ངས་འོས་བསྡུའི་ལེགས་བཅོས་འདི་ལྟར་བྱེད།

ཨ་མཆོད་འཇམ་དཔལ་ཚུལ་ཁྲིམས་ཀྱིས།

གཅིག བརྗེད་ངེས་ཚབ་པོ་ཆེ་དེ་དྲན་གསོ་གཏོང་།

ད་ལྟའི་སྐབས་སུ་སྤྱི་འཐུས་མང་ཚོགས་དང་བཅས་པ་ཀུན་གྱི་སེམས་སུ་བརྗེད་ངེས་ཚབ་པོ་ཆེ་ཞིག་བྱུང་ཡོད། གྲོས་ཚོགས་ཀྱི་ལམ་ལུགས་འདི་ཐོག་མ་འཛུགས་སྐབས་སྤྱི་འཐུས་མི་གྲངས་ངེས་ཅན་དེ་དག་བོད་སྤྱི་བའི་ལས་དོན་སྒྲུབ་པའི་ཆེད་དུ་བཏང་བའི་“སྤྱི”་མི་ཤ་སྟག་ལ་དམིགས་པ་རེད། འོན་ཀྱང་ད་སྐབས་གྲོས་ཚོགས་ར་བའི་ནང་གི་སྤྱི་འཐུས་རྣམས་རང་རང་གི་ཡོང་ཁུངས་དག་གི་བདེ་སྡུག་བརྗོད་མཁན་གྱི་མགྲིན་ཚབ་པ་ལྟ་བུ་ཞིག་ཡིན་བསམ་པ་ལས། ཐོག་མའི་དམིགས་ཡུལ་ལྟར་ “སྤྱི་འཐུས”་ཞིག་ཡིན་པའི་ཚོར་བ་དང་འདུ་ཤེས་དེ་བརྗེད་ཟིན་པ་རེད། བརྗེད་ངེས་རྐུན་པོ་ཆེ་འདི་རྨང་མེད་དུ་གཏོང་རྒྱུ་ནི་ད་ལྟའི་དུས་ཀྱི་ཆེས་གལ་ཆེན་གྱི་བྱ་བ་དེ་རེད།

ད་སྐབས་ཆོལ་ཁའི་སྤྱི་འཐུས་ཤིག་ཆོལ་ཁ་སོ་སོའི་མི་མང་ཁོ་ནས་འོས་འཕངས་ནས་ཡོང་བ་ཡིན་སྟབས་ཁོང་ཅག་ཆོལ་ཁ་སོ་སོའི་བདེ་སྡུག་གི་ཆེད་དུ་ཡོང་བ་ཡིན་པའི་མཐོང་ཚུལ་དང་། ཆོས་ལུགས་སྤྱི་འཐུས་ཤིག་ཆོས་རྒྱུད་སོ་སོ་ནས་ཡོང་བ་ཡིན་སྟབས་ཁོང་ཆོས་བརྒྱུད་སོ་སོའི་བདེ་སྡུག་གི་ཆེད་དུ་ཕེབས་པ་ཡིན་པའི་དགོངས་ཚུལ། དེ་བཞིན་ཡུ་རོབ་སོགས་ནས་ཡོང་བས་དེ་དང་དེའི་མི་མང་གི་བདེ་སྡུག་བཤད་པའི་ཆེད་དུ་ཡིན་པའི་བསམ་ཚུལ་བཅས་ཡོང་གི་ཡོད་པ་དེ་ནོར་འཁྲུལ་འདིའི་རྩ་བ་ཡིན་པར་སྙམ། སྤྱིར་ནོར་འཁྲུལ་དེའི་ཡོང་ཁུངས་ནི་སྤྱི་འཐུས་དེ་དག་གི་ཡོང་ཁུངས་ངེས་བཅད་བྱས་པ་དང་། རང་ཅག་གི་ཐུན་མོང་མ་ཡིན་པའི་ཁྱད་ཆོས་དེ་ངོས་མ་འཕྲོད་པར་གཡས་གཡོན་གྱི་མང་གཙོའི་ལམ་ལུགས་ཁག་ལས་དཔེ་ལེན་ཙམ་བྱས་པ་ལས་བྱུང་བར་མངོན། ནམ་ཡིན་ན་སོ་སོའི་ཐུན་མོང་མ་ཡིན་པའི་ཁྱད་ཆོས་དེ་ངོས་འཕྲོད་དགོས།

གཉིས། འོས་འཕེན་ལམ་ལུགས་འགྱུར་བ་གཏོང་།

གོང་དུ་ཞུས་པའི་ནོར་འཁྲུལ་དེ་སྒྲིག་གཞིའི་ཐོག་ནས་བླངས་དོར་ཇི་དགོས་གསལ་མ་ཐུབ་པའི་སྐྱོན་ལས་བྱུང་བ་ཞིག་མ་རེད། གལ་སྲིད་ད་ལྟའི་ལམ་ལུགས་འདི་མུ་མཐུད་ནས་སོང་ན་སྤྱི་འཐུས་དེ་སྤྱི་མི་ཡིན་དགོས་པ་ལས་ཆོལ་མི་ཡིན་མི་འོས་པའི་སྐོར་ལ་སྒྲིག་གཞི་ལ་ཇི་ཙམ་འཁོད་ཀྱང་། ཇི་ཙམ་བཤད་ཀྱང་ད་ལྟ་བཞིན་ཡོང་ངེས་ལས་འགྱུར་བ་གང་ཡང་འགྲོ་མི་ཐུབ། དེས་ན་སྤྱི་འཐུས་རྣམས་ཀྱི་སེམས་སུ་རང་ཉིད་བོད་ཆོལ་ཁ་གསུམ་གྱི་སྤྱི་མི་ཡིན་པ་ལས་ཆོལ་ཁ་གཅིག་གི་སྒེར་མི་མིན་པའི་ཚོར་སྣང་འབྱུང་བའི་ཆེད་དུ་ཆོལ་ཁ་སོ་སོའི་འཐུས་མི་ལ་ཆོལ་ཁ་གཞན་གྱི་མི་མང་གིས་ཀྱང་འོས་འཕངས་ནས་འདེམས་དགོས། སྤྱི་འཐུས་གང་ཞིག་ལ་ཆོལ་ཁ་གསུམ་ཁའི་མང་ཚོགས་ཀྱིས་འོས་འཕངས་ནས་བདམས་པའི་ཚེ་རང་ཉིད་བོད་སྤྱི་བའི་ལས་དོན་སྒྲུབ་ཆེད་དུ་བསྐོས་པའི་མི་ཞིག་ཡིན་པའི་ཚོར་སྣང་འབྱུང་། དེ་བྱེད་ལུགས་ནི་སླ་མོ་ཡིན་ཏེ། ད་ལྟ་བཞིན་ཆོལ་ཁ་སོ་སོའི་འོས་མི་ཉི་ཤུ་ལས་རྩེ་བཏོག་གིས་བདམས་ན་འགྲིག་པ་རེད།

གསུམ། སྲིད་སྤྱིའི་འོས་ཆོས་ལ་འགྱུར་བ་གཏོང་།

སྤྱི་འཐུས་ནང་དུ་མི་ཡག་པོ་གཏོང་དགོས་ཞེས་ཇི་ཙམ་བཤད་ཀྱང་འགྲོ་ལུགས་དང་ལག་ལེན་རང་གི་ཐོག་ནས་འགྲོ་ས་དང་བྱེད་ས་མེད་པ་ཞིག་བཟོ་མ་ཐུབ་ན་སྟོང་བཤད་ཁོ་ན་ཡིན། དེས་ན་སེམས་སུ་མི་འཐད་པའི་སྣང་བ་ཅུང་ཟད་ཙམ་ཡང་མི་འབྱུང་བའི་ཆེད་དུ་ལམ་ལུགས་ཤིག་བསྐྲུན་དགོས་པ་ལས། སྒྲིག་གཞི་ཙམ་ལ་བརྙེས་པས་མི་ཕན་པས་དེའི་ཐོག་ལ་ཚང་མས་རིག་པ་སྒྲིམ་དགོས།

འོ་ན་ད་ལྟ་ཡོད་བཞིན་པའི་སྤྱི་བློན་སྲིད་གསུམ་གྱི་འོས་ཆོས་དག་གི་ཐོག་ཏུ་འོས་ཆོས་གསར་བ་གང་འཇོག་དགོས་ཤེ་ན། “དགེ་འདུན་པ་མ་ཡིན་པ”་ཞེས་པ་ཞིག་འཇོག་དགོས། ལར་ནས་བོད་རྒྱལ་ཁབ་ཀྱི་ལོ་རྒྱུས་ཀྱི་ཐོག་ཏུ་ཡང་མྱང་ཏིང་འཛིན་བཟང་པོ་སོགས་དགེ་འདུན་པས་སྲིད་ཀྱི་བྱ་བ་ལ་ཞུགས་མ་མྱོང་བ་མིན། འོན་ཀྱང་ད་སྐབས་དང་དེ་སྐབས་མི་འདྲ། སྤྱིར་ན་འཕགས་པའི་དགེ་འདུན་པ་ནི་ “་་་ཐལ་མོ་སྦྱར་བའི་འོས་སུ་གྱུར་བ། ཕྱག་བྱ་བའི་འོས་སུ་གྱུར་བ། བསོད་ནམས་ཀྱི་དཔལ་གྱི་ཞིང༌་་་།” ཞེས་པ་སོགས་ཡིན་དགོས་པ་ལས། སྐྱ་བོ་མི་ནག་གི་བྱ་བའི་ནང་དུ་འཛུལ་ནས་ཁྱིམ་པ་སུན་འབྱིན་གྱི་ལས་གསོག་པའི་རྒྱུ་བྱས་ན་རང་གཞན་དང་དུས་རྣམ་ཀུན་ཏུ་གནོད་པ་ཞིག་ལས་མེད། ད་ལྟའི་སྐབས་སུ་སྤྱི་བློན་སྲིད་གསུམ་གྱི་ནང་དུ་དགེ་འདུན་པས་འཚང་ཀ་ཡོད་ཀྱང་གཞུང་ཞབས་ཀྱི་ནང་དུ་ཞུགས་མཁན་དགེ་འདུན་པ་མེད་པ་འདིས་ཀྱང་སྐབས་འདི་དང་འབྲེལ་བའི་དོན་དག་མང་པོ་ཞིག་སྟོན། གཞན་ཡང་ “སྐྱ་ལམ་སེར་ལམ་ཁ་ཁ་རེད། འབྲོང་བྲེ་ལུའི་ལམ་དེ་རྫ་ལམ་རེད།” ཅེས་འཇིག་རྟེན་གྱི་ཁ་དཔེ་ལ་ཡོད་པ་བཞིན་ད་ལྟའི་ཆ་ལ་སྐྱ་སེར་གྱི་ལམ་ཁ་སོ་སོར་བྱས་པ་ཡིན་ན་ཚེ་འདི་ཕྱི་གཉིས་དང་། སྐྱ་སེར་སྒེར་སོ་སོ། ཆོས་འཇིག་རྟེན་གཉིས་བཅས་གང་ཐད་ནས་དགེ་མཚན་ཧ་ཅང་ཆེ། དགེ་འདུན་པ་ནི་རང་རེའི་སྐྱབས་གསུམ་གྱི་ཡ་གྱལ་ཞིག་ཡིན་ཞིང་། སྐྱབས་དེ་སྐྱབས་ཀྱི་གནས་སུ་བཞག་ཅིང་བཞུགས་ན་ཕྱོགས་གང་ས་ནས་དགེ་མཚན་ཆེ།

འོ་ན་དགེ་འདུན་པའི་ཆབ་སྲིད་ཀྱི་ཐོབ་ཐང་འཕྲོག་སོང་རབས་ཀྱི་རྙོག་དྲ་ལངས་སྲིད་ཀྱི་མ་རེད་དམ་དགོངས་སྲིད་ཀྱང་། དོན་ངོ་མར་བཤད་ན་དགེ་འདུན་པའི་ཚོགས་སྡེ་འདི་འཚོ་ཐབས་བྱེ་བྲག་པ་ཞིག་ཡིན་པའི་ངོས་ལེན་ཡོངས་སུ་བྱས་ན་ཁོང་ཅག་ལ་ཐོབ་ཐང་དེ་མ་སྤྲད་མི་འགྲིག་པ་བདེན་ཡང་། དེ་ལྟར་ངོས་བཞེས་མེད་པར་ཐར་བ་དང་ཐམས་ཅད་མཁྱེན་པ་དོན་དུ་གཉེར་མཁན་གྱི་ཚོགས་སྡེ་ཞིག་ཡིན་པར་དགོངས་ན་འཇིག་རྟེན་ཆགས་སྡང་གི་རྨང་གཞིར་གྱུར་བའི་སྲིད་དོན་གྱི་བྱ་བ་དེ་འདྲའི་ནང་དུ་ཞུགས་པར་འདོད་རྔམ་སྐྱེ་དགོས་དོན་གང་ཡང་མེད། སྤྱི་ཚོགས་ཀྱི་ཞབས་ཞུ་སྒྲུབ་ན་གང་དུ་ཡང་སྒྲུབ་ཆོག་ལ། ངེས་པར་དུ་གཞུང་གི་བྱ་བ་ཞིག་སྒྲུབ་འདོད་ན་ཡང་གཞུང་ཞབས་ཀྱི་ནང་དུ་ཕེབས་ན་དེ་བས་དགེ་མཚན་ཆེ།

འོ་ན་དགེ་འདུན་པ་ཡིན་མིན་ནི་སྐྱེ་བོ་གང་ཞིག་གི་རྒྱུད་ལ་དགེ་ཚུལ་སློང་གི་སྡོམ་པ་ཡོད་མེད་ལ་མཐར་གཏུགས་དགོས་པས་འདི་ལག་ལེན་དུ་སྟར་བར་ཧ་ཅང་དཀའ་མོ་མིན་ནམ་སྙམ་སྲིད། སྤྱིར་ན་བྱ་བ་ག་འདྲ་ཞིག་ཡིན་ཡང་འདུན་པ་ཡོད་ན་སྒྲུབ་མི་ཐུབ་པ་ཞིག་མི་སྲིད་པས། འཇིག་རྟེན་ཁ་དཔེར་ཡོད་པ་བཞིན། ལ་ཞིག་ཡོད་ན་ལམ་ཞིག་རྙེད་ངེས་རེད། འདིར་གུས་རང་ཉིད་ཀྱི་བསམ་ཚུལ་ཞིག་འབུལ་ན་དགེ་འདུན་པ་ཡིན་མིན་ནི་ཕྱི་ཚུལ་ཙམ་གྱིས་འབྱེད་རྒྱུ་བྱ་ཆོག གལ་སྲིད་དགེ་འདུན་པ་ཞིག་སྲིད་དོན་ལ་ཞུགས་འདོད་ནས་སངས་རྒྱས་ཀྱི་མནབས་བཟའ་ཕུད་དེ་སྐྱ་ཆས་སུ་ཞུགས་ནས་འོས་འགྲན་ལ་ཞུགས་ན་འགོག་ཐབས་མེད་ཅིང་། འདི་འདྲ་ནི་འབྱུང་བ་དཀོན་ཙམ་ཡིན་པས་སྐྱོན་ཆེན་པོ་མི་འབྱུང་།

བཞི། ཆོས་བརྒྱུད་སྤྱི་འཐུས་ཕྱིར་བསྡུ་བྱེད།

རང་རེའི་སྤྱི་འཐུས་ནི་རྒྱལ་ཁབ་གཞན་གྱི་འཐུས་མི་བཞིན་མིན་པར་། ཕར་འབུལ་མཁན་ཞིག་ཡིན་པ་ལས་ཚུར་ལེན་མཁན་ཞིག་མིན། རང་རེའི་ཐུན་མོང་མ་ཡིན་པའི་ཁྱད་ཆོས་འདི་ངེས་དགོས་པ་ཧ་ཅང་གལ་ཆེ། དེ་ཡང་ཆོལ་ཁའི་སྤྱི་འཐུས་ནི་ཆོལ་ཁའི་ངོས་ནས་སྤྱི་དོན་ལ་ཞལ་འདེབས་འབུལ་དུ་བཏང་བ་ལས་ཆོལ་ཁའི་ཆེད་དུ་ཐོབ་ཐང་ལེན་དུ་མངགས་པ་མིན། དེ་བཞིན་ཁུངས་གཞན་པའི་སྤྱི་འཐུས་དག་ཀྱང་དེ་ལྟར་ཡིན་དགོས། དེས་ན་ལར་ནས་ཆོས་ལུགས་ཀྱི་ངོས་ནས་སྲིད་དོན་ལ་འབུལ་རྒྱུ་ཞིག་ཡོང་དཀའ་ཞིང་། གལ་སྲིད་ཡོད་ན་ཡང་ཆོལ་ཁའི་ནང་དུ་མ་ཚུད་པའི་ཆོས་རྒྱུད་ཀྱི་ངོས་ནས་སྤྱི་དོན་ལ་འབུལ་རྒྱུའི་ཞལ་འདེབས་ཤིག་མེད། ཆོས་རྒྱུད་དང་ཆོལ་ཁའི་སྤྱི་འཐུས་ཀྱི་ལམ་ལུགས་འདིས་ངས་ཐོག་མར་ཞུས་པའི་ནོར་འཁྲུལ་དེ་བསྐྲུན་ཡོད་ཀྱང་། འོས་འཕེན་ལམ་ལུགས་ལ་འགྱུར་བ་བཏང་ན་ཆོལ་ཁའི་སྤྱི་འཐུས་ལམ་གྱི་སྐྱོན་ཆ་དེ་ཧ་ཅང་ཉུང་དུ་འགྲོ་ངེས་པས་མ་བཞག་ཐབས་མེད་འདི་དེ་མུར་འཇོག་ཆོག

ཕྱི་ལོ་ ༢༠༡༦ ཟླ་ ༧ ཚེས། ༡༥ ལ་ཧུན་སུར་ནས།