི་འབོད་ཚིག་འཁོད་ཡོད་ཅིང་། སྐབས་དེར་ཧོང་ཀོང་གཞུང་གིས་ཉེན་རྟོག་པ་དང་དམག་མི་འབོར་ཆེན་བཏང་སྟེ་དམ་དྲག་བྱས་ཡོད་འདུག འདི་ནི་འདས་པའི་མི་ལོ་བཞིའི་ནང་རྒྱ་ནག་དམར་ཤོག་དམངས་ཆེན་གྲོས་ཚོགས་ཀྱི་མཐོ་རིམ་དཔོན་རིགས་ཤིག་ཧོང་ཀོང་ནང་སྐོར་སྐྱོད་བྱས་པ་ཐོག་དང་པོ་ཡིན་འདུག

གཟའ་མིག་དམར་ཉིན་ཀྲང་ཏི་ཅན་ཧོང་ཀོང་སྲིད་གཞུང་གི་ཚོགས་ཁང་ཆེན་མོའི་ནང་ཧོང་ཀོང་གི་དཔོན་རིགས་ཚོ་དང་ཐུག་འཕྲད་བྱས་ཡོད་པ་དང་། ཧོང་ཀོང་གྲོང་ཁྱེར་དཔལ་འབྱོར་གྲོས་མོལ་ཚོགས་འདུའི་ཐོག་ཁོས་གཏམ་བཤད་སྐབས། ངས་སྔོན་ཆད་ཀུང་ཏུང་ཞིང་ཆེན་དུ་ལས་ཀ་ལས་དུས། ཧོང་ཀོང་གྲོང་ཁྱེར་གྱི་ལས་དོན་ཐད་འབྲེལ་བ་ཏན་ཏན་ཡོད་སྟབས། ངས་ཧོང་ཀོང་སྲིད་གཞུང་དང་དམིགས་བསལ་སྲིད་འཛིན་ས་ཁུལ་ཡོངས་ (Pan-PRD) མཉམ་རུབ་ཐོག་དབུགས་འབྱིན་ནད་ཡམས་ (SARS pandemic) ལ་གདོང་ལེན་དང་དོན་འབྲས་སྨིན་ཐབས་སུ་སྐུལ་འདེད་བཏང་བ་ཡིན། དེ་ངས་ད་ལྟའང་དྲན་གྱི་འདུག ང་རང་དབུས་སྲིད་གཞུང་གིས་ཧོང་ཀོང་མི་དམངས་ལ་བཅངས་པའི་བརྩེ་སེམས་དང་གཅེས་སྐྱོང་མཚོན་པའི་སྐུ་ཚབ་ཡིན། ངའི་ལྟ་སྐོར་འདི་ལ་དོན་འབྲུས་སྨིན་པའི་ཡིད་ཆེས་བྱེད་ཀྱི་ཡོད་ཅེས་དང་། ང་འདིར་ཡོང་དོན་གཙོ་བོ་གཅིག་ཧོང་ཀོང་གྲོང་ཁྱེར་གྱི་འཕེལ་རྒྱས་ལ་ལྟ་ཞིབ་དང་ཧོང་ཀོང་མི་མང་གི་འཚོ་གནས་ལ་ལྟ་སྐོར་བརྒྱུད་གྲོགས་པོ་གསར་རྙིང་ལ་ཐུག་འཕྲད། གཉིས་པ“རྒྱལ་ཁབ་གཅིག ལམ་ལུགས་གཉིས”ཀྱི་རྩ་དོན་གཞིར་བཟུང་ཐོག་ཧོང་ཀོང་གཞུང་དམངས་ཀྱི་ལས་དོན་དང་བསམ་ཚུལ་ལ་ཉན་རྒྱུ། གསུམ་པ། ཧོང་ཀོང་སྲིད་གཞུང་གིས་གོ་སྒྲིག་ཞུས་པའི“བརྒྱུད་གཅིག ལམ་གཅིག་གི་དཔོན་རིགས་ལྷན་ཚོགས” (Belt and Road summit) ཐོག་གཏམ་བཤད་སྤེལ་རྒྱུ་བཅས་ཡིན། ཞེས་སོགས་བརྗོད་འདུག

ཧོང་ཀོང་གྲོང་ཁྱེར་ཚོང་ལས་མཐུན་ཚོགས་ཀྱི་མགོ་འཛིན་ཇོན་ལིང་ (John Leung) ཟེར་བ་ཞིག་གིས། ང་ཚོས་ཀྲང་ཏི་ཅང་ལ་སྣེ་ལེན་ཕེབས་བསུ་ཞུ་འདོད་མེད་སྐོར་བརྗོད་ཡོད་པ་དང་། ཚོང་ལས་མཐུན་གྱི་ལས་འཛིན་ཟུར་བ་ཨ་ལེ་ཁི་སན་ཌི་ར་ཝང་ (Alexandra Wong) ཟེར་བ་ཞིག་གིས་ཀྱང་། ཧོང་ཀོང་མི་མང་རྒྱ་ནག་གིས་ཧོང་ཀོང་ཐོག་འཛིན་པའི་སྲིད་ཇུས་ལ་དངངས་འཚབ་ཆེ་རུ་འགྲོ་བཞིན་ཡོད་སྐོར་བརྗོད་འདུག

ཨ་རིའི་གསར་དེབ་ཁང་ (wsj) གི་དཔྱད་རྩོམ་ཞིག་གི་ནང་། ཧོང་ཀོང་གསར་འགོད་ལྷན་ཚོགས་ཀྱི་ཚོགས་གཙོ་ཡེ་ལན་ (Yee-lan) ཟེར་བ་ཞིག་གིས། ཀྲང་ཏི་ཅང་ཉིན་གསུམ་རིང་གི་སྐོར་སྐྱོད་སྐབས་ཧོང་ཀོང་གཞུང་གིས་ཀྲང་ཏི་ཅང་སྐོར་སྐྱོད་བྱེད་སའི་ཧོང་ཀོང་གྲོང་ཁྱེར་གྱི་སྲང་ལམ་ཁག་ཏུ་ཉེན་རྟོག་དམག་མི་ ༦༠༠༠ ཆེད་གཏོང་བྱས་ཡོད་པ་མ་ཟད། གསར་འགྱུར་བརྒྱུད་ལམ་ཁག་གི་བཅར་འདྲི་ཡང་བཀག་སྡོམ་བྱས་ཡོད་སྟབས། འདི་ནི་ཧོང་ཀོང་གྲོང་ཁྱེར་ནང་གསར་འགོད་རང་དབང་ལ་ཐོག་དང་པོར་སྟངས་འཛིན་བྱས་པ་ཞིག་ཡིན་པ་དང་། ཀྲང་ཏི་ཅང་གིས་ཧོང་ཀོང་མི་མང་གི་མངོན་འདོད་གཙོ་བོ་དམངས་གཙོའི་དཀའ་རྙོག་སྐོར་གླེང་སློང་བྱེད་རྒྱུའི་ཚབ་ཏུ། ཁོའི་གཏམ་བཤད་གཙོ་བོ་པེ་ཅིན་གཞུང་གིས་ཧོང་ཀོང་དམིགས་བསལ་སྲིད་འཛིན་ས་ཁུལ་ཐོག་འཛིན་པའི“བརྒྱུད་གཅིག ལམ་གཅིག”ཟེར་བའི་སྲིད་བྱུས་དེ་ལ་རྟོགས་ཞིབ་ཆེད་ཡིན་ཚུལ་བརྗོད་པ་དེ་ནི་ཧ་ཅང་བློ་ཕམ་དགོས་པ་ཞིག་རེད། ཅེས་སོགས་བརྗོད་འདུག

རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚན་པས། ཧོང་ཀོང་མི་མང་གིས་ཀྲང་ཏི་ཅང་གི་སྐོར་སྐྱོད་ལ་ངོ་རྒོལ་སྐད་འབོད་བྱས་པར་དབང་འཛིན་པ་ཚོས་སྟངས་འཛིན་ནན་མོ་བྱེད་ཀྱིན་ཡོད་པ་དང་། ཧོང་ཀོང་གི་དཔོན་རིགས་ཚོས་ངེས་པར་དུ་ཀྲང་ཏི་ཅང་ལ་ཧོང་ཀོང་རང་སྲིད་རང་སྐྱོང་གི་འགྲོ་བ་མིའི་ཐོབ་ཐང་དང་དམངས་གཙོའི་ལམ་ལུགས་ལ་བརྩི་མཐོང་དགོས་སྐོར་བརྗོད་འདུག

གནས་ཚུལ་ལྟར་ན། ཧོང་ཀོང་མི་མང་གི་རང་བཙན་ལས་འགུལ་ལ་རྒྱ་ནག་སྐམ་ས་ཆེན་མོ་དང་ཧོང་ཀོང་གྲོང་ཁྱེར་གྱི་དབང་འཛིན་པ་ཚོས་བརྡབ་གསིག་ཆེན་པོ་གཏོང་གི་ཡོད་སྟབས། ཁ་སང་དེ་རིང་ཧོང་ཀོང་མི་མང་སྟོང་ཕྲག་མང་པོ་འདུ་འཛོམས་ཀྱིས་ཧོང་ཀོང་གི་རྒྱལ་དར་དང་མི་མང་ལ་འོས་བསྡུའི་ཐོབ་ཐང་དགོས་པ་དང་། རྒྱ་ནག་གཞུང་གིས་ནོ་བྷིལ་ཞི་བདེ་གཟེངས་རྟགས་ཐོབ་མཁན་ལུའུ་ཞོ་པོ་ (Liu Xiaobo) ཀློད་གྲོལ་དགོས་པ་སོགས་ཀྱི་འབོད་ཚིག་དང་འཕྲེད་དར་སྣ་ཚོགས་འཕྱར་ཏེ་ངོ་རྒོལ་གྱི་རྣམ་པ་ཤུགས་ཆེ་རུ་འགྲོ་བཞིན་ཡོད་འདུག

གསར་འགོད་པ། པདྨ་རྒྱལ།