ངའི་མིང་ལ་བསྟན་འཛིན་ཟེར། ང་རང་རྒྱ་མི་མིན།

དེ་རིང་ཕྱི་དྲོའི་ཆུ་ཚོད་ ༣ པའི་ཐོག་བོད་ཀྱི་དཔེ་མཛོད་ཁང་གི་ཚོགས་ཁང་དུ། རྩོམ་པ་པོ་རྡོ་རིང་བསྟན་འཛིན་ཕུན་ཚོགས་ལགས་ཀྱིས་བརྩམས་པའི་<<ངའི་མིང་ལ་བསྟན་འཛིན་ཟེར། ང་རང་རྒྱ་མི་མིན>><<My nams is Tenzin. I am not chinese>>ཞེས་པའི་དབྱིན་དེབ་ཅིག་དབུ་འབྱེད་གནང་སོང་ལ། སྐུ་མགྲོན་གཙོ་བོར་བོད་མི་མང་སྤྱི་འཐུས་་ཟུར་པ་ཤར་གླིང་ཟླ་སྒྲོན་ལགས་ཀྱི་གཙོས་ནུབ་གླིང་གི་སློབ་མ་ཁག་ཅིག་དང་གངས་སྐྱིད་ཀྱི་ལས་བྱེད་ཁག་ཅིག་བཅས་འཛོམས་འདུག

སྤྱི་ཟུར་ཤར་གླིང་ཟླ་སྒྲོན་ལགས་ཀྱིས་དཔེ་དེབ་དབུ་འབྱེད་གནང་བ་དང་འབྲེལ། རྩོམ་པ་པོ་ཁོ་རང་གི་སེམས་ཤུགས་དང་ལས་འཆར་ནང་བཞིན་དཔེ་དེབ་དེ་རྩོམ་སྒྲིག་གནང་ཐུབ་པ་བྱུང་བ་མ་ཟད། རྒྱལ་ཡོངས་དཔེ་སྐྲུན་ཁང་ལྟ་བུ་ནས་པར་སྐྲུན་གནང་ཐུབ་པ་བྱུང་བ་དང་། དེ་བཞིན་ཟླ་བ་ཁ་ཤས་ནང་དཔེ་དེབ་དབུ་འབྱེད་ཀྱི་མཛད་སྒོ་སྲུང་གཙི་ཞུ་ཐུབ་པ་དེ་གང་ཟག་སོ་སོའི་སེམས་ཤུགས་དང་དམིགས་ཡུལ། སྙིང་སྟོབས་དང་ཕྱག་ལས་ཤིག་དམིགས་ཡུལ་བཟུང་བ་ནང་བཞིན། ལག་ལེན་འཁེལ་ཐུབ་ཀྱི་ཡོད་པ་གསལ་བོ་ཞེ་དྲགས་ཆགས་ཡོད་པ་རེད་བསམ་གྱི་འདུག དེར་བརྟེན་ཕུན་ཚོགས་ལགས་ཀྱི་ཕྱག་རྗེས་དེ་ལ་ངས་སྙིང་ཐག་པ་ནས་ཐུགས་རྗེ་ཆེ་དང་ཡི་རངས་ཞུ་རྒྱུ་ཡིན། ཞེས་བརྗོད་བྱུང་།

དཔེ་དེབ་ཀྱི་སྐོར་ལ་མོས། བདུན་ཕྲག་གསུམ་ཙམ་གྱི་གོང་དུ་ཁོང་གིས་དཔེ་དེབ་ཅིག་ང་ལ་གནང་སོང་། གང་མགྱོགས་མགྱོགས་བཀླགས་ཡིན། རྣམ་པ་ཚོས་རིམ་པས་དཔེ་དེབ་དེ་བཀླག་པའི་གོ་སྐབས་རག་གི་རེད་བསམ་གྱི་འདུག དཔེ་དེབ་དེ་དང་པོ་ཀློག་རྒྱུ་མགོ་བཙུགས་དུས་མཇུག་བསྡུ་བར་རྔམ་དྲགས་འདྲ་བོ་ཞིག་སྐྱེས་ཀྱི་འདུག བཞག་འདོད་མེད་པ་འདྲ་པོ་མཚན་མོར་གཉིད་མ་ཁུག་བར་དུ་དེབ་དེ་ཀློག་སྤྲོ་བ་དང་། ཞོགས་པ་ཡར་ལངས་པ་དང་ཡང་དེབ་དེར་ལག་པ་འཆང་སྤྲོ་བ་དེ་འདྲ་ཞིག་འདུག དེར་བརྟེན་དེ་རིང་ཚང་མས་དེབ་དེར་གཟིགས་མདོག་ཁ་བོ་རེད། དེབ་དེ་ཀློག་པ་ཡིན་ན། སོ་སོར་ཉམས་མྱོང་གསར་པ་ཞིག་དང་ཚོར་བ་གསར་བ་ཞིག་རག་པ་དེ་ངས་ཞུ་ཐུབ་ཀྱི་འདུག ཅེས་བརྗོད་སོང་།

རྩོམ་པ་པོ་བསྟན་འཛིན་ཕུན་ཚོགས་ལགས་ཀྱིས་ཁོང་གི་དཔེ་དེབ་ངོ་སྤྲོད་བྱེད་སྐབས། དེབ་དེའི་ནང་ཁྱོན་ལེའུ་ ༡༥ དང་ཤོག་ངོས་ ༣༥༠ ཡོད་པ་དང་། དེབ་དེའི་བརྗོད་སྙིང་གཙོ་བོ་ཁོ་རང་རྒྱ་གར་མཐོ་སློབ་ནང་བསྡད་སྐབས་ཀྱི་འཚོ་གནས་དང་། བོད་དོན་ལས་འགུལ་སྤེལ་སྟངས། མཐོ་སློབ་ཁག་གི་དགེ་སློབ་ཚོས་བོད་དོན་ཐོག་རྒྱབ་སྐྱོར་གནང་བའི་སྐོར། དེ་བཞིན་མཐོ་རིམ་སློབ་ཕྲུག་ཚོགས་པ་ཁག་གི་ལས་འགུལ་དང་འབྲེལ་བའི་གནས་ཚུལ། ཁོ་རང་མཐོ་སློབ་ཐོན་པའི་རྗེས་ཀྱི་གནས་ཚུལ་བཅས་བཀོད་ཡོད་སྐོར་བརྗོད་སོང་ལ། མཇུག་ཏུ་ཁོས་ད་ལྟའི་ཆར་དཔེ་དེབ་གཉིས་པ་<<ཨ་མ་དང་བུ་>>ཞེས་པའི་དེབ་ཅིག་འབྲི་མགོ་བཙུགས་ཡོད་པ་དང་། དེབ་དེ་ནི་ཨ་མ་ལགས་བོད་ན་ཡོད་པ་དང་བུ་རྒྱ་གར་ནང་ཡོད་པའི་སྐོར་ཡིན་ལུགས་བརྗོད་སོང་།

རྩོམ་པ་པོ་བསྟན་འཛིན་ཕུན་ཚོགས་ལགས་ནི་སྔོན་ཆད་མ་སུ་རི་བོད་ཁྱིམ་ནས་ཡིན་པ་དང་། མ་ཌི་ར་ས་ཡེ་ཤུ་མཐོ་སློབ་ནང་ཆབ་སྲིད་རིག་པའི་སྐོར་ལ་སློབ་གཉེར་གནང་སྟེ་གཙུག་ལག་རབ་འབྱམས་པ་ཐོན་ཡོད་པ་དང་། སྔ་རྗེས་སུ་མ་ཌི་ར་སའི་སློབ་ཕྲུག་ཚོགས་པ་དང་མཐོ་རིམ་སློབ་ཕྲུག་ཚོགས་པ། དེ་བཞིན་བོད་རྒྱལ་ཡོངས་དམངས་གཙོ་ཚོགས་པ་སོགས་ཀྱི་ནང་ལས་ཀ་བྱས་ཡོད་པ་དང་། ད་ལྟ་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་སྡེ་ཚན་ནང་ལས་ཀ་བྱེད་མུས་ཡིན་འདུག

གསར་འགོད་པ། པདྨ་རྒྱལ།