ཁུང་ཙིའི་འཆད་ཁྲིད་འཛིན་གྲྭར་དོགས་པ་ཟོས།

རྒྱ་ནག་གཞུང་འབྲེལ་གྱིས་གཉེར་བཞིན་པའི་ཨོ་སི་ཊོར་ལི་ཡའི་བྱང་གི་མཚོ་རྒྱུད་སློབ་གྲྭ་(North Shore public schools) དག་གི་ནང་ཁྲིད་སྤེལ་བྱེད་བཞིན་པའི་སློབ་ཚན་ཞིག་ལ་ས་གནས་དེ་གའི་ཁྱིམ་བདག་ཚོས་སེམས་འཚབ་ཆེན་པོ་བྱེད་བཞིན་ཡོད་འདུག

སྐུ་ཞབས་ཨཱེ་ལེ་ཛཱན་ཊྲེ་ནིལ་སེན་(Alexander Nilsen)གྱི་བུ་ལོ་བཞིའི་སྔོན་ནོར་ཝེ་ནས་མཱོ་སི་མེན་(Mosman)ལ་གནས་སྤོ་བྱས་ཡོད་པ་དང་། ཁོ་རང་གིས་མཱོ་སི་མེན་ཧེ་ཊྲེ་ཞེས་པའི་སློབ་གྲྭའི་ནང་ཁུང་ཙིའི་འཆད་ཁྲིད་འཛིན་གྲྭ་(Confucius Classroom programs)དག་གི་སློབ་ཁྲིད་ཐབས་ལམ་དང་བརྗོད་གཞི་སོགས་ཀྱི་སྐོར་དངོས་སུ་རྒྱུས་ལོན་བྱུང་རྗེས་ཧ་ལས་ནས་བརྗོད་རྒྱུར། “ངས་སློབ་ཚན་དེའི་སྐོར་དཔྱད་ཞིབ་མང་པོ་བྱས་པ་དང་རྙོག་གླེང་དེའི་ནང་ལྷུང་རྗེས་ང་རང་གི་བུ་སློབ་གྲྭ་དེར་མུ་མཐུད་འཇོག་དགོས་མིན་ཐེ་ཚོམ་བསླེབས་སོང་” ཞེས་བརྗོད་ཡོད།

ཁུང་ཙིའི་འཆད་ཁྲིད་འཛིན་གྲྭ་ཞེས་པ་དེ་རིགས་ནི་ཨོ་སི་ཊོར་ལི་ཡར་ཡོད་པའི་རྒྱ་ནག་གི་ཚོགས་པ་ཞིག་གིས་གཉེར་བཞིན་ཡོད་ཅིང་། འཛིན་གྲྭ་དེ་དག་ལ་རྒྱ་ནག་གཞུང་གི་རྒྱབ་རོགས་འོག་འཛམ་གླིང་ཤར་ནུབ་གང་སར་ཁྱབ་སྤེལ་བྱེད་བཞིན་ཡོད་པ་རེད།

ཁོང་གིས་མུ་མཐུད་དུ་བརྗོད་དོན། “ངས་འདས་པའི་ལོ་བཅུ་ལྷག་གི་རིང་རྒྱ་རིགས་དང་གན་རྒྱ་བཞག་ནས་ལས་དོན་མང་པོ་གཉེར་པ་བརྒྱུད་དེ། ཁུང་ཙིའི་ཚོགས་པ་དང་འཛིན་གྲྭའི་ནང་གི་འཆད་ཁྲིད་དེ་ཚོ་གང་འདྲ་ཡོད་མེད་ཚང་མ་ཤེས་ཀྱི་ཡོད།” ཅེས་དང་། ཁོང་ས་གནས་དེ་ནས་ལོ་གཅིག་གི་རིང་ཁ་བྲལ་ཏེ་སླར་ཚུར་ཆཱ་ཚི་ཝུ་ཊྲི་(Chatswood)ཁུལ་དུ་ལོག་ཡོང་སྐབས་སྟབས་མ་ལེགས་པ་ཞིག་ལ་སློབ་ཚན་དེ་ནི་ཆྭ་ཚི་ཝུ་ཊྲི་ཁུལ་གྱི་གཞུང་གི་སློབ་གྲྭ་ཁག་དང་མཐོ་རིམ་སློབ་གྲྭ་ཚང་མའི་ནང་གཉེར་གྱི་ཡོད་པ་ཤེས་འདུག ཁོང་དང་ཁོང་གི་བཟའ་ཟླ་ཇཱི་ན་གཉིས་ཀྱི་བུ་ཕྰེ་བིན་ད་ལྟ་ལོ་བརྒྱད་ལ་བསླེབས་པ་དེ་མ་གཞི་ཆ་ཚི་ཝུ་ཊྲིའི་སློབ་གྲྭ་ཞིག་གི་ནང་གཏོང་འཆར་ཡོད་ཀྱང་། སློབ་ཚན་དེའི་རྐྱེན་པས་མཐར་བསམ་བློ་དེ་ཕྱིར་འཐེན་གནང་དགོས་འཁེལ་འདུག

ཁུང་ཙིའི་འཆད་ཁྲིད་འཛིན་གྲྭ་རྣམས་ཨོ་སི་ཊོར་ལི་ཡའི་སློབ་གྲྭ་དག་གི་ཐད་ཀའི་སྟངས་འཛིན་འོག་མེད་སྟབས། བློ་འཚབ་དེ་བས་ཆེ་བ་ཞིག་ཆགས་ཡོད་ཅིང་། འཆད་ཁྲིད་འཛིན་གྲྭ་དེ་རྣམས་ནི་རྒྱ་ནག་དམར་ཤོག་གཞུང་གི་སློབ་གསོ་གཞིར་བཟུང་འགྲོ་གི་ཡོད་པ་རེད། གནས་ཚུལ་ཡ་མཚན་པ་ཞིག་ལ་ཚོགས་པ་དེའི་འབྲེལ་ཡོད་ལས་བྱེད་ཚོ་འཛིན་གྲྭའི་ནང་བསླེབས་ནས་དམར་ཤོག་གི་ལྟ་བ་དམར་རྗེན་དུ་ཁྱབ་སྤེལ་བྱེད་ཀྱི་མེད་རུང་གནད་འགག་ཡོད་པའི་གནས་ཚུལ། དཔེར་ན། ཐེ་ཝན་དང་གནམ་བདེ་སྒོ་མོའི་ཆེའི་དོན་རྐྱེན་སོགས་ཀྱི་སྐོར་གཏན་ནས་གླེང་སློང་བྱེད་ཀྱི་མི་འདུག

ནིལ་སེན་ལགས་ཀྱིས་མུ་མཐུད་བརྗོད་རྒྱུར། “ངས་ངོས་ནས་བཤད་ན་རྒྱ་ནག་གཞུང་གི་ལས་གཞི་འདི་དག་གི་དམིགས་ཡུལ་ངོ་མ་གང་ཡིན་ཤེས་རྟོགས་བྱུང་རྗེས་སློབ་ཚན་དེའི་རིགས་ཨོ་སི་ཊོར་ལི་ཡ་ལ་གཏན་ནས་འཚམས་འཇོག་བྱེད་ན་དགེ་མཚན་ཆེ་བ་འདུག་སྙམ། སྤྱིར་བཏང་རྒྱ་ནག་གི་སྲོལ་རྒྱུན་རིག་གནས་དེ་ནི་ཧ་ཅང་གི་ཕྱུག་པོ་དང་ངོ་མཚར་དགོས་པ་ཞིག་ཡོད་པ་རེད། ང་རང་གི་བུ་ལའང་ནམ་རྒྱུན་དེའི་སྐོར་བཤད་ཀྱི་ཡོད། འོན་ཀྱང་། ཨོ་སི་ཊོར་ལི་ཡའི་སློབ་ཕྲུག་ཚོར་རྒྱའི་རིག་གཞུང་དང་ཡི་གེ་སློབ་ཁྲིད་བྱ་ཐབས་དེ་ལས་ཡག་པ་གཞན་ཡོད་ངེས་རེད།” ཅེས་བརྗོད་འདུག སྐུ་ཞབས་ནེལ་སོན་དང་བྱང་གི་མཚོ་རྒྱུད་ཁུལ་གྱི་ཁྱིམ་བདག་ཚོ་མཉམ་རུབ་ཀྱིས་གནད་དོན་དེའི་སྐོར་དོ་སྣང་བསླེབ་ཆེད་བསྒྱུར་བཅོས་ཀྱི་སྙན་ཞུ་ཞེས་པའི་ངོ་དེབ་ཀྱི་ཤོག་ངོས་གསར་པ་ཞིག་ཕྱེས་འདུག

འོན་ཀྱང་། ཤེས་རིག་ལས་ཁུངས་ཀྱི་འབྲེལ་ཡོད་གཞུང་གི་མི་སྣ་ཞིག་གིས་བརྗོད་གསལ་ལ། ཁུང་ཙིའི་ཚོགས་པ་དག་ནི་གུས་བཀུར་འོས་པ་དང་ཡུན་རིང་གི་སློབ་ཚན་ལས་གཞིའི་འོག་ནས་ཨོ་སི་ཊོར་ལི་ཡའི་མཐོ་སློབ་ཁག་དང་ཟུང་འབྲེལ་ཐུབ་པ་བྱུང་ཡོད་ཅེས་དང་། ཚོགས་པ་འདིའི་དམིགས་ཡུལ་གཙོ་བོ་ནི་སློབ་ཕྲུག་ཚོའི་རྒྱ་ཡིག་དང་རྒྱའི་རིག་གནས་ཀྱི་ཤེས་ཚད་གོང་མཐོར་གཏོང་རྒྱུ་དེ་ཡིན། གཞན། ཟུང་འབྲེལ་སློབ་གྲྭ་ཁག་ལ་རྒྱ་ནག་དང་ཐད་ཀར་འབྲེལ་བ་བྱ་ཐུབ་པའི་དགེ་མཚན་ལྡན་ཡོད་ཅེས་བརྗོད་ཡོད་འདུག ཕྱི་ལོ་ ༢༠༡༢ ལོར་ཤེས་རིག་ལས་ཁུངས་ནས་ཁུང་ཙིའི་ཚོགས་པ་དེའི་རྒྱ་ནག་ལ་ཡོད་པའི་ལས་ཁུངས་ཨ་མ་དང་མཉམ་འབྲེལ་སྒོས་གན་རྒྱ་བཞག་ཏེ། བྱང་གི་མཚོ་རྒྱུད་ས་ཁུལ་ཁག་གི་སློབ་གྲྭ་ ༡༣ ཙམ་ནང་ཁུང་རྩིའི་འཛིན་གྲྭ་གཉེར་རྒྱུ་གཏན་འཁེལ་བྱུང་ཡོད་འདུག

བློ་བཟང་ཡེ་ཤེས་ཀྱིས་བོད་བསྒྱུར་བྱས།