རྒྱལ་སྤྱིའི་རང་དབང་ཚོགས་སྡེ་གསུམ་གྱིས་རྒྱ་ནག་གཞུང་གིས་བོད་དང་ཡུ་གུར། སོག་ཡུལ་བཅས་རྒྱ་ནག་ནང་གི་གྲངས་ཉུང་མི་རིགས་ལ་སྡུག་སྦྱོང་མནར་གཅོད་གཏོང་བཞིན་པ་མཚམས་འཇོག་དགོས་པའི་འབོད་སྐུལ་ཞུས་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ (fidh) ཀྱི་དྲ་ཚིགས་སྟེང་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༢ ནས་ ༡༣ བར་ཡུ་རོབ་མཐུན་ཚོགས་དང་རྒྱ་ནག་གཉིས་ཀྱི་ཚོང་དོན་ལྷན་ཚོགས་ཐེངས་ ༡༨ དེ་རྒྱ་ནག་རྒྱལ་ས་པེ་ཅིན་དུ་འཚོགས་བཞིན་ཡོད་པ་དང་བསྟུན་ཏེ། ཟླ་འདིའི་ཕྱི་ཚེས་ ༦ ཉིན་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ (ICT) དང་རྒྱ་ནག་ནང་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་ (HRIC)། རྒྱལ་སྤྱིའི་ཉེས་ཡངས་ཚོགས་པ་ (AI) བཅས་ཐུན་མོང་ནས་ཡུ་རོབ་མཐུན་ཚོགས་ཀྱི་དབུ་ཁྲིད་ཚོར་ཞུ་ཡིག་ཅིག་ཕུལ་བའི་ནང་། ཡུ་རོབ་མཐུན་ཚོགས་ཀྱི་དཔོན་རིགས་ཚོས་ཡུ་རོབ་མཐུན་ཚོགས་དང་རྒྱ་ནག་གཉིས་ཀྱི་ཚོང་དོན་ལྷན་ཚོགས་ཐེངས་ ༡༨ པའི་ཐོག་རྒྱ་ནག་ནང་གི་འགྲོ་བ་མིའི་ཐོབ་ཐང་གནད་དོན་ཐེར་འདོན་དགོས་སྐོར་བརྗོད་འདུག
ཞུ་ཡིག་དེའི་ནང་། ཡུ་རོབ་མཐུན་ཚོགས་ཀྱི་དཔོན་རིགས་ཚོས་རྒྱ་ནག་གཞུང་གི་དབང་འཛིན་དཔོན་རིགས་ཚོར་འགྲོ་བ་མིའི་ཐོབ་ཐང་དོན་གཉེར་བ་དང་ཁྲིམས་རྩོད་པ་ཚོ་འཛིན་བཟུང་བཙོན་འཇུག་དང་སྡུག་སྦྱོང་མནར་གཅོད་གཏོང་རྒྱུ་མཚམས་འཇོག་དང་། ཁོ་ཚོར་ཞི་བའི་ཐོག་ནས་མུ་མཐུད་ལས་དོན་སྒྲུབ་ཏུ་འཇུག་དགོས་པའི་འབོད་སྐུལ་བཏང་སྟེ། རྒྱ་ནག་ནང་གི་ཁྲིམས་ཀྱི་དབང་སྒྱུར་དང་། ཁྲིམས་རྩོད་པའི་ཁེ་དབང་དང་སྨྲ་བརྗོད་རང་དབང་སོགས་ཡར་རྒྱས་གཏོང་དགོས་པའི་འབོད་སྐུལ་ཞུ་དགོས་པ་མ་ཟད། ཡུ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་དང་དམངས་གཙོའི་རྩ་དོན་གཞིར་བཟུང་སྟེ་རྒྱ་ནག་ནང་འབྱུང་བཞིན་པའི་འགྲོ་བ་མིའི་ཐོབ་ཐང་དང་རང་བྱུང་ཁོར་ཡུག་ལ་གཏོར་བཤིག་བཟོ་བཞིན་པའི་གནད་དོན་ཐད་སྐྱོན་བརྗོད་དང་། རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་འཛིན་དང་ཁྲིམས་ཀྱི་དབང་སྒྱུར་ལ་བརྩི་འཇོག་དགོས་པའི་འབོད་སྐུལ་ཞུ་དགོས། ཞེས་སོགས་བཀོད་འདུག
རྒྱ་ནག་གཞུང་གིས་ཉེ་ཆར་གཏན་འབེབས་ལག་བསྟར་བྱེད་བཞིན་པའི་རྒྱལ་ཁབ་བདེ་འཇགས་ཁྲིམས་སྲོལ་ (National Security Law) དང་དྲག་སྤྱོད་པར་རྒོལ་བའི་ཁྲིམས་སྲོལ་ (Counterterrorism Law)། ཕྱི་རྒྱལ་གྱི་གཞུང་འབྲེལ་མིན་པའི་ཚོགས་པས་རང་ཁོངས་སུ་བྱ་འགུལ་སྤེལ་ཕྱོགས་དོ་དམ་ཁྲིམས་སྲོལ་ (FNGO Law) དང་དྲ་རྒྱའི་བདེ་འཇགས་ཁྲིམས་སྲོལ་ (Cyber Security Law) སོགས་ལ་བརྟེན་ནས་བོད་དང་ཡུ་གུར། སོག་ཡུལ་བཅས་རྒྱ་ནག་ནང་གི་གྲངས་ཉུང་མི་རིགས་ཁག་ལ་དྲག་གནོན་དབང་སྒྱུར་དང་སྡུག་སྦྱོང་མནར་གཅོད་གཏོང་བཞིན་པ་མཚམས་འཇོག་དགོས་པ་དང་། རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་འཛིན་དང་རྩ་ཁྲིམས་ལ་བསྟུན་དགོས་སྐོར་སོགས་བཀོད་འདུག
ཞུ་ཡིག་དེའི་མཇུག་ཏུ་ཡུ་རོབ་མཐུན་ཚོགས་ཀྱི་དཔོན་རིགས་ཚོས་རྒྱ་ནག་གཞུང་གི་དབང་འཛིན་དཔོན་རིགས་ཚོར་བཤད་དགོས་པའི་འབོད་སྐུལ་དོན་ཚན་བཞི་བཏོན་པའི་དང་པོ། རྒྱ་ནག་གཞུང་གིས་འགྲོ་བ་མིའི་ཐོབ་ཐང་དོན་གཉེར་བ་དང་ཁྲིམས་རྩོད་པ་ ༢༠ ལྷག་འཛིན་བཟུང་བཙོན་འཇུག་བྱས་ཡོད་པ་དག་ཀློད་གྲོལ་གཏོང་དགོས་པ་དང་། དོན་ཚན་གཉིས་པ། རྒྱ་ནག་གཞུང་གི་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་འཛིན་དང་རྩ་ཁྲིམས་གཞིར་བཟུང་གིས་ད་ཆར་ལག་བསྟར་བྱེད་བཞིན་པའི་རྒྱལ་ཁབ་བདེ་འཇགས་ཁྲིམས་སྲོལ་དང་དྲག་སྤྱོད་པར་རྒོལ་བའི་ཁྲིམས་སྲོལ། ཕྱི་རྒྱལ་གྱི་གཞུང་འབྲེལ་མིན་པའི་ཚོགས་པས་རང་ཁོངས་སུ་བྱ་འགུལ་སྤེལ་ཕྱོགས་དོ་དམ་ཁྲིམས་སྲོལ་དང་དྲ་རྒྱའི་བདེ་འཇགས་ཁྲིམས་སྲོལ་སོགས་ཕྱིར་འཐེན་དགོས་པ། དོན་ཚན་གསུམ་པ། བོད་དང་ཡུ་གུར། སོག་ཡུལ་བཅས་རྒྱ་ནག་ནང་གི་གྲངས་ཉུང་མི་རིགས་ཁག་ལ་དྲག་གནོན་དབང་སྒྱུར་དང་སྡུག་སྦྱོང་མནར་གཅོད་གཏོང་བཞིན་པ་མཚམས་བཞག་སྟེ་ཁོ་ཚོར་ཆོས་ལུགས་དད་མོས་རང་དབང་དང་སྨྲ་བརྗོད་རང་དབང་སོགས་སྤྲོད་དགོས་པ་དང་། དོན་ཚན་བཞི་བ། རྒྱ་ནག་གཞུང་གིས་རྒྱལ་སྤྱིའི་རྩ་ཁྲིམས་རྡོག་རོལ་བཏང་སྟེ། ཐའེ་ལན་དང་མ་ལེ་ཞི་ཡ། ཁམ་བྷོ་ཌེ་ཡ་སོགས་ཁྱིམ་མཚེས་རྒྱལ་ཁབ་ཁག་ལ་དངོས་ཤུགས་བརྒྱུད་གསུམ་ནས་དབང་སྒྱུར་གནོན་ཤུགས་དང་། འགྲོ་བ་མིའི་ཐོབ་ཐང་རྡོག་རོལ་གཏོང་རྒྱུ་སོགས་མཚམས་འཇོག་དགོས་སྐོར་བརྗོད་འདུག
གསར་འགོད་པ། པདྨ་རྒྱལ།
