རྒྱ་ནག་ཀུང་ཏུང་ཞིང་ཆེན་གྱི་བཙོན་ཁང་ཞིག་ཏུ་རྒྱ་རིགས་རང་དབང་དོན་གཉེར་བ་ཞིག་གིས་རྒྱ་ནག་གི་དཔོན་རིགས་ཚོས་ཆབ་སྲིད་བཅོས་བསྒྱུར་གཏོང་དགོས་པའི་དགོས་འདུན་འོག་ཟས་བཅད་ངོ་རྒོལ་བྱེད་བཞིན་ཡོད་འདུག
དེ་རིང་རྒྱ་ནག་ལྷོ་རྒྱུད་ཞོགས་པའི་ཚགས་པར་ཁང་ (scmp) གིས་གནས་ཚུལ་སྤེལ་བ་ལྟར་ན། གཟའ་ཟླ་བའི་ཉིན་རྒྱ་ནག་ནང་གི་སྨྲ་བརྗོད་རང་དབང་དང་དམངས་གཙོ་དོན་གཉེར་བ་རྒྱ་རིགས་གོ་ཧྥེ་ཞོང་ (Guo Feixiong) ཟེར་བ་ཞིག་གིས་ཀུང་ཏུང་ཞིང་ཆེན་ཡཱང་ཁྲུན་བཙོན་ཁང་ (Yangchun prison) གི་དཔོན་རིགས་ཚོས་བཙོན་པའི་འཕྲོད་བསྟེན་ཡར་རྒྱས་དང་ཆབ་སྲིད་བཅོས་བསྒྱུར་གཏོང་དགོས་པའི་རེ་འདུན་འོག་ཟས་བཅོད་ངོ་རྒོལ་བྱས་ཡོད་འདུག
གོ་ཧྥེ་ཞོང་གི་བཟའ་ཟླ་ཀྲང་ཆེན་ (Zhang Qing) གྱིས་རྒྱ་ནག་གི་སྲིད་འཛིན་ཞི་ཅིན་ཕིན་ལ་འཕྲིན་ཡིག་ཅིག་བཏང་སྟེ། གོ་ཧྥེ་ཞོང་གིས་བཙོན་ཁང་དུ་དབང་འཛིན་པ་ཚོའི་བྱ་སྤྱོད་ལ་ཟས་བཅད་ངོ་རྒོལ་བྱེད་བཞིན་པ་དེར་དགོངས་བཞེས་གནང་དགོས་པ་དང་། གོ་ཧྥེ་ཞོང་ལ་སྡུག་སྦྱོང་མནར་གཅོད་བཏང་སྟེ་འཆི་ལམ་དུ་འདེད་པའི་ཐོབ་ཐང་སུ་ལའང་མེད་ཅིང་། ཁོ་ལ་མ་ཉེས་ཁག་གཡོག་བྱེད་རྒྱུ་མཚམས་འཇོག་དགོས་པ། དེ་བཞིན། ཀུང་ཏུང་ཞིང་ཆེན་གྱི་བཙོན་ཁང་གི་དཔོན་རིགས་ཚོས་ཁྲིམས་མེད་ལུགས་མེད་ཀྱི་བྱ་སྤྱོད་མི་སྤེལ་བར་རྒྱལ་ཁབ་ཀྱི་རྩ་ཁྲིམས་བརྩི་སྲུང་དགོས་སྐོར་སོགས་འཁོད་འདུག
རྒྱལ་སྤྱིའི་འགྲོ་བ་མིའི་ལྟ་ཞིབ་ཚན་པའི་འགན་འཛིན་སོ་ཧྥེ་རེ་ཆར་ཌི་སོན་ (Sophie Richardson) གྱིས་རྒྱ་ནག་གཞུང་གིས་ཆབ་སྲིད་བཙོན་པ་ཚོར་མི་སྤྱོད་ལས་འདས་པའི་སྡུག་སྦྱོང་མནར་གཅོད་གཏོང་བཞིན་པར་བློ་འཚབ་ཆེ་བ་དང་། རྒྱ་ནག་གི་དཔོན་རིགས་ཚོས་རང་ཉིད་ཀྱི་ཁེ་གྲགས་ཁོ་ནའི་ཆེད་དུ་རྒྱ་ནག་ནང་གི་ཆབ་སྲིད་བཙོན་པ་ཚོར་གདུག་རྩུབ་ཆེ་བའི་མནར་གཅོད་གཏོང་བ་དང་། ཐ་ན་སྲོག་ཐོག་གཏོང་བ་དང་ཚེ་བཙོན་བྱེད་ཀྱི་སྐོར་བརྗོད་འདུག
གནས་ཚུལ་ལྟར་ན། གོ་ཧྥེ་ཞོང་གི་དངོས་མིང་ལ་ཡང་མའོ་ཏོང་ (Yang Maodong) ཟེར་ཞིང་ད་ལྟ་ལོ་ ༤༩ ཡིན་པ་དང་། ཁོ་རྒྱ་ནག་ཀུང་ཏུང་ཞིང་ཆེན་གྱི་འགྲོ་བ་མིའི་ཐོབ་ཐང་ཁྲིམས་རྩོད་པ་ཡིན་ཞིང་། ཕྱི་ལོ་ ༢༠༠༦ ལོའི་ཕྱི་ཟླ་ ༩ བའི་ཚེས་ ༣༠ ཉིན་ཁོ་ཆབ་སྲིད་དཔེ་དེབ་ཅིག་གི་དཔར་སྐྲུན་དང་འབྲེལ་བའི་ཉེས་འཛུགས་འོག་འཛིན་བཟུང་བྱས་ཏེ་ཟླ་ ༧ རིང་བཀག་བསྐྱིལ་བྱས་རྗེས། ཕྱི་ལོ་ ༢༠༠༧ ལོའི་ཟླ་བ་ ༡༡ པའི་ཚེས་ ༡༤ ཉིན་ལོ་ ༥ ཁྲིམས་ཐག་བཅད་དེ་ཀུང་ཏུང་ཞིང་ཆེན་མའེ་ཀྲོ་བཙན་ཁང་ (Meizhou Prison) དུ་བཙོན་འཇུག་བྱས་ཡོད་པ་མ་ཟད། དམངས་སྒོར་ ༤༠,༠༠༠ ཡི་ཆད་པ་བཅད་ཡོད་འདུག་ལ། ཕྱི་ལོ་ ༢༠༡༡ ལོའི་ཟླ་ ༩ བའི་ཚེས་ ༡༣ ཉིན་ཁོ་ཀློད་གྲོལ་བཏང་ཡོད་ནའང་། ཕྱི་ལོ་ ༢༠༡༣ ལོའི་ ༨ པའི་ཚེས་ ༨ ཉིན་མི་དམངས་འདུ་འཛོམ་དང་སྤྱི་མང་གི་བདེ་འཇགས་ལ་གཏོར་བརླག་བྱས་པའི་ཉེས་འཛུགས་ཐོག་ཡང་བསྐྱར་འཛིན་བཟུང་བཙོན་འཇུག་བྱས་ཡོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚན་པའི་ཞིབ་འཇུག་རྒྱུས་ལོན་ལྟར་ན། ཕྱི་ལོ་ ༢༠༡༥ ལོའི་ཟླ་ ༦ པ་ནས་ ༩ བའི་བར་རྒྱ་ནང་གི་འགྲོ་བ་མིའི་ཐོབ་ཐང་ཁྲིམས་རྩོད་པ་དང་ཁྲིམས་རྩོད་ལས་རོགས། དེ་བཞིན། འགྲོ་བ་མིའི་ཐོབ་ཐང་དང་དམངས་གཙོ་དོན་གཉེར་བ་ཁྱོན་མི་གྲངས་ ༣༠༠ འཛིན་བཟུང་བྱས་ཡོད་པ་དང་། ཕྱི་ལོ་ ༢༠༡༦ ལོའི་ཟླ་དང་པོའི་ཚེས་ ༨ ནས་ ༩ བར་འགྲོ་བ་མིའི་ཐོབ་ཐང་ཁྲིམས་རྩོད་པ་ ༡༡ འཛིན་བཟུང་བྱས་ཡོད་པ་དང་། ཁོ་ཚོའི་ནང་མི་ཚོར་ཡང་འཛིན་བཟུང་དང་འདྲི་གཅོད་ཀྱི་བརྡ་སྦྱོར་བཏང་ཡོད་འདུག
གསར་འགོད་པ། པདྨ་རྒྱལ།
