ཕྱི་ཟླ་ ༦ ཚེས་ ༡ ནས་ ༣ བར་སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་གྲོས་ཚོགས་ཚོགས་དུས་དང་པོ་འཚོགས་རྒྱུ་དང་སྤྱི་འཐུས་གསར་པ་ ༢༣ ལ་ཟབ་སྦྱོང་འབུལ་བའི་གྲ་སྒྲིག་གནང་བཞིན་འདུག
ཟླ་འདིའི་ཕྱི་ཚེས་ ༣༠ ཉིན་གྱི་སྔ་དྲོར་སྐབས་བཅུ་དྲུག་པའི་བོད་མི་མང་སྤྱི་འཐུས་རྣམ་པས་བར་བརྒལ་སྤྱི་འཐུས་ཚོགས་གཙོ་པདྨ་འབྱུང་གནས་ལགས་ཀྱི་མདུན་དུ་ལས་འཁུར་དམ་བཅའ་འབུལ་རྒྱུ་དང་། ཉིན་དེའི་ཕྱི་དྲོར་སྤྱི་འཐུས་རྣམ་པས་སྤྱི་འཐུས་ཚོགས་གཙོ་དང་ཚོགས་གཞོན་འོས་འདེམས་གནང་སྟེ། ཕྱི་ཉིན་ཁྲིམས་ཞིབ་པ་ཆེ་བའི་མདུན་དུ་ཚོགས་གཙོ་སྦྲེལ་པོ་རྣམ་གཉིས་ནས་ལས་འཁུར་དམ་བཅའ་འབུལ་རྒྱུ་ཡིན་པ་དང་། ཕྱི་ཟླ་ ༦ ཚེས་ ༡ ནས་ ༣ བར་སྐབས་ ༡༦ པའི་གྲོས་ཚོགས་ཚོགས་དུས་དང་པོ་འཚོགས་རྒྱུ་དང་། ཕྱི་ཚེས་ ༤ ནས་ ༡༠ བར་གསར་དུ་ཕེབས་པའི་སྤྱི་འཐུས་ ༢༣ ལ་བདུན་ཕྲག་གཅིག་རིང་ཟབ་སྦྱོང་འབུལ་རྒྱུ་ཡིན་འདུག
འདི་གའི་གསར་འགོད་པས་ཚོགས་དྲུང་སྟོབས་རྒྱལ་ལགས་སུ་སྐབས་བཅུ་དྲུག་པའི་གྲོས་ཚོགས་ཚོགས་དུས་དང་པོའི་ཐོག་ལས་རིམ་གཙོ་བོ་ག་རེ་ཡོད་སྐོར་བཀའ་འདྲི་ཞུས་པར་ཁོང་གིས། ད་ལན་རང་ལུས་མེར་བསྲེགས་གནང་བ་དང་སྤྱི་འཐུས་ཟུར་པ་དགོངས་པ་རྫོགས་དེ་འདྲ་བྱུང་ཡོད་ལ། དེ་བཞིན་ཕྱི་རྒྱལ་གྱི་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་ང་ཚོའི་གྲོགས་པོ་དེ་འདྲ་ཡང་དགོངས་པ་རྫོགས་ཡོད་པ་ཁོང་རྣམས་ལ་མྱ་ངན་གུས་འདུད་ཀྱི་རྗེས་དྲན་ཞུ་རྒྱུ་དང་། བོད་ནང་གི་ཛ་དྲག་གནས་སྟངས་མུ་མཐུད་དུ་གནས་ཀྱི་ཡོད་སྟབས་གདུང་སེམས་མཉམ་སྐྱེད་ཀྱི་གྲོས་གཞི་གྲོས་འཆར་བཅས་ནམ་རྒྱུན་འབུལ་གྱི་ཡོད་པ་ལྟར་ད་ལན་ཡང་འབུལ་བའི་འཆར་གཞི་གཏིང་བསྡད་ཡོད། དེ་ནས་སྲིད་སྐྱོང་གི་དབུས་པའི་བཀའ་ཤག་གསར་པ་ཕེབས་ཡོང་གི་ཡོད་དུས་བཀའ་ཤག་གི་གསལ་བཤད་དེ་འདྲའང་ཡོང་གི་རེད་བསམ་གྱི་འདུག གཞན་ཡང་། བར་ལམ་གྱི་སྲིད་སྤྱིའི་འོས་བསྡུའི་ལམ་རིམ་གྱི་ཐོག་ནས་འོས་བསྡུའི་སྒྲིག་གཞིར་བསྐྱར་བཅོས་བྱུང་ན་ཡག་པོ་འདུག་གསུང་མཁན་མང་པོ་ཞེ་དྲགས་བྱུང་ཡོད་སྟབས། ད་ལན་གྱི་གྲོས་ཚོགས་ནང་འོས་བསྡུའི་སྒྲིག་གཞིར་གང་ལ་གང་འཚམ་གྱིས་བསྐྱར་བཅོས་ཡོང་བ་གསལ་པོ་གཏན་འཁེལ་བསྡད་ཡོད་པ་རེད། གང་ལྟར་ནམ་རྒྱུན་གྲོས་ཚོགས་ཀྱི་ལས་རིམ་ནང་གང་ཡོད་པ་དེ་འཆར་ཅན་ལྟར་བསླེབ་ངེས་རེད། བར་མཚམས་ནས་ག་རེ་བསླེབ་ཀྱི་ཡོད་མེད་ང་ཚོས་ཧ་གོ་ཡི་མ་རེད། གྲོས་ཚོགས་ཀྱི་ལས་རིམ་བཟོ་རྒྱུ་དེ་སྤྱི་འཐུས་ཚོགས་གཙོ་དང་ཚོགས་གཞོན་བདམས་རྗེས་ཁོང་རྣམ་གཉིས་ནས་གཏན་འབེབས་གནང་དགོས་པ་རེད། གལ་སྲིད་སྤྱི་འཐུས་གསར་པ་ཕེབས་ཀྱི་མེད་ན་ནམ་རྒྱུན་ང་ཚོས་ད་ལྟ་ལས་རིམ་རགས་ཟིན་གཏན་འབེབས་གནང་སྟེ་བཀྲམ་ཚར་བ་རེད། ཅེས་བརྗོད་བྱུང་།
འཆར་ཅན་ལྟར་སྤྱི་འཐུས་ཀྱི་མཚན་གནས་གསར་དུ་བཞེས་མཁན་ཚོར་དམིགས་བསལ་གྱིས་མཁྱེན་རྟོགས་གོང་སྤེལ་གྱི་ལས་རིམ་གོ་སྒྲིག་གནང་འཆར་ཡོད་སྐོར་ཁོང་གིས། སྤྱི་འཐུས་སྐབས་རེ་རེ་འཁྱུར་འགྲོ་སྐབས་སྤྱི་འཐུས་ཀྱི་མཚན་གནས་གསར་དུ་བཞེས་མཁན་ཚོར་ང་ཚོས་བདུན་ཕྲག་གཅིག་རིང་ཟབ་སྦྱོང་ཞིག་འབུལ་གྱི་ཡོད་པ་རེད། ཟབ་སྦྱོང་ཐོག་བཙན་བྱོལ་བོད་མིའི་བཅའ་ཁྲིམས་དང་ལས་དོན་བྱེད་ཕྱོགས། དེ་བཞིན་སྔོན་རྩིས་སྒྲིག་གཞི་དང་སྔོན་རྩིས་འགྲོ་ལུགས། བོད་མིའི་ཆབ་སྲིད་ལངས་ཕྱོགས་དང་བོད་རྒྱ་འབྲེལ་མོལ་སྐོར་སོགས་ངོ་སྤྲོད་ཞུས་ཏེ། ཆབ་སྲིད་དང་འཛིན་སྐྱོང་གང་ཅིའི་ཐོག་སྔར་ལས་མཁྱེན་རྟོགས་གསལ་པོ་ཡོང་ཆེད་ཟབ་སྦྱོང་འབུལ་གྱི་ཡོད་པ་རེད། དེའི་ཐོག་ད་ལན་ང་ཚོས་དགའ་ལྡན་ཕོ་བྲང་དང་བོད་མིའི་སྒྲིག་འཛུགས་བཀའ་ཤག་ནས་བཟུང་ལས་ཁུངས་ཁག་ཡོངས་རྫོགས་དང་། དེ་བཞིན་སྡེ་ཚན་ཁག་དང་གཞུང་འབྲེལ་མ་ཡིན་པའི་ཚོགས་པ་ཁག་གང་ཐུབ་ཐུབ་ཅིག་ངོ་སྤྲོད་ཀྱི་དེབ་ཅིག་པར་སྐྲུན་བྱས་ཏེ་གསར་དུ་ཕེབས་པའི་སྤྱི་འཐུས་རྣམས་ལ་འབུལ་དགོས་མིན་འགྲོ་བསམ་བསྡད་ཡོད། གང་ཡིན་ཟེར་ན། གནས་ཚུལ་ག་ཚོད་ཤེས་ནས་ཕྱག་ལས་གནང་བ་ཡིན་ན་དེ་ཚོད་ཀྱིས་སྤུས་དག་པོ་ཆགས་ངེས་རེད། ཅེས་བརྗོད་བྱུང་།
གསར་འགོད་པ། པདྨ་མཚོ།
བདམས་ཐོན་བྱུང་བའི་སྐབས་ ༡༦ པའི་བོད་མི་མང་གི་སྤྱི་འཐུས་ཡོངས་ལ་འཚམས་འདྲིའི་བཀྲིས་བདེ་ལེགས་ཞུ་བ་དང་ཆབས་གཅིག་བོད་དོན་བདེན་མཐའ་མྱུར་དུ་སེལ་བའི་ཐོག་འབད་བསྩོན་གནང་རོགས་ཞེས་གསོལ་འདེབས་ཞུ་འདོད་བྱུང་། བཀྲ་ཤིས་བདེ་ལེགས།