ཨ་རིའི་སྤྱི་མཐུན་ཚོཊ་པས་བསླངས་པའི་དངངས་འཚབ།

བོད་མིའི་རིག་གནས་ལེགས་བྱང་རྒྱ་ནག་གཞུང་གིས་རྩ་མེད་བཟོ་ཡི་འདུག་ཟེར་བ་དེ་ཨ་རིའི་སྤྱི་མཐུན་ཚོགས་པས་རྒྱ་ནག་གཞུང་ལ་གཞི་མེད་བསྙོན་འཛུགས་བྱས་པ་ཞིག་ཡིན་སྐོར་བརྗོད་འདུག

དེ་རིང་རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ལུ་ཁང་(Lu Kang) ཟེར་བ་དེས། ཨ་རིའི་སྤྱི་མཐུན་ཚོགས་པའི་ཆབ་སྲིད་སྡིངས་ཆའི་སྟེང་རྒྱ་ནག་གིས་ལྷོ་རྒྱུད་མཚོ་ཁུལ་གྱི་བདག་དབང་རྩོད་གླེང་དང་བོད་མིའི་རིག་གནས་ལེགས་བྱང་རྩ་མེད་བཟོ་བཞིན་འདུག་ཅེས་རྒྱ་ནག་གཞུང་ལ་གཞི་མེད་བསྙོན་འཛུགས་བྱེད་བཞིན་པ་མཚམས་འཇོག་དགོས་སྐོར་བརྗོད་ཡོད་པ་མ་ཟད། རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས་དབྱིན་ཡིག་བསྒྲགས་གཏམ་ཞིག་སྤེལ་བའི་ནང་། ཨ་རིའི་སྤྱི་མཐུན་ཚོགས་པས་ཆབ་སྲིད་སྡིངས་ཆའི་སྟེང་བོད་དང་ཐའེ་ཝན། རྒྱ་ནག་གི་ཚོང་འབྲེལ་དང་ལྷོ་རྒྱུད་མཚོ་ཁུལ་གྱི་བདག་དབང་རྩོད་གླེང་སོགས་དང་འབྲེལ་བའི་རྒྱ་ནག་གི་ནང་སྲིད་ལ་ཐེ་གཏོགས་བྱེད་མི་ཆོག་པ་དང་། ཨ་རིའི་ཆབ་སྲིད་ཚོགས་པ་ཁག་གིས་རྒྱ་ནག་གི་དཔལ་འབྱོར་འཕེལ་རྒྱས་དང་། རྒྱ་ནག་གི་རྒྱུ་མཚན་ལྡན་པའི་སྤྱོད་ཚུལ། ད་ལྟའི་ཕྱོགས་གཉིས་དབར་གྱི་འབྲེལ་ལམ་བཅས་ལ་དཔྱད་ཞིབ་གནང་དགོས། འབྲེལ་ཡོད་ཆབ་སྲིད་ཚོགས་པ་ཁག་གིས་རྒྱ་ནག་གི་ནང་སྲིད་ལ་བྱུས་གཏོགས་བྱེད་རྒྱུ་མཚམས་བཞག་སྟེ། རྒྱལ་ཁབ་གཉིས་ཀྱིས་ཕན་ཚུན་ཡིད་རྟོན་དང་མཉམ་ལས་ཐད་འབད་བརྩོན་དགོས་ལུགས་སོགས་བཀོད་འདུག

དེ་རིང་རྒྱ་ནག་གི་སྲིད་འཛིན་ཞི་ཅིན་ཕིན་གྱི་གཏམ་བཤད་ཅིག་གི་ནང་། རྒྱ་ནག་ནང་གི་ཆོས་ལུགས་རིག་གནས་དང་གྲངས་ཉུང་མི་རིགས་ཁག་ཚང་མ་རྒྱ་ནག་གི་རིག་གནས་དཔལ་ཡོན་ནང་འཐུམས་ཏེ་ལོ་ངོ་ ༥༠༠༠ ལྷག་ཕྱིན་པའི་ལོ་རྒྱུས་ཡོད་པ་དང་། མ་འོངས་པར་རྒྱ་ནག་ནང་གི་གྲངས་ཉུང་མི་རིགས་ཁག་གི་ཆོས་ལུགས་རིག་གནས་དར་ཁྱབ་ཆེན་འགྲོ་རྒྱུ་ཡིན་ལུགས་དང་། རྒྱ་ནག་སྤྱི་མང་གི་ཆ་ཤས་སུ་གྲུབ་པའི་གྲངས་ཉུང་མི་རིགས་ཁག་གིས་སོ་སོའི་ཆོས་ལུགས་རིག་གནས་རྒྱུན་འཛིན་གྱི་བྱེད་སྒོ་སྤེལ་ཆོག་ལུགས་བཤད་འདུག

གནས་ཚུལ་ལྟར་ན། ཟླ་འདིའི་ཕྱི་ཚེས་༡༨ ཉིན་ཨ་རིའི་གཞུང་གི་སྲིད་པ་ཚོས་རྒྱ་ནག་གཞུང་གིས་ལྷོ་རྒྱུད་མཚོ་ཁུལ་གྱི་བདག་དབང་རྒྱ་ནག་ལ་ཡོད་པའི་བཙན་སྐུལ་བྱས་ཏེ་མཚོ་ཁུལ་དེའི་མི་མང་གི་དཔལ་འབྱོར་དཀའ་ངལ་སྣང་མེད་བཏང་བ་དང་། བོད་དང་ཡུ་གུར་མི་རིགས་ཀྱི་རིག་གནས་ལེགས་བྱང་རྩ་མེད་བཟོ་བའི་སྲིད་ཇུས་ལག་བསྟར་བྱེད་པ། དེ་བཞིན་ཐའེ་ཝན་མཚོ་འགག་གི་མཚོན་ཆ་ཉོ་འཚོང་ཐད་གནོན་ཤུགས་སྤྲོད་བཞིན་པའི་ཐད་ལ་སྐྱོན་བརྗོད་བྱས་འདུག

སྤྱིར་རྒྱ་ནག་གཞུང་གིས་ད་ལོའི་ཨ་རིའི་སྐབས་ ༥༧ པའི་སྲིད་འཛིན་འོས་བསྡུའི་ལས་རིམ་དེ་ནི་ཨ་རིའི་ནང་སྲིད་ལས་དོན་ཞིག་ཡིན་པ་དང་། རྒྱ་ནག་གཞུང་གིས་དེ་དོན་ལ་དོ་སྣང་བྱེད་ཀྱིན་མེད་ལུགས་བཤད་ཀྱང་། ད་ལོའི་ཕྱི་ཟླ་༤ བའི་ནང་རྒྱ་ནག་གི་དཔལ་འབྱོར་བློན་ཆེན་ལུའུ་ཅེ་ཝེ་(Lou Jiwei) ཟེར་བ་ཞིག་གིས། ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊ་རུམ་ཕིས་རྒྱ་ནག་གི་ཚོང་ཟོག་ནང་འདྲེན་བྱེད་པའི་ཐད་ལ་ཁྲལ་བསྡུ་དགོས་སྐོར་བརྗོད་པ་དེ་ནི་གནས་ལུགས་མེད་པའི་སྐད་ཆ་ཞིག་ཡིན་ལུགས་བཤད་ཡོད་པ་དང་། ཨ་རིའི་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ཁི་ལེན་ཊོན་དང་བསྡུར་ན་རྒྱ་ནག་གི་དབང་འཛིན་དཔོན་རིགས་ཚོས་ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཊི་རུམ་ཕི་ལགས་ཀྱི་ཆབ་སྲིད་ལངས་ཕྱོགས་ཐད་ལ་དོ་སྣང་ཤུགས་ཆེན་བྱེད་ཀྱིན་ཡོད་འདུག

གསར་འགོད་པ། པདྨ་རྒྱལ།