རྒྱ་ནག་གཞུང་གིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་དོ་འཁུར་གནང་མཁན་དབྱིན་ཇིའི་གཞས་མ་གྲགས་ཅན་ཇན་བྷིར་ཀིན་ལགས་ལ་ཐོངས་མཆན་མི་འདུག
དབྱིན་ཇིའི་གློག་བརྙན་འཁྲབ་སྟོན་པ་དང་གཞས་མ་གྲགས་ཅན་ཇན་བྷིར་ཀིན་(Jane Birkin )ལགས་ཀྱིས། ཟླ་འདིའི་ཕྱི་ཚེས་ ༩ ཉིན་རྒྱ་ནག་ཧྲང་ཧེ་གྲོང་ཁྱེར་དུ་རྗེས་དྲན་རོལ་དབྱངས་འདུ་འཛོམས་(Gainsbourg Symphonic )ཤིག་བསྡུ་འཆར་ཡོད་ཀྱང་། ཟླ་འདིའི་ཕྱི་ཚེས་ ༡ ཉིན་འབྲེལ་ཡོད་ནས་རྒྱ་ནག་གཞུང་ཚབ་ཁང་གིས་རྒྱུ་མཚན་གང་ཡང་མ་བཤད་པར་ཇན་བྷིར་ཀིན་ལགས་ལ་ཐོངས་མཆན་སྤྲད་མེད་པ་དང་། མོའི་ལས་རོགས་འགའ་ལ་ཐོངས་མཆན་རག་ཡོད་སྐོར་བརྗོད་འདུག
གོང་གི་གནད་དོན་དེའི་ཐད་རྒྱ་ནག་གི་སྤྱི་ཚོགས་ལས་འགུལ་བ་ཧུའུ་ཀྭ་ཡིས། རྒྱ་གཞུང་གིས་མོ་ལ་ཐོངས་མཆན་མ་སྤྲད་པ་དེར་རྒྱུ་རྐྱེན་གཉིས་ཡོད་པའི་དང་པོ་ནི། ཧྲང་ཧེ་ཡི་གླུ་གཞས་འཁྲབ་སྟོན་ཐོག་ཇན་བྷིར་ཀིན་ལགས་ཀྱིས་རྒྱ་གཞུང་གིས་ཁྲིམས་རྩོད་པ་ ༧༠༩ འཛིན་བཟུང་བཀག་ཉར་བྱས་པའི་གནད་དོན་དང་། ནོ་སྦེལ་ཞི་བདེའི་གཟེངས་རྟགས་ཐོབ་མཁན་ལོའུ་ཞོ་པའོ་བཙོན་འཇུག་དང་ཁོང་གི་བཟའ་ཟླ་བཟང་བཙོན་དུ་ཡོད་པ། དེ་བཞིན་འཆར་ལྡན་བུ་སྐྱེས་ཀྱི་གནད་དོན་སོགས་གླེང་བར་ཞེད་སྣང་བྱེད་ཀྱི་ཡོད་པ་དང་། རྒྱུ་རྐྱེན་གཉིས་པ་ནི་ནུབ་ཕྱོགས་ཀྱི་གློག་བརྙན་འཁྲབ་སྟོན་པ་དང་གཞས་པ་གཞས་མ། སྒྱུ་རྩལ་བ་ཚང་མར་འཁྲབ་སྟོན་གྱི་བརྗོད་གཞིའི་ནང་འགྲོ་བ་མིའི་ཐོབ་ཐང་སྐོར་འདྲུད་ཡོང་བ་ཡིན་ན། ཇན་བྷིར་ཀིན་ལྟར་རྒྱ་ནག་ནང་འཁྲབ་སྟོན་བྱེད་པར་ཐོངས་མཆན་སྤྲོད་རྒྱུ་མིན་པའི་བརྡ་ལན་སྤྲད་དེ། ར་བསད་ནས་ལུག་འདར་དུ་འཇུག་འདོད་པ་ཡིན་སྐོར་བརྗོད་འདུག
ཧྥ་རན་སིའི་གསར་ཁང་གིས་གནས་ཚུལ་སྤེལ་བ་ལྟར་ན། ཇན་བྷིར་ཀིན་ལགས་ནི་རྒྱལ་སྤྱིའི་ཉེ་ཡང་ཚོགས་པ་དང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་ཡིན་ལ། འདས་པའི་ལོ་ངོ་ ༤༠ ལྷག་གི་ནང་མོས་འཛམ་གླིང་སྤྱི་ཡོངས་ཀྱི་འགྲོ་བ་མིའི་ཐོབ་ཐང་ལ་དོ་ཁུར་གནང་ཡོད་པ་མ་ཟད། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་དོ་ཁུར་ཆེན་པོ་གནང་གི་ཡོད་པ་དང་། ཕྱི་ལོ་ ༢༠༠༨ ལོའི་པེ་ཅིན་ཨོ་རྩལ་འགྲན་ཚོགས་ཀྱི་དཔལ་འབར་སྐོར་སྐྱོད་སྐབས་ཧྥ་རན་སིའི་ནང་སྤེལ་བའི་ངོ་རྒོལ་ལས་འགུལ་ནང་དུའང་མོ་རང་མཉམ་ཞུགས་གནང་ཡོད་འདུག
ནུབ་ཕྱོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་པ་སྤྱི་དང་། ལྷག་པར་དུ་༧གོང་ས་སྐྱབས་མགོན་ཆེན་པོ་མཆོག་ལ་མཇལ་བཅར་དད་གུས་ཞུ་མཁན་དང་། བོད་དོན་ལ་རྒྱབ་སྐྱོར་གནང་མཁན་གློག་བརྙན་འཁྲབ་སྟོན་པ་དང་། གཞས་པ་གཞས་མ་གྲགས་ཅན་མང་པོ་རྒྱ་ནག་ནང་ཡོང་བར་བཀག་སྡོམ་བྱེད་བཞིན་ཡོད་པ་དཔེར་ན། ཉེ་ཆར་རང་ཨ་རིའི་གློག་བརྙན་འཁྲབ་སྟོན་པ་དང་གཞས་མ་གྲགས་ཅན་ལི་ཌི་གྷ་གྷ་ལགས་ཀྱིས། ༧གོང་ས་མཆོག་དང་ལྷན་དུ་ཞི་བདེ་དང་བཟང་སྤྱོད་གོང་སྤེལ་གཏོང་ཕྱོགས་སྐོར་ནས་བཀའ་འདྲི་བཀའ་ལན་གནང་བ་དེར། རྒྱ་ནག་ཕྱོགས་ནས་སྐྱོན་བརྗོད་ཤུགས་ཆེན་བྱས་ཏེ་ལི་ཌི་གྷ་གྷ་ལགས་དང་འབྲེལ་བའི་གནས་ཚུལ་རྣམས་རྒྱ་ནག་ནང་བཀག་སྡོམ་བྱས་ཡོད་པ་རེད།
གསར་འགོད་པ། པདྨ་མཚོ།
