ཌ་ཝི་ཌི་བྷ་ལར་ DAVID BLAIR གྱིས་བརྩམས།
རིག་འཛིན་ལྷུན་གྲུབ་ཀྱིས་བསྒྱུར།
ཨ་རིའི་སྲིད་འཛིན་ཨོ་བྷ་མས་ཉི་ཧོང་གི་གྲོང་ཁྱེར་ཧེ་རོ་ཤི་མའི་ཞི་བདེའི་ཚལ་དུ་མེ་ཏོག་ཞག་འཁོར་འབུལ་བསྒྲོན་གནང་། ཁོང་གི་སྐོར་སྐྱོད་དེ་ནི་ “འཆི་བདག་མཁའ་དབྱིངས་ནས་བབས་པ་དང་འཛམ་གླིང་འཕོ་འགྱུར་” གྱི་དུས་དྲན་ཉིན་མོ་དེར་འཁེལ་ཡོད་པ་མ་ཟད། སྐོར་སྐྱོད་དེ་ནི་དམག་འཁྲུག་མཇུག་བསྒྲིལ་ཅིང་གཏོར་རླག་གི་ཅོང་བརྡ་དང་བཅས་མཐའ་མཇུག་གི་རྒྱལ་ཁ་ཐོབ་པའི་དུས་སྐབས་དྲན་གསོ་ཞིག་ཀྱང་ཆགས་ཡོད།
ད་ལྟའི་དངོས་ཡོད་གནས་སྟངས་ལ་གཞིགས་ན་མ་འདྲ་བ་ཅི་ཞིག་ཡོད་དམ། ང་ཚོ་ནི་རྒྱལ་ཁ་ལ་ངེས་བརྟན་མེད་པ་དང་། དམག་འཁྲུག་གིས་མཐའ་མའི་ཐག་གཅོད་བྱེད་མི་ཐུབ་པ། དྲག་ཤུགས་བྱ་འགུལ་ཡང་ནས་བསྐྱར་དུ་སྤེལ་མི་དགོས་པར་ཁག་ཐེག་བྱེད་མི་ཐུབ་པའི་དུས་རབས་ཤིག་གི་ནང་འཚོ་བཞིན་ཡོད།
ཕྱི་ལོ་ ༢༠༡༡ ལོར་དབྱིན་ཇིའི་གནམ་དམག་གི་རམ་འདེགས་འོག དབང་འཛིན་པ་གྷ་ཌ་ཧྥེ་མགོ་རྟིང་བསློགས། འོན་ཀྱང་དབྱིན་ཇིའི་དམིགས་བསལ་དྲག་དམག་ལི་བྷི་ཡའི་ནང་མུ་མཐུད་འཐབ་རྒོལ་ལ་ཞུགས་བཞིན་ཡོད་པ་དང་མཚོ་དམག་བྱང་ཨ་ཧྥི་རི་ཀའི་མཚོ་མཐར་མངགས་གཏོང་གི་འཆར་གཞི་བསྒྲིགས།
ཕྱི་ལོ་ ༢༠༠༩ ལོར་དབྱིན་ཇིའི་དམག་མི་མཐའ་མ་དེ་ཨི་རག་ནས་ཕྱིར་འཐེན་བྱས་པའི་དབང་དུ་བྱས་ཀྱང་། དེང་སྐབས་དབྱིན་ཇིའི་དྲག་ཆས་དམག་མི་ཆིག་སྟོང་ལྷག་གིས་དབུས་ཤར་ཨེ་ཤ་ཡའི་ནང་དམག་འཐབ་བྱེད་བཞིན་ཡོད་པ་དང་། དབྱིན་ཇིིའི་གནམ་དམག་གིས་ཨི་རག་ནང་ཉིན་ལྟར་འབམ་རྫས་གཡུག་གི་ཡོད། ཕྱི་ལོ་ ༢༠༡༤ ལོར་ནུབ་ཕྱོགས་པའི་འཐབ་རྒོལ་དམག་སྡེ་ཨབ་གྷན་ནས་ཕྱིར་འཐེན་བྱས་ཡོད་མོད། ཐ་ལི་བྷན་དྲག་སྤྱོད་ཚོགས་པ་བསྐྱར་ལངས་བརྒྱབས་ཏེ་ཁོ་ཚོ་རྗེས་སུ་སྙིག་ཕྱིར་ཨ་རིའི་དམག་མི་སྟོང་ཕྲག་ཕྱིར་ལོག་རྒྱག་དགོས་བྱུང་བ་རེད།
སྟབས་བདེའི་མཇུག་བསྡོམས་དེས་བར་འདུམ་བྱ་འགུལ་ནི་ཕམ་ཁ་ཞིག་ཡིན་པས་རྩིས་མེད་བཏང་ཡོད། རྒྱལ་ཁ་ཐོབ་རྒྱུ་ལས་ལྡོག་སྟེ་དེ་ཡིས་འཕྲལ་སེལ་ཁེ་ཕན་ཙམ་ཐོབ། དེར་བརྟེན། དེ་དག་ནི་མགོ་བཙུགས་དུས་ནས་ལེགས་གྲུབ་བྱུང་མེད།
འོན་ཀྱང་། དོན་དངོས་ནི་དེ་ལས་ཀྱང་ཐབས་རྡུགས་ཤིག་ཆགས་ཡོད། ཨི་རག་དང་། ལི་བྷི་ཡ་དང་། ཨབ་གྷ་ནི་སི་ཐན་བཅས་ཀྱི་ནང་རྒྱལ་ཁ་ཐོབ་མི་སྲིད་མོད། གནས་སྐབས་འཕྲལ་སེལ་གྱི་ཁེ་ཕན་ཙམ་ཞིག་བསྒྲུབས་ཐུབ་སྲིད། གདམ་ག་ནི་འཕྲལ་དང་ཕུགས་ཀྱི་ལེགས་བཅོས་མིན་པར་ཡུད་ཙམ་གྱི་ཁེ་ཕན་ནམ་ཁེ་ཕན་ཅི་ཡང་མེད་པ་གཉིས་ཀྱི་བར་དུ་གདམ་ག་བྱེད་རྒྱུ་དེ་རེད།
དཀའ་ངལ་ནི་མང་ཚོགས་ཀྱི་རེ་དོགས་ཏེ་ཕྱི་ལོ་ ༡༩༤༥ དྲན་ཚོར་གྱི་ཤུགས་རྐྱེན་ཡོད་པ་དེ་རེད། དེའི་ཚེ་དེའི་དུས་བདུན་ཕྲག་འགའ་ཞིག་ནང་ཨུ་རུ་སུའི་དམག་དཔུང་བྷར་ལེན་དུ་མདུན་སྐྱོད་བྱས་པ་དང་། རྡུལ་ཕྲན་མཚོན་ཆ་གཉིས་ཀྱིས་གྲོང་ཁྱེར་ཧེ་རོ་ཤི་མ་དང་ན་གཱ་ས་ཀི་ཐལ་བར་གཏོར་བརླགས་བཏང་། འཇིགས་སྐྲག་ཅན་གྱི་འབར་གས་དེ་དག་གཡུགས་རྗེས་འཛམ་གླིང་དམག་ཆེན་གཉིས་པ་ཡུ་རོབ་ནང་ཕྱི་ཟླ་ ༥ པའི་ཚེས་ ༨ དང་། ཨེ་ཤ་ཡའི་ནང་ཕྱི་ཟླ་ ༨ ཚེས་ ༡༥ ཉིན་བཅས་ལ་མཇུག་བསྒྲིལ། སྐབས་དེ་ནས་བཟུང་དུས་ནམ་ཡང་མི་ཚེ་ལ་འོད་སྣང་ཞིག་འཆར་ཐུབ་མེད།
འོན་ཀྱང་། འདས་ཟིན་པའི་ནང་ཕྱི་ལོ་ ༡༩༤༥ དང་མཚུངས་བསྡུར་བྱེད་ཆོག་པའི་རྒྱལ་ཁ་ཞིག་རྒྱལ་ཁབ་གང་ལ་ཐོབ་མྱོང་ངམ། དཔེ་མཚོན་གཅིག་རང་ནི། ཕྱི་ལོ་ ༡༩༨༢ ཟླ་ ༦ ཚེས་ ༡༤ ཉིན་ཨར་ཇེན་ཊི་ནའི་དྲག་དམག་གིས་གྲོང་ཁྱེར་པོར་ས་ཊན་ལེ་ནང་བཙན་འཛུལ་བྱས་སྟབས། ཕིལ་ཀན་ཌི་གླིང་ཕྲན་གྱི་དམག་འཁྲུག་གློ་བུར་དུ་མཇུག་བསྒྲིལ་པ་དེ་རེད།
ཕྱི་ལོ་ ༡༩༩༡ ཟླ་ ༢ ཚེས་ ༢༨ ཉིན་སཱ་དྷམ་ཧུ་སིན་གྱིས་ཁུ་ཝཱ་ཊི་ནས་དམག་འཐབ་ཕྱིར་འཐེན་བྱས་པ་ནི། ཨ་རི་ལ་རྒྱལ་ཁ་ཐོབ་པ་ལྟ་བུ་ཞིག་ཏུ་སྣང་ཡང་། དེ་ནི་ཨ་རིའི་དམག་སྤྱི་ཆེན་མོ་ནོར་མན་ཅོ་ཝར་ཀོབ་ཡིས་དམག་མཚམས་འཇོག་རྒྱུའི་གྲོས་ཆོད་ལ་མིང་རྟགས་བཀོད་པ་དང་། ཨི་རག་གི་དབང་སྒྱུར་པས་ལོ་བཅུ་ཕྲག་རིང་དམ་དྲག་བཀའ་རྒྱ་བཏང་བ། གནམ་གྲུ་འཕུར་སྐྱོད་མི་ཆོག་པའི་ས་ཁུལ་དང་། ཉེན་ཚབས་ཆེ་བའི་རྡུལ་ཕྲན་ཚོན་ཆ་ཡོད་མེད་རྟོག་ཞིབ་བྱེད་རྒྱུ་བཅས་ལ་མགོ་འདོག་བྱེད་མགོ་བཙུགས་པ་དང་། ཕྱི་ལོ་ ༢༠༠༣ ལོར་སཱ་དྷམ་ཧུ་སིན་གྱིས་འཇིག་རྟེན་རྩ་གཏོར་གཏོང་སླད་དམག་འཁྲུག་གཤམས་པ་རེད། དེ་ནས་བཟུང་གཅིག་རྗེས་གཉིས་མཐུད་དུ་རྙོག་ཟིང་རྒྱུན་ཆད་མེད་པར་བྱུང་དང་འབྱུང་བཞིན་ཡོད།
བདེན་དོན་ནི། སྤྱིར་བཏང་རྒྱལ་ཁབ་དང་རྒྱལ་ཁབ་བར་དུ་དམག་འཁྲུག་རྒྱག་པ་གང་ཞིག་ཡིན་ཡང་མངའ་ཁོངས་དབང་བསྒྱུར་བྱེད་པར་མཐར་ཐུག་གི་རྒྱལ་ཁ་ཞེས་པ་ཞིག་ཡོད་སྲིད་མོད། དེང་གི་རྩོད་རྙོག་དག་ནི་དེ་འདྲ་ཞིག་གཏན་ནས་མིན། ང་ཚོའི་དགྲ་བོ་ནི་རྒྱལ་ཁབ་མིན་པར་ཡ་ང་སྙིང་རྗེ་མེད་པའི་ལྟ་གྲུབ་ཅིག་གིས་སྐུལ་སློང་བྱས་ཏེ། འཇབ་དམག་གི་འཐབ་རྒོལ་ལམ་འཇིགས་སྐུལ་དྲག་སྤྱོད་པའི་ཚོགས་སྡེ་དག་ཡིན་ལ། ཁོ་ཚོས་ས་ཆ་དང་མངའ་ཁོངས་ཤོར་ཡང་ཕམ་ཁ་ཁས་ལེན་མི་བྱེད་པར། ཐབས་ལམ་གཞན་གྱི་ཐོག་ནས་འཐབ་རྩོད་མཐའ་འཁྱོང་བྱེད་བཞིན་ཡོད། སཱ་དྷམ་ཧུ་སིན་གྱི་རྣམ་པ་ཅན་གྱི་ཨི་རག་རྒྱལ་ཁབ་དེ་ཐེངས་གཅིག་ལ་རྩ་གཏོར་བཏང་པར་གྲགས་ཀྱང་། དེ་ནི་འཇིགས་སྐུལ་དྲག་སྤྱོད་པའི་བྱ་འགུལ་རྩ་འཛུགས་ཅན་ཞིག་ལ་སྤུ་མདོག་བསྒྱུར་བ་ཙམ་རེད།
འཇར་མན་དང་ཉི་ཧོང་གཉིས་དམངས་གཙོའི་ལམ་ལུགས་སྲ་བརྟན་ཞིག་ཏུ་སྐྱེད་སྲིང་བྱུང་སྟབས། ཕྱི་ལོ་ ༡༩༤༥ ལོའི་རྒྱལ་ཁ་དེ་མཐར་ཐུག་ཅིག་ཏུ་གྱུར། དབྱིན་ཇི་ལ་ཕིལ་ཀན་ཌི་གླིང་ཕྲན་གྱི་དམག་འཁྲུག་ལ་མཐར་ཐུག་གི་རྒྱལ་ཁ་ཐོབ་པ་ནི། ཕྱི་ལོ་ ༡༩༠༣ ལོར་ཨར་ཇེན་ཊི་ནའི་དྲག་ཚོགས་མགོ་རྟིང་བསློགས་སའི་ས་ཁུལ་བྷུ་ནོ་ཨ་རི་སི་ཞེས་པར་རྒྱལ་ཁ་ཐོབ་ཡོད་པ་ལས་ས་ཁུལ་གཞན་ཁག་ཏུ་རྒྱལ་ཁ་ཐོབ་མེད། དྲག་ཚོགས་སྤྱི་ཁྱབ་པས་མགོ་བཏགས་ཞུས་པ་ནི་ཨར་ཇེན་ཊི་ནའི་སྲིད་གཞུང་གིས་ཐེངས་གཉིས་པར་དབང་བསྒྱུར་བྱེད་ཆེད། དྲག་དམག་མངགས་གཏོང་མི་ཡོང་བའི་ཆེད་དུ་ཡིན། མདོར་བསྡུས་ན། མཐར་ཐུག་གི་རྒྱལ་ཁ་ཞེས་པ་དེ་ཞི་བདེ་ལྷིང་འཇགས་བརྟན་འཁེལ་བྱེད་ནུས་པའི་ཆབ་སྲིད་ཀྱི་ཞི་འགྲིག་ཐབས་ལམ་ཞིག་ལ་ཟེར།
དེང་སྐབས་ཞི་འགྲིག་དེ་ལྟ་བུ་ནི་འབྱུང་མི་སྲིད་པ་ཞིག་རེད། དཔེར་ན། ཁ་ཆེའི་འཇིགས་སྐུལ་དྲག་སྤྱོད་ཚོགས་པ་(ISI)དང་། གཞན་དག་ལ་མཉམ་མཐུན་ནམ་ཞི་མོལ་གྱི་དམིགས་ཡུལ་གང་ཡང་མེད། ཨི་རག་དང་། ཨབ་གྷན། ལི་བྷི་ཡ་བཅས་རྒྱལ་ཁབ་ཁག་གི་ནང་རྒྱལ་ཁབ་འདི་དག་གོང་བུ་གཅིག་ཏུ་གནས་རྒྱུར་རྒྱལ་ཁབ་དེ་དག་གི་སོ་སོའི་མི་སེར་མང་པོས་ངོས་ལེན་བྱེད་ཀྱི་མེད། བདེན་དོན་ནི་རྒྱལ་ཁབ་འདི་དག་འཛིན་སྐྱོང་བྱེད་ཐུབ་ཐབས་མེད་པ་དང་དུས་ཡུན་རིང་པོར་རྩོད་རྙོག་གི་འབྱུང་གནས་ཤིག་ཏུ་གྱུར་བ་དེ་རེད།
དེར་བརྟེན། དངོས་དོན་ནི་ང་ཚོ་དབྱིན་ཇིའི་དྲག་དམག་ཨི་རག་དང་ལི་བྷི་ཡའི་ནང་དམག་འཁྲུག་ལ་ཞུགས་བཞིན་ཡོད་པ་ནི་ཕམ་ཁའི་མཚོན་རྟགས་ཤིག་མིན་ཡང་། མཐར་ཐུག་གི་རྒྱལ་ཁ་ནི་འཁྲུལ་སྣང་ཞིག་ཡིན་པ་ཟློག་ཏུ་མེད་པའི་དུས་རབས་ཀྱི་ཆོས་ཉིད་ཅིག་ཡིན།། །།
ཌ་ཝི་ཌི་བྷ་ལར་ནི་དབྱིན་ཇིའི་གསར་ཤོག་ཉིན་རེའི་ཏར་འཕྲིན་ཞེས་པའི་ཕྱི་རྒྱལ་གྱི་གསར་འགྱུར་ཆེད་གཏོང་བ་གཙོ་བོ་དང་། དཔལ་འབྱོར་དུས་བབ་ཀྱི་གསར་འགྱུར་ཆེད་གཏོང་བ། དེ་བཞིན། སྲིད་ཇུས་དུས་དེབ་ཀྱི་རྩོམ་སྒྲིག་པ་བཅས་ཡིན།
མ་རྩོམ་གྱི་དྲ་ཐག http://www.telegraph.co.uk/news/2016/05/28/in-todays-wars-final-victory-is-no-longer-possible/
བསྒྱུར་རྩོམ་གནང་བར་ཐུགས་རྗེ་ཆེ། ངེད་ཚོའི་དུས་སྐབས་ཉེར་གཅིག་ནང་ཚན་རིག་གི་ཕྱིའི་དངོས་པོ་ཡར་རྒྱས་ཀྱིས་འགྲོ་བ་ཀུན་ལ་ཕན་བདེ་བསྐྲུན་ཡོད་ལ་གནོད་ཚབས་ཡང་དེ་བས་སྐྱེལ་ཡོད། དམག་ཆེན་གཉིས་པ་ནི་རྡུལ་ཕྲན་མཚོན་ཆ་ཡིས་མཇུག་བསྡོམས་རྒྱག་པའི་གནས་ཚུལ་ངོ་མ་ཞིག་རེད། འོན་ཀྱང་དུས་དེ་ནས་བཟུང་རྒྱལ་ཁབ་ཀུན་གྱིས་བསྲུང་བྱའམ་དབང་བྱ་དམིགས་ཡུལ་དུ་བཟུང་ནས་སྣ་མང་ཅན་གྱི་རྡུལ་ཕྲན་མཚོན་ཆ་གསར་བསྐྲུན་བྱེད་མགོ་བཙུགས།། ཁེ་དབང་དང་དཔལ་འབྱོར་གྱི་ཞེན་པ་ཆེ་དྲགས་ནས་སྟོབས་ཆེན་རྒྱལ་ཁབ་ཀྱིས་རྒྱལ་ཁབ་ཆུང་བ་དང་སྐྱོ་བ་ཀུན་ལ་ཐུབ་ཚོད་གཏོང་སྟངས་ནི་སྔར་སྲིད་པ་ཆགས་པའི་སྐབས་ནས་བྱུང་བའི་གཏམ་རྒྱུད་དང་འདྲ་བའི་མུ་མཐུད་གནས་ཡོད། སྟོབས་ཆེན་རྒྱལ་ཁབ་ཚོས་རང་ཉིད་དབང་ཐང་ངོམས་པ་དང་ཆབས་ཅིག་དཔལ་འབྱོར་ལ་དར་འཕེལ་ཡོང་ཐབས་ནི་དམག་ཁོ་ན་རྒྱབ་ནས་རེད། དེ་ཡང་ཤན་པ་གླ་རྗེས་སྲོག་གཅོད་བྱ་བཅུག་ནས་ཉེས་པ་ཤན་པའི་ཐོག་གཡོག་པ་ལྟར། སྔར་ངོ་བོ་ཙམ་མེད་པའི་དྲག་སྤྱོད་རིང་ལུགས་ལ་དཔལ་འབྱོར་དང་མཚོན་ཆ་བསྐུར་ཏེ་བསྐུལ་འདེད་བྱས་ནས་རང་ལ་ཉེན་སྲུང་གི་གོ་སྐབས་བཙུགས། འཇིགས་བསྐུལ་གྱི་ངན་ཁག་གཡོགས་ནས་དབང་བསྒྱུར་གྱི་དམག་རྒྱབ་སྟེ་རྡོ་སྣུམ་དབོར་འདྲེན་སོགས་ལ་གང་ཐུབ་སྤྱོད་པ་དང་། ཕྱོགས་གཞན་ནས་རྒྱལ་ཁབ་ཀྱི་ལ་རྒྱ་མདུན་ལྕོག་ཏུ་བཞག་ནས་ཉེས་མེད་ཀྱི་ཚེ་སྲོག་སྐད་ཅིག་ལ་བཅོམ་ནས་དཔའ་རྒོད་ཀྱི་གླུ་དབྱངས་མིག་ཆུ་ཡིས་ལེན་པ་ནི་ཡ་མཚན་གྱི་ལྟད་མོ་ཞིག་ཅི་ལ་མིན། ད་དུང་དྲག་སྤྱོད་པ་ལ་མཚོན་ཆ་དང་དམིགས་ཡུལ་སྦྱིན་ནས་གཡོ་སྒྱུ་ལྡན་པའི་ལོག་སྤྱོད་ཀྱི་སྲིད་བྱུས་ངན་པ་འདི་སུས་ཀྱང་ངོས་འཛིན་ག་ལ་ཐུབ། དུས་ནམ་ཞིག་ལ་རྒྱལ་ཁབ་སོ་སོས་ཁེ་དབང་དང་ཡར་རྒྱས་ཀྱི་རྒྱུ་མཚན་མ་རྫོགས་པར་དེ་བར་དུ་དམག་འཐབ་ཀྱི་མཇུག་འབྲས་རྫོགས་ཐབས་མེད་པ་ནི་ཆོས་ཉིད་ཞིག་ཡིན་པ་ལ་གུས་པས་ངོས་འཛིན་བྱེད་ཀྱི་ཡོད།