རྒྱའི་གསར་འགོད་པ་གསུམ་རྒྱ་གར་ནས་ཕྱིར་ཕུད་བཏང་།

རྒྱ་གར་གཞུང་གིས་རྒྱ་ནག་ཤིན་ཧྭ་གསར་ཁང་གི་གསར་འགོད་པ་གསུམ་ཟླ་འདིའི་ཕྱི་ཚེས་ ༣༡ ཉིན་ནང་ཚུད་རྒྱ་གར་ནས་ངེས་པར་དུ་འཐོན་དགོས་པའི་ཐག་གཅོད་གནང་འདུག

དེ་རིང་རྒྱ་གར་ཧིན་རྡུ་དུས་བབ་ཀྱིས་གནས་ཚུལ་སྤེལ་བ་ལྟར་ན། རྒྱ་གར་ནང་ཡོད་པའི་རྒྱ་ནག་ཤིན་ཧྭ་གསར་ཁང་གི་གསར་འགོད་པ་གསུམ་གྱིས། རྒྱ་གར་གཞུང་ལ་ཆོག་མཆན་མ་ཞུས་པར་ཐེངས་མང་པོར་རྒྱ་གར་ལྷོ་ཕྱོགས་སུ་ཡོད་པའི་བོད་མིའི་གཞིས་ཆགས་ཁག་གི་ནང་སྐོར་སྐྱོད་བྱས་ཡོད་པ་མ་ཟད། བོད་རིགས་ལས་འགུལ་བ་ཁག་ཅིག་ལ་ཐུག་འཕྲད་བྱས་ཡོད་པར་བརྟེན། རྒྱ་གར་གཞུང་གིས་གསར་འགོད་པ་དེ་གསུམ་གྱི་ཐོངས་མཆན་ཕྱིར་འགྱངས་མ་བྱས་པར་ཟླ་འདིའི་ཕྱི་ཚེས་ ༣༡ ཉིན་ནང་ཚུད་ངེས་པར་དུ་རྒྱ་གར་ནས་འཐོན་དགོས་པའི་ཐག་གཅོད་གནང་ཡོད་འདུག

ད་ལྟའི་བར་རྒྱ་གར་གཞུང་ཕྱོགས་ནས་གསར་འགོད་པ་དེ་གསུམ་ཕྱིར་ཕུད་གཏོང་དགོས་པའི་རྒྱུ་མཚན་གསལ་བཤད་གནང་མེད་ཀྱང་། རྒྱ་གར་གཞུང་འབྲེལ་མི་སྣ་ཞིག་གིས་གསར་འགོད་པར། ཕྱིར་ཕུད་བཏང་བའི་གསར་འགོད་པ་གསུམ་གྱི་ནང་ནས་ཝུ་ཆིང་ཟེར་བ་དེ་རྒྱ་གར་ནང་བསླེབས་ནས་ལོ་ ༧ འགྲོ་བཞིན་ཡོད་ལ། ད་ལྟ་ཁོ་རྒྱ་གར་གྱི་རྒྱལ་ས་ལྡི་ལིར་ཡོད་པའི་ཤིན་ཧྭ་གསར་ཁང་གི་འགན་འཛིན་ཡིན་པ་དང་། དེ་བཞིན་བུད་མེད་གསར་འགོད་པ་ཐང་ལུ་ཟེར་བ་མེམ་བྷེ་ཤིན་ཧྭ་ཡན་ལག་ཁང་གི་འགན་འཛིན་དང་། ཡོང་ཀང་ཟེར་བ་མེམ་བྷེ་ཡི་གསར་འགོད་པ་ཞིག་ཡིན་ལ། ཐང་ལུ་དང་ཡོང་ཀང་གཉིས་འདས་ལོའི་ཕྱི་ཟླ་ ༡ པོའི་ནང་རྒྱ་གར་དུ་བསླེབས་ཏེ། སོ་སོའི་ཐོབ་ཐང་ངོ་མ་སྦེད་གསང་བྱས་ཏེ་རྒྱ་གར་ལྷོ་ཕྱོགས་ཀྱི་བོད་མིའི་གཞིས་ཆགས་ཁག་ཏུ་སྐོར་སྐྱོད་བྱས་ཡོད་པ་མ་ཟད། བོད་རིགས་ལས་འགུལ་བ་ཁག་ཅིག་ལ་ཐུག་འཕྲད་བྱས་ཡོད་པར་བརྟེན། བདེ་འཇགས་ལ་གནོད་པའི་ལས་ཀ་བྱས་པའི་དོགས་གཞིའི་འོག་ཐོངས་མཆན་ཕྱིར་འགྱངས་བྱ་རྒྱུ་མིན་པའི་ཐག་གཅོད་བྱུང་ཡོད་སྐོར་བརྗོད་འདུག

རྒྱ་ནག་པེ་ཅིན་དུ་ཡོད་པའི་ཤིན་ཧྭ་གསར་ཁང་གི་དབུས་ལས་ཁུངས་ལ་གནད་དོན་དེའི་ཐད་འབྲེལ་བ་བྱེད་སྐབས། ད་ལྟའི་ཆར་གནད་དོན་དེར་ལན་རྒྱག་མི་ཐུབ་སྐོར་བརྗོད་ཡོད་པ་རེད། ཡིན་ནའང་། རྒྱ་ནག་གཞུང་འབྲེལ་གསར་ལམ་དུ་རྒྱ་གར་གཞུང་གི་ཐག་གཅོད་དེར་རྒྱ་གར་གྱི་མཐོ་རིམ་དཔོན་རིགས་དང་ཤེས་ཡོན་པ་སོགས་ནས་མོས་མཐུན་བྱེད་ཀྱི་མེད་པ་མ་ཟད། དགོས་མེད་དང་དཔྱད་ཞིབ་གང་ཡང་མ་བྱས་པའི་བྱ་སྤྱོད་ཅིག་ཡིན་སྟབས། དེས་རྒྱ་དཀར་ནག་གཉིས་ཀྱི་འབྲེལ་བ་ཇེ་སྡུག་ཏུ་གཏོང་ཉེན་ཡོད་པའི་སྐྱོན་བརྗོད་བྱེད་ཀྱི་ཡོད་སྐོར་སོགས་བརྗོད་འདུག

གསར་འགོད་པ། པདྨ་མཚོ།