ཐའེ་ཝན་རང་བཙན་གྱི་དྲག་ཤུགས་ལ་མཐའ་གཅིག་ཏུ་ཁ་གཏད་གཅོག་ངེས་ཡིན་ཟེར།

དེ་རིང་རྒྱ་ནག་དམར་ཤོགས་ཚོགས་པའི་དུས་ཆེན་སྟེང་སྲིད་འཛིན་ཞི་ཅིན་ཕིན་གྱིས་རྒྱ་ནག་གིས་དོ་འཁུར་དང་ཡིད་གཟབ་བྱེད་དགོས་ས་གཙོ་བོ་རྒྱལ་ནང་གི་ལྐོག་ཟ་རུལ་སུངས་དང་། རྒྱལ་སྲུང་བདེ་འཇགས་དང་ལྷོ་རྒྱུད་མཚོ་ཁུལ་གྱི་གནད་དོན། ཐའེ་ཝན་རང་བཙན་གནད་དོན་སོགས་ཡིན་སྐོར་བརྗོད་འདུག

རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཕྱི་ཟླ་ ༧ པའི་ཚེས་ ༡ སྟེ་རྒྱ་ནག་དམར་ཤོག་ཚོགས་པ་བཙུགས་ཏེ་མི་ལོ་ ༩༥ ལོན་པའི་མཛད་སྒོའི་སྟེང་། རྒྱ་ནག་གི་སྲིད་འཛིན་ཞི་ཅིན་ཕིན་གྱིས་གཏམ་བཤད་སྤེལ་ཏེ། རྒྱ་ནག་དམར་ཤོག་ཚོགས་པའི་དབང་སྒྱུར་སྲིད་ཇུས་ཀྱི་འཇིག་ཉེན་གཙོ་བོ་རྒྱ་ནང་གི་ལྐོག་ཟ་རུལ་སུངས་ཡིན་པ་དང་། དམར་ཤོག་ཚོགས་པའི་དབང་འཛིན་དཔོན་རིགས་ཚོས་ནང་ཁུལ་གྱི་ལྐོག་ཟ་རུལ་སུངས་མཁན་ཚོར་ཞིབ་བཤེར་དང་ཁྲིམས་ཆད་ནན་མོ་གཅོད་དགོས་པ་ལས་བཟོད་བསྲན་དང་སྦེད་སྐུང་རིགས་གཏན་ནས་བྱ་རུང་བའི་འགྱུར་མེད་དམ་བཅའ་དགོས། ཞེས་བརྗོད་འདུག

ཁོས་མུ་མཐུད་དུ། རྒྱ་ནག་ནི་དོན་མེད་ལ་དཀའ་རྙོག་བཟོ་མཁན་ཞིག་མིན་པ་དང་། ནུབ་གླིང་རྒྱལ་ཁབ་ཚོས་རྒྱ་ནག་གིས་རང་ཉིད་ཀྱི་ཁེ་ཕན་ཁོ་ན་གཉེར་བཞིན་པར་བསམ་མི་རུང་ལ། ནུབ་གླིང་རྒྱལ་ཁབ་ཁག་གིས་རྒྱ་ནག་གིས་རང་རྒྱལ་གྱི་མངའ་ཁོངས་བདག་དབང་དང་རྒྱལ་ཁབ་ཀྱི་བདེ་འཇགས། འཕེལ་རྒྱས་ཀྱི་ཁེ་ལས་བཅས་ལ་ཐེབས་པའི་གནོན་སྐྱོན་དེ་དུས་ནམ་ཡང་བློས་གཏོང་མི་སྲིད་པ་ཤེས་དགོས་ཞེས་དང་། ཐའེ་ཝན་གྱི་རང་བཙན་རྩོད་རྙོག་སྐོར་ལ་ཁོས། ང་ཚོས་ཐའེ་ཝན་རང་བཙན་གྱི་དྲག་ཤུགས་ལ་མཐའ་གཅིག་ཏུ་ཁ་གཏོད་གཅོག་ངེས་ཡིན། རྒྱ་རིགས་ཐེར་འབུམ་ ༡.༣ དང་རྒྱ་ནང་གི་མི་རིགས་ཁག་ཚང་མས་དུས་ནམ་ཡང་གཞན་གྱི་མེས་རྒྱལ་ཁ་བྲལ་གྱི་ལས་འགུལ་ལ་མོས་མཐུན་བྱ་མི་སྲིད་སྐོར་བཤད་འདུག

གནས་ཚུལ་ལྟར་ན། རྒྱ་ནག་དམར་ཤོག་ཚོགས་པ་བཙུགས་ཏེ་ལོ་ ༩༥ ལོན་པའི་མཛད་སྒོའི་ཐོག སྲིད་བློན་ལིས་ཁི་ཆང་དང་། ཀྲང་ཏི་ཅང་། ཡུས་ཀྲིན་ཧྲིན། ལིག་ཡུན་ཧྲན། ཝང་ཆི་ཧྲན། ཀྲང་ཀའོ་ལིས་སོགས་ཏང་དང་རྒྱལ་ཁབ་ཀྱི་དབང་འཛིན་དཔོན་རིགས་ཚོ་དང་། ཀྲུང་གུང་ཀྲུང་དབྱང་དང་རྒྱལ་ཡོངས་དམངས་ཆེན་རྒྱུན་ལས་ཨུ་ཡོན་ལྷན་ཁང་། རྒྱལ་སྲིད་སྤྱི་ཁྱབ་ཁང་དང་ཆེས་མཐོའི་མི་དམངས་ཁྲིམས་ཁང་། ཆེས་མཐོའི་མི་དམངས་ཞིབ་དཔྱོད་ཁང་དང་རྒྱལ་ཡོངས་སྲིད་གྲོས། ཀྲུང་དབྱང་དམག་དོན་ཨུ་ཡོན་ལྷན་ཁང་བཅས་ཀྱི་དབང་འཛིན་དཔོན་རིགས་དང་ལས་རིགས་སོ་སོའི་མི་གྲངས་སུམ་སྟོང་ལྷག་མཉམ་ཞུགས་བྱས་ཡོད་འདུག

འདས་པའི་མི་ལོ་ ༣ ནང་རྒྱ་ནག་གི་སྲིད་འཛིན་ཞི་ཅིན་ཕིན་གྱི་དབང་སྒྱུར་སྲིད་ཇུས་ཀྱི་དམིགས་འབེན་གཙོ་བོ་རྒྱ་ནང་གི་ལྐོག་ཟ་རུལ་སུངས་གཙང་བཤེར་ལས་འགུལ་ལ་བརྟེན་ནས་དམར་ཤོག་ཚོགས་པ་ནང་ཁུལ་གྱི་གནད་ཡོད་དཔོན་རིགས་ཚོར་གཉའ་གནོན་འཇིགས་སྐུལ་གཏོང་རྒྱུ་དང་། རྒྱ་ནག་གི་མངའ་ཁོངས་སུ་གླེང་བའི་ས་ཁུལ་ཁག་བདག་འཛིན་བྱེད་རྒྱུ། ལྷག་པར་དུ་ལྷོ་ཤར་ཨེ་ཤེ་ཡ་དང་ནུབ་གླིང་རྒྱལ་ཁབ་ཁག་གི་ཚོང་ལམ་དང་རྡོ་སྣུམ། མཚོ་ནང་གི་དངོས་རིགས་སོགས་ཀྱི་ཐོན་ཁུངས་གཙོ་བོ་རྒྱ་ནག་གི་ལྷོ་རྒྱུད་མཚོ་ཁུལ་ཁག་བདག་འཛིན་བྱ་ཐབས་སུ། མཚོ་ཁུལ་དེ་དག་ནང་དྲག་ཆས་དམག་དཔུང་གི་རྟེན་གཞི་འཛུགས་རྒྱུ་སོགས་ཡིན་འདུག

གསར་འགོད་པ། པདྨ་རྒྱལ་གྱིས་བསྒྱུར་སྒྲིག་བྱས།