རྒྱ་ནག་དམག་དོན་ཁྲིམས་ཁང་ནས་དམག་སྤྱི་ཆེན་མོ་ཟུར་པ་གོ་པའོ་ཞོང་གིས་ལྐོག་རྔན་འབོར་ཆེན་བླངས་བའི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་འདུག
ཁ་སང་རྒྱ་ནག་དམག་དོན་ཁྲིམས་ཁང་གིས་ཅིངས་གྲོལ་དམག་གི་དམག་སྤྱི་ཆེན་མོ་ཟུར་པ་གོ་པའོ་ཞོང་གིས། གོ་གནས་བེད་སྤྱད་དེ་ལྐོག་རྔན་འབོར་ཆེན་བླངས་བའི་ནག་ཉེས་འོག་ཚེ་གང་ཆབ་སྲིད་ཀྱི་ཁེ་དབང་འཕྲོག་པ་མ་ཟད། ཚེ་བཙོན་གྱི་ཁྲིམས་ཐག་བཅད་ཡོད་པ་དང་། མི་སྒེར་གྱི་རྒྱུ་དངོས་ཆ་ཚང་བླངས་མེད་ཀྱང་ཁྲིམས་འགལ་གྱིས་བླངས་བའི་དངུལ་དངོས་གཞུང་བཞེས་བཏང་ཡོད་པ་དང་། ཁྲིམས་རའི་ནང་གོ་པའོ་ཞོང་གིས་ཚེ་བཙོན་གྱི་ཁྲིམས་ཐག་དང་ལེན་བྱས་ཏེ་བསྐྱར་དུ་ཁྲིམས་གཏུག་བྱ་རྒྱུ་མིན་ལུགས་བརྗོད་ཡོད་འདུག
རྒྱ་ནག་གཞུང་ཕྱོགས་ནས་གོ་པའོ་ཞོང་གིས་ལྐོག་རྔན་བླངས་བའི་དངུལ་དངོས་ཀྱི་གྲངས་འབོར་དང་འབྲེལ་ཡོད་དཔང་རྟགས་སོགས་ཕྱིར་བསྒྲགས་བྱས་མེད་ཀྱང་། ཨ་རིའི་ནེའུ་ཡོག་གྲོང་ཁྱེར་ཆེད་འཛུགས་སློབ་ཆེན་གྱི་ཆབ་སྲིད་རིག་པའི་དགེ་རྒན་ཆེན་པོ་ཤཱ་མིན་ལགས་ཀྱིས། རྒྱ་ནག་དབུས་དམག་སྤྱི་གཞོན་པ་ཞི་ཚེ་ཧུའུ་ལ་རྒྱ་ནག་བྱང་ཤར་གྱི་སྟག་རྒན་དང་། གོ་པའོ་ཞོང་ལ་ནུབ་བྱང་གི་སྤྱང་རྒན་ཞེས་ཁོ་གཉིས་ནི་རྒྱ་ནག་དམག་ཕྱོགས་ཀྱི་འགྲན་ཟླ་བྲལ་བའི་ལྐོག་ཟ་རུལ་སུངས་ཀྱི་སྟག་རྒན་གཉིས་ཡིན་ལ། ལྐོག་ཟ་རུལ་སུངས་བྱས་པའི་དངུལ་དངོས་དུང་ཕྱུར་ལས་བརྒལ་ཡོད་སྟབས། གོ་པའོ་ཞོང་ལ་ཚེ་བཙོན་གྱི་ཁྲིམས་ཐག་བཅད་པ་འོས་འཚམ་ཡིན་སྐོར་བརྗོད་འདུག
གསར་འགོད་པ། པདྨ་མཚོ།
