རྒྱ་ནག་དམངས་གཙོ་ཚོགས་པར་རྒྱབ་སྐྱོར་དང་རྒྱ་ནང་གི་དམངས་གཙོའི་སྐོར་གྱི་རྩོམ་ཡིག་བྲིས་ཏེ་ཕྱིའི་གནས་འཕྲིན་བརྒྱུད་ལམ་ཁག་ཏུ་སྤེལ་བའི་ནག་ཉེས་ཐོག་རྒྱ་རིགས་དམངས་གཙོ་དོན་གཉེར་བ་ལུ་ཀིང་སུང་དང་ཁྲིན་ཧྲུ་ཆེན་གཉིས་ལོ་སོར་ལོ་བཅུ་གཅིག་དང་བཅུ་དང་ཕྱེད་བཅས་ཀྱི་ཁྲིམས་ཐག་བཅད་འདུག
ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་ཤར་རྒྱུད་ཀྲེ་ཅང་ཞིང་ཆེན་ཧང་ཀྲུའུ་ (Hangzhou) གྲོང་ཁྱེར་གྱི་ཁྲིམས་ཁང་ཞིག་ནང་རྒྱ་རིགས་དམངས་གཙོ་དོན་གཉེར་བ་ལུ་ཀིང་སུང་ (Lu Gengsong) གིས་ཕྱིའི་གནས་འཕྲིན་བརྒྱུད་ལམ་ཁག་ཏུ་རྒྱ་ནང་གི་དམངས་གཙོའི་སྐོར་གྱི་རྩོམ་ཡིག་སྤེལ་བ་དང་རྒྱ་ནག་གཞུང་གིས་འགོག་སྡོམ་བྱེད་པའི་ “རྒྱ་ནག་དམངས་གཙོ་ཚོགས་པའི” (China Democratic Party) ནུས་སྟོབས་གོང་སྤེལ་བཏང་བའི་ཉེས་མིང་ཐོག་ལོ་ ༡༡ ཁྲིམས་ཐག་བཅད་པ་དང་། ཁྲིན་ཧྲུ་ཆེན་ (Chen Shuqing) གྱིས“རྒྱ་ནག་དམངས་གཙོ་ཚོགས་པར”རྒྱབ་སྐྱོར་བྱས་པའི་ཉེས་མིང་ཐོག་ལོ་ ༡༠ དང་ཕྱེད་ཀའི་ཁྲིམས་ཐག་བཅད་ཡོད་འདུག
རྒྱ་རིགས་དམངས་གཙོ་དོན་གཉེར་བ་ཁྲིན་ཧྲུ་ཆེན་གྱི་ཁྲིམས་རྩོད་པ་ཧྥི་ཡོང་ཀང་ (Fu Yonggang) ཟེར་བ་ཞིག་གིས་ཁོ་རང་རྒྱ་ནག་ཧང་ཀྲུའུ་གྲོང་ཁྱེར་གྱི་ཁྲིམས་ཁང་ནང་བཅར་ཐུབ་མེད་པ་དང་། ཁྲིན་ཧྲུ་ཆེན་གྱིས་ཁོ་རང་གི་ཉེས་ཆད་དང་ལེན་བྱེད་མིན་གྱི་སྐད་ཆ་མང་པོ་བཤད་མེད་ཅིང་། དེ་སྔོན་ཁོས་རང་ཉིད་ཀྱི་ནག་ཉེས་ཅི་བསགས་ཡོད་པའི་བདེན་དབང་ར་སྤྲོད་དགོས་སྐོར་བཤད་ཡོད་པ་རེད། ཅེས་བརྗོད་འདུག
ཧོང་ཀོང་གྲོང་ཁྱེར་དུ་རྟེན་གཞི་བྱེད་པའི་རྒྱལ་སྤྱིའི་ཉེས་ཡངས་ཚོགས་པའི་ཞིབ་མཇུག་པ་ཕོན་ (Poon) ཟེར་བ་ཞིག་གིས་གློག་འཕྲིན་གྱི་ལམ་ནས་ཧུ་ཅིན་ཐོ་དང་འདྲ་བའི་རྒྱ་ནག་གི་དབང་འཛིན་པ་སྔོན་མ་ཚོའི་སྲིད་དབང་དུས་སྐབས་དང་བསྡུར་ན། ཞི་ཅིན་ཕིན་གྱི་སྲིད་དབང་དུས་སྐབས་འདིར་རྒྱ་ནག་དམར་ཤོག་ཚོགས་པར་རྒྱབ་འགལ་བྱེད་མཁན་ཚོའི་ཐོག་དམ་དྲག་ཤུགས་ཆེར་ཕྱིན་ཡོད་པ་དང་། རྒྱ་རིགས་དམངས་གཙོ་དོན་གཉེར་བ་དེ་གཉིས་ལ་བཅད་པའི་ཉེས་ཆད་དེ་ཡང་འཆར་ཅན་གྱི་གདུག་རྩུབ་ཅིག་ཡིན་ཞིང་། ཁོང་གཉིས་སྔོན་ཆད་ཧུ་ཅིན་ཐོ་ཡི་སྲིད་དབང་དུས་སྐབས་སུའང་ལོ་ ༤ ཉེས་ཆད་ཁྲིམས་ཐག་བཅད་ཡོད་པ་རེད། ཅེས་བརྗོད་འདུག
གནས་ཚུལ་ལྟར་ན། རྒྱ་རིགས་དམངས་གཙོ་དོན་གཉེར་བ་ལུ་ཀིང་སུང་ད་ལྟ་ལོ་ ༦༠ ཡིན་པ་དང་། ཁོ་སྔོན་ཆད་རྒྱ་ནག་ཉེན་རྟོག་སློབ་ཆེན་གྱི་དགེ་རྒན་ཡིན་ཞིང་། ཕྱི་ལོ་ ༢༠༠༨ ལོར་རྒྱ་ནག་དམར་ཤོག་ཚོགས་པའི་སྲིད་དབང་མགོ་རྟིང་སློག་པའི་ཉེས་མིང་ཐོག་ལོ་ ༤ ཁྲིམས་ཐག་བཅད་དེ་ཕྱི་ལོ་ ༢༠༡༡ ལོར་ཀློད་གྲོལ་བཏང་བ་དང་། ཁྲིན་ཧྲུ་ཆེན་ཕྱི་ལོ་ ༡༩༨༩ ལོར་སློབ་ཕྲུག་ཚོའི་ཡར་ལངས་སྐབས་སུ་དམངས་གཙོའི་ལས་འགུལ་ནང་མཉམ་ཞུགས་བྱས་ཡོད་པ་དང་། ཕྱི་ལོ་ ༢༠༠༧ ལོར་ལོ་ ༤ ཁྲིམས་ཐག་བཅད་པ་དེ་ཕྱི་ལོ་ ༢༠༡༠ ལོར་བཙོན་གྲོལ་བཏང་ཡོད་པ་རེད།
ད་ལན་ཁོང་གཉིས་ལ་ཁྲིམས་གཅོད་ཀྱི་ཉེས་དོན་གཙོ་བོ“རྒྱ་ནག་དམངས་གཙོ་ཚོགས་པར”རྒྱབ་སྐྱོར་དང་རྒྱ་ནང་གི་དམངས་གཙོའི་སྐོར་གྱི་རྩོམ་ཡིག་བྲིས་ཏེ་ཕྱིའི་གནས་འཕྲིན་བརྒྱུད་ལམ་ཁག་ཏུ་འགྲེམ་སྤེལ་བྱས་པ་དེ་ཡིན་འདུག
གསར་འགོད་པ། པདྨ་རྒྱལ།
