སྐྱབས་བཅོལ་ལག་དེབ་དུས་འགྱངས་བྱེད་པར་ཐོག་མ་དྲ་ཐོག་ནས་འགེངས་ཤོག་བསྐང་དགོས།

བདེ་སྲུང་ཡན་ལག་ལས་ཁུངས་ཀྱི་འགན་འཛིན་འཇིགས་མེད་རྒྱལ་མཚོ་ལགས་ནས་བོད་མིའི་སྐྱབས་བཅོལ་ལག་དེབ་དུས་འགྱངས་ཀྱི་དཀའ་རྙོག་སེལ་ཐབས་ཡག་ཤོས་དེ་ང་ཚོ་བོད་པ་ཚང་མས་གང་ཐུབ་ཐུབ་ཀྱིས་སྐྱབས་བཅོལ་ལག་དེབ་དུས་འགྱངས་ཐོ་འགོད་བྱེད་པར་ཟླ་གཅིག་གི་སྔོན་ལ་ཡོང་རྒྱུ་གལ་ཆེན་པོ་ཡིན་སྐོར་བརྗོད་སོང་།

ཟླ་འགའི་གོང་ནས་བཟུང་རྒྱ་གར་གཞུང་གིས་བོད་མི་བཙན་བྱོལ་བ་ཚོའི་སྐྱབས་བཅོལ་ལག་དེབ་(R.C)དུས་འགྱངས་བྱེད་པར་ཐོག་མར་དྲ་ཐོག་ནས་འགེངས་ཤོག་བསྐང་དགོས་པའི་འགྲོ་སྟངས་ཤིག་བཟོས་ཡོད་པ་དང་། བཞུགས་སྒར་དྷ་རམ་ས་ལ་ཁུལ་ལ་མཚོན་ན། སྐྱབས་བཅོལ་ལག་དེབ་ཀྱི་དུས་ཚོད་རྫོགས་པར་ཟླ་གཅིག་ལས་མེད་པའི་མཚམས་སུ་དྲ་ཐོག་ནས་འགེངས་ཤོག་བསྐོངས་ཏེ། དྷ་རམ་ས་ལའི་བདེ་སྲུང་ཡན་ལག་ལས་ཁུངས་བརྒྱུད་ཀང་ར་རྫོང་སྐོར་སྲུང་སྤྱི་ཁྱབ་ལས་ཁུངས་ལ་འགྲོ་དགོས་ཀྱི་ཡོད་འདུག

མི་མང་གིས་སྐྱབས་བཅོལ་ལག་དེབ་དྲ་ཐོག་ནས་དུས་འགྱངས་བྱེད་པའི་འགྱུར་བ་དེ་སྔོན་ཆད་དང་བསྡུར་ན་དཀའ་ཁག་ཆེ་སྐོར་རྗོད་ཀྱི་ཡོད་པ་དང་། ལྷག་པར་དུ་ས་གནས་གཞན་ནང་སྡོད་པའི་བོད་མི་ཚོ་དྷ་རམ་ས་ལར་སྐྱབས་བཅོལ་ལག་དེབ་དུས་འགྱངས་བྱེད་པར་ཡོང་དུས། ཐོག་མར་བདེ་སྲུང་ཡན་ལག་ལས་ཁུངས་བརྒྱུད་དྲ་ཐོག་ནས་འགེངས་ཤོག་བསྐངས་དགོས་པ་དང་། དེ་ནས་ཀང་ར་སྐོར་སྲུང་སྤྱི་ཁྱབ་ལས་ཁུངས་ལ་ག་དུས་བཅར་དགོས་མིན་གྱི་བརྡ་ལན་ལ་སྒུག་དགོས་ཀྱི་ཡོད་སྟབས། འགྲོ་གྲོན་སྡོད་གནས་སོགས་ཀྱི་དཀའ་ཁག་འཕྲད་ཀྱིན་ཡོད་འདུག

འདི་ག་གསར་འགོད་པས་བདེ་སྲུང་ཡན་ལག་ལས་ཁུངས་ཀྱི་འགན་འཛིན་འཇིགས་མེད་རྒྱལ་མཚོ་ལགས་སུ་བོད་མིའི་སྐྱབས་བཅོལ་ལག་དེབ་དྲ་ཐོག་ནས་དུས་འགྱངས་ཞུ་སྟངས་སྐོར་དྲིས་པར་ཁོང་གིས། སྐྱབས་བཅོལ་ལག་དེབ་དྲ་ཐོག་ནས་དུས་འགྱངས་ཞུ་བའི་ལས་རིམ་དེ་ཧ་ལམ་ལོ་གཅིག་འགོར་གྲབས་ཡོད་པ་རེད། འདས་པའི་ལོ་གཅིག་ནང་ང་ཚོས་བཙན་བྱོལ་བོད་མིའི་སྒྲིག་འཛུགས་ཁག་དང་། དགོན་སྡེ་ཁག སློབ་གྲྭ་ཁག་ཚང་མར་དྲ་ཐོག་ནས་སྐྱབས་བཅོལ་ལག་དེབ་དུས་འགྱངས་ཐོ་འགོད་ཞུ་ཕྱོགས་སྐོར་ལབ་ཚར་ཡིན། འོན་ཀྱང་བོད་མིའི་སྒྲིག་འཛུགས་ས་གནས་ཁག་ཅིག་ཏུ་གློག་ཀླད་དང་དྲ་ལམ། པར་བཤུས་སོགས་ཀྱི་ཆ་རྐྱེན་མེད་སྟབས། འདི་ག་བདེ་སྲུང་ཡན་ལག་ལས་ཁུངས་སུ་བཅར་ནས་དུས་འགྱངས་ཐོ་འགོད་ཞུ་བཞིན་ཡོད་པ་རེད།

ད་ལན་ནས་རྒྱ་གར་ཧི་མ་ཅལ་མངའ་སྡེ་ཀང་ར་རྫོང་ཁོངས་ཀྱི་བོད་མིའི་གཞིས་གྲོང་ཁག་དང་། བོད་སློབ་ཁག་ཡོངས་ནས་ཉིན་གཅིག་ལ་མི་ ༢༠ དུས་འགྱངས་ཐོ་འགོད་ཀྱི་ས་མིག་མ་གཏོགས་སྤྲད་ཡོད་པ་མ་རེད། ང་ཚོའི་སྡོམ་རྩིས་ལྟར་ན་ཀང་ར་རྫོང་ཁོངས་སུ་སྐྱབས་བཅོལ་བོད་མི་སྟོང་ཕྲག་ ༡༥ ལྷག་ཡོད་པ་རེད། ཉིན་གཅིག་ལ་མི་ ༢༠ ས་མིག་དེ་ཁེངས་འགྲོ་གི་ཡོད་པ་དང་། དྲ་ཐོག་ནས་དུས་འགྱངས་ཐོ་འགོད་ཀྱི་དུས་ཚོད་དེ་ཡང་ཕྱི་ཟླ་ ༨ ནང་མ་གཏོགས་རག་གི་ཡོད་པ་མ་རེད། རྒྱ་གར་དཔོན་པོ་ཚོས་ཛ་དྲག་ཡོད་རིགས་ཚོར་དམིགས་བསལ་དུས་འགྱངས་བྱེད་ཀྱི་ཡིན། ཛ་དྲག་མེད་མཁན་ཚོ་དུས་ཚེས་ཏག་ཏག་ལ་ཤོག་ཅེས་ལབ་ཀྱི་ཡོད་པ་རེད། སྔོན་མ་ཡིན་ན་ཉིན་ ༡༥ ནང་སྐྱབས་བཅོལ་ལག་དེབ་དུས་འགྱངས་ཞུ་དགོས་ཀྱི་ཡོད་པ་དང་། དེང་སྐབས་ཟླ་གཅིག་ནང་དུས་འགྱངས་ཞུ་རུ་ཤོག་ཅེས་ཤོག་བུ་དཀར་པོ་དེའི་གཤམ་དུ་གསལ་བཤད་གནང་ཡོད་པ་རེད། དེ་ལ་ཡིན་གཅིག་མིན་གཉིས་དོ་སྣང་ཡོང་དགོས་པ་གལ་ཆེན་པོ་རེད། ཅེས་བརྗོད་སོང་།

ཁོང་གིས་མུ་མཐུད་དུ། དེང་སྐབས་དྲ་ཐོག་ནས་བོད་མིའི་སྐྱབས་བཅོལ་ལག་དེབ་དུས་འགྱངས་གཅིག་པུ་ཙམ་མིན་པར།  ཕྱིར་སྐྱོད་ཆོག་མཆན་ (Exit Permit) དང་། ཕྱིར་ལོག་ཆོག་མཆན་ (Return Visa) སོགས་ཚང་མ་དྲ་ཐོག་ནས་ཞུ་དགོས་ཀྱི་ཡོད་པ་དང་། ང་ཚོར་ཉིན་གཅིག་ལ་དུས་འགྱངས་ས་མིག་ ༢༠ མ་གཏོགས་མེད་སྟབས། དེ་ཚང་མ་ཁེངས་འགྲོ་བཞིན་ཡོད་སྟབས། དེ་དཀའ་ངལ་གཅིག་ཆགས་ཀྱི་ཡོད་པ་རེད། དེར་བརྟེན་ང་ཚོས་ས་གནས་སོ་སོ་ནས་དྲ་ཐོག་དུས་འགྱངས་ཐོ་འགོད་ལས་བྱེད་དང་དུས་འགྱངས་ས་མིག་མང་དུ་གཏོང་དགོས་པའི་འབོད་སྐུལ་ཞུས་ཡོད་ལ། འབོད་སྐུལ་ཞུས་པ་གཞིར་བཟུང་གིས་ཁོང་ཚོས་དགོངས་པ་བཞེས་ཀྱི་ཡོད་ནའང་། ག་དུས་འཕོ་འགྱུར་གཏོང་མིན་ཤེས་ཀྱི་མི་འདུག ཅེས་བརྗོད་སོང་།

བོད་མིའི་སྐྱབས་བཅོལ་ལག་དེབ་དྲ་ཐོག་ནས་དུས་འགྱངས་ཐོ་འགོད་ཞུ་བའི་དགོས་དམིགས་ག་རེ་ཡིན་མིན་སྐོར་ལ་ཁོང་གིས། དེ་རྒྱ་གར་གཞུང་གིས་ཁྲིམས་ཐོག་ནས་གཏན་འབེབ་བྱས་པ་གཞིར་བཟུང་གིས་གཅིག་ནས་ང་ཚོ་སྐྱབས་བཅོལ་བོད་མིའི་ཡིག་ཆ་བོར་བརླག་མི་འགྲོ་བ་དང་། གཉིས་ནས་ཡིག་ཆ་ཁག་འཚོལ་ཞིབ་བདེ་བའི་ཆེད་དུ་ཡིན་ས་རེད། ཅེས་བརྗོད་སོང་།

གསར་འགོད་པས་སྔོན་མ་ཡིན་ན་སྐྱབས་བཅོལ་ལག་དེབ་དུས་འགྱངས་སྐབས་སུ། ཉིན་འགའ་རྗེས་ལུས་ཐེབས་པ་ཡིན་ན། དུས་འགྱངས་ཞུ་མི་ཐུབ་པར་བརྟེན་ནས་རེ་ཟུང་གིས་དངུལ་ཕྲན་བུ་སྤྲོད་ཀྱི་ཡོད་པའི་དཀའ་རྙོག་བྱུང་བ་རེད། མ་འོངས་པར་དཀའ་རྙོག་དེ་རིགས་མི་ཡོང་བའི་ཐབས་ཤེས་གཙོ་བོ་ག་རེ་ཡོད་མེད་དྲིས་པར་ཁོང་གིས། དཀའ་རྙོག་དེ་སེལ་ཐབས་ཡག་ཤོས་ང་ཚོ་བོད་པ་ཚང་མས་གང་ཐུབ་ཐུབ་ཀྱིས་སྐྱབས་བཅོལ་ལག་དེབ་དུས་འགྱངས་ཐོ་འགོད་བྱེད་པར་ཟླ་གཅིག་གི་སྔོན་ལ་ཡོང་རྒྱུ་གལ་ཆེན་པ་རེད། དེ་མིན་དྲ་ཐོག་ནས་དུས་འགྱངས་བྱེད་སྐབས་ཚེ་གྲངས་ཡོད་པ་རེད། ཚེ་གྲངས་བླངས་པ་ཡིན་ན། རྗེས་མ་ཀང་ར་སྐོར་སྲུང་སྤྱི་ཁྱབ་ལས་ཁུངས་སུ་བཅར་དུས། ངས་དྲ་ཐོག་ནས་དུས་འགྱངས་ཞུས་པའི་ཚེ་གྲངས་འདི་ཡིན་ཞེས་བདེན་དཔང་བྱས་ཆོག་གི་ཡོད་སྟབས། ཁོང་ཚོས་རྙོག་དྲ་བཤད་ཀི་མ་རེད། ཡིན་ཡང་སྐབས་རེར་སྐོར་སྲུང་སྤྱི་ཁྱབ་དཔོན་པོ་མེད་པའམ་ཕར་ཕྱོགས་ནས་ལས་བྱེད་ཉུང་བའི་སྐབས་སུ་འཁེལ་བའི་དཀའ་ངལ་དེ་འདྲ་ཕྲན་བུ་ཡོང་གི་རེད་དེ། དུས་རྒྱུན་ཡོང་གི་མ་རེད་བསམ་གྱི་འདུག ང་ཚོས་ནམ་རྒྱུན་ལྟ་རྟོག་བྱེད་ཀྱིན་ཡོད་པ་རེད། སྔོན་མ་ཡིན་ན་བདུན་ཕྲག་གཅིག་ནང་དུས་འགྱངས་ཉིན་གསུམ་རིང་རེད། དེང་སྐབས་ཧིན་བོད་དུས་ཆེན་གུང་སེང་ཕུད་བདུན་ཕྲག་གཅིག་གི་གཟའ་ཟླ་བ་ནས་སྤེན་པའི་བར་ཉིན་དྲུག་རིང་ག་དུས་འགྲོ་འགྲོ་རེད། ཅེས་བརྗོད་སོང་།

བདེ་སྲུང་ཡན་ལག་ལས་ཁུངས་ནས་དྲ་ཐོག་དུས་འགྱངས་ཐོ་འགོད་ཞུས་ཏེ་ཉིན་གཉིས་རིང་སྒུག་དགོས་པའི་སྐོར་ལ་ཁོང་གིས། དེ་དཔེར་ན་ཁྱེད་རང་གི་སྐྱབས་བཅོལ་ལག་དེབ་ཉིན་ ༢༠ རྗེས་སུ་དུས་འགྱངས་ཞུ་གི་ཡོད་པ་དང་། དེ་རིང་འདིར་དྲ་ཐོག་དུས་འགྱངས་ཐོ་འགོད་ཞུ་བར་སླེབས་པ་ཡིན་ན། རྒྱ་གར་སྐྱབས་བཅོལ་ལག་དེབ་ཐོ་འགོད་ལས་ཁུངས་སུ་བཅར་བའི་དུས་ཡུན་ཟླ་བ་ཆགས་ཀྱི་ཡོད་པ་རེད། དེ་གང་ཡིན་ཟེར་ན་ང་ཚོར་ཉིན་གཅིག་ལ་ཐོ་འགོད་ས་མིག་ ༢༠ མ་གཏོགས་མེད་པའི་རྐྱེན་གྱིས་རེད། ཉིན་གཅིག་ལ་དུས་འགྱངས་ཐོ་འགོད་ཞུ་མཁན་ཉུང་ཉུང་ཡིན་ན། དུས་འགྱངས་ཐོ་ཤོག་ཉིན་དེར་རག་གི་རེད། སྐབས་རེར་ཕྱི་སྐྱོད་ཆོག་མཆན་མ་ཡིན་པའི་སྐྱབས་བཅོལ་ལག་དེབ་དུས་འགྱངས་གཅིག་པུ་ཞུ་མཁན་མི་བཞི་བཅུ་ལྔ་བཅུ་སླེབས་ཀྱི་འདུག དེ་འདྲའི་སྐབས་སུ་ཉིན་གཅིག་གཉིས་ཀྱི་དུས་ཚོད་འགོར་གྱི་ཡོད་པ་རེད། རྒྱུ་མཚན་དྲ་ཐོག་ནས་དུས་འགྱངས་ཐོ་འགོད་ཞུ་སྐབས། དྲ་ལམ་མགྱོགས་ན་དུས་འགྱངས་ཐོ་འགོད་དང་པར་བཤུས་སྐར་མ་བཅུའི་ནང་ཚར་གྱི་འདུག དྲ་ལམ་དལ་སྐབས་ཆུ་ཚོད་ཕྱེད་ཀ་འགོར་གྱི་འདུག དེར་མ་ཟད་སྐུ་མདུན་ཆིབས་བསྒྱུར་སྐབས་དང་གསུང་ཆོས་དེ་འདྲ་སྐབས་སུ། ང་ཚོར་ལས་བྱེད་ཉུང་དྲགས་ཏེ་འགོར་འགྱངས་ཐེབས་ཀྱི་ཡོད་པ་རེད་མ་གཏོགས། གཞན་སྤྱི་ཡོངས་ནས་ང་ཚོས་ཉིན་རེ་ཉིན་རེར་དུས་འགྱངས་ཐོ་འགོད་ཚར་བའི་ཐེབས་ཤེས་བྱེད་ཀྱིན་ཡོད། ཅེས་བརྗོད་སོང་།

མཇུག་ཏུ་ཁོང་གིས་བོད་མི་ཚོས་རྒྱ་གར་གཞུང་གི་སྙན་ཞུའི་འགེང་ཤོག་དྲ་རྒྱ་ (indianfrro.gov.in) འདིའི་ནང་གི་འགེང་ཤོག་བསྐངས་ཏེ་དུས་འགྱངས་ཞུ་དགོས་པ་དང་། དེ་ཡང་དྲ་ཚིགས་བེད་སྤྱོད་ཤེས་ཀྱི་ཡོད་ན། དོ་བདག་སོ་སོས་དྲ་ཐོག་ནས་དུས་འགྱངས་ཞུ་ཆོག་གི་རེད། ཅེས་བརྗོད་སོང་།

གསར་འགོད་པ། པདྨ་རྒྱལ།