ཉེ་སྔོན་རྒྱ་གཞུང་གིས་མཁན་པོ་དཀར་ཚེ་ལགས་ཀློད་གྲོལ་བཏང་ཡོད་ཀྱང་མུ་མཐུད་ལྟ་རྟོག་བྱས་ཏེ་ཡུལ་ཤུལ་ཁུལ་ཐོག་གི་ཉེ་འབྲེལ་ཞིག་གི་ནང་སྡོད་དུ་བཅུག་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༦ ཚེས་ ༤ ཉིན། ཡུལ་ཤུལ་ནང་ཆེན་རྫོང་ཇ་པ་དགོན་པའི་མཁན་པོ་དཀར་ཚེ་ལགས་ཀྱི་བཙོན་འཇུག་དུས་ཡུན་རྫོགས་ཏེ་ཁྲིན་ཏུའུ་ཡི་བཙོན་ཁང་ཞིག་ནས་ཀློད་གྲོལ་བཏང་ཡོད་ཀྱང་། དགོན་པར་ཕེབས་ཏུ་མ་བཅུག་པར་མུ་མཐུད་ལྟ་རྟོག་འོག་བཞག་སྟེ། ཡུལ་ཤུལ་ཁུལ་ཐོག་གི་ཉེ་འབྲེལ་ཞིག་གི་ནང་སྡོད་དུ་བཅུག་ཡོད་འདུག
དེ་ སྔོན་ཁོང་བཙོན་ཁང་དུ་ཡོད་སྐབས་སྐུ་གཟུགས་གནས་སྟངས་ཞན་པོ་ཡིན་པ་དང་ནད་རྙིང་ གསོ་བཅོས་ཀྱི་མཐུན་རྐྱེན་མེད་པ་སོགས་ཀྱི་གནས་ཚུལ་ཐོན་ཡོད་པ་དང་། ད་ལྟའི་ཆར་ཁོང་གི་སྐུ་གཟུགས་གནས་སྟངས་ག་འདྲ་ཡོད་མེད་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མི་འདུག་ཀྱང་། སྤྱི་ཚོགས་འཕྲིན་ལམ་དུ་ང་སླར་ཡང་མི་ཡུལ་དུ་ཐོན་ཡོད་ཟེར་བའི་འཕྲིན་ཐུང་ཞིག་ སྤེལ་ཡོད་པའི་ནང་། སྙིང་ཉེ་བའི་ཁྱེད་ཅག་གི་ཐུགས་ཁུར་དང་གདུང་སེམས། རྒྱབ་སྐྱོར་དང་སྨོན་འདུན་གྲངས་མེད་ཀྱིས་ང་སླར་ཡང་མི་ཡུལ་དུ་བསླེབས་ཡོད། ཞེན་དྲག་པའི་འགན་འཁྲི་དེ་དག་གི་ཆེད་དུ། བགྲོད་མ་ཚར་བའི་ལམ་བུ་དེ་དག་གི་ཆེད་དུ། མི་ཡུལ་གྱི་སྤྱི་ཆོས་དང་ལྷ་ཡུལ་གྱི་སྒེར་ཆོས་དེ་དག་གི་ཆེད་དུ། ལུས་ཕུང་བདེ་ཐང་དང་སེམས་ཁམས་དྭངས་གསལ་ངང་ང་སླར་ཡང་མི་ཡུལ་དུ་ཐོན་ཡོད། དཀོན་མཆོག་མཁྱེན། ང་ཚོའི་འཇིགས་རྟེན་ལ་རང་དབང་གི་འོད་སྣང་འཕྲོ་བར་ཤོག ཅེས་བརྗོད་འདུག
མཁན་པོ་དཀར་ཚེ་ལགས་ཕྱི་ལོ་ ༢༠༡༣ ཟླ་ ༡༢ ཚེས་ ༦ ཉིན་གྱི་དགོང་མོར་ཆབ་མདོ་ཉེན་རྟོག་པས་ཁྲིན་ཏུའུ་གྲོང་ཁྱེར་ནས་འཛིན་བཟུང་བཙན་འཁྲིད་བྱས་ཏེ་ཡུན་རིང་གར་སོང་ཆ་མེད་དུ་གྱུར་ཡོད་པ་དང་། ས་གནས་སེར་སྐྱ་མི་མང་བརྒྱ་ཕྲག་མང་པོས་ཞི་བའི་ངོ་རྒོལ་བྱས་ཏེ་ཁོང་ལ་ནག་ཉེས་ གང་ཡང་མེད་སྟབས་མྱུར་ཏུ་ཀློད་གྲོལ་གཏོང་དགོས་པའི་རེ་སྐུལ་བྱས་ཡོད་པ་རེད། དང་ཐོག་ཁོང་གིས་རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཟོས་ཡོད་པའི་ཉེས་མིང་བཏགས་ཡོད་པ་དང་། ཕྱིས་སུ་སྦས་སྲུང་བྱས་པའི་ཉེས་མིང་འོག་ཆབ་མདོ་ས་ཁུལ་གྱི་ཁྲིམས་ཁང་ཞིག་གིས་གསང་བའི་ཐོག་ནས་ལོ་གཉིས་དང་ཕྱེད་ཀྱི་བཙོན་འཇུག་ཁྲིམས་ཐག་བཅད་ཡོད་པ་རེད།
གསར་འགོད་པ། པདྨ་མཚོ།
དཔའ་བོ་རེད་་་་་་་☸?????????