ཨ་རིའི་གྲོང་ཁྱེར་སྤྱི་ཁྱབ་པའི་ལོ་འཁོར་ལྷན་ཚོགས་ཐོག་བོད་མིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་དང་ཨ་རིའི་གཞས་མ་གྲགས་ཆེན་གྷ་གྷ་རྣམ་གཉིས་ཀྱིས་དྲི་བ་དྲིས་ལན་དང་༧གོང་ས་མཆོག་གསུང་བཤད་བཅས་གནང་རྒྱུ་ཡིན་འདུག
སང་ཉིན་ཨ་རིའི་གཟའ་ཉི་མར་ཨ་རིའི་མངའ་སྡེ་གྲོང་ཁྱེར་ཨིན་ཌེ་ཡ་ན་ཕོ་ལེ་སི་ (Indianapolis) ཡི་ (JW Marriott Houston Downtown) གསོལ་མགྲོན་ཁང་དུ་ཨ་རིའི་གྲོང་ཁྱེར་སྤྱི་ཁྱབ་པའི་ལོ་འཁོར་ལྷན་ཚོགས་ཐེངས་ ༨༤ པ་འཚོགས་འཆར་ཡོད་པ་དང་། ལྷན་ཚོགས་སྟེང་༧གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་ཨ་རིའི་གཞས་མ་གྲགས་ཅན་ལེ་ཌེ་གྷ་གྷ་ (Lady Gaga) དང་། ཨ་རིའི་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ཁི་ལེན་ཊོན་ (Hillary Clinton) དང་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་ (Trump) དང་། དེ་བཞིན། ཨ་རིའི་གྲོང་ཁྱེར་སྤྱི་ཁྱབ་པ་ ༣༠༠ མ་ཟིན་ཙམ་མཉམ་གཞུག་གནང་འཆར་ཡོད་འདུག
ལྷན་ཚོགས་ཀྱི་ཐོག་མར་གཞས་མ་དང་སྒྱུ་རྩལ་བ་གྲགས་ཅན་ལེ་ཌེ་གྷ་གྷ་ལགས་ཀྱིས་༧གོང་ས་མཆོག་གིས་གསུང་བའི་ “དཀའ་རྙོག་མིས་བཟོས་པ་ཡིན་སྟབས་མིས་སེལ་དགོས”པ་དང་། “འགྲོ་བ་མིའི་རྩ་བའི་རང་བཞིན་ནི་སྙིང་རྗེ་ཅན་ཡིན་པ་དང་། དེ་ནི་ང་ཚོའི་རེ་བའི་འབྱུང་ཁུངས་ཡིན”ཞེས་པའི་བཀའ་སློབ་ཁག་ཅིག་གདངས་དབྱངས་སུ་གྱེར་རྒྱུ་ཡིན་པ་དང་། དེའི་རྗེས་བོད་མིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་གིས་ “བྱམས་བརྩེ་ནི་འཛམ་གླིང་ཞི་བདེ་བསྐྲུན་ཐབས་ཀྱི་ཀྭ་བ་ལྟ་བུ་ཡིན” (Compassion as the Pillar of World Peace) པའི་བརྗོད་གཞིའི་ཐོག་གསུང་བཤད་གནང་རྒྱུ་ཡིན་ཞིང་། ༧གོང་ས་མཆོག་ནས་གསུང་བཤད་གནང་གྲུབ་རྗེས། ཁོང་ཉིད་ལེ་ཌེ་གྷ་གྷ་དང་ལྷན་བཞུགས་ཀྱིས་དྲི་བར་དྲི་ལན་གནང་རྒྱུ་ཡིན་པ་དང་། ལས་རིམ་དེ་ཨ་རིའི་རྒྱལ་ཡོངས་བརྙན་འཕྲིན་ཁང་ (NBC) གི་གསར་འགོད་པ་ཟུར་བ་ལྕམ་ (Ann Curry) ལགས་ཀྱིས་མདོ་འཛིན་གནང་རྒྱུ་ཡིན་འདུག
རེས་གཟའ་ཉི་མའི་ཉིན་རྒྱབ་ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་དང་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ཁི་ལེན་ཊོན་རྣམ་གཉིས་ནས་ཀྱང་ཨ་རིའི་དཔལ་འབྱོར་འདུ་འགོད་ཀྱི་ལྟེ་བར་གྱུར་བའི་ས་གནས་དང་གྲོང་ཁྱེར་ཁག་ཡར་རྒྱས་གོང་འཕེལ་ཡོང་ཐབས་སུ་ཕྱར་བ་གྲུ་འདེགས་དགོས་པའི་སྐོར་གྱི་གཏམ་བཤད་སྤེལ་འཆར་ཡོད་འདུག
ཐེངས་འདིའི་ཨ་རིའི་གྲོང་ཁྱེར་སྤྱི་ཁྱབ་པའི་ལོ་འཁོར་ལྷན་ཚོགས་ཐོག་སྤྱི་དམངས་མཉམ་ཞུགས་བྱེད་དུ་འཇུག་རྩིས་མེད་ནའང་། ལྷན་ཚོགས་ཀྱི་ལས་རིམ་དང་གཏམ་བཤད་ཁག་ཨ་རིའི་གསར་འགྱུར་བརྒྱུད་ལམ་ཁག་དང་སྤྱི་ཚོགས་བརྒྱུད་ལམ་ཁག་ནས་རྒྱང་སྒྲོག་བྱེད་འཆར་ཡོད་འདུག
གསར་འགོད་པ། པདྨ་རྒྱལ།
འདི་འདྲ་གཏམ་བཟང་ཞིག་འཇིག་རྟེན་གྱི་ཞི་བདེའི་བྱང་སེམས་མ་གཏོགས་སྐྱེ་བུ་སུ་ཞིག་སྒྲུབ་ཐུབ་ངོ་མ་ཡ་མཚན་རེད། འདི་འུ་ཅག་བོད་མི་ཚོའི་བསོད་ནམས་ཡིན་ནོ་ཤེས་ཀྱི་མེད་པ་འདྲ་ད་དུང་ཁོག་ལ་གདོན་བཞུག་འདུག་མཁན་ཁ་ཤས་ནས་༧གོང་ས་མཆོག་ལ་མཚན་སྨད་བྱེད་པ་དང་དེའི་བཀའ་གསུང་མི་བརྩི་བ་དེ་འདྲ་མཐོང་ན་ངོ་མ་བློ་ཕམ་ནི་ཞིག་རེད་གང་ལྟར་བཀའ་དྲིན་ཆེ་སྒྱུར་རྩོམ་འདི་སྤེལ་མཁན་དང་དུས་བབས་ཚང་བཀྲིན་ཆེ་ཞུ།