ན་གཞོན་པར་པ་སྐལ་བཟང་འཇིགས་མེད་ལགས་ནས་བོད་ཀྱི་འགྲེམས་སྟོན་ཁང་དུ་པར་རིས་འགྲེམས་སྟོན་དང་པར་འགྲན་སྡུར་གྱི་ལས་གཞི་ཞིག་མགོ་བཙུགས་འདུག
དེ་རིང་སྔ་དྲོའི་ཆུ་ཚོད་ ༡༠ ཐོག་དྷ་ས་མེག་གྷན་བོད་ཀྱི་འགྲེམས་སྟོན་ཁང་གི་ཐོག་ཁང་དུ། བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པའི་མཐུན་འགྱུར་འོག་ན་གཞོན་ཆེད་ལས་པར་པ་སྐལ་བཟང་འཇིགས་མེད་ལགས་ནས་པར་རིས་འགྲེམས་སྟོན་དང་སྦྲགས། པར་འགྲན་སྡུར་གྱི་བྱ་འགུལ་ཞིག་དབུ་འབྱེད་གནང་སོང་བ་དང་། སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་པར་རིས་འགྲེམས་སྟོན་གྱི་ལས་གཞི་གསར་པ་མགོ་བཙུགས་པ་དེ་དཔེ་ཡག་པོ་ཡིན་ལ། ལས་གཞི་ཞིག་མགོ་བཙུགས་རྗེས་མཇུག་ཡག་པོ་སྐྱོང་རྒྱུ་ཧ་ཅང་གལ་ཆེན་པོ་ཡིན་སྐོར་གསུངས་སོང་ལ། དབུ་འབྱེད་ཐོག་པར་པ་སྐལ་བཟང་འཇིགས་མེད་ལགས་ནས་ཁོང་རང་གིས་བྲིས་པའི་རང་བྱུང་ཁོར་ཡུག་གི་མཛེས་སྡུག་མཚོན་པའི་པར་རེ་སྐུ་མགྲོན་གཙོ་བོ་མཆོག་དང་ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་གཉིས་ལ་ཕུལ་སོང་།
སྐལ་བཟང་འཇིགས་མེད་ལགས་ནས་ཐེངས་འདིའི་པར་རིས་འགྲེམས་སྟོན་དང་འགྲན་སྡུར་གྱི་དགོས་དམིགས། དེ་བཞིན་ཁོང་རང་གི་(IN FRAME)ཞེས་པའི་ལས་གཞི་ཡི་རྩ་བའི་དམིགས་ཡུལ་གཙོ་བོ་གསུམ་གྱི་སྐོར་ལ་གཏམ་བཤད་གནང་སྐབས། ལོ་ལྟར་བོད་པའི་སྤྱི་ཚོགས་ནང་པར་རིས་འགྲེམས་སྟོན་དང་པར་འགྲན་སྡུར་བྱེད་པའི་ལས་འཆར་ཡོད་ལ། དེའི་དམིགས་ཡུལ་གཙོ་བོ་ནི་བོད་པའི་སྤྱི་ཚོགས་ནང་པར་ལ་དོ་སྣང་ཡོད་མཁན་དང་པར་རྒྱག་རྒྱུར་དགའ་བོ་ཡོད་མཁན་མང་པོ་ཞེ་དྲགས་ཡོད་ཀྱང་། ཁོང་ཚོར་སྡིངས་ཆ་དཀོན་པོ་ཡིན་ལ། དམིགས་བསལ་གྱིས་བོད་པའི་སྤྱི་ཚོགས་ནང་སྡིངས་ཆ་དཀོན་པོ་ཡིན་སྟབས། པར་རིས་འགྲེམས་སྟོན་བྱས་པ་ཡིན་ན་ཁོང་ཚོར་སྡིངས་ཆ་དང་ཁོང་ཚོའི་སྒྱུ་རྩལ་གྱི་རྣམ་པ་དེ་མང་ཚོགས་ལ་སྤྱན་འབུལ་ཞུ་པའི་གོ་སྐབས་བཟང་པོ་ཞིག་ཐོབ་པའི་ཆེད་དུ་ཡིན། ཞེས་དང་། ཁོང་གི་དམིགས་བསལ་གཙོ་བོ་དང་གལ་ཆེ་ཤོས་ནི་མི་རྣམས་པར་རིས་ལྡན་པའི་དུས་དེབ་ལ་ལྟ་རྒྱུར་དགའ་བོ་ཡོད་པ་དེ་བེད་སྤྱོད་གཏོང་ཐུབ་པའི་ཆེད་དུ། (IN FRAME)ཞེས་པའི་པར་རིས་ཁོ་ནའི་དུས་དེབ་ཅིག་འདོན་འཆར་ཡོད་ཅིང་། དུས་དེབ་འདོན་ཐེངས་དང་པོ་བསྒྲིགས་ཚར་ནས་པར་སྐྲུན་གྱི་འགྲོ་གྲོན་མཁོ་སྒྲུབ་བྱེད་བཞིན་པའི་སྒང་ཡིན་སྐོར་དང་། དེ་བཞིན་པར་གསར་རྙིང་རྣམས་བསྡུ་རུབ་ཉར་ཚགས་བྱས་ཏེ་དྲ་ཐོག་བརྒྱུད་གཞན་ལ་བཙོང་ནས་ཡོང་འབབ་བསག་ཐབས་ཐོག་ཤུགས་རྒྱག་རྒྱུ་ཡིན་སྐོར་བརྗོད་སོང་།
ཡང་ཁོང་གིས། ཐེངས་འདིའི་པར་རིས་འགྲན་སྡུར་ནང་ཧྥ་རན་སི་དང་ཨོ་སི་ཊོ་ལི་ཡ། གྷི་རི་སི། དབྱིན་ལན་བཅས་ཕྱི་རྒྱལ་གྱི་རྒྱལ་ཁབ་བཞི་དང་། དམིགས་བསལ་གྱིས་བོད་ནང་ནས་མཉམ་ཞུགས་བྱེད་མཁན་ཡོད་པ་དང་། ཚོར་སྣང་ཆེ་ཤོས་ཤིག་ལ་དུས་རྒྱུན་ཚོགས་འདུ་དང་གཏམ་བཤད་སོགས་བྱ་འགུལ་ག་རེའི་ནང་དུ་ཡིན་ནའང་བོད་པའི་བུད་མེད་ཚོས་ཆ་ཤས་བླངས་བ་ཉུང་ཉུང་ཡིན་ནའང་། ད་རེས་ཀྱི་པར་རིས་འགྲན་སྡུར་ནང་བུད་མེད་གང་འཚམ་ཡོད་པ་མ་ཟད། པར་ཡང་ཡག་པོ་དེ་འདྲ་བསྐུར་ཡོད་སྐོར་བརྗོད་སོང་ལ། པར་རིས་འགྲེམས་སྟོན་དང་འགྲན་སྡུར་དེའི་ནང་པར་པ་ ༥༠ ཙམ་གྱིས་བརྒྱབ་པའི་རང་བྱུང་ཁོར་ཡུག་དང་སེམས་ཅན། མིའི་རང་བཞིན་གྱི་རྣམ་འགྱུར་དང་མི་རིགས་ཀྱི་ཐུན་མོང་མ་ཡིན་པའི་ཆས་གོས་སོགས་ཀྱི་མཛེས་པ་འབུར་དུ་ཐོན་པའི་ཁྱོན་པར་རིས་ ༦༣ ཡོད་པ་དང་། སྐུ་མགྲོན་གཙོ་བོ་མཆོག་གི་དབུས་ལྟད་མོ་བ་རྣམ་པས་སོ་སོའི་དགའ་ཕྱོགས་དང་མཐོང་སྣང་ལྟར། མི་རེས་པར་ ༤ ཙམ་རེ་འདེམས་དགོས་ཀྱི་འདུག་ལ། ལྟད་མོ་བ་ཚོས་བདམས་པའི་རྩེ་ཕུད་པར་རིས་བཞི་ལ་ལག་ཁྱེར་ཞིག་དང་བྱ་དགའི་དངུལ་བཅས་སྤྲོད་རྒྱུ་ཡིན་འདུག
སྐུ་མགྲོན་གཙོ་བོ་ཀརྨ་ཡེ་ཤེས་མཆོག་ནས་པར་གྱི་འགྲེམས་སྟོན་དེ་བྲེལ་འཚུབ་ཆེ་བའི་དེང་དུས་ཀྱི་སྤྱི་ཚོགས་ནང་གལ་ཆེན་པོ་ཡིན་སྟབས། སྐལ་བཟང་འཇིགས་མེད་ལགས་ནས་ཆེད་ལས་སློབ་སྦྱོང་གནང་བ་ལྟར་སྒེར་ངོས་ནས་ལས་གཞི་འདི་འདྲ་མགོ་བཙུགས་པར་བསྔགས་བརྗོད་དང་བྱ་བ་ལམ་ལྷོང་ཡོང་བའི་སྨོན་འདུན་དང་བཅས་ཁོང་གིས། བོད་པའི་སྤྱི་ཚོགས་ནང་པར་ལ་དོ་སྣང་མེད་མཁན་མེད་ལ། པར་ཡག་པོ་རྒྱག་གི་ཡོད་ཀྱང་། སོ་སོས་བརྒྱབ་པ་དེ་གཤམ་ནས་མི་ལ་སྟོན་མཁན་དཔེ་ཉུང་ཉུང་ཡིན་དུས། དེ་འདྲའི་ཐད་སྤྱི་ཚོགས་ནང་གཞོན་སྐྱེས་ཤིག་ཐོན་པ་དཔེ་མི་སྲིད་པའི་ཡག་པོ་ཡིན་སྐོར་དང་། པར་གྱི་དུས་དེབ་ཅིག་འདོན་འཆར་ཡོད་ལབ་པ་ལྟར་དུས་དེབ་འདོན་རྒྱུ་དེ་དཔེ་གལ་ཆེན་པོ་ཡིན་ལ། དུས་དེབ་དེ་བརྒྱུད་ནས་བོད་ཀྱི་རིག་གཞུང་དང་རྩ་དོན། དེ་བཞིན་སྐུ་མདུན་གྱི་མཛད་འཕྲིན་ཁག་ངོ་སྤྲོད་གནང་བར་ཐུགས་ཕན་ཆེན་པོ་གསོ་ཐུབ་ཀྱང་། དེ་ལས་གལ་ཆེ་བ་ནི་དུས་དེབ་དེར་གནས་སྐབས་རིང་དཔལ་འབྱོར་གྱི་དཀའ་ངལ་ཡོད་སྟབས། ཟླ་བ་གཉིས་རེར་ཐེངས་གཅིག་འདོན་མ་ཐུབ་ནའང་ལོ་གཅིག་ནང་ཐེངས་བཞི་འདྲ་པོ་བཏོན་ནས་མཇུག་སྐྱོང་རྒྱུ་དཔེ་གལ་ཆེན་པོ་ཡིན་ལ། བོད་པའི་སྤྱི་ཚོགས་ནང་དུས་དེབ་དེ་འདྲ་བཏོན་ནས་འདོན་ཐེངས་དང་པོ་དང་གཉིས་པ་དཔེ་ཚགས་ཚུད་པོ་ཡག་པོ་བཏོན་རྗེས་བར་ལམ་ཞིག་ནས་མཚམས་ཆད་འགྲོ་ཡི་ཡོད་པས། དེ་འདྲ་མ་ཡིན་པར་ད་ལྟ་གསར་པ་ཡིན་དུས་དཔལ་འབྱོར་ཐོག་དཀའ་ངལ་ཡོད་པ་རེད་དེ། དེ་འདྲའི་ཐོག་ལ་འབྲེལ་བ་བྱེད་ས་ཡོད་རྒྱུ་རེད་བསམ་གྱི་འདུག་པས། དེ་ཚོར་འབྲེལ་བ་བྱས་བཞག་ན་དོན་དག་འགྲུབ་འགྲོ་བ་དང་། དོན་དག་ཆེ་ཤོས་ལས་གཞི་དེ་མགོ་བཙུགས་ནས་མཇུག་སྐྱེལ་ཐུབ་དགོས་པ་དེ་དཔེ་མི་སྲིད་པའི་གལ་ཆེན་པོ་ཡིན་སྐོར་སོགས་གསུངས་སོང་།
ཆེད་ལས་པར་པ་སྐལ་བཟང་འཇིགས་མེད་ལགས་བོད་ཀྱི་རྒྱལ་ས་ལྷ་ས་རུ་སྐྱེས་ཤིང་། ཕྱི་ལོ་ ༡༩༩༨ ལོར་རྒྱ་གར་ནང་བཙན་བྱོལ་དུ་བསླེབས་ཏེ་མ་སུ་རི་བོད་ཁྱིམ་དང་བྷང་ལོར་རུ་( St. Josephs college)མཐོ་སློབ་ནས་མཐར་ཕྱིན་ཡོད་པ་དང་། དེའི་རྗེས་ལྡི་ལི་གསར་པ་རུ་(Paul Academy)ནང་པར་གྱི་ཐོག་སློབ་སྦྱོང་བྱས་ཡོད་འདུག ཁོང་གིས་གསར་འགོད་པར་ཐོག་མར་པར་རིས་སྒྱུ་རྩལ་ལ་སྤྲོ་སྣང་ག་འདྲ་བྱུང་བའི་སྐོར་བརྗོད་སྐབས། པར་རིས་སྒྱུ་རྩལ་དེ་སོ་སོའི་སེམས་ནང་གི་ཚོར་བ་སྟོན་བྱེད་ཀྱི་སྐད་ཡིག་ལྟ་བུ་ཞིག་ཡིན་དུས། པར་རིས་སྒྱུ་རྩལ་ཐོག་ལ་དམིགས་བསལ་གྱིས་དོ་སྣང་བྱས་པ་དང་། ལྷག་པར་དུ་བོད་པའི་སྤྱི་ཚོགས་ནང་པར་རིས་སྒྱུ་རྩལ་ཐོག་ཆེད་ལས་རང་བཞིན་ལྡན་པ་ཞེ་དྲགས་ཉུང་ཉུང་ཡིན་སྟབས། པར་རིས་སྒྱུ་རྩལ་ཐོག་ལས་ཀ་བྱས་ན་བོད་པའི་སྤྱི་ཚོགས་ནང་ཐུགས་ཕན་གསོ་ཐུབ་ས་རེད་བསམ་སྟེ། འདས་པའི་ལོ་ ༤ རིང་པར་བརྒྱབ་ནས་བསྡད་པ་ཡིན་སྐོར་བརྗོད་བྱུང་།
གསར་འགོད་པ། པདྨ་མཚོ།
