དྷ་ས་ས་གནས་མགོ་འཛིན་གྱི་དངོས་གཞིའི་འོས་མི་གསུམ་གྱི་ནང་ནས་ཟླ་བ་རིན་ཆེན་ལགས་ལ་འོས་གྲངས་ ༧༠༦ ཐོབ་སྟེ་སྐབས་ ༤ པའི་དྷ་ས་ས་གནས་མགོ་འཛིན་དུ་བདམས་ཐོན་བྱུང་འདུག
ཉེ་སྔོན་ཕྱི་ཟླ་ ༥ ཚེས་ ༢༥ ཉིན་དྷ་ས་ས་གནས་མགོ་འཛིན་གྱི་སྔོན་འགྲོའི་འོས་བསྡུ་གནང་ཡོད་པ་དང་། ཟླ་འདིའི་ཕྱི་ཚེས་ ༦ ཉིན་དངོས་གཞིའི་འོས་བསྡུ་གནང་བ་ལྟར། དངོས་གཞིའི་འོས་མི་གསུམ་གྱི་ནང་ནས་བཀྲ་ཤིས་རྡོ་རྗེ་ལགས་ལ་འོས་གྲངས་ ༢༨ དང་། ཐུབ་བསྟན་འཇིགས་མེད་ལགས་ལ་འོས་གྲངས་ ༡༥༨། ཟླ་བ་རིན་ཆེན་ལགས་ལ་འོས་གྲངས་ ༧༠༦ ཐོབ་སྟེ་ཁོང་སྐབས་ ༤ པའི་དྷ་ས་ས་གནས་མགོ་འཛིན་དུ་བདམས་ཐོན་བྱུང་ཡོད་པ་དང་། ཁ་སང་དབུས་འོས་བསྡུ་ལས་ཁང་ནས་ཟླ་བ་རིན་ཆེན་ལགས་ལ་མང་མོས་ཐོག་ས་གནས་མགོ་འཛིན་དུ་བདམས་ཐོན་བྱུང་བར་འཚམས་འདྲི་གནང་བ་དང་སྦྲགས། འོས་བསྡུའི་སྒྲིག་དོན་ ༨༠།༡ དགོངས་དོན་ལྟར་ཟླ་འདིའི་ཕྱི་ཚེས་ ༡༥ ནས་ལོ་གསུམ་རིང་ས་གནས་མགོ་འཛིན་དུ་བསྐོ་བཞག་གནང་ཡོད་འདུག
ཟླ་བ་རིན་ཆེན་ལགས་ནི། ཕྱི་ལོ་ ༡༩༦༤ ལོར་འཁྲུངས་ཤིང་། ཕྱི་ལོ་ ༡༩༨༥ ནས ༡༩༨༩ ལོའི་བར་དྭངས་སློབ་དབུས་སློབ་གཉེར་ཁང་དུ་དྭངས་སློབ་ ༡༠༠༠ ལྷག་ལ་ལུས་རྩལ་དང་གོ་མཚོན་སློབ་ཁྲིད་ཀྱི་དགེ་རྒན་གནང་ཡོད་པ་དང་། ཕྱི་ལོ་ ༡༩༩༠ ནས་ ༡༩༩༣ བར་༸གོང་ས་མཆོག་གི་སྐུ་སྲུང་གི་ཞབས་ཕྱི་ཞུས། ཕྱི་ལོ་ ༡༩༩༥ ལོར་རྡ་སར་ཧིན་བོད་མཛའ་འབྲེལ་ཚོགས་པ་གསར་འཛུགས་ཀྱིས་དྲུང་ཆེ་གནང་། ཕྱི་ལོ་ ༢༠༠༠ ནས་ ༢༠༠༣ བར་གངས་སྐྱིད་དགེ་རྒན་ཕ་མའི་ཚོགས་ཆུང་གི་ཚོགས་གཙོ་གནང་། ཕྱི་ལོ་ ༢༠༠༣ ལོར་ཆབ་སྲིད་དྲིལ་བསྒྲགས་ཆེད་སྒེར་ངོས་ནས་ཆབ་སྲིད་བཙོན་ཟུར་སྐུ་ཞབས་དཔལ་ ལྡན་རྒྱ་མཚོ་ལགས་ཨ་རིར་གདན་ཞུས་ཀྱིས་ས་གནས་ཁག་དྲུག་ནང་ཆབ་སྲིད་དྲིལ་བསྒྲགས་ གནང་། ཕྱི་ལོ་ ༢༠༠༨ ནས་ ༢༠༡༡ བར་རྡ་ས་མེད་གྷན་ཕ་མའི་ཚོགས་ཆུང་གི་ཚོགས་གཙོ་གནང་། ཕྱི་ལོ་ ༢༠༠༥ ལོ་ནས་བོད་མིའི་ཚོང་ལས་བདེ་ཚོགསདབུས་ཀྱི་སྐབས་དང་པོའི་རྒྱུན་ལས་དང་དྲུང་ཆེ་ གནང་། ཕྱི་ལོ ༢༠༠༩ ནས་ ༢༠༡༠ དང་། ཕྱི་ལོ་ ༢༠༡༢ ནས་ད་བར་བོད་རྒྱལ་ཡོངས་རྩེད་རིགས་ཚོགས་པའི་རྒྱུན་ལས་གནང་མུས། ཕྱི་ལོ་ ༢༠༡༢ ནས་ ༢༠༡༥ བར་དུ་བོད་ཀྱི་རོལ་དབྱངས་མཐུན་ཚོགས་ཀྱི་སློབ་སྟོན་པ་གནང་། ད་ལྟའི་ཆར་ཧིན་བོད་མཛའ་འབྲེལ་ཚོགས་པའི་ཚོགས་གཞོན་དང་། བོད་རྒྱལ་ཡོངས་རྩེད་རིགས་ཚོགས་པའི་རྒྱུན་ལས་བཅས་ཀྱི་ལས་འཁུར་ཞུ་མུས་ཡིན་འདུག
པདྨ་མཚོས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།
བཀྲ་ཤིས་བདེ་ལེགས་ཞུ།