རྒྱ་ནག་གཞུང་གིས་རྒྱལ་ཁབ་གཅིག་ལམ་ལུགས་གཉིས་ཀྱི་རྩ་འཛིན་དང་གྲོས་ཆོད་རྩིས་མེད་བཏང་སྟེ་མི་མང་གི་མངོན་འདོད་ལ་དྲག་ཤུགས་ཁོ་ན་བཀོལ་སྟབས། རྒྱ་ཆེའི་མི་མང་གིས་ཞི་བའི་རྔམ་སྟོན་ཁྲོམ་སྐོར་བྱས་འདུག
ཁ་སང་ནི་ཕྱི་ལོ་ ༡༩༩༧ ལོའི་ཟླ་ ༧ ཚེས་ ༡ ཉིན་ཏེ་དབྱིན་ཇིའི་གཞུང་གིས་ཧོང་ཀོང་གི་བདག་དབང་ཕྱིར་རྒྱ་ནག་ལ་རྩིས་སྤྲད་དེ་མི་ལོ་ ༡༩ ལོན་པའི་ཉིན་མོ་ཡིན་སྟབས། ཉིན་དེའི་ཕྱི་དྲོར་མི་མང་སྟོང་ཕྲག་མང་པོ་ཧོང་ཀོང་གྲོང་ཁྱེར་གྱི་རྒྱ་ནག་གཞུང་གི་ལས་ཁུངས་ཁག་གི་སྒོ་ཁར་འདུ་འཛོམས་གནང་སྟེ། ཧོང་ཀོང་ལ་རང་དབང་དང་དམངས་གཙོ་དགོས་པའི་རྔམ་སྟོན་ཁྲོམ་སྐོར་བྱས་ཡོད་པ་དང་། རྒྱ་ནག་གཞུང་གིས་དེ་སྔོན་ཧོང་ཀོང་གྲོང་ཁྱེར་དབྱིན་ཇིའི་ལག་ནས་རྩིས་ལེན་སྐབས་ཧོང་ཀོང་ལ་རང་སྲིད་རང་སྐྱོང་གི་བདག་དབང་སྤྲོད་རྒྱུ་མ་ཟད། “རྒྱལ་ཁབ་གཅིག་ལ་ལམ་ལུགས་གཉིས” ཀྱི་རྩ་འཛིན་འོག་ཧོང་ཀོང་མི་མང་གི་རང་དབང་ལ་འགན་སྲུང་ཁག་འཁུར་བྱས་ཡོད་པ་ལག་བསྟེར་དགོས་པ་དང་། ད་ལྟའི་ཧོང་ཀོང་གི་གཞུང་འཛིན་པ་ལིང་ཁྲུན་ཡེན་ (Leung Chun-ying) སྲིད་སྟེགས་ལས་འབབ་དགོས་པ་སོགས་ཀྱི་དགོས་འདུན་བཏོན་ཡོད་འདུག
ཧོང་ཀོང་གི་འགྲོ་བ་མིའི་ཐོབ་ཐང་དོན་གཉེར་བ་རྗ་ཀེ་ཧོང་ (Jackie Hung) ཟེར་བ་ཞིག་གིས། ཐེངས་འདིའི་རྔམ་སྟོན་ཁྲོམ་སྐོར་ཐོག་ཧོང་ཀོང་མི་མང་འབུམ་གཅིག་ལྷག་མཉམ་ཞུགས་བྱས་ཡོད་པ་དང་། མི་མང་གིས་ད་ལྟའི་ཧོང་ཀོང་གྲོང་ཁྱེར་གྱི་ཆབ་སྲིད་འཛིན་སྐྱོང་ལ་མི་འདོད་པའི་རྣམ་འགྱུར་ཤུགས་ཆེན་བསྟན་ཡོད་སྐོར་བརྗོད་འདུག
ཧོང་ཀོང་གྲོང་ཁྱེར་གྱི་ཉེན་རྟོག་པས་མི་མང་གི་ངོས་ནས་ངོ་རྒོལ་འདུ་འཛོམས་ཀྱི་ཆོག་མཆན་ཞུས་མེད་སྟབས། ཐེངས་འདིའི་རྔམ་སྟོན་ཁྲོར་སྐོར་དེ་ནི་ཧོང་ཀོང་གྲོང་ཁྱེར་གྱི་དཀའ་རྙོག་སེལ་ཐབས་ལས་ལྡོག་སྟེ་ཁྲིམས་འགལ་གྱི་བྱ་སྤྱོད་ཅིག་ཆགས་ཡོད་སྐོར་བརྗོད་འདུག
གཞན། ཧོང་ཀོང་གི་ཡུལ་མི་ཨེ་ཌི་ཝར་ཌི་ལིང་ (Edward Leung) ཟེར་བ་ཞིག་གིས། རྒྱ་ནག་གཞུང་གིས་ཧོང་ཀོང་གྲོང་ཁྱེར་གྱི་དཔེ་ཚོང་བ་ལམ་ཝེན་ཀུའུ་ (Lam Wing-kee) བཙན་ཁྲིད་བཀག་བསྐྱིལ་བྱས་པའི་གནད་དོན་དེས་ཧོང་ཀོང་མི་མང་ལ་དོ་ཕོག་ཆེན་པོ་བཟོས་ཡོད་པ་དང་། ད་རེབ་ཀྱི་ཧོང་ཀོང་མི་མང་གི་རྔམ་སྟོན་ཁྲོམ་སྐོར་འདིས་འཛམ་གླིང་ཡོངས་ལ་རྒྱ་ནག་གཞུང་གིས་ “རྒྱལ་ཁབ་གཅིག་ལ་ལམ་ལུགས་གཉིས” ཀྱི་རྩ་དོན་ལ་རྡོག་རོལ་བཏང་བར་གསལ་བརྡ་ཞིག་སྤྲད་པ་མཚོན་གྱི་ཡོད་སྐོར་བརྗོད་འདུག
གནས་ཚུལ་ལྟར་ན། ལོ་རེའི་ཕྱི་ཟླ་ ༧ པའི་ཚེས་ ༡ ཉིན། ཧོང་ཀོང་མི་མང་གིས་ཧོང་ཀོང་གི་བག་དབང་དབྱིན་ཇིའི་འོག་ཕྱིར་རྒྱ་ནག་གཞུང་ལ་རྩིས་སྤྲོད་བྱས་པའི་ཉིན་མོ་སྲུང་གཙི་བྱས་ཏེ། ཧོང་ཀོང་ལ་རང་དབང་དང་དམངས་གཙོའི་དགོས་འདུན་འདོན་གྱིན་ཡོད་ནའང་། རྒྱ་ནག་གཞུང་གིས་དེ་སྔའི་གྲོས་ཆོད་དང་རྩ་འཛིན་ཁག་རྩིས་མེད་བཏང་སྟེ་མི་མང་གི་མངོན་འདོད་ལ་འཇིགས་སྐུལ་དྲག་གནོན་བྱེད་ཀྱིན་ཡོད་འདུག
གསར་འགོད་པ། པདྨ་རྒྱལ།
