སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་ངོ་བོ་སྲུང་སྐྱོབ་ཆེད་དང་པོར་བོད་སྐད་ཡག་པོ་སྦྱོང་ཐུབ་ན་བསམ་པའི་ཐོག་ནས་ཀློག་དེབ་འདི་དག་རྩོམ་སྒྲིག་དཔར་བསྐྲུན་བྱས་པ་ཡིན་སྐོར་བརྗོད་སོང་།
དེ་རིང་སྔོ་དྲོའི་ཆུ་ཚོད་ ༡༡ སྟེང་གངས་སྐྱིད་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་དང་བྱང་ཨ་རིའི་སྐུ་ཚབ་དོན་གཅོད་གཉིས་མཉམ་འབྲེལ་ཐོག་ནས་གཟའ་མཇུག་སློབ་གྲྭའི་སྔོན་འགྲོ་ནས་འཛིན་རིམ་གཉིས་པ་བར་གྱི་ཀློག་དེབ་གསུམ་འགྲེམས་སྤེལ་དབུ་འབྱེད་གནང་སོང་བ་དང་། སྐུ་མགྲོན་གཙོ་བོར་སྲིད་སྐྱོང་བློ་བཟང་སེང་གེ་མཆོག་དང་ཤེས་རིག་དྲུང་ཆེ་ངག་དབང་རབ་རྒྱས་ལགས་གཉིས་ཀྱི་གཙོས་པའི་བོད་སློབ་ཁག་གི་སློབ་སྤྱི་ཁག་ཅིག་དང་། ཤེས་ལྷན་གྱི་རྩོམ་སྒྲིག་པ་དང་ལས་བྱེད་ཁག་ཅིག་བཅས་ཕེབས་འདུག
མཛད་སྒོའི་ཐོག་མར་ཤེས་ལྷན་འགན་འཛིན་ཚེ་རིང་བསམ་གྲུབ་ལགས་ཀྱིས་གསར་དུ་རྩོམ་སྒྲིག་གནང་བའི་ཀློག་དེབ་སྐོར་ངོ་སྤྲོད་གནང་དོན། ང་ཚོ་བོད་རིགས་མང་པོ་ཞིག་ཨ་རི་གཙོས་པའི་ནུབ་ཕྱོགས་རྒྱལ་ཁབ་མང་པོ་ཞིག་ནང་རྟེན་གཞི་བྱས་ཡོད་པ་རེད། ཡིན་ནའང་སོ་སོའི་སྐད་ཡིག་དང་རིག་གཞུང་ག་རེ་ལ་ཡིན་ནའང་ཚང་མས་དོ་སྣང་ཤུགས་ཆེན་གནང་གི་ཡོད་པ་རེད། དཔེ་མཚོན་ཞིག་བཞག་པ་ཡིན་ན། ཁོང་ཚོར་བདུན་ཕྲག་གཅིག་ནང་ཉིན་གཉིས་ཀྱི་གུང་སེང་ཡོད་པ་དང་། ཉིན་གཉིས་དེའི་རིང་ལ་ཕ་མ་ཚོས་སོ་སོའི་བུ་ཕྲུག་གཟའ་མཇུག་སློབ་གྲྭ་ལ་བཏང་ནས་བུ་ཕྲུག་ལ་སློབ་སྦྱོང་སྤྲོད་རྒྱུ་དང་། ཕ་མ་ཡིན་ནའང་བུ་ཕྲུག་སློབ་གྲྭར་སྐྱེལ་བ་སོགས་ཀྱི་སྐུ་ངལ་མང་པོ་ཞེ་དྲགས་ཤིག་སྐྱོན་གྱི་ཡོད་པ་དང་། དེའི་ནང་ནས་ནེའུ་ཡོག་དང་མེ་ནི་སོ་ཊ་གྱི་ཁུལ་གཟའ་མཇུག་སློབ་གྲྭ་ནི་རྒྱ་ཆེན་པོའི་གྲས་ཡིན་ལ། དེ་རུ་བུ་ཕྲུག་འཕོན་ཆེན་པོ་ཡོད་པ་དང་འཛིན་གྲྭ་བརྒྱད་པ་བར་དུ་ཡོད་པ་རེད། དེ་ཚོའི་གྲས་ཀྱིས་དཀའ་ལས་རྒྱག་སྟངས་དེ་ཚོ་མཐོང་བ་ཡིན་ན་དངོས་གནས་ཡིད་སྨོན་སྐྱེས་དགོས་པའི་གནས་སྟངས་ཤིག་ཆགས་འདུག དེར་བརྟེན་ཤེས་རིག་ལས་ཁུངས་ཀྱི་ངོས་ནས་ཕྱི་ལོ་ ༢༠༡༢ ལོར་ཕྱི་རྒྱལ་ཁག་ཏུ་རྟེན་གཞི་བྱས་པ་ཆ་ཚང་ལ་སྤྱི་འགྲོས་གཅིག་མཚུངས་ཞིག་བྱུང་ན་བྱུང་བའི་འཆར་གཞི་ཞིག་བཟོས་ཡོད་ཀྱང་། སུད་སི་དང་ཨོ་སི་ཊོ་ལི་ཡ། སྦེལ་ཇམ། དེ་བཞིན་ཨ་རི་སོགས་ས་ཁུལ་མི་འདྲ་བར་སོ་སོའི་བསམ་ཚུལ་མི་འདྲ་བ་སྟེ་ཀློག་དེབ་གང་མང་མང་ཡོད་ན་ཡག་པོ་ཡོད་པའི་བསམ་ཚུལ་བྱུང་སྟབས། ཨ་རིའི་ཁུལ་འདྲ་བོ་ཞིག་ཡིན་ན། ཕྱི་ལོ་ ༢༠༠༨ ལོར་པདྨ་འབུམ་སོགས་ཆེད་ལས་མཁས་པ་མང་པོ་ཞིག་གིས་བསླབ་གཞི་རྩ་འཛིན་ཞིག་ཁོ་རང་ཚོས་བསྒྲིགས་ཡོད་པ་དང་། ཕྱི་ལོ་ ༢༠༡༢ ལོར་ཁོང་ཚོས་ནེའུ་ཡོག་ཏུ་ཚོགས་འདུ་ཚོགས་པའི་སྐབས་ནས་བཟུང་ཀློག་དེབ་འཁྲིད་རྒྱུ་མགོ་བཙུགས་གནང་འདུག ཕྱི་ལོ་ ༢༠༡༤ ལོར་ང་རང་བྱང་ཨ་རིའི་ཚོགས་འདུར་བཅར་བའི་གོ་སྐབས་བྱུང་། སྐབས་དེར་གང་འཚམ་ཞིག་འགྲུབ་སྟེ་གོ་བསྡུར་གནང་སོང་། གོ་བསྡུར་བྱས་པ་ནང་བཞིན་མཐའ་མའི་གྲོས་ཆོད་ནང་ལ་ཁོ་ཚོའི་ཀློག་དེབ་ཚང་མ་བསྒྲུབ་པ་དང་མཉམ་དུ་ཤེས་རིག་ལས་ཁུངས་ལ་ཕུལ་བ་དང་། ཤེས་རིག་ལས་ཁུངས་ནས་མཐའ་མའི་གཏན་འབེབས་གནང་བ་ཞིག་ཆགས་ཡོད་པ་རེད། ཅེས་དང་། འཛིན་རིམ་དྲུག་པ་བདུན་པ་བརྒྱད་པ་བཅས་ཀྱི་བོད་ཡིག་ཀློག་དེབ་སྒྲིག་བཞིན་པ་ཡིན་ལ། ད་ལོའི་ཕྱི་ཟླ་ ༩ བར་དུ་ཀློག་དེབ་ཆ་ཚང་འགྲུབ་ཐུབ་པའི་འཆར་གཞི་ཡོད་སྐོར་སོགས་བརྗོད་སོང་།
སྐུ་མགྲོན་གཙོ་བོ་བློ་བཟང་སེང་གེ་མཆོག་ནས་ཀློག་དེབ་དང་འབྲེལ་བའི་གསུང་བཤད་གནང་དོན། ཤེས་རིག་ལས་ཁུངས་ཀྱི་འགན་གཙོ་བོ་དེ་མཐུན་རྐྱེན་འབྱོར་རྒྱུ་དེ་རེད། རྒྱ་ཆེ་ས་ནས་ཡིན་ནའང་། ང་ཚོས་དུས་ལྟར་ཞུས་བསྡད་ཡོད་པ་ལྟར། རྒྱ་ནག་གཞུང་གི་དམིགས་ཡུལ་གཙོ་བོ་དེ་བོད་སྐད་རྒྱ་སྐད་དུ་བསྒྱུར་རྒྱུ་དང་བོད་རིགས་རྒྱུ་རིགས་སུ་བསྒྱུར་རྒྱུ་དེ་ཡིན་པ་དང་། ཕྱོགས་གཅིག་ནས་ཁོ་རང་ཚོས་སྲིད་བྱིས་དེ་འདྲ་སྤེལ་ནས་བོད་ཡུལ་རྒྱ་ཡུལ་དུ་བསྒྱུར་ཐབས་སུ་འབོད་བརྩོན་ཞེ་དྲགས་གནང་གི་ཡོད་པ་རེད། མེ་འཁོར་ལྕགས་ལམ་དང་གཞུང་ལམ། གནམ་ཐང་སོགས་བཟོས་ཏེ་རྒྱ་མི་མང་པོ་བོད་ལ་ཡོང་ནས་རང་བཞིན་གྱིས་བོད་མི་ཚོ་སོ་སོའི་རྒྱལ་ཁབ་ནང་གྲངས་ཉུང་མི་རིགས་བཟོ་ཐབས་སུ་འབད་བརྩོན་བྱེད་ཀྱིན་ཡོད་པ་རེད། ཐོག་མ་ནས་རྒྱ་ནག་གཞུང་གི་དམིགས་ཡུལ་གཏིང་ཟབ་ཤོས་དང་ནག་ཤོས་དེ་བོད་པའི་ཆོས་རིག་གཞུང་སྐད་ཡིག་ལ་གཏོར་བཤིག་བཏང་སྟེ་མེད་པ་བཟོ་ཐུབ་པ་ཡིན་ན། བོད་རིགས་རྒྱ་རིགས་ཆགས་འགྲོ་བ་དང་དེ་ཁོ་ཚོའི་དམིགས་ཡུལ་གཙོ་བོ་ཡིན་པ་བཤད་མ་དགོས་པ་རེད། དེའི་སྐོར་ཀུན་གཟིགས་པཎ་ཆེན་རིན་པོ་ཆེ་མཆོག་གི་ཡིག་འབྲི་ཁྲི་བདུན་གྱི་ཡིག་ཆའི་ནང་གཟིགས་པ་ཡིན་ན། རིག་གནས་གསར་བརྗེ་འགོ་བཙུགས་སྔོན་ནས་ཕྱི་ལོ་ ༡༩༦༢ བར་བོད་ནང་གི་དགོན་སྡེ་བརྒྱ་ཆ་གོ་བརྒྱད་གཏོར་བཤིས་བཟོས་ཚར་བ་རེད་ཅེས་ཀུན་གཟིགས་པཎ་ཆེན་རིན་པོ་ཆེས་མའོ་ཙེ་ཏུང་ལ་ཕུལ་བའི་ཡིག་འབྲི་ཁྲི་བདུན་ཡོད་པའི་སྙན་ཐོའི་ནང་འཁོད་བཞག་ཡོད་པ་རེད། རྒྱ་ནག་གཞུང་གིས་ཐོག་མ་ནས་དམར་པོའི་ལྟ་བ་ཁྱེར་ཡོང་དུས་སྐབས་ནས་དགོན་སྡེ་ཁག་གཏོར། རིག་གནས་ཁང་ཁག་གཏོར། བོད་སྐད་ཡིན་ནའང་རིག་གནས་བརྗེ་སྐབས་སུ་གོ་སྤྱོད་མི་ཆོག་པའི་དམ་དྲགས་ཤུགས་ཆེན་བྱས་ཏེ་རྒྱ་སྐད་བཤད་པ་དང་རྒྱ་ཆས་གྱོན་དགོས་པ་རེད། དེས་ག་རེ་སྟོན་ཡོད་པ་རེད་ཟེར་ན། བོད་རིགས་རྒྱ་རིགས་སུ་བསྒྱུར་ཐུབ་པ་ཡིན་ན། བོད་ཀྱི་རྩ་དོན་རྩ་བ་ནས་བརླག་འགྲོ་གི་ཡོད་པ་རེད། ཁོ་རང་ཚོས་དམིགས་ཡུལ་དེ་བཟུང་ནས་འདས་པའི་ལོ་ ༦༠ ནང་ལག་བསྟར་གནང་བཞིན་པ་རེད་དེ། ད་ལྟ་ཡིན་ནའང་ཁོ་རང་ཚོའི་དམིགས་ཡུལ་ལ་ལམ་ལྷོང་མ་ཡོང་བའི་རྒྱུ་མཚན་དེ། བོད་ཕྱི་ནང་གཉིས་ཀྱི་བོད་མི་ཚོས་སྐུ་ལས་བསྐྱོན་པ་དང་། བཙན་བྱོལ་དུ་ཡིན་ནའང་སྔོན་མ་བོད་ནང་དུ་གཏོར་བཤིས་བཏང་བའི་དགོན་སྡེ་ཁག་བསྐྱར་གསོ་བྱས་པ་དང་། ནང་ཆོས་ཡིན་ནའང་ཉེ་བའི་ཆར་དར་རྒྱས་ཆེན་པོ་ཞེ་དྲགས་ཕྱིན་ཡོད་པ་རེད་ལ། རིག་གཞུང་གི་ཐོག་ནས་ཡིན་ནའང་བཙན་བྱོལ་ནང་བསྐྱར་གསོ་བྱས་ཏེ་གང་ཐུབ་ཅི་ཐུབ་ཀྱིས་མི་ཉམས་གོང་འཕེལ་གཏོང་བསྡད་པ་རེད། དེ་བཞིན་བོད་སྐད་ཀྱི་ཐོག་ནས་ང་ཚོས་ཤེས་ཡོན་སྲིད་བྱུས་དང་འབྲེལ་བའི་སྤྱི་ཡོངས་ནས་ཡར་རྒྱས་གཏོང་བསྡད་ཡོད་པ་རེད། ཅེས་དང་།
ཁོང་གིས་མུ་མཐུད། དུས་རྒྱུན་ང་ཚོའི་འཐབ་རྩོད་ལ་འདི་ལྟར་ཞུས་བསྡད་ཡོད། ཕྱོགས་གཅིག་ནས་ང་ཚོ་བོད་མི་ཡིན་པའི་ངོ་བོ་དེ་མ་བརླག་པའི་ཐོག་ནས་བོད་མིའི་ཆོས་མཐོང་དགོས་ཀྱི་ཡོད་པ་རེད། ཆོས་མཐོང་འཐོབ་པར་ང་ཚོས་རང་གི་སྐད་ཡིག་རིག་གཞུང་གི་རང་དབང་དང་། འགྲོ་བ་མིའི་ཐོབ་ཐང་དང་ཁོར་ཡུག་གི་ཐོབ་ཐང་སོགས་བརྩོན་ལེན་དགོས་ཀྱི་ཡོད་པ་རེད། བོད་མི་ཡིན་པའི་ངོ་བོ་བརླག་པ་ཡིན་ན། བོད་རྒྱལ་ཁབ་བརླག་འགྲོ་གི་རེད་ལ། ཆོས་རྒྱལ་མེས་དབོན་རྣམ་གསུམ་རྗེས་སུ་སྐུ་ལས་བསྐྱོན་པའི་བོད་རྒྱལ་ཁབ་དང་བོད་སྐད་ཡིག་རིག་གཞུང་འཛམ་བུ་གླིང་ལ་ངོམ་ཆོག་པ་དེ་བརླག་འགྲོ་གི་ཡོད་པ་རེད། དེར་བརྟེན་ང་ཚོས་དུས་ལྟར་བོད་རིགས་ཀྱི་ངོ་བོ་དང་བོད་པའི་ཆེས་མཐོང་རྩ་དོན་དུ་བཟུང་ནས་བརྩོན་ལེན་བྱེད་ཀྱིན་ཡོད་པ་རེད། བཙན་བྱོད་བོད་མི་ཚོར་རང་བཞིན་གྱི་དཀའ་ངལ་འཕྲད་ཀྱི་ཡོད་པ་རེད། རྒྱ་གར་ནང་ཡིན་ན་བོད་མིའི་གཞིས་ཆགས་ཁག་དང་ཁོར་ཡུག་ཅིག་ཡོད་སྟབས་ད་དུང་ཅུང་ཡག་པོ་ཡོད་རེད། བོད་ཀྱི་ཆོས་སྐད་ཡིག་རིག་གཞུང་ལ་རང་བཞིན་གྱིས་དགོན་སྡེ་སློབ་གྲྭ་གཞས་ཆགས་ཁག་ནས་སྲུང་སྐྱོབ་དར་སྤེལ་གཏོང་ཐུབ་ཀྱི་ཡོད་པ་རེད། ཕྱི་རྒྱལ་དུ་ཡོད་མཁན་ཚོར་རང་བཞིན་གྱིས་དཀའ་ངལ་ཞིག་ཡོད་པ་རེད། ཁོ་ཚོར་དུས་ཚོད་དང་ཁོར་ཡུག་ཐོག་དཀའ་ངལ་འཕྲད་ཀྱི་ཡོད་སྟབས། གཟའ་སྤེལ་པའི་ཉིན་གྲོས་བྱས་ཏེ་ཁོ་རང་ཚོ་སོ་སོ་བོད་རིགས་ཡིན་པའི་ངོ་བོ་མ་བརླག་པ་ཡོང་ཐབས་སུ་བོད་ཀྱི་སྐད་ཡིག་རིག་གཞུང་སྤྱོང་དགོས་ཀྱི་ཡོད་སྟབས། ད་ལན་ང་ཚོས་ཀློག་དེབ་འདི་འདྲ་གསུམ་དང་། ཀློག་དེབ་གསུམ་ནས་བརྒྱད་པའི་བར་ཆ་ཚང་ལབ་ཐུབ་པ་ཡིན་ན། ང་ཚོས་ཕྱི་རྒྱལ་དུ་ཡོད་མཁན་གཞོན་སྐྱེས་ཚོ་ཏན་ཏན་རིག་གནས་དང་ཕྱག་ལས་ཐོག་མཆོག་ཏུ་གྱུར་བ་ཡོང་བའི་རེ་བ་བྱེད་ཀྱི་མེད་ནའང་། བོད་ཀྱི་ངོ་བོ་སྲུང་སྐྱོབ་ཆེད་དུ་དང་པོར་བོད་སྐད་ཡག་པོ་སྦྱོང་ཐུབ་ན་བསམ་པའི་ཐོག་ནས་ཀློག་དེབ་འདི་དག་དཔར་བསྐྲུན་བྱས་པ་རེད། ཅེས་གསུངས་སོང་།
གསར་འགོད་པ། པདྨ་རྒྱལ།
ལོ་གཉིས་ཙམ་གོང་ནས་ཤེས་རིག་ལས་ཁུངས་ཀྱིས་བྱིས་སྒྲུང་འབྲི་རྩོམ་འགྲན་སྡུར་གསལ་བསྒྲགས་ཤིག་བཀོད་སྒྲིག་གནང་བ་ལྟར་དེའི་ནང་འཛུལ་ཞུགས་བྱས་མཁན་ཧ་ལམ་མི་བརྒྱ་མ་ཟིན་ཙམ་བྱུང་འདུག མི་དེ་དག་ཁྲོད་ནས་བྱིས་སྒྲུང་འབྲི་མཁན་རྩེ་དྲག་མི་བཅུ་གཉིས་བདམས་ཏེ་ལྡི་ལི་ཆེས་མཐོའི་གཙུག་ལག་སློབ་ཆེན་ནས་རྒྱ་གར་རྒྱལ་ཡོངས་ལ་གྲགས་ཆེ་བའི་བྱིས་སྒྲུང་ཁྱད་མཁས་སློབ་དཔོན་ཆེན་མོ་ལྕམ་ལ་ཏི་ཀ་གུབ་ཊ་ལགས་གདན་འདྲེན་ཞུས་ནས་བྱིས་སྒྲུང་འབྲི་མཁན་ཚོར་དེང་རབས་བྱིས་སྒྲུང་འབྲི་སྟངས་སྐོར་ལ་ཟབ་སྦྱོང་ཐེངས་ལྔ་ཙམ་སྤྲད་འདུག ཟབ་སྦྱོང་སྤྲད་རྗེས་བྱིས་སྒྲུང་འབྲི་མཁན་ཚོས་བྱིས་སྒྲུང་དེབ་ཕྲེང་བཞི་བཅུ་ཙམ་བྲིས་ཡོད་ས་རེད། ཤེས་རིག་བཀའ་བློན་མཆོག་ནས་ཐེངས་མང་པོར་གསུང་བཤད་གནང་སྐབས་བྱིས་སྒྲུང་དེབ་ཕྲེང་གསར་པ་བཞི་བཅུ་པར་སྐྲུན་བྱེད་ལ་ཉེ་བ་ཡོད་ཅེས་གསུངས་སོང་། བྱིས་སྒྲུང་དེབ་ཕྲེང་བཞི་བཅུ་བྲིས་ནས་ལོ་གཉིས་ཙམ་འགོར་བཞིན་ཡོད་ནའང་། བློ་ཕམ་པ་ཞིག་ལ་ད་དུང་བྱིས་སྒྲུང་དེབ་དེ་དག་ང་ཚོའི་མིག་གི་མཐོང་ཆོས་སུ་གྱུར་མེད། དེབ་དེ་དག་ད་དུང་པར་སྐྲུན་མ་བྱས་པའི་རྒྱུ་མཚན་ཅི་ཡིན་ནམ།
དུས་རྟག་ཏུ་སྲིད་སྐྱོང་མཆོག་གིས་གསུང་བཤད་གང་ཞིག་གནང་བ་ཡིན་ན་རེད། ལྷག་པར་བོད་ཀྱི་ལོ་རྒྱུས་སྐོར་གྱི་གཏམ་བཤད་དང་དེའི་སྐོར་གསར་འགོད་པ་ཚོ་ལ་གླེང་མོར་གནང་བ་ཡིན་ན་ངེས་པར་ཐུགས་བསམ་གཏོང་དགོས་པ་ཞིག་རེད་གང་ཡིན་ཞེ་ན་འདས་པའི་ནང་གསུང་ནོར་བྱུང་ནས་སྤྱི་ཚོགས་ཐོག་གང་བྱུང་སྐྱོན་བརྗོད་གནང་མཁན་བྱུང་བ་རེད་དེ་ཡང་དངོས་ཡོདགནས་ཚུལ་ཞིག་ཡིན་ཙང་བརྗོད་པ་རེད་དེ་འདྲ་སོང་ཙང་ངེས་པར་སྲིད་སྐྱོང་མཆོག་གིས་ཧམ་བཤད་མི་བྱེད་རྒྱུ་གལ་ཆེན་རེད།
ཕྱི་ལོ་༡༩༦༢ ལོའི་བར་རིག་གནས་གསར་བརྗེ་ཞིག་བྱུང་མྱོང་ཡོད་པ་མ་རེད། སྲིད་སྐྱོང་གིས་དེ་ལྟར་གསུངས་ཡོད་ནའང་ནོར་བཅོས་བྱས་ན་ཡག་པོ་ཡོད་པ་རེད། ལོ་རྒྱུས་ཡིག་ཆ་ཁག་དང་དོན་དངོས་གནས་ཚུལ་ལ་གསལ་བོ་ཡོད་པ་རེད།
སྔོན་ཆད་ཀྱང་རྒྱལ་སྤྱིའི་ལྡིང་ཆ་གལ་ཆེན་གྱི་ཐོག་ནས་བོད་རང་བཙན་ལྡན་པའི་རྒྱལ་ཁབ་ཅིག་གི་ངོ་བོར་གནས་མྱོང་མེད་ཚུལ་བཤད་པ་རེད།
དེ་རྗེས་དྷ་སར་འཚོགས་པའི་ཕ་མའི་ཚོགས་ཆེན་སྐབས་སུའང་བོད་ས་ཁུལ་དུ་དགུན་ཁ་རྒྱ་རིགས་ཉུང་བ་ཡོད་པ་དང་དབྱར་ཁར་རྒྱ་རིགས་མང་ཡོད་སྐོར་དོན་དངོས་གནས་ཚུལ་དང་གཏན་ནས་མི་མཐུན་པ་དེ་འདྲ་གསུངས་ཡོད་པ་རེད། སྲིད་སྐྱོང་ངོས་ནས་ལོ་རྒྱུས་དང་དངོས་ཡོད་གནས་ཚུལ་མཁྱེན་གྱི་མེད་ནའང་། ཤེས་མཁན་ཚོས་དུས་ཐོག་ལ་ནོར་བཅོས་མ་བྱས་ཚེ། ནོར་སྐྱོན་ཆེན་པོ་ཡོང་བའི་ཉེན་ཁ་འདུག་སྙམ།
ཕྱི་ལོ་༡༩༥༨ ནས་ཕྱི་ལོ་༡༩༦༢ བར་མདུན་མཆོང་ཆེན་མོ་ཟེར་བའི་ལས་འགུལ་གྱི་དུས་རེད། ཕྱི་ལོ་༡༩༦༦ ནས་༡༩༧༦ བར་མོའོ་ཙེ་ཏུང་མ་ཤི་བར་གྱི་ལོ་བཅུའི་རིང་ལ་རིག་གནས་གསར་བརྗེ་བྱུང་བ་རེད།