བསྟན་པ་མགོ་ནས་བཤིག་མཁན་གྱི་བཀའ་སྤྱི།

ཞང་བློན།

ཕྱི་ལོ་ ༢༠༡༦ ཟླ་ ༥ ཚེས་ ༢༧ ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་དབུ་བཞུགས་ཐོག་དཔལ་ལྡན་ཁྲིམས་ཞིབ་པའི་མདུན་དུ་བཀའ་ཤག་སྐབས་བཅོ་ལྔ་པའི་སྲིད་སྐྱོང་བློ་བཟང་སེངྒེས། “བདག་མིང་བློ་བཟང་སེངྒེ་ཞེས་བགྱི་བ། བོད་མིའི་སྒྲིག་འཛུགས་ཀྱི་སྲིད་སྐྱོང་ལ་འོས་ཐོན་བྱུང་བ་ལགས་ན། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་། བློ་གཏད་ཀྱི་ཐོག་ནས། སྲིད་སྐྱོང་གི་ལས་འཁུར་ཞུ་སྒོ་མཐའ་དག་བཅའ་ཁྲིམས་ཀྱི་དགོངས་དོན་དང་འགལ་མེད་ཐོག རང་དོན་ཕྱོགས་ལྷུང་དང་འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོམ་མེད་ཀྱི་སྒོ་ནས། རང་ནུས་གང་ཐེག་ཞུ་རྒྱུའི་མཆོག་གསུམ་དཔང་བཙུགས་ཀྱི་དམ་བཅའ་བརྟན་པོ་ཞུ་རྒྱུ་ཡིན།” ཞེས་ལས་འཁུར་དམ་བཅའ་ཕུལ་བ་རེད།

སྲིད་སྐྱོང་གི་དམ་འབུལ་གྲུབ་ནས་ཉིན་གཉིས་ཕྱིན་པའི་རྗེས་ཏེ། ཕྱི་ཚེས་ ༣༠ ཉིན་སྐབས་བཅུ་དྲུག་པའི་སྤྱི་འཐུས་རྣམ་པས་སྤྱི་འཐུས་ཀྱི་ལས་འཁུར་དམ་བཅའ་ཕུལ་བ་དང་། ཕྱི་ཚེས་ ༣༡ ཉིན་ཚོགས་གཙོ་སྦྲེལ་པོས་ལས་ཁུར་དང་གསང་རྒྱའི་དམ་བཅའ་ཕུལ།   ཕྱི་ལོ་ ༢༠༡༦ ཟླ་ ༦ ཚེས་ ༡ ཉིན་བོད་མི་མང་སྤྱི་འཐུས་སྐབས་བཅུ་དྲུག་པའི་གྲོས་ཚོགས་ཚོགས་དུས་དང་པོ་བསྐོང་ཚོགས་གནང་བ་དང་། སྔ་དྲོའི་ཚོགས་དུས་ཐོག་སྲིད་སྐྱོང་མཆོག་གིས་བཀའ་ཤག་སྐབས་བཅོ་ལྔ་པའི་བཀའ་བློན་འོས་དམིགས་རྣམ་པའི་མཚན་འདོན་གནང་བ་རེད། སྐབས་སྔ་མ་དང་མི་འདྲ་བར་རེབ་འདིར་བཀའ་བློན་གཅིག་ལའང་སྤྱི་མོས་མ་བྱུང་སྟབས། སྲིད་སྐྱོང་གིས་བཀའ་བློན་འོས་དམིགས་རེ་རེ་བཞིན་གྱི་ལོ་རྒྱུས་སྒྲོག་སྦྱང་དང་སྦྲགས་”བཅའ་ཁྲིམས་ཀྱི་དགོངས་དོན་བཞིན་འོས་ཆོས་ཆ་ཚང་ཚང་གི་ཡོད།”ཅེས་གསུངས་གྲུབ་མཚམས། གྲོས་ཚོགས་འཐུས་མི་རྣམ་པས་གསང་བའི་འོས་འཕེན་ཏེ། མཐར་བཀའ་ཤག་སྐབས་བཅོ་ལྔ་པའི་བཀའ་བློན་ཆ་ཚང་མང་མོས་ཐོག་ནས་བསྐོ་བཞག་གནང་ཡོད།

ཉིན་གུང་གསོལ་ཚིགས་གྲུབ་མཚམས་བདམས་ཐོན་བཀའ་བློན་རྣམ་པས། ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་ལས་ཁུར་དང་གསང་རྒྱའི་དམ་བཅའ་འབུལ་བར་ཕེབས་ཡོད་པ་དང་། སྐབས་དེར་དབུས་གཙང་སྤྱི་འཐུས་ཤར་གླིང་བསྟན་འཛིན་ཟླ་སྒྲོན་སྤྱི་འཐུས་ནས་རྩ་དགོངས་མ་ཞུས་པར། བྲེལ་བྲེལ་ཚུབ་ཚུབ་ཀྱིས་བཀའ་བློན་ལས་གནས་ཐོག་དམ་འབུལ་ཞུ་བར་བཅར་ཡོད་པས། འབྲེལ་ཡོད་འགའ་ཤས་ཀྱིས་ལམ་སྟོན་གནང་བ་ལྟར་འཕྲལ་མ་ཉིད་དུ་སྤྱི་འཐུས་ནས་རྩ་དགོངས་ཞུ་བར་མངགས་པ་རེད། དེ་ནས་ཁོང་རྣམས་ཀྱིས་དཔལ་ལྡན་ཁྲིམས་ཞིབ་པ་མཆོག་གི་མདུན་དུ་ལས་ཁུར་དང་གསང་རྒྱའི་དམ་བཅའ་ཕུལ་ཏེ། གཟི་བརྗིད་ལྡན་པའི་ངང་དམ་འབུལ་མ་དེབ་ཏུ་བཀའ་བློན་རེ་རེ་བཞིན་མཚན་རྟགས་བཀོད་པ་དང་། ཁྲིམས་ཞིབ་པ་རྣམ་པ་དང་། ཚོགས་གཙོ་སྦྲེལ་པོ། ལྷན་ཁང་ཁག་གི་སྐུ་ཚབ་རྣམ་པ་བཅས་ཀྱིས་རྟེན་འབྱུང་མཇལ་དར་བསྒྲོན་ཏེ་བཀྲ་ཤིས་བདེ་ལེགས་ཞུས་གནང་མཛད།

དེའི་ཕྱི་དྲོར་བཀའ་དྲུང་ཡིག་ཚང་ནས་གསལ་བསྒྲགས་ཤིག་སྤེལ་ཏེ། “ཕྱི་ལོ་ ༢༠༡༦ ཟླ་ ༦ ཚེས་ ༡ ཉིན་སྐབས་ ༡༦  པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་དང་པོའི་ཐོག་འདེམས་ཐོན་བྱུང་བའི་བཀའ་བློན་རྣམས་བཅའ་ཁྲིམས་དོན་ཚན་ ༢༩ ནང་གསེས་ ༢ པའི་དགོངས་དོན་ལྟར། བཀའ་བློན་གཡུ་ཐོག་ཀརྨ་དགེ་ལེགས་མཆོག་ཆོས་རིག་ལས་ཁུངས་ཀྱི་བཀའ་བློན་དང་། བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ནང་སྲིད་ལས་ཁུངས་ཀྱི་བཀའ་བློན། བཀའ་བློན་ཀརྨ་ཡེ་ཤེས་མཆོག་དཔལ་འབྱོར་ལས་ཁུངས་ཀྱི་བཀའ་བློན། བཀའ་བློན་བླ་བྲང་འཕགས་པ་ཚེ་རིང་མཆོག་བདེ་སྲུང་ལས་ཁུངས་ཀྱི་བཀའ་བློན། བཀའ་བློན་ཤར་གླིང་ཟླ་སྒྲོན་མཆོག་ཕྱི་དྲིལ་ལས་ཁུངས་ཀྱི་བཀའ་བློན། བཀའ་བློན་ཆོས་སྐྱོང་དབང་ཕྱུག་མཆོག་འཕྲོད་བསྟེན་ལས་ཁུངས་ཀྱི་བཀའ་བློན་བཅས་ཀྱི་མཛད་ཁུར་བཞེས་རྒྱུ་དང་། ཤེས་རིག་ལས་ཁུངས་ཀྱི་བཀའ་བློན་སྲིད་སྐྱོང་མཆོག་ནས་གཅིག་ལྕོགས་གནང་རྒྱུ་དང་། འདེམས་ཐོན་བཀའ་བློན་དངོས་གྲུབ་ཚེ་རིང་མཆོག་ཨ་རིར་ཐོངས་མཆན་དུས་འགྱངས་ཞུ་རྒྱུར་ཕེབས་ཡོད་པས་རིང་མིན་ཕྱིར་ཕེབས་ཀྱིས་དམ་འབུལ་ཞུས་མཚམས་ལས་འགན་བཀོད་སྒྲིག་གནང་རྒྱུ།” ཞེས་ཕེབས་པ་རེད། མདོ་དོན་ཉིན་གཅིག་ནང་བཀའ་བློན་འོས་དམིགས་འདོན་པ་དང་། གསང་བའི་འོས་བསྡུའི་ལམ་ནས་འདེམས་བསྐོ་གནང་བ། ལས་ཁུར་དང་གསང་རྒྱའི་དམ་བཅའ་བཞེས་པ། ལས་ཁུངས་བཀོད་སྒྲིག་གནང་བ་བཅས་ཚ་ཚ་འུར་འུར་གྱི་ལས་རིམ་སྤེལ་བ་རེད།

འོན་ཀྱང་དེའི་སང་ཉིན་ཏེ། ཕྱི་ལོ་ ༢༠༡༦ ཟླ་ ༦ ཚེས་ ༢ ཉིན་གསར་འགྱུར་བརྒྱུད་ལམ་དང་སྤྱི་ཚོགས་དྲ་ལམ་ཁག་ཏུ་ཤར་གླིང་བསྟན་འཛིན་ཟླ་སྒྲོན་ལགས་སུ་བཀའ་བློན་གྱི་འོས་ཆོས་ཚང་གི་མེད་པའི་གནས་ཚུལ་ཞིག་རྒྱ་ཁྱབ་འགྲོ་བཞིན་ཡོད། ལས་ཁུར་དམ་འབུལ་ཞུས་ཟིན་པ་མ་ཟད་ལྷན་ཁང་ཡང་གཏན་འབེབས་བྱུང་བའི་བཀའ་བློན་ཞིག་ལ་འོས་ཆོས་ཚང་གི་མི་འདུག་ཟེར་བ་ནི་དཀྲོགས་གཏམ་རང་རེད་སྙམ་པ་དང་། དེ་བས་ཀྱང་སྲིད་སྐྱོང་མཆོག་ནས་གྲོས་ཚོགས་ལ་བཅའ་ཁྲིམས་ཀྱི་དགོངས་དོན་ལྟར་འོས་ཆོས་ཆ་ཚང་ཚང་གི་ཡོད་ཅེས་གསལ་པོ་གསུངས་ཡོད་པ། ལྷག་པར་དུ་བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་། བློ་གཏད་ཀྱི་ཐོག་ནས། སྤྱི་འཐུས་ཀྱི་ལས་འཁུར་ཞུ་སྒོ་མཐའ་དག་བཅའ་ཁྲིམས་ཀྱི་དགོངས་དོན་དང་འགལ་མེད་ཐོག རང་དོན་ཕྱོགས་ལྷུང་དང་འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོམ་མེད་ཀྱི་སྒོ་ནས། རང་ནུས་གང་ཐེག་ཞུ་རྒྱུའི་མཆོག་གསུམ་དཔང་བཙུགས་ཀྱི་དམ་བཅའ་བརྟན་པོ་ཕུལ་མཁན་གྱི་ཚོགས་གཙོ་སྦྲེལ་པོས་གཙོས། ངོ་ཡོད་སྤྱི་འཐུས་ ༤༣ གྱིས་མི་མང་གི་ཚབ་བྱས་ནས་བཀའ་བློན་དུ་འོས་མིན་འདེམས་ཤོག་འཕེན་ཡོད་པས། འོས་ཆོས་མ་ཚང་བའི་གནད་དོན་དེ་འདྲ་ཞིག་གཏན་ནས་ལྷག་ངེས་མ་རེད་སྙམ་བྱུང་།

བློ་ཡུལ་དུ་ཤོང་དཀའ་བ་ཞིག་ལ་ཤར་གླིང་བསྟན་འཛིན་ཟླ་སྒྲོན་ལགས་ཕྱི་ལོ་ ༡༩༨༡ ཟླ་ ༩ ཚེས་ ༢༣ ཉིན་སྐྱེས་ཡོད་པ་དང་། ད་ལྟ་རང་ལོ་ ༣༤ ལས་སོན་མེད་སྟབས། བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ཉེར་གཅིག་པའི་ནང་གསེས་གཉིས་པར། “རང་ལོ་སོ་ལྔ་ཧྲིལ་པོར་ལོན་པ།” ཞེས་པའི་འོས་ཆོས་ཚང་གི་མེད་པ་དངོས་བདེན་རེད་འདུག་པས། བཅའ་ཁྲིམས་ཀྱི་དགོངས་དོན་དང་འགལ་འཛོལ་བྱུང་བའི་བཀའ་བློན་འདི་འདྲ་ཞིག་གང་འདྲ་སླེབས་པ་ཡིན་ནམ་སྙམ་ནས་ཧང་སངས་བྱུང་། དེ་ཡང་ཞིབ་ཏུ་བསམ་ཚེ། གཅིག་ནས་རྒྱལ་སྤྱིའི་ཁྲིམས་ལུགས་ལ་མཁས་པར་གྲགས་པའི་སྲིད་སྐྱོང་མཆོག་གིས་བཙན་བྱོལ་བོད་མིའི་བཅའ་ཁྲིམས་ལ་དོ་གལ་ཆེན་པོར་མ་གཟིགས་པར། གྲོས་ཚོགས་སུ་བཅའ་ཁྲིམས་ཀྱི་དགོངས་དོན་བཞིན་འོས་ཆོས་ཚང་གི་ཡོད་ཅེས་དབུ་སྐོར་ཞུས་པ་དང་། བཅའ་ཁྲིམས་ཀྱི་དགོངས་དོན་ལྟར་བཀའ་བློན་འོས་དམིགས་རྣམ་པའི་འོས་ཆོས་ལ་དོ་ནན་མ་གནང་བ། འཛིན་སྐྱོང་གི་ལས་དོན་ཚགས་ཚུད་མེད་པར་བཀའ་བློན་གྱི་འོས་དམིགས་འདོན་པ།

གཉིས་ནས་དོ་བདག་ཤར་གླིང་བསྟན་འཛིན་ཟླ་སྒྲོན་རང་ཉིད་ཀྱིས་ཀྱང་རང་ལོ་གསལ་པོར་ཤེས་བཞིན་དུ་གསལ་འདོན་མ་བྱས་པ་དང་། བོད་མི་མང་སྤྱི་འཐུས་ཤིག་ཡིན་པའི་ཆ་ནས་ཁྲིམས་དང་བཟང་སྤྱོད་ཀྱི་འགན་འཁུར་མེད་པ། བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་ལ་དོ་ནན་མ་བྱས་པར། བཀའ་བློན་གྱི་ལས་འགན་ཁས་ལེན་དང་དམ་འབུལ་བྱས་པ།

གསུམ་ནས། ཚོགས་གཙོ་སྦྲེལ་པོས་གྲོས་ཚོགས་ཀྱི་ལས་རིམ་སྔར་ལམ་ལྟར་མ་བསྒྲིགས་པ་དང་།  བཀའ་བློན་འོས་དམིགས་ཀྱི་ལོ་རྒྱུས་དང་འོས་ཆོས་ཡིག་ཆ་ཁག་དུས་ཐོག་ཏུ་མ་འགྲེམས་པ། གྲོས་ཚོགས་ཀྱི་གསོལ་ལྕོགས་ཐོག་འབུལ་རྒྱུའི་ཡིག་ཆར་སྤྱི་སྤམ་དུ་འགྲེམས་འཐུས་ངོས་ལེན་བྱས་པ།

བཞི་ནས་མི་མང་གི་སྐུ་ཚབ་སྤྱི་འཐུས་རྣམས་རིག་པ་དང་གསལ་མེད་པ་དང་། ཁྲིམས་སྒྲིག་ལ་དོ་ནན་མེད་པ། གལ་འགངས་ཆེ་བའི་གནད་དོན་ཐག་གཅོད་སྐབས་ཧོལ་རྒྱུགས་ཤོར་བ་བཅས་ལ་བརྟེན། བཀའ་སྤྱི་གཉིས་ཀྱིས་བཅའ་ཁྲིམས་ལ་འགལ་འཛོལ་བྱས་པའི་གནས་ཚུལ་འདི་བྱུང་བར་བསམས།

བཅའ་ཁྲིམས་འགལ་འཛོལ་གྱི་གནས་ཚུལ་འདི་བྱུང་རྗེས། ཕྱི་ཟླ་ ༦ ཚེས་ ༣ ཉིན་སྲིད་སྐྱོང་མཆོག་གིས་གྲོས་ཚོགས་ལ་དགོངས་སེལ་ཞུས་པ་དང་སྦྲགས། བཀའ་ཤག་ནང་བཀའ་སྡུར་གནང་སྟེ་ཤར་གླིང་བསྟན་འཛིན་ཟླ་སྒྲོན་ད་ལྟའི་བཀའ་བློན་གྱི་ལས་གནས་ནས་ཕྱིར་འཐེན་བྱས་པ་ཡིན་ཞེས་གྲོས་ཚོགས་ལ་སྙན་གསན་ཞུས་པ་རེད། ཤར་གླིང་བསྟན་འཛིན་ཟླ་སྒྲོན་ལགས་བོད་མི་མང་སྤྱི་འཐུས་ནས་དགོངས་པ་ཞུས་ཟིན་པ་དང་། དེའི་ཚབ་ཏུ་སྤྱི་འཐུས་གཞན་ཞིག་བསྐོ་བཞག་ཟིན་པ། གྲོས་ཚོགས་ཀྱིས་མང་མོས་ཐོག་ནས་བཀའ་བློན་དུ་བདམས་པ། བཅའ་ཁྲིམས་ཀྱི་དགོངས་དོན་ལྟར་བཀའ་བློན་གྱི་དམ་བཅའ་ཕུལ་ཟིན་པ། དམ་འབུལ་མ་དེབ་ཐོག་ཏུ་མཚན་རྟགས་བསྐྱོན་གྲུབ་པ། བཀའ་དྲུང་ཡིག་ཚང་ནས་ལྷན་ཁང་བཀོད་སྒྲིག་གནང་ཟིན་པ་བཅས་ལ་བརྟེན། དུས་དེ་ནས་བཟུང་ཁོང་བཀའ་བློན་ཞིག་ཡིན་པས། སྟབས་བདེ་པོའི་ཐོག་ནས་ཕྱིར་འཐེན་ཡིན་ཟེར་བ་ནི་ཁྲིམས་སྒྲིག་དང་མི་མཐུན་པའི་ཐག་གཅོད་ཅིག་ཡིན། མ་ཟད་བཀའ་བློན་གྱི་ལས་གནས་ནས་ཕྱིར་འཐེན་ཞེས་པ་ནི་བཅའ་ཁྲིམས་ཀྱི་དོན་ཚན་གང་དུ་ཡང་མེད་པའི་ཚིག་གཅིག་ཡིན་པས། བཀའ་བློན་འཕོ་འགྱུར་གཏོང་དགོས་ཚེ་དེ་ངེས་པར་དུ་བཅའ་ཁྲིམས་ཀྱི་དགོངས་དོན་བཞིན་གནང་ལུགས་གནང་སྟངས་ཤིག་ཡོད་པ་ལས། ཕྲུ་གུའི་རྩེད་མོ་ལྟར་གང་འདོད་བྱ་ས་ག་ལ་ཡོད། འདེམས་བསྐོ་ཟིན་པའི་བཀའ་བློན་སུ་རུང་ཞིག་བཀའ་བློན་གྱི་ལས་གནས་ནས་འཕོ་དགོས་ཚེ།  བཀའ་བློན་རང་ཉིད་ཀྱིས་དགོངས་པ་ཞུ་བའམ། ཡང་ན་གྲོས་ཚོགས་ནས་འཕོ་འགྱུར་བཏང་བ། དེ་མིན་བཅའ་ཁྲིམས་དོན་ཚན་ཉེར་དགུ་པའི་ནང་གསེས་བཞི་པར། སྲིད་སྐྱོང་གིས་བཀའ་བློན་བྱེ་བྲག་པ་སུ་རུང་དགོངས་ཞུ་བྱེད་དགོས་ཀྱི་བསམ་འཆར་བཏོན་ཚེ། བཀའ་བློན་དེས་ངེས་པར་དུ་དགོངས་པ་ཞུ་དགོས། ཞེས་པའི་དགོངས་དོན་ལྟར། སྲིད་སྐྱོང་གི་བསམ་འཆར་འོག་བཀའ་བློན་གྱི་ལས་གནས་ནས་དགོངས་པ་ཞུ་རྒྱུ་ལས། དེ་མིན་ཐབས་ལམ་ཞིག་གང་ནའང་མེད། ཐེངས་འདིར་སྲིད་སྐྱོང་མཆོག་གིས་ཤར་གླིང་བསྟན་འཛིན་ཟླ་སྒྲོན་ལགས་ཕྱིར་འཐེན་ཡིན་གསུངས་པ་དེ། ཁོང་ལ་བསམ་འཆར་ཡོད་པ་ལྟར། བཀའ་བློན་ལས་འཁྱུར་བར་ངོས་འཛིན་བྱ་དགོས་སམ། དེ་ལྟར་ཡིན་ན་བཙན་བྱོལ་བོད་མིའི་བཅའ་ཁྲིམས་དོན་ཚན་ཉེར་དགུ་པའི་ནང་གསེས་ལྔ་པར། བཀའ་བློན་བྱེ་བྲག་པ་འཕོ་འགྱུར་བྱུང་ཚེ་སྤྱི་འཐུས་ལྷན་ཚོགས་ཀྱི་ཚོགས་འདུ་འཚོགས་མུས་ཡིན་ན་ཚོགས་དུས་དེ་གའི་ནང་དང་། དེ་མིན་ཚོགས་དུས་རྗེས་མའི་ནང་སྲིད་སྐྱོང་གིས་ཚབ་གསར་བཅའ་ཁྲིམས་དོན་ཚན་ ༢༢ པ་ནང་གསལ་བཞིན་མིང་འདོན་བྱེད་དགོས་ཞེས་པའི་དགོངས་དོན་ལྟར། རེབ་འདིར་སྤྱི་འཐུས་ལྷན་ཚོགས་ཀྱི་ཚོགས་འདུ་འཚོགས་མུས་ཡིན་པས། བཅའ་ཁྲིམས་ཀྱི་དགོངས་དོན་ལྟར་ཚབ་གསར་མིང་འདོན་བྱ་དགོས་པས། དེ་མི་བྱེད་དོན་གང་རེད་དམ། སྤྱི་འཐུས་རྣམ་པས་བཅའ་ཁྲིམས་ཀྱི་དགོངས་དོན་ལྟར། ཚབ་གསར་མིང་འདོན་བྱེད་རྒྱུའི་བཀའ་མོལ་མི་གནང་བའི་རྒྱུ་མཚན་གང་ཡིན་ནམ། ཁྱེད་ཚོས་ག་རེ་རྩོད་ནས་བཞུགས་ཡོད། ནམ་རྒྱུན་མཛད་གཙོ་རྣམ་པའི་ཕོགས་ཐོབ་དང་བགྲེས་ཤག་སོགས་ཀྱི་སྐོར་ལ་བཀའ་སྤྱི་གཉིས་ཀས་འགྲེལ་བཤད་ལ་ཡང་བཤད་བྱས་ཏེ་གསལ་བཀྲོལ་བྱེད་ཀྱི་འདུག་པས། ད་ཐེངས་བཅའ་ཁྲིམས་ཀྱི་དགོངས་དོན་མི་མཐུན་པར་བཀའ་བློན་བསྐོས་པ་དང་། ཡང་བཅའ་ཁྲིམས་ཀྱི་དགོངས་དོན་དང་མི་མཐུན་པར་བཀའ་བློན་འཕོ་འགྱུར་བྱས་པ་སོགས། བཅའ་ཁྲིམས་དོན་ཚན་རིམ་པ་བཞིན་འགལ་འཛོལ་བྱུང་ཡང་། སྐབས་བཅུ་དྲུག་པའི་གྲོས་ཚོགས་ཚོགས་དུས་དང་པོ་གཟི་བརྗིད་ལྡན་པའི་ངང་གྲོལ་སོང་། ཞེས་གསུངས་ཕོད་པ་ནི་ངོ་མ་ཧ་ལས་དགོས་པ་ཞིག་མ་རེད་དམ།

གོ་ཐོས་ལྟར་ན་བཀའ་ཤག་ལྷན་རྒྱས་ནང་ཟླ་སྒྲོན་ཤར་གླིང་ལགས་གནས་སྐབས་ངང་སྒུག་གནང་སྟེ། མ་འོངས་པར་བསྐྱར་དུ་ཕྱི་དྲིལ་བཀའ་བློན་ལ་བསྐོ་རྒྱུའི་ནང་མོལ་ཞིག་བྱུང་ཡོད་ཚོད་འདུག ཁོ་མོར་མཚོན་ན་ཟླ་ཤས་ངང་སྒུག་བྱ་རྒྱུ་ཙམ་ལས་དོན་དུ་རང་ཉིད་ཕྱི་དྲིལ་བཀའ་བློན་ཡིན་སྙམ་གྱི་ཡོད། འོན་ཀྱང་ཐེངས་རྗེས་མར་བཀའ་བློན་ལ་ཡོང་སའི་ལམ་ཁ་ཞིག་གང་ན་ཡོད། བཅའ་ཁྲིམས་དོན་ཚན་ཉེར་གཅིག་པའི་ནང་གསེས་བརྒྱད་པར། བཀའ་བློན་གྱི་འོས་ཆོས་ནང་། “བཅའ་ཁྲིམས་དོན་ཚན་ ༢༩ པའི་ནང་གསེས་ ༣ པའི་ཀ་དང་ ༤ པ་ལྟར་སྲིད་སྐྱོང་ངམ་བཀའ་བློན་འཕོ་འགྱུར་བྱེད་དགོས་བྱུང་བ་མ་ཡིན་པ།” ཞེས་པའི་དགོངས་དོན་ལྟར། ཁོ་མོ་ནི་ནང་གསེས་ ༤ པའི་འོག་”སྲིད་སྐྱོང་གིས་དགོངས་ཞུ་བྱེད་དགོས་ཀྱི་བསམ་འཆར་བཏོན་ནས་འཕོ་འགྱུར་བྱུང་བ་ཞིག་ཡིན་”དགོས་པས། དོན་ཚན་འདིའི་འོག་ཁོ་མོར་བཀའ་བློན་གྱི་འོས་ཆོས་མ་ཚང་བར་གྱུར་ཡོད། དེ་བས་ཀྱང་བཅའ་ཁྲིམས་ལ་འགལ་འཛོལ་བྱུང་བ་དང་། བཟང་སྤྱོད་དང་འགལ་འཛོལ་བྱུང་བའི་གང་ཟག་ཅིག་བསྐྱར་དུ་བཀའ་བློན་འོས་དམིགས་སུ་འདོན་པ་དང་། སྤྱི་འཐུས་རྣམ་པས་ཀྱང་དེ་ལ་འོས་འཕེན་ནས་བཀའ་བློན་ལ་བསྐོ་བཞག་གནང་ན། བོད་ཀྱི་མང་གཙོའི་རིན་ཐང་ཐལ་བར་གཏོང་བའི་བྱ་སྤྱོད་ཅིག་ལོས་ཡིན།

སྤྱི་ཚོགས་དྲ་ལམ་ཁག་ཏུ་ཟླ་སྒྲོན་ཤར་གླིང་སྤྱི་འཐུས་ནས་དགོངས་ཞུ་བྱ་རུ་བཅུག་སྟེ་དེའི་ཚབ་ཏུ་འཕྲོད་བསྟེན་བཀའ་ཟུར་གྱི་སྤུན་མཆེད་དེ་ཡར་འཐེན་ཆེད། སྲིད་སྐྱོང་མཆོག་གིས་ཆེད་དུ་ཆབ་སྲིད་འཁྲབ་པ་ཡིན་ཚུལ་གླེང་མཁན་རིགས་གཅིག་ཡོད་ལ། ཡང་ལ་ལས་སྤྱི་འཐུས་འགའ་ཤས་ཀྱིས་ཟླ་སྒྲོན་ཤར་གླིང་ལ་འོས་ཆོས་ཚང་གི་མེད་པ་ཤེས་བཞིན་དུ་ཆབ་སྲིད་འཁྲབ་ནས་བཀའ་བློན་ལ་བསྐོས་ཏེ། རྐང་བཙུགས་ནས་སྲིད་སྐྱོང་ལ་ཁག་པོ་བཟོས་པ་དང་། སྲིད་སྐྱོང་གིས་གྲོས་ཚོགས་ལ་དགོངས་སེལ་ཞུ་རུ་བཅུག་པ་རེད་ཅེས་གླེང་མཁན་ཡང་འདུག གསར་ལམ་དང་སྤྱི་ཚོགས་དྲ་རྒྱ་ཁག་གི་སྐད་ཆ་མང་པོ་ཞིག་ལ་ཆ་འཇོག་བྱེད་ས་མེད་ཅིང་། ལྷག་པར་མཛད་གཙོ་རྣམ་པས་མཁྱེན་ཡོན་ཞེ་དྲགས་ཡོད་མདོག་གིས་སྣང་ཆུང་གཏོང་གི་ཡོད་མོད། ད་ཐེངས་གསར་ལམ་དང་སྤྱི་ཚོགས་དྲ་ལམ་བརྒྱུད་ནས་ཐེར་འདོན་བྱས་ན་མ་གཏོགས། དེ་མིན་མགོ་རུལ་རྣ་བས་མ་ཚོར་བར་བཅའ་ཁྲིམས་ཀྱི་དགོངས་དོན་ལས་བརྒལ་རུང་ལྷོད་ཀྱིས་སྡོད་ཚོད་ཡིན། སྲིད་སྐྱོང་མཆོག་གིས་གྲོས་ཚོགས་ནང་“ཉིན་དང་པོར་ཞུས་པ་ལྟར་གཟའ་ཟླ་བའི་སྔ་དྲོ་ཆུ་ཚོད་ ༡༡ ཡས་མས་ནས་བཀའ་བློན་རིམ་པར་འབྲེལ་བ་ཞུས་པ་ཡིན། སྐབས་དེར་ཆ་རྐྱེན་གཉིས་ཏེ་༧གོང་ས་མཆོག་གི་བཀའ་དགོངས་གཞིར་བཟུང་དང་དབུ་མའི་ལམ་གཞིར་བཟུང་ཕྱག་ལས་གནང་དགོས་པ་རེད་ཅེས་ཞུས་པ་དང་སྦྲགས། བཀའ་བློན་ཁོང་རང་ལ་ཁྱེད་རང་གི་སྐྱེས་ལོ་གང་འདྲ་རེད་ཅེས་འདྲི་སྐབས། སྐྱེས་ལོ་ ༡༩༨༡ རེད་གསུངས་དུས་ཧོབ་དེ་གྲངས་ཀ་རྒྱག་ཡོང་སྐབས་དགུང་ལོ་ ༣༥ ཚང་འདུག་དགོངས་པ་རེད།”  ཅེས་ལོ་ ༣༥ ཚང་ཡོད་གསུངས་མཁན་དེ་དོ་བདག་ཟླ་སྒྲོན་ཤར་གླིང་ཡིན་པའི་མཐའ་བསྡོམས་བརྒྱབས་ཏེ། མང་ཚོགས་ཀྱི་མིག་མདའ་དེ་གང་ཟག་གཅིག་གི་ཐོག་ཏུ་འཕེན་ཐབས་བྱས་ཡོད། གང་ལྟར་ཡང་སྐབས་བཅུ་དྲུག་པའི་སྤྱི་འཐུས་ནང་འོས་གྲངས་མཐོ་ཤོས་ཡིན་པའི་ཟླ་སྒྲོན་ཤར་གླིང་ལགས། དབུས་གཙང་མི་མང་གིས་རེ་སྐུལ་བྱས་པ་བཞིན་མི་མང་གི་སྐུ་ཚབ་བྱས་ནས་སྤྱི་འཐུས་སུ་མ་བཞུགས་པར། ཟང་ཟིང་གི་འཁྲབ་སྟོན་ནང་ཞུགས་སྟབས། ད་ཆ་ཕར་རིའི་ལྕི་བ་མེད། ཚུར་རིའི་སླེ་པོ་མེད་པ། ཟེར་བའི་དཔེ་ཟླར་གྱུར་བ་མ་ཟད། ཐེངས་འདིའི་བཅའ་ཁྲིམས་འགལ་འཛོལ་ལ་བརྟེན་ནས་མ་འོངས་པར་བཀའ་བློན་དང་སྲིད་སྐྱོང་གི་འོས་མིར་ཞུགས་རྒྱུའི་ཆ་རྐྱེན་དང་འགྲོ་ལམ་གཏན་དུ་བརླགས་པ་རེད།

ཉིན་ཤས་གོང་སྲིད་སྐྱོང་དམ་འབུལ་མཛད་སྒོའི་ཐོག་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ནས་”དངོས་གནས་དྲང་གནས་ཡ་རབས་སྤྱོད་བཟང་དང་དྲང་བདེན། རྒྱབ་མདུན་ངོ་ལྐོག་མེད་པ། ཕྱི་གསལ་ནང་གསལ་གྱིས་ང་ཚོས་སྤོབས་པ་བྱས་ནས་འཛམ་བུ་གླིང་འདིའི་སྒང་ལ་གདོང་སྟོན་ཐུབ་པའི་ཆ་རྐྱེན་གཙོ་བོ་དེ། ང་ཚོའི་ཡ་རབས་དྲང་བདེན་དང་སྤྱོད་བཟང་དེ་ཚོ་ཆགས་ཀྱི་ཡོད་པ་རེད། དེ་ཚོ་ཏོག་ཙམ་བསྟན་པ་མགོ་ནས་བཤིག་པ་འདྲ་པོ་ཞིག་ཆགས་ཡོང་དུས། དགའ་རབ་བློ་ཕམ་ཡོང་གི་འདུག” ཅེས་དང་། “ང་ལ་ཏོག་ཙམ་གྲོགས་པོའི་འདུ་ཤེས་ཡོད་ན་ཁ་ལ་ཉན་དགོས་པ་རེད། ༧རྒྱལ་བ་རིན་པོ་ཆེ་ཞེས་མདུན་དུ་ཐུག་པའི་སྐབས་ལ་དགའ་རབ་ཡིན་མདོག་མདོག་བྱས། རྒྱབ་ལོགས་ལ་ཆོས་ལུགས་འཐེན་འཁྱེར་དང་ཆོལ་ཁའི་འཐེན་འཁྱེར་བྱས། སྐྱག་རྫུན་དང་ཧམ་པ་ཏོག་ཙམ་ཏོག་ཙམ་བཤད་བསྡད་པ་ཡིན་ན་ཡག་པོ་ཡོད་པ་མ་རེད་པཱ།” ཞེས་བཀའ་སློབ་ལམ་སྟོན་ཟབ་རྒྱས་ཕེབས་ཡོད།   བཀའ་སློབ་འདིའི་དྲོད་མ་ཡལ་གོང་”བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་། བློ་གཏད་ཀྱི་ཐོག་ནས། སྲིད་སྐྱོང་གི་ལས་འཁུར་ཞུ་སྒོ་མཐའ་དག་བཅའ་ཁྲིམས་ཀྱི་དགོངས་དོན་དང་འགལ་མེད་ཐོག རང་དོན་ཕྱོགས་ལྷུང་དང་འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོམ་མེད་ཀྱི་སྒོ་ནས། རང་ནུས་གང་ཐེག་ཞུ་རྒྱུའི་མཆོག་གསུམ་དཔང་བཙུགས་ཀྱི་དམ་བཅའ་བརྟན་པོ་”ཕུལ་བའི་བཀའ་སྤྱི་གཉིས་ནས་བླ་ན་མེད་པའི་བཅའ་ཁྲིམས་རིན་པོ་ཆེའི་དགོངས་དོན་ལ་རྡོག་རོལ་བཏང་སྟེ། བསྟན་པ་མགོ་ནས་བཤིག་ཡོང་དུས། མང་ཚོགས་ཀྱིས་བློ་གཏད་སུ་ལ་བཅོལ་དགོས་སམ། །

“སྟོབས་དང་ལྡན་རྣམས་རང་འདོད་ལྷུར་ལེན་ཕན་ཚུན་རྩོད་ཅིང་དམའ་ལ་འཚེ། །

དམན་པ་རྣམས་ནི་རྟག་ཏུ་འཁོལ་ཞིང་གྱི་ནའི་ཟས་ཀྱང་རྙེད་པར་དཀའ། །

མི་བཟད་སྙིགས་མའི་ངང་ཚུལ་འདི་འདྲར་འཕགས་པས་བཏང་སྙོམས་མཛད་ལགས་ན། །

སྔོན་གྱི་ཐུགས་དམ་དེ་ཡིས་ཅི་འཚལ་འབངས་རྣམས་སུ་ཞིག་སྐྱབས་ལ་བསྟེན།” ཞེས་ཀྱང་བྱའོ། །