དེ་རིང་སྔ་དྲོའི་ཆུ་ཚོད་ ༡༠ སྟེང་། བོད་ཀྱི་དཔེ་མཛོད་ཁང་གི་ཚོགས་ཁང་དུ། སློབ་བུ་བསྟན་འཛིན་ནམ་མཁའ་ལགས་ཀྱིས་བརྩམས་པའི་<<ཕ་མའི་བརྩེ་སེམས་>>ཞེས་པའི་སྙན་དེབ་དེ་བོད་ཀྱི་དཔེ་མཛོད་ཁང་གི་རྩོམ་སྒྲིག་པ་ན་ག་སངས་རྒྱས་བསྟན་དར་ལགས་ཀྱིས་དབུ་འབྱེད་གནང་སོང་། རྩོམ་པ་པོས་ངོ་སྤྲོད་གནང་བར། དེབ་དེ་ཁོ་རང་ཆུང་དུས་ནས་བྱམས་སྐྱོང་གནང་མཁན་ཕ་མ་གཉིས་ལ་བཀའ་དྲིན་རྗེས་དྲན་དང་། བཙན་བྱོལ་སྤྱི་ཚོགས་ནང་གི་ན་གཞོན་ཚོར་སེམས་ཤུགས་སྤེལ་ཆེད་ཡིན་སྐོར་བརྗོད་སོང་།
བསྟན་འཛིན་ནམ་མཁའ་ལགས་ཀྱིས་བརྗོད་དོན། ང་རང་ལ་སྙན་རྩོམ་འབྲི་བའི་ཚོར་བ་ཐོག་མ་དེ་ཁོ་རང་ཆུང་དུས་ནས་ལྷན་སྐྱེས་སུ་ཡོད་པ་ཞིག་དང་། དམིགས་བསལ་འཛིན་རིམ་བཅུ་གཉིས་ཐོན་རྗེས་སྨན་རྩིས་ཁང་མཐོ་སློབ་ཏུ་ཡིག་ཚད་གཏོང་སྐབས་རང་ཉིད་ལ་ཡིད་ཆེས་ཆེན་པོ་ཡོད་ཀྱང་། རྒྱུགས་འབྲས་ནང་རྩོམ་རྒྱུགས་ཕྱོགས་ནས་ཨང་གཉིས་པ་མ་གཏོགས་རག་མེད་སྟབས། ཅུང་བློ་ཕམ་དང་སེམས་ཤུགས་ཆགས་པ་དང་། སྐབས་དེར་ཁོ་བོར་བོད་ཡིག་གལ་ཆེན་ཡིན་པ་དང་ལྷག་པར་དུ་རྩོག་རིག་གལ་ཆེན་ཡིན་པའི་ངེས་ཤེས་སྐྱེས་ཡོད་པ་དང་། ཕྱིས་ཀྱི་ལོ་ངོ་བཞི་ལྷག་རིང་སོ་སོའི་བོད་ཡིག་ཡར་རྒྱས་ཅུང་བཏང་བ་དང་བསྟུན་ནས་དཔེ་དེབ་ཅིག་རྩོམ་པའི་འདུན་སྐྱེས་སོང་། ཞེས་བརྗོད་སོང་།
སྐུ་མགྲོན་གཙོ་བོ་ན་ག་སངས་རྒྱས་བསྟན་དར་ལགས་ཀྱིས། ང་ཚོ་བོད་པའི་སྤྱི་ཚོགས་ནང་ཁ་ཅིག་གིས་བོད་སྐད་ཡིག་ཡར་རྒྱས་འགྲོ་གི་མི་འདུག་ཅེས་དང་། ཡང་ཁ་གཅིག་གིས་སྔར་ལས་ཡར་རྒྱས་ཆེན་པོ་འགྲོ་འདུག་ཅེས་གསུང་གི་ཡོད་པ་རེད། དེ་ཚོ་ཚང་མ་སོ་སོའི་ལྟ་སྟངས་ཐད་ནས་ཕྱོགས་གཉི་གར་བདེན་པའི་ཆ་རེ་ཡོད་པ་ཞིག་ཆགས་འདུག ཉེ་བའི་ཆར་ནས་བསམ་བློ་བཏང་ན། ཕྱོགས་མང་པོ་ཞིག་ནས་སློབ་སྦྱོང་གི་གོ་སྐབས་དང་དཔལ་འབྱོར་མཐུན་རྐྱེན་སོགས་ཡར་རྒྱས་འགྲོ་བཞིན་པའི་བཟོ་ལྟ་ཞིག་མཐོང་གི་འདུག་ལ། མི་རབས་རྒན་པ་ཚོའི་བསླབ་བྱ་བསྐྱོན་པར་བརྟེན་ནས་སྔ་རྗེས་སུ་མི་རབས་གསར་བ་ཚོས་སྙན་རྩོམ་འབྲི་བ་དང་དཔེ་དེབ་འདོན་པའི་སེམས་ཤུགས་འཕར་བཞིན་ཡོད་པ་ལྟར། ད་རེབ་བསྟན་འཛིན་ནམ་མཁའ་ལགས་ཀྱི་དཔེ་དེབ་དང་པོ་དཔར་སྐྲུན་ཞུས་ཡོད་པ་དང་། དཔེ་དེབ་དང་པོ་ཟེར་དུས་དཔེ་དེབ་གཉིས་པ་ཞིག་ཀྱང་ཡོད་ཤག་ཤག་རེད། ཅེས་གསུངས་སོང་།
ཁོང་གིས་མུ་མཐུད་དུ་གསུངས་དོན། ང་ཚོས་ལས་ཀ་ག་རེ་བྱས་པ་ཡིན་ནའང་སྔོན་གྱི་སྐྱེས་ཆེན་དམ་པ་ཚོའི་ཕྱག་ལས་གནང་སྟངས་ལ་ལྟ་དགོས་དེ་ཧ་ཅང་གལ་ཆེན་པོ་ཡིན་སྟབས། བརྩོན་འགྲུས་དང་དཀའ་ལས་མུ་མཐུད་རྒྱག་དགོས། གང་ཡིན་ཟེར་ན། དཀའ་ལས་ཁག་ཤོས་དེ་ཆུ་ཚོད་ཐུང་ཐུང་རིང་ཤུགས་རྒྱག་རྒྱུ་དེ་མ་རེད། ཡིག་རྒྱུགས་སྐབས་སུ་ཚང་མས་དཀའ་ལས་རྒྱག་གི་ཡོད་པ་རེད། ཡིན་ནའང་དུས་ཚོད་རིང་པོར་དཀའ་ལས་ཤུགས་ཆེན་པོ་བརྒྱབ་སྟེ། གུས་སྦྱོར་གྱི་བརྩོན་འགྲུས་དང་རྟག་སྦྱོར་གྱི་བརྩོན་འགྲུས་གཉིས་ག་བསྟེན་པ་ཡིན་ན། ལས་ཀ་ག་རེ་བྱས་པ་ཡིན་ནའང་ཏན་ཏན་ལས་ཀྱི་རྣམ་པར་སྨིན་པ་ཡིན་ན་མ་གཏོགས་གྲུབ་འབྲས་མི་སྨིན་པ་དེ་འདྲ་སྲིད་ཀྱི་མ་རེད། ཅེས་སོགས་གསུངས་སོང་།
<<ཕ་མའི་བརྩེ་སེམས་>>ཞེས་པའི་དཔེ་དེབ་དེའི་ནང་རང་མོས་སྙན་ངག་དང་ཚིག་བཅད་སྙན་ངག བརྩམས་སྒྲུང་བཅས་ཚན་པ་ ༣ དང་ཤོག་ངོས་ ༡༡༣ ལས་གྲུབ་ཡོད་པ་དང་། བརྩམས་སྒྲུང་དེ་འཆར་ཡན་རིང་ལུགས་ཀྱི་རྩོམ་ཐབས་སྤྱད་ཡོད་པ་། ནང་དོན་གཙོ་བོ་ཕ་མའི་བྱམས་བརྩེ་གལ་འགངས་ཆེ་བའི་སྐོར་ཡིན་ཞིང་། རྩོམ་པ་པོ་ཁོ་རང་ལ་མཚོན་ན་ཚན་པ་གསུམ་གྱི་གྲས་ནས་རྩོམ་ཡིག་ལེགས་ཤོས་དེ་ཚིག་བཅད་སྙན་ངག་དང་དེའི་འགྲེལ་བའི་སྐོར་ཡིན་འདུག
གསར་འགོད་པ། པདྨ་རྒྱལ།
