༧གོང་ས་མཆོག་དང་ཨོ་བྷ་མ་རྣམ་གཉིས་མཇལ་འཕྲད།

ཁ་སང་ཨ་རིའི་གཟའ་ལྷག་པའི་སྔ་དྲོའི་ཆུ་ཚོད་ ༡༠།༡༨ སྟེང་བོད་མིའི་སྐྱབས་མགོན་༧གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་ཕོ་བྲང་དཀར་པོ་རུ་ཆུ་ཚོད་ཕྱེད་ཀའི་རིང་མཇལ་འཕྲད་བཀའ་མོལ་གནང་ཡོད་འདུག

མཇལ་འཕྲད་རྗེས་ཨ་རིའི་ཕོ་བྲང་དཀར་པོ་ནས་གསལ་བསྒྲགས་ཤིག་སྤེལ་བའི་ནང་། ༧གོང་ས་ཏཱ་ལའི་བླ་མ་མཆོག་གིས་བྱམས་བརྩེ་སྙིང་རྗེ་དང་། འཚེ་མེད་ཞི་བ་བཅས་ཀྱི་ཐོག་ཕྱག་ལས་གནང་བར་བསྔགས་བརྗོད་ཡོད་པ་དང་། ད་རེབ་ཨོ་བྷ་མ་དང་ཏཱ་ལའི་བླ་མ་མཇལ་འཕྲད་སྐབས་བོད་ནང་གི་གནས་སྟངས་ཐོག་བཀའ་མོལ་གནང་སྟེ། སྲིད་འཛིན་ཨོ་བྷ་མས་བོད་པའི་ཆོས་དང་རིག་གཞུང་། སྐད་ཡིག་སྲུང་སྐྱོབ་བཅས་ལ་རྒྱབ་སྐྱོར་ཤུགས་ཆེན་པོ་གནང་གི་ཡོད་སྐོར་འཁོད་ཡོད་འདུག

གསལ་བསྒྲགས་ནང་མུ་མཐུད་དུ། ཨ་རིའི་གཞུང་གིས་བོད་རང་བཙན་ལ་རྒྱབ་སྐྱོར་བྱེད་ཀྱི་མེད་པར། ༧གོང་ས་ཏཱ་ལའི་བླ་མའི་བཏོན་པའི་དབུ་མའི་ལམ་ལ་རྒྱབ་སྐྱོར་ཡོད་ཞུ་བཞིན་ཡོད་པ་དང་། ༧གོང་ས་ཏཱ་ལའི་བླ་མ་མཆོག་གིས་ཀྱང་བོད་རང་བཙན་རྩོད་ཀྱི་མེད་སྟབས། རྒྱ་ནག་གཞུང་གིས་༧གོང་ས་མཆོག་དང་། ཡང་ན། ཁོང་གི་སྐུ་ཚབ་མཉམ་དུ་དོན་ཕན་ལྡན་པའི་གྲོས་མོལ་གནང་སྟེ་བོད་རྒྱའི་དཀའ་རྙོག་སེལ་ཐབས་གནང་དགོས་པ་སོགས་འཁོད་ཡོད་འདུག

ཉེ་ལམ་༧གོང་ས་མཆོག་དང་ཨ་རིའི་སྲིད་འཛིན་རྣམ་གཉིས་ཕོ་བྲང་དཀར་པོ་རུ་མཇལ་འཕྲད་གནང་འཆར་ཡོད་པ་ཐོས་མ་ཐག རྒྱ་ནག་གཞུང་གིས་པེ་ཅིན་དུ་ཡོད་པའི་ཨ་རིའི་གཞུང་ཚབ་ཁང་ལ་ཡི་གེ་བཏང་སྟེ། ཐེངས་འདིའི་ཏཱ་ལའི་བླ་མ་དང་ཨ་བྷ་མ་གཉིས་ཀྱི་མཇལ་འཕྲད་དེ་ཕྱིར་འཐེན་བྱེད་དགོས་སྐོར་དང་། གལ་སྲིད་མཇལ་འཕྲད་གནང་བ་ཡིན་ན་རྒྱལ་ཁབ་གཉིས་བར་གྱི་འབྲེལ་ལམ་ལ་དོ་ཕོག་འགྲོ་རྒྱུ་ཡིན་སྐོར་སོགས་ཀྱི་གནོན་ཤུགས་སྤྲད་ཡོད་འདུག

ཐེངས་འདི་ནི་བོད་མིའི་སྐྱབས་མགོན་༧གོང་ས་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་མཇལ་འཕྲད་གནང་བ་ཐེངས་ ༥ པ་དེ་ཆགས་ཡོད།

༡༽ ཕྱི་ལོ་ ༢༠༡༠ ཟླ་ ༢ ཚེས་ ༡༨ ཉིན། ཨ་རིའི་རྒྱལ་ས་ཝ་ཞིན་ཊོན་གྱི་ཕོ་བྲང་དཀར་པོ་རུ་ཆུ་ཚོད་གཅིག་ལྷག་རིང་མཇལ་འཕྲད་གནང་ཡོད།

༢༽ ཕྱི་ལོ་ ༢༠༡༡ ཟླ་ ༧ ཚེས་ ༡༦ ཉིན། ཨ་རིའི་རྒྱལ་ས་ཝ་ཞིན་ཏོན་གྱི་ཕོ་བྲང་དཀར་པོ་རུ་མཇལ་འཕྲད་གནང་ཡོད།

༣༽ ཕྱི་ལོ་ ༢༠༡༤ ཟླ་ ༢ ཚེས་ ༢༡ ཉིན། ཨ་རིའི་རྒྱལ་ས་ཝ་ཞིན་ཏོན་གྱི་ཕོ་བྲང་དཀར་པོ་རུ་མཇལ་འཕྲད་གནང་ཡོད།

༤༽ ཕྱི་ལོ་ ༢༠༡༥ ཟླ་ ༢ ཚེས་ ༥ ཉིན། ཨ་རིའི་རྒྱལ་ས་ཝ་ཤཱིན་ཊོན་དུ་ཨ་རིའི་རྒྱལ་ཡོངས་ཡེ་ཤུའི་སྨོན་ལམ་གསོལ་སྟོན་སྟེང་མཇལ་འཕྲད་གནང་ཡོད།

༥༽ ཕྱི་ལོ་ ༢༠༡༦ ཟླ་ ༦ ཚེས་ ༡༥ ཉིན། ཨ་རིའི་རྒྱལ་ས་ཝ་ཞིན་ཊོན་གྱི་ཕོ་བྲང་དཀར་པོ་རུ་ཆུ་ཚོད་ཕྱེད་ལྷག་རིང་མཇལ་འཕད་གནང་ཡོད།