རྒྱ་ནག་གཞུང་ལ་མཚོན་ན་ངོ་རྒོལ་བ་ཚོས་ནག་ཉེས་བཟོས་ཡོད་མེད་གཙོ་བོ་མིན་པར་ཁོ་ཚོས་སྲིད་གཞུང་ལ་འཛིན་པའི་རྣམ་འགྱུར་དྲང་མིན་གཙོ་བོ་ཡིན་འདུག
ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཐེན་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་གིས་རྒྱ་ནག་གི་འགྲོ་བ་མིའི་ཐོབ་ཐང་ཁྲིམས་རྩོད་པ་ལེ་ཧི་ཕིན་ (Li Heping) དང་ཝང་ཆུན་ཀྲང་ (Wang Quanzhang)། འགྲོ་བ་མིའི་ཐོང་ཐང་དོན་གཉེར་བ་ཀོ་ཧོང་ཀོ་ (Gou Hongguo) དང་ཀྲེ་ཡན་མིན་ (Zhai Yanmin) བཅས་ཀྱིས། རྒྱལ་ཁབ་ཀྱི་སྲིད་དབང་མགོ་རྟིང་སློག་རྩིས་ཀྱི་ཇུས་ངན་འཐེན་པའི་ནག་ཉེས་ཚབས་ཆེན་ཡིན་སྐོར་བརྗོད་དེ། འགྲོ་བ་མིའི་ཐོབ་ཐང་དོན་གཉེར་བ་ཀྲེ་ཡན་མིན་གནས་སྐབས་སྲིད་གཞུང་གི་ལྟ་རྟོག་འོག་འཇོག་རྒྱུ་ཡིན་ལ། ཁོའི་རྣམ་འགྱུར་དྲང་ཚེ་ལོ་ ༤ ལ་བཟང་བཙོན་བྱ་རྒྱུ་དང་། ཁོས་ཐག་གཅོད་དེ་དང་ལེན་མ་བྱས་ཚེ་ལོ་ ༣ རིང་བཙོན་འཇུག་བྱ་རྒྱུ་ཡིན་ལུགས་ཕྱི་བསྒྲགས་བྱས་འདུག
རྒྱ་རིགས་ཆབ་སྲིད་པ་ཀྲང་ལེ་ཧྥན་ (Zhang Lifan) ཟེར་བ་ཞིག་གིས། སྲིད་གཞུང་གིས་རྒྱ་ནག་ནང་གི་ལས་འགུལ་བ་ཚོའི་ཆབ་སྲིད་དང་འབྲེལ་བའི་ངོ་རྒོལ་ཁྲོམ་སྐོར་ལ་དམ་དྲགས་བྱེད་ཀྱི་ཡོད་སྟབས། ཁོ་ཚོའི་གྲས་ཀྱི་སྲིད་གཞུང་གི་ཁ་ལ་ཉན་མཁན་ཚོར་ཉེས་ཆད་ཡང་མོ་གཅོད་པ་དང་། ནག་ཉེས་ངོས་ལེན་མི་བྱེད་མཁན་ཚོར་ཉེས་ཆད་ལྕི་མོ་གཅོད་ཀྱི་ཡོད་ཅིང་། གནད་དོན་གྱི་རྩ་བ་ནི་ཁོ་ཚོས་ནག་ཉེས་བཟོས་ཡོད་མེད་གཙོ་བོ་མ་ཡིན་པར། ཁོ་ཚོས་སྲིག་གཞུང་གི་ཁ་ལ་ཉན་མིན་དེ་གཙོ་བོ་ཡིན་ལུགས་བཤད་འདུག
གནས་ཚུལ་ལྟར་ན། ལོ་ ༥༥ ཡིན་པའི་ཀྲེ་ཡན་མིན་ནི་རྒྱ་ནག་ནང་གི་འགྲོ་བ་མིའི་ཐོབ་ཐང་དོན་གཉེར་བ་ཞིག་ཡིན་ཞིང་། ན་ནིང་ཕྱི་ཟླ་ ༧ པའི་ནང་རྒྱ་ནག་གཞུང་གིས་ཁོས་རྒྱ་རིགས་འགྲོ་བ་མིའི་ཐོབ་ཐང་དང་དམངས་གཙོ་དོན་གཉེར་བ་མང་པོ་རྩ་འཛུགས་བྱས་ཏེ། རྒྱ་ནག་གཞུང་གི་སྲིད་དབང་མགོ་རྟིང་སློག་པའི་ཇུས་ངན་འཐེན་པ་དང་། རྒྱལ་སྤྱིའི་མི་མང་གི་མིག་མདུན་དུ་རྒྱ་ནག་ནང་འགྲོ་བ་མིའི་ཐོབ་ཐང་གི་རྩོད་གླེང་ཐེར་འདོན། དེ་བཞིན་རྒྱ་ནག་སྲིད་གཞུང་ལ་མཐོང་ཆུང་བྱས་པ་སོགས་ཀྱི་ནག་ཉེས་བཙུགས་ཏེ་ཁོང་འཛིན་བཟུང་བཀག་བསྐྱིལ་བྱས་ཡོད་འདུག
ཟླ་སྔོན་མའི་ཕྱི་ཚེས་ ༣༠ ཉིན་ཀྲེ་ཡན་མིན་གྱི་བཟའ་ཟླ་ལུའུ་ཨར་མིན་ ((Liu Ermin) གྱིས། ཐེན་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་གིས་ཀྲེ་ཡན་མིན་ལ་ཁྲིགས་ཐག་གཅོད་འཆར་ཡོད་པའི་གནས་ཚུལ་དང་འབྲེལ་ནས་ཞུ་གཏུག་བྱེད་སྐབས། ཐེན་ཅིན་གྲོང་ཁྱེར་ཧི་ཞེ་ (Hexi) རྫོང་ཉེན་རྟོག་པས་མོ་ཁྲིམས་ཁང་ནས་བཙན་ཁྲིད་བྱས་ཏེ། ཁ་སང་རེས་གཟའ་ཟླ་བའི་ཉིན་ཀློད་གྲོལ་བཏང་ཡོད་ནའང་། མོས་ཐེངས་དུ་མར་ཀྲེ་ཡན་མིན་འཛིན་བཟུང་བྱས་པའི་གནས་ཚུལ་ཞུ་གཏུག་བྱས་པའི་རྐྱེན་གྱིས། ད་ཆར་མོའང་པེ་ཅིན་སྲིད་གཞུང་གི་ལྟ་རྟོག་འོག་རང་ཁྱིམ་དུ་བཀག་ཉར་བྱས་ཡོད་པ་རེད།
གསར་འགོད་པ། པདྨ་རྒྱལ།
ཨེ་ཕེ་གསར་ཁང་གིས་གནས་ཚུལ་སྤེལ་
