འཛམ་གླིང་ཤར་ནུབ་རྒྱལ་ཁབ་ཕན་ཚན་བར་གྱི་ཟིང་འཁྲུག་དང་ཞེ་འཁོན་གྱི་རྐྱེན་པས་ན་ནིང་གཅིག་པུར་འཛམ་གླིང་ཕྱོགས་མཐའི་སྐྱབས་བཅོལ་བ་དང་ཡུལ་གྱར་བ་ས་ཡ་ ༦༥.༣ ཙམ་ཡུལ་མེད་བྲོས་བྱོལ་བ་ཆགས་ཡོད་འདུག
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། རེས་གཟའ་ཟླ་བའི་ཉིན་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལས་ཁུངས་ནས་སྙན་ཐོ་ཞོག་བཏོན་ཏེ་ན་ནིང་གཅུག་པུར་འཛམ་གླིང་ཡུལ་གྲུ་ཁག་གི་ཟིང་འཁྲུག་དང་མཐའ་མཚམས་ཁག་གི་དམ་དྲག་ཁྲིམས་སྒྲིག་བཅས་ཀྱི་རྐྱེན་པས་བཙན་བྱོལ་བ་ས་ཡ་ ༦༥.༣ ཡུལ་མེད་ཆགས་ཡོད་སྐོར་བརྗོད་འདུག
མཉམ་འབྲེལ་རྒྱལ་ཚོགས་སྐྱབས་བཅོལ་ལས་ཁུངས་ཀྱི་འགན་འཛིན་ཧྥེ་ལེ་ཕོ་གྷ་རན་ཌེ་ (Filippo Grandi) ཟེར་བ་ཞིག་གིས་མཚོ་དཀྱིལ་རྒྱ་མཚོ་ (Mediterranean) བརྒྱུད་དེ་ཡུ་རོབ་གླིང་ཕྲན་ཁག་ཏུ་འབྱོར་བའི་སྐྱབས་བཅོལ་བ་དང་ཡུལ་གྱར་བའི་དཀའ་རྙོག་མ་སེལ་ཚེ། དཀའ་རྙོག་དེ་རིམ་པས་ཁྱེད་རང་ལའང་འཕྲད་སྲིད། སྟོབས་ཆེན་རྒྱལ་ཁབ་ཁག་གི་མི་མང་གིས་དུས་ཡུན་རིང་བོའི་དཀག་རྙོག་དེ་ལ་ངེས་ཤེས་བསྐྱེད་དགོས་པ་དང་། སྐྱབས་བཅོལ་བའི་དཀའ་རྙོག་སེལ་ཐབས་སུ་ང་ཚོས་ཆབ་སྲིད་ཀྱི་བྱ་འགུལ་ལ་བརྟེན་ནས་རྒྱལ་ཁབ་སོ་སོའི་ནང་གི་འཁྲུག་ཟིང་ཞི་འཇགས་གཏོང་དགོས་མོད། སྟབས་ཉེས་པ་ཞིག་ལ། རྒྱལ་ཁབ་ཕན་ཚུན་བར་དགྲ་འཛིན་གྱི་ཞེ་འཁོན་ཚབས་ཆེ་རུ་འགྲོ་བཞིན་ཡོད་པ་མ་ཟད། མཐའ་མཚམས་ཁག་གི་ཁྲིམས་སྒྲིག་དང་འབྲེལ་བའི་རྩོད་རྙོག་འཕེལ་བཞིན་ཡོད་པ་དང་། བཟོ་ལས་དཔལ་འབྱོར་འཕེལ་རྒྱས་ཅན་གྱི་རྒྱལ་ཁབ་མང་པོ་ཞིག་གི་མཐའ་མཚམས་ཁག་ཏུ་དུས་ཡུན་རིང་བོར་སྐྱབས་བཅོལ་བའི་གཞི་རྩའི་ཐོབ་ཐང་གི་རྩ་འཛིན་ཁག་རྩིས་མེད་རྡོག་རོལ་གཏོང་གི་འདུག ཅེས་སོགས་བརྗོད་འདུག
མཉམ་འབྲེལ་རྒྱལ་ཚོགས་སྐྱབས་བཅོལ་ལས་ཁུངས་ནས་བཏོན་པའི་སྙན་ཐོ་དེའི་ནང་། ན་ནིང་གཅུག་པུར་འཛམ་གླིང་ཕྱོགས་མཐའི་སྐྱབས་བཅོལ་བ་དང་ཡུལ་གྱར་བ་ས་ཡ་ ༦༥.༣ ཡོད་པ་དང་ཕྱི་ལོ་ ༢༠༡༤ ལོར་ས་ཡ་ ༥༩.༥ ཟིན་པ་དེ་མ་འོངས་ལོ་ ༥ ནང་སྐྱབས་བཅོལ་བ་དང་ཡུལ་གྱར་བ་བརྒྱ་ཆ་ ༥༠ འཕེལ་བ་ཡིན་ན། སའི་གོ་ལའི་སྟེང་གི་མི་ ༡༡༣ གྲས་ནས་མི་ ༡ སོ་སོའི་ཡུལ་ལུང་ནས་རྒྱལ་ཁབ་གཞན་ནང་སྐྱབས་བཅོལ་དུ་འབྱོལ་དགོས་ཆགས་ཀྱི་ཡོད་འདུག
སི་རི་ཡ་དང་ཨ་ཧྥི་གྷ་ནེ་སི་ཐན། བྷུ་རུན་ཌེ་དང་ལྷོ་སུ་ཌན་རྒྱལ་ཁབ་བཅས་ཀྱི་ཡུལ་མི་ཚོ་རྒྱལ་ཁབ་གཞན་ནང་སྡེབ་བྱོལ་བྱེད་ཀྱིན་ཡོད་པ་དེ་ཁྱོན་མི་འབོར་ས་ཡ་ ༢༡.༣ ཟིན་གྱི་ཡོད་པ་དང་། གྲངས་འབོར་དེའི་ཕྱེད་ཙམ་བྱིས་པ་ཡིན་པ་དང་། བཟོ་ལས་དཔལ་འབྱོར་འཕེལ་རྒྱས་ཅན་གྱི་རྒྱལ་ཁབ་ཁག་གིས་འཛམ་གླིང་ཕྱོགས་མཐའི་ཡུལ་བྱོལ་བའི་བརྒྱ་ཆ་ ༨༦ སྣེ་ལེན་བྱེད་ཀྱིན་ཡོད་པ་དང་། ཊུར་ཀི་སྤྱི་མཐུན་རྒྱལ་ཁབ་ནང་སི་རི་ཡའི་སྐྱབས་བཅོལ་བ་ས་ཡ་ ༢.༥ བླངས་ཡོད་པ་དང་། འཛམ་གླིང་དམག་ཆེན་གཉིས་པའི་རྗེས་ཀྱི་འགྲོ་བ་མིའི་དཀའ་རྙོག་ཆེ་ཤོས་དེ་སི་རི་ཡའི་རྒྱལ་ནང་དུ་འབྱུང་གི་ཡོད་པ་དང་། སི་རི་ཡའི་ཡུལ་མི་ས་ཡ་ ༥.༦ རྒྱལ་ཁག་གཞན་ནང་འཚོ་སྡོད་བྱས་ཡོད་ཅིང་། ས་ཡ་ ༤.༨ ཙམ་གྱིས་རྒྱལ་ཁབ་གཞན་ནང་སྐྱབས་གནས་འཚོལ་བཞིན་ཡོད་སྐོར་སོགས་འཁོད་འདུག
གཞན། སེ་ཨན་ཨན་གསར་ཁང་གིས་མཉམ་འབྲེལ་རྒྱལ་ཚོགས་སྐྱབས་བཅོལ་ལས་ཁུངས་ཀྱི་སྙན་ཐོ་དང་འབྲེལ་བའི་གནས་ཚུལ་སྤེལ་བའི་ནང་། ཕྱི་ལོ་ ༢༠༡༥ ལོ་མཇུག་ནས་ཨི་རག་རྒྱལ་ནང་གི་འཁྲུག་ཟིང་ཟམ་མ་ཆད་པར་ཡུལ་མི་ས་ཡ་ ༤.༤ སོ་སོའི་ཡུལ་ལུང་དང་ཁ་འབྲལ་དགོས་བྱུང་ཡོད་པ་དང་། དེའི་གྲས་ཀྱི་ཕྱེད་ཙམ་རྒྱལ་ཁབ་གཞན་ནང་སྐྱབས་བཅོལ་དུ་འཚོ་སྡོད་བྱས་ཡོད་པ་དང་། རྒྱལ་ནང་གི་ཟིང་འཁྲུག་དང་རྩོད་རྙོག་སྣ་ཚོགས་ཀྱི་རྐྱེན་པས། ཁོ་ཚོས་སོ་སོའི་གྲོགས་ཉེ་དུ་དང་རང་ཡུལ་སྤྱི་ཚོགས། རྒྱུ་དངོས་གཞིས་དང་ལས་གནས། སློབ་གྲྭ་སོགས་བསྐྱུར་ཏེ་ཡུལ་ལུང་གཞན་ནང་བདེ་འཇགས་ཀྱི་འཚོ་གནས་ཐུབ་པའི་རེ་འདུན་བཅངས་ཡོད་འདུག
སྙན་ཐོ་དེའི་ནང་བཏོན་པའི་སྐྱབས་བཅོལ་བ་དང་ཡུལ་གྱར་བའི་གྲངས་འབོར་དེ་ནི་འཛམ་གླིང་དམག་ཆེན་གཉིས་པའི་སྐབས་ཀྱི་སྐྱབས་བཅོལ་བའི་གྲངས་འབོར་ལས་བརྒལ་ཏེ་འཛམ་གླིང་ལོ་རྒྱུས་ཁྲོད་ཀྱི་དཀའ་རྙོག་ཆེ་ཤོས་ཆགས་ཀྱི་ཡོད་པ་དང་། དེ་རིང་གི་འཛམ་གླིང་སྒང་གི་སྐྱབས་བཅོལ་བའི་གྲངས་འབོར་དེ་དབྱིན་ཡུལ་གྱི་མི་འབོར་ལས་ཆེ་ཞིང་། གལ་ཏེ་སྐྱབས་བཅོལ་དེ་ཚོ་རྒྱལ་ཁབ་ཅིག་ཏུ་གྲུབ་པའི་དབང་དུ་བཏང་ན། དེ་ནི་དུས་རབས་ཉེར་གཅིག་པའི་འཛམ་གླིང་སྟེང་གི་རྒྱལ་ཁབ་ཆེ་ཤོས་ཆགས་ཀྱི་ཡོད་འདུག
སྐྱབས་བཅོལ་བའི་བརྒྱ་ཆ་ ༥༤ ཨ་ཧྥི་གྷ་ནེ་སི་ཐན་དང་སི་རི་ཡ། སོ་མ་ལེ་ཡ་བཅས་ནས་ཞིང་། སི་རི་ཡའི་སྐྱབས་བཅོལ་བ་ས་ཡ་ ༤. ༩ དང་། ཨ་ཧྥི་གྷ་ནེ་སི་ཐན་གྱི་སྐྱབས་བཅོལ་བ་ས་ཡ་ ༢.༧ དང་སོ་མ་ལེ་ཡའི་སྐྱབས་བཅོལ་བ་ས་ཡ་ ༡.༡ ཡོད་འདུག
མཉམ་འབྲེལ་རྒྱལ་ཚོགས་སྐྱབས་བཅོལ་ལས་ཁུངས་སུ་འབྱོར་བའི་སྐྱབས་འཚོལ་སྙན་ཞུའི་ནང་། སོ་སོའི་ནང་མི་བྲལ་བའི་བྱིས་པ་ ༩༨,༤༠༠ ཟིན་གྱི་ཡོད་པ་དང་། བྱིས་པ་སྐྱབས་བཅོལ་བ་དེ་དག་ཚང་མ་ཨ་ཧྥི་གྷ་ནེ་སི་ཐན་དང་ཨ་རེ་ཊི་རིན། སི་རི་ཡ་དང་སོ་མ་ལེ་ཡ་ནས་ཡིན་འདུག
ཕྱི་ལོ་ ༢༠༡༥ ལོར་ཨ་ཧྥི་གྷ་ནེ་སི་ཐན་དང་སོ་མ་ལེ་ཡ། ཨ་ཧྥི་རེ་ཁ་དབུས་སྤྱི་མཐུན་རྒྱལ་ཁབ་བཅས་ཀྱི་སྐྱབས་བཅོལ་བ་ ༢༠༠,༠༠༠ ལྷག་ཕྱིར་རང་ཡུལ་དུ་ལོག་དགོས་བྱུང་ཡོད་ནའང་། ད་དུང་སྐྱབས་བཅོལ་བ་ ༡༠༧,༡༠༠ འཛམ་གླིང་ཤར་ནུབ་རྒྱལ་ཁབ་ཁབ་ནང་འཚོ་སྡོད་བྱས་ཡོད་པ་དང་། ཨ་རིའི་ནང་སྐྱབས་བཅོལ་བ་ ༦༦,༥༠༠ ཡོད་པ་དང་། ཊུར་ཀིའི་ནང་སྐྱབས་བཅོལ་བ་ས་ཡ་ས་ ༢.༥ དང་པ་ཀི་སི་ཐན་ནང་ས་ཡ་ ༡.༦། ལི་བྷ་ནོན་ནང་ས་ཡ་ ༡.༡། ཨེ་རན་ནང་ ༩༧༩,༠༠༠། ཨ་ཐོ་ཕེ་ཡ་ནང་ ༧༣༦,༠༠༠ ཡོད་པ་དང་། ཊུར་ཀི་སྤྱི་མཐུན་རྒྱལ་ཁབ་ནས་འཛམ་གླིང་ཕྱོགས་མཐའི་སྐྱབས་བཅོལ་བར་སྣེ་ལེན་ཞུས་པ་ཐེངས་གཉིས་པ་དེ་ཆགས་ཀྱི་ཡོད་སྐོར་སོགས་འཁོད་འདུག
གསར་འགོད་པ། པདྨ་རྒྱལ།
