བལ་ཡུལ་གྱི་རྒྱལ་བརྒྱུད་རིང་ལུགས་ལ་ངོ་རྒོལ་བྱེད་མཁན་མའོ་དམར་ཤོག་ཚོགས་པ་དང་མའོ་གྱེན་ལོག་ཤོག་ཁག་གི་མགོ་འཁྲིད་ཟུར་བ་སྐུ་ཞབས་ཀ་མད་ཌ་ཧད་བལ་ཡུལ་གྱི་སྲིད་བློན་དུ་བསྐོ་བཞག་བྱས་འདུག
ཁ་སང་བལ་ཡུལ་གྲོས་ཚོགས་ནང་ངོ་ཡོད་འཐུས་མི་ ༥༩༥ ཡིས་འོས་ཤོག་འཕངས་ཏེ། རྒྱལ་བརྒྱུད་རིང་ལུགས་ལ་ངོ་རྒོལ་བྱེད་མཁན་མའོ་དམར་ཤོག་ཚོགས་པ་དང་མའོ་གྱེན་ ལོག་ཤོག་ཁག་གི་མགོ་འཁྲིད་ཟུར་བ་སྐུ་ཞབས་ཀ་མད་ཌ་ཧད་ (Kamal Dahal) ལ་འོས་གྲངས་ ༣༦༣ ཐོབ་སྟེ། བལ་ཡུལ་རྒྱལ་ཁབ་ཀྱི་སྲིད་བློན་གསར་བར་བསྐོ་བཞག་བྱས་ཡོད་པ་དང་། དེ་སྔོན་གྱི་སྲིད་བློན་ཤཱར་མ་ཨོ་ལེ་ (Sharma Oli) ཉེ་སྔོན་ཕྱི་ཟླ་ ༧ པའི་ཚེས་ ༢༤ ཉིན་གྲོས་ཚོགས་ནང་ལོགས་ཀྱི་ཤོག་ཁག་ཕན་ཚུན་བར་ཡིད་ཆེས་དང་རྒྱབ་སྐྱོར་མེད་ པའི་དོགས་གཞིའི་འོག་གློ་བུར་དུ་སྲིད་བློན་ལས་གནས་ནས་རྩ་དགོངས་ཞུས་ཡོད་པ་ རེད།
བལ་ཡུལ་གྱི་སྲིད་བློན་གསར་བ་སྐུ་ཞབས་ཀ་མད་ཌ་ཧད་ཀྱིས་གྲོས་ཚོགས་ནང་གཏམ་བཤད་སྤེལ་སྐབས། བལ་ཡུལ་གཞུང་མང་གཉིས་ཀྱིས་ཆབ་སྲིད་ཤོག་ཁག་ཕན་ཚུན་བར་གྱི་འགལ་འདུ་འདུམ་འགྲིག་བྱས་ཏེ། བལ་ཡུལ་གྲོས་ཚོགས་ཀྱི་ཆིག་སྒྲིལ་དང་ནུས་སྟོབས་རྒྱ་བསྐྱེད་དགོས་སྐོར་བརྗོད་འདུག
ད་ལྟ་རང་ལོ་ ༦༡ ཡིན་ཞིང་། བལ་ཡུལ་གྱི་སྲིད་བློན་སྐབས་ ༢༥ པར་བདམས་ཐོན་བྱུང་བའི་སྐུ་ཞབས་ཀ་མད་ཌ་ཧད་ནི། ཧིན་རྡུའི་རིགས་རུས་མཐོ་བའི་ཁྱིམ་ཚང་དབུལ་བོ་ཞིག་ཏུ་སྐྱེས་པ་དང་། ཆུང་དུས་ཁོང་གིས་ར་ལུག་སོགས་འཚོ་སྐྱོང་བྱས་ཏེ་འཚོ་བ་རོལ་ཞིང་། རང་ལོ་ ༢༥ སྟེང་བལ་ཡུལ་མའོ་དམར་ཤོག་ཚོགས་པའི་ནང་འཛུལ་ཞུགས་བྱས་ཡོད་པ་དང་། ཕྱི་ལོ་ ༡༩༩༠ ལོ་ནས་ཁོང་གིས་རྒྱལ་བརྒྱུད་རིང་ལུགས་པའི་སྒེར་གཅོད་ལམ་ལུགས་ལ་ངོ་རྒོལ་བྱས་ཏེ། སྲིད་ཚོགས་མཉམ་འབྲེལ་དམངས་གཙོའི་ལམ་ལུགས་(multiparty democracy) བསྐྱར་འཛུགས་གནང་ཡོད་པ་དང་། ཕྱི་ལོ་ ༡༩༩༦ ལོར་ཁོང་གིས་མང་དམག་ཅེས་པའི་མའོ་གྱེན་ལོག་ཚོགས་པ་ཞིག་གསར་འཛུགས་བྱས་ཏེ་རྒྱལ་བརྒྱུད་སྲིད་གཞུང་ལ་རྒོལ་འཛིང་བྱས་ཡོད་པ་དང་། སྔར་རྗེས་སུ་རྒྱལ་བརྒྱུད་སྲིད་གཞུང་དང་མའོ་གྱེན་ལོག་ཤོག་ཁག་གཉིས་བར་བཞག་པའི་ཞི་འགྲིག་གྲོས་ཆོད་ཁག་དོན་འཁྱོལ་མ་བྱུང་རྗེས། ཕྱི་ལོ་ ༢༠༠༨ ལོའི་ཕྱི་ཟླ་ ༨ པའི་ནང་ཁོང་བལ་ཡུལ་གྱི་སྲིད་བློན་དུ་བསྐོ་བཞག་བྱས་ཡོད་ཀྱང་སྲིད་ཚོགས་བར་གྱི་རྩོད་རྙོག་གི་རྐྱེན་གྱིས་ཟླ་ ༩ ཙམ་གྱི་རྗེས་སུ་སྲིད་བློན་གྱི་ལས་གནས་ནས་རྩ་དགོངས་ཞུས་ཡོད་པ་རེད།
རྒྱ་གར་སྲིད་བློན་ན་རིན་ཌ་ར་མོ་ཏེ་ (Narendra Modi) མཆོག་གིས་ཁོང་གི་འཕྲིན་ཕྲན་ནང་། བལ་ཡུལ་གྲོས་ཚོགས་འོས་བསྡུའི་ཁྲོད་སྐུ་ཞབས་ཀ་མད་ཌ་ཧད་ལ་རྒྱལ་ཁ་ཐོབ་པར་འཚམས་འདྲི་གནང་ཡོད་པ་དང་། རྒྱ་གར་གཞུང་གིས་ཁོང་ལ་རྒྱབ་སྐྱོར་ཡོད་པ་དང་ཁོང་མ་འོངས་པར་རྒྱ་གར་ནང་གཟིགས་སྐོར་དུ་ཡོང་བར་མགྲོན་འབོད་གནང་ཡོད་འདུག
གསར་འགོད་པ། པདྨ་རྒྱལ།
