རྒྱ་ནག་ཕྱི་སྲིད་བློན་ཆེན་ལ་ཁེ་ན་ཌའི་གསར་འགོད་པ་ཞིག་གིས་རྒྱ་ནག་གི་འགྲོ་བ་མིའི་ཐོབ་ཐང་སྐོར་དྲི་བ་བཏོན་པའི་ལན་དུ་མི་མང་དཀྱིལ་དུ་ཐད་ཀར་ཁ་རྡུང་དྲག་པོ་བཏང་ཡོད་འདུག
གཟའ་ལྷག་པའི་ཉིན། ཁེ་ན་ཌའི་ཕྱི་སྲིད་བློན་ཆེན་སེ་ཊེ་ཧྥན་ཌེ་འོང་(Stepane Dion)དང་། རྒྱ་ནག་གི་ཕྱི་སྲིད་བློན་ཆེན་ཝང་ཡི་(Wang Yi)གཉིས་གོ་ལའི་སྤྱི་ཁྱབ་ལས་དོན་ཁང་གི་མི་སྣ་མཇལ་འཛོམས་སྐབས། གསར་འགོད་ལྷན་ཚོགས་ཤིག་སྐོང་སྐབས་བའི་ཐོག ཁེ་ན་ཌའི་ཨའི་པོ་ལི་ཊིག་ས་(web outlet IPolitics)ཞེས་པའི་གསར་ཁང་གི་གསར་འགོད་པས་རྒྱ་ནག་གི་འགྲོ་བ་མིའི་ཐོབ་ཐང་སྐོར་དང་། རྒྱ་གཞུང་གིས་གསང་ཉུལ་བའི་ཉེས་མིང་འོག་འཛིན་བཟུང་བྱས་པའི་ཁེ་ན་ཌའི་མི་སེར་ཀེ་ཝིན་གྷ་རཱ་ཊའི་(Kevin Garratt)ཡི་སྐོར་བཅས་ཀྱི་སྐོར་ཝང་ཡི་ལ་དྲི་བ་དྲིས་པར། ཝང་ཁོང་ཁྲོའོ་རྣམ་འགྱུར་མངོན་གསལ་ངང་དེ་ནི་དོ་ཁུར་མེད་པའི་སྐད་ཆ་ཞིག་རེད་ཅེས་བཤད་པ་དང་། “ཁྱོད་ཀྱི་དྲི་བ་ནི་ཕྱོགས་ལྷུང་ཆེ་ལ་རྒྱ་ནག་གི་ཁ་གཏད་དུ་ལངས་པ་ཞིག་རེད། དྲི་བ་དེ་གང་ནས་ཡོང་མིན་མི་ཤེས་ཀྱང་། རྩ་བ་ནས་ཁས་ལེན་བྱེད་ཐབས་བྲལ་བ་ཞིག་རེད།”ཅེས་བརྗོད་ཡོད་པ་དང་། ཁོས་ད་དུང་ “རྒྱ་ནག་གི་འགྲོ་བ་མིའི་ཐོབ་ཐང་གནས་བབ་སྐོར་ཕྱི་མི་ལས་རྒྱ་མི་རིགས་ཀྱིས་ལེགས་པ་ཤེས་ཀྱི་ཡོད། འགྲོ་བ་མིའི་གནས་བབ་ཀྱི་ཐོག་ནས་བཤད་ན། རྒྱ་མི་རིགས་ཀྱི་གནས་སྟངས་ཡག་ཐག་ཆོད་ཡོད།” ཅེས་དང་། “ དེར་བརྟེན། ངས་ཁྱོད་ལ་དོ་ཁུར་མེད་པའི་དྲི་བའི་རིགས་མི་འདྲི་བའི་དྲན་སྐུལ་བྱེད་ཀྱི་ཡོད། ང་ཚོས་མཐུན་འབྲེལ་གྱི་རང་བཞིན་དུ་གྱུར་བའི་དྲི་བར་དགའ་བསུ་དང་། གཞི་མེད་སྐྱོན་འཛུགས་ཀྱི་དྲི་བར་ངོས་ལེན་བྱེད་རྒྱུ་མིན།”ཞེས་སོགས་བརྗོད།
དེ་གའི་གསར་འགོད་པ་ཚོས་ཨཱི་པོ་ལི་ཊིག་སའི་(IPolitics)གསར་འགོད་པའི་དྲི་བར་ཧ་ཅང་མོས་མཐུན་བྱས་ཡོད་པ་རེད། ཝང་ཡིས་གསར་འགོད་པ་དེར་ཁྱོད་རྒྱ་ནག་ཏུ་འགྲོ་མྱོང་ཡོད་དམ་ཟེར་བ་དང་། མུ་འཐུད་ “རྒྱ་ནག་མི་མང་ས་ཡ་ ༦༠༠ ལྷག་དབུལ་ཕོངས་ཀྱི་གནས་ལས་གྲོལ་ཐུབ་པ་ཁྱོད་ཀྱིས་ཤེས་སམ། རྒྱ་ནག་གཞི་རྟེན་སྐྱོ་བོ་ཞིག་ནས་ད་ཆ་འཛམ་གླིང་གི་དཔལ་འབྱོར་ཨང་གཉིས་པ་ཆགས་ཡོད་པ་ཁྱོད་ཀྱིས་ཤེས་སམ། རྒྱ་ནག་གི་རྩ་ཁྲིམས་ནང་འགྲོ་བ་མིའི་ཐོབ་ཐང་སྲུང་སྐྱོབ་དང་དར་སྤེལ་གཏོང་རྒྱུ་བཀོད་ཡོད་པ་ཁྱོད་ཀྱིས་ཤེས་སམ།”ཞེས་སོགས་བརྗོད།
དེ་སྔོན་སེ་ཊེ་ཧྥན། ཌེ་འོང་ལ་གསར་འགོད་པས་ཀེ་ཝིན་གྷ་རཱ་ཊ་ཡི་གནད་དོན་སྐོར་དྲི་བ་དྲིས་པར། ངས་གནད་དོན་དེའི་སྐོར་ཝང་ཡི་དང་ལྷན་དུ་གླེང་སློང་བྱས་པ་ཡིན། གོ་སྐབས་ནམ་བྱུང་ལ་འགྲོ་བ་མིའི་ཐོབ་ཐང་གནད་དོན་སྐོར་དང་། དཀའ་ཚེགས་ཆེ་བའི་ཚོང་འབྲེལ་གྱི་གནད་དོན་སྐོར་གླེང་སློང་བྱེད་ཀྱི་ཡོད་ཅེས་བཤད།
གྷ་ར་ཊ་ནི་དྷང་ཌོང་ཞེས་པའི་བྱང་ཀོ་རིའི་ས་མཚམས་སུ་ཡོད་པའི་གྲོང་ཁྱེར་ཁྲིམས་ཁང་ཞིག་གིས་ནག་ཉེས་ཁྲིམས་ཐག་བཅད་པ་རེད། གྲོང་ཁྱེར་དེར་ཁོ་པ་རང་ཉིད་ཀྱི་བཟའ་ཟླ་དང་ལྷན་དུ་མི་མང་པོས་དགའ་པོ་བྱེད་པའི་ཀོ་ཕི་(coffee)ཚོང་ཁང་ཞིག་གཉེར་གྱི་ཡོད་པ་དང་། བྱང་ཀོ་རི་ཡར་ཡེ་ཤུའི་རོགས་ཚོགས་ཤིག་གི་སྣེ་ཁྲིད་ལམ་སྟོན་བྱེད་ཀྱི་ཡོད་པ་རེད། ཁོ་པ་དང་བཟའ་ཟླ་གཉིས་ཕྱི་ལོ་ ༢༠༡༤ ལོའི་ཟླ་ ༨ པའི་ནང་རྒྱལ་ཁབ་བདེ་སྲུང་ཚན་པས་འཛིན་བཟུང་བྱས་པ་དང་། བཟའ་ཟླ་དེ་ཕྱིས་སུ་ཀློད་གྲོལ་བཏང་ཡོད་པ་རེད། ཌེ་འོང་གིས་ང་དང་ཝང་ཡི་གཉིས་ཀྱི་བར་འགྲོ་བ་མིའི་ཐོབ་ཐང་སྐོར་དང་ཚོང་འབྲེལ་གནད་དོན་ཐོག་གླེང་མོལ་ཁ་རི་ཁ་ཐུག་དང་དྲང་པོ་དྲང་གཞག་ངང་བྱས་ཡོད།
ཝང་གིས་སྲིད་བློན་ཇ་སི་ཊིན། ཊུ་ཌིའུ་(Justin Trudeau)མཆོག་ཀྱང་མཇལ་འཕྲད་བྱས་ཡོད་པ་རེད་བཅས་བཤད།ཝང་ཡིས་ཁེ་ན་ཌ་དང་རྒྱ་ནག་གཉིས་ནི་འབྲེལ་ལམ་གསེར་གྱི་དུས་གསར་(new Golden Age)རམ་འབྲེལ་ལམ་བཟང་པོར་ཁ་ཕྱོགས་བཞིན་པར་ཡིད་ཆེས་དང་། ཕྱི་ལོ་ ༡༩༧༠ ལོར་སྲིད་བློན་ཇ་སི་ཊིན་མཆོག་གི་ཡབ་ཀྱིས་ཕྱི་སྲིད་ཀྱི་འབྲེལ་བ་གསར་འཛུགས་གནང་བ་ནས། སྔར་གྱི་བསམ་བློ་གུ་ཡངས་ཅན་གྱི་སྲིད་བློན་ཇིན། ཁི་རི་ཤན་(Jean Chretien)དང་། པོལ། མར་ཊིན།(Paul Martin)གཉིས་ཀྱིས་རྒྱ་སྐྱེད་བྱས་ཚུལ་ལུང་འདྲེན་བྱས་པ་དང་། དེ་སྔོན་གྱི་རྙིང་ཞེན་ཅན་གྱི་སྲིད་བློན་སི་ཊེ་ཧྥན། ཧར་ཕེར་(Stephen Harper)གྱི་སྐོར་གང་ཡང་བརྗོད་མེད་པ་རེད།
སི་ཊི་ཧྥན་གྱིས་ལོ་ངོ་བཅུ་ཕྲག་དབང་སྒྱུར་བྱས་པའི་རིང་། རྒྱ་ནག་ལ་དམའ་འབེབས་དང་བརྙས་སྨོད་བྱས་པའི་སྐྱོན་འཛུགས་ཀྱིས། ཡུལ་གཉིས་ཀྱི་འབྲེལ་བ་ཧ་ཅང་གྲང་ཤུར་ཤུར་གྱི་གནས་བབས་ཤིག་ཏུ་སྐྱེལ་དགོས་བྱུང་ཡོད།ཞི་ཅིན་ཕིན་གྱི་ཆེས་ཐོག་མའི་རྒྱལ་སྤྱིའི་ཕྱོགས་སྐྱོད་སྐབས་སྲིད་བློན་ཇ་སི་ཊིན། ཊུ་ཌིའུ་ཡིས་བཟང་ཕྱོགས་ཀྱི་འབྲེལ་ཟམ་བཙུགས་པར་བརྟེན། ཞི་ཡིས་ཊི་ཌིའུ་ཡི་ཡབ་ཀྱིས་ཕྱི་ལོ་ ༡༩༧༠ ལོར་རྒྱ་ནག་དང་ལྷན་ཕུགས་རྒྱང་རིང་བའི་ཕྱི་འབྲེལ་གསར་བཙུགས་བྱས་པར། ཊར་ཀི་རུ་སྐོང་འཚོགས་བྱས་པའི་རྒྱལ་ཁབ་ ༢༠(G20)ལྷན་ཚོགས་སྐབས་བསྔགས་བརྗོད་བྱས་ཡོད་པ་རེད།
ཨེ་པི་གསར་ཁང་(AP)གིས་སྤེལ་བ་སྐལ་ལྡན་གྱིས་བོད་སྒྱུར་བྱས།
