དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༢༣ ཉིན་གྱི་དགོང་དྲོའི་ཆུ་ཚོད་ ༨ ཙམ་ལ་རྒྱ་ནག་ཤར་རྒྱུད་ཅང་སུའུ་ཞིང་ཆེན་ཡན་ཁྲིན་གྲོང་ཁྱེར་གྱི་རྫོང་དང་གྲོང་རྡལ་མང་པོར་རླུང་འཚུབ་དང་དྲག་ཆར་གྱི་གནོད་པ་ཚབས་ཆེན་ཐེབས་ཏེ། ས་ཁུལ་དེ་དག་གི་ཁང་བ་དང་བཟོ་གྲྭ། སློབ་གྲྭ་དང་ཤིང་སྡོང་། ཐོག་རྩེག་ཁང་ཆེན་དང་འགྲིམ་འགྲུལ་གཞུང་ལམ་སོགས་ལ་གཏོར་སྐྱོན་ཐེབས་པའི་ཁྲོད་ད་སྔ་མི་ ༩༨ རྐྱེན་ལམ་དུ་ཤོར་བ་དང་མི་ ༨༠༠ ལྷག་རྨས་སྐྱོན་ཕོག་འདུག
ཅང་སུའུ་ཞིང་ཆེན་གྱི་དཔོན་རིགས་ཧྲི་ཐེ་ཧྥིན་ (Shi Taifeng) ཟེར་བ་ཞིག་གིས། ཆར་རླུང་ཁྲོད་དུ་ཡུལ་མི་ ༩༨ རྐྱེན་ལམ་དུ་ཤོར་བ་དང་ཡུལ་མི་ ༨༠༠ ལྷག་རྨས་སྐྱོན་ཕོག་སྐོར་བཤད་ཅིང་། རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས་ཐེངས་འདིའི་ཆར་རླུང་ཁྲོད་ཡུལ་མི་ ༢༠༠ རྨས་སྐྱོན་ཕོག་པ་ཙམ་ཡིན་ལུགས་བཤད་འདུག
ཝང་ཧྲུ་ཆེན་ (Wang Shuqing) ཟེར་བའི་རྒྱ་རིགས་ཡུལ་མི་ཞིག་གིས་ཨེ་ཕེ་གསར་འགོད་པར་བརྗོད་དོན། ངའི་ནང་མི་ཚང་མ་སྡོད་ཁང་ནང་ཡོད་སྟབས། ཁོ་ཚོ་ཚང་མ་ཁང་རྩེག་རྡིབ་སྐྱོན་འོག་རྐྱེན་ལམ་དུ་ཤོར་བ་རེད། དེའི་རྗེས་ས་གནས་ཉེན་རྟོག་དམག་མི་ཡོང་ནས་ཁོ་ཚོའི་ཕུང་པོ་ཕྱིར་བཏོན་པ་རེད། ངའི་སེམས་པ་ཧ་ཅང་སྐྱོ་བོ་བྱུང་། ཞེས་བརྗོད་འདུག
པེ་ཅིན་གཞུང་འབྲེལ་གསར་ལམ་ཁག་ཏུ་ཆར་རླུང་གི་གནོན་འཚེ་ཐེངས་ཁུལ་ཁག་ཏུ་སྦྲ་གུར་དང་ཛ་དྲག་གི་མཁོ་དངོས་སྐྱེལ་འདྲེན་བྱས་ཏེ་གནོད་འཚེ་ཐེབས་ཡུལ་གྱི་མི་མང་མྱུར་སྐྱོབ་བྱེད་བཞིན་ཡོད་ལུགས་བཤད་འདུག
གནས་ཚུལ་ལྟར་ན། ཅང་སུའུ་ནི་ཧྲང་ཧེ་གྲོང་ཁྱེར་ནུབ་རྒྱུད་ཀྱི་མཚོ་ཁུལ་ཞིང་ཆེན་ཞིག་ཡིན་པ་དང་། ཡན་ཁྲིན་གྲོང་ཁྱེར་ནི་གནའ་བོའི་གྲོང་ཁྱེར་རྙིང་པ་ཡིན་ཞིང་། གྲོང་ཁྱེར་དེའི་ནང་མི་མང་ས་ཡ་ ༨ ལྷག་འཚོ་སྡོད་བྱས་ཡོད་པ་དང་། ཕྱི་ལོ་ ༡༩༦༦ ལོའི་ ༣ པའི་ཚེས་ ༣ ཉིན་ཡན་ཁྲིན་གྲོང་ཁྱེར་དུ་བྱུང་བའི་ཆར་རླུང་གི་གནོད་འཚེ་ཁྲོད་ཡུལ་མི་ ༨༧ རྐྱེན་འདས་དང་ཡུལ་མིའི་སྡོད་ཁང་ ༣༠༠༠༠ ལྷག་གཏོར་བཅོམ་ཐེབས་ཡོད་འདུག
གསར་འགོད་པ། པདྨ་རྒྱལ།
