རྒྱ་ནག་གི་རྒྱལ་ས་པེ་ཅིན་དུ་བསྡུས་པའི་རྒྱལ་སྤྱིའི་བོད་རིག་པའི་དཔྱད་གླེང་ཚོགས་འདུ་སྐབས་དྲུག་པའི་ཐོག་ཕྱི་ནང་གི་མཁས་དབང་ ༣༢༥ མཉམ་ཞུགས་གནང་ཡོད་འདུག
བོད་ནང་གི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། བོད་རིག་པ་ཞིབ་འཇུག་ལྟེ་གནས་དང་བོད་ལྗོངས་རིག་གནས་སྲུང་སྤེལ་མཐུན་ཚོགས། བོད་ལྗོངས་སྤྱི་ཚོགས་ཚན་རིག་ཁང་བཅས་ཀྱིས་གཙོ་གཉེར་བྱེད་བཞིན་པའི་རྒྱལ་སྤྱིའི་བོད་རིག་པའི་དཔྱད་གླེང་ཚོགས་འདུ་སྐབས་ ༦ པ་དེ། ཟླ་འདིའི་ཕྱི་ཚེས་ ༢ ནས་ ༤ བར་རྒྱ་ནག་གི་རྒྱལ་ས་པེ་ཅིན་དུ་ཡོད་པའི་བོད་རིག་པ་ཞིབ་འཇུག་ལྟེ་གནས་ཁང་དུ་འཚོགས་བཞིན་ཡོད་པ་དང་། ཐེངས་འདིའི་གྲོས་ཚོགས་སྟེང་བོད་རྒྱ་གཉིས་ཀྱི་མཁས་དབང་ ༢༡༦ དང་ཕྱི་རྒྱལ་གྱི་མཁས་དབང་ ༡༠༩ བཅས་ཁྱོན་བོད་རིག་པའི་མཁས་དབང་ ༣༢༥ འཛོམས་ཡོད་འདུག
ཚོགས་འདུ་དབུ་འཛུགས་ཐོག་བོད་ལྗོངས་རིག་གནས་སྲུང་སྤེལ་མཐུན་ཚོགས་ཀྱི་ཚོགས་གཙོ་གཞོན་པ་དང་དྲུང་ཡིག་ཆེན་མོ་ཀྲང་དབྱི་ཅུང་དང་། བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་གཞོན་པ་ཡུའུ་ལུའོ་ཕིང་། བོད་རང་སྐྱོང་ལྗོངས་སྤྱི་ཚོགས་ཚན་རིག་ཁང་གི་འགན་འཛིན་པདྨ་རྣམ་རྒྱལ་གསུམ་གྱིས་བོད་རིག་པའི་དཔྱད་གླེང་ཚོགས་འདུ་སྐབས་དྲུག་པ་དང་འབྲེལ་བའི་གཏམ་བཤད་གནང་ཡོད་འདུག
ཐེངས་འདིའི་བོད་རིག་པའི་དཔྱད་གླེང་ཚོགས་འདུའི་ཐོག་བོད་རིག་པའི་ཞིབ་འཇུག་གི་ཁྱབ་ཁོངས་ཁག་དང་འབྲེལ་བའི་དེང་རབས་ཆབ་སྲིད་དང་སྤྱི་ཚོགས་འཕོ་འགྱུར། དཔལ་འབྱོར་འཕེལ་རྒྱས་དང་ཕྱོགས་ཡོངས་ནས་འབྱོར་འབྲིང་མངོན་འགྱུར། “རྒྱུད་གཅིག་ལམ་གཅིག”དང་ཨེ་ཤེ་ཡ་ལྷོ་མར་སྒོ་འབྱེད་བྱས་པའི་བགྲོད་ལམ་གལ་ཆེན་འཛུགས་སྐྲུན་སོགས་ཀྱི་ཐད་དཔྱད་གླེང་བྱེད་བཞིན་ཡོད་པ་མ་ཟད། བོད་རིག་པ་ཞིབ་འཇུག་ལྟེ་གནས་ཀྱི་བོད་ལྗོངས་རིག་གནས་རྟེན་རྫས་བཤམས་མཛོད་ཁང་གི་སྤྲུལ་སྐུའི་ཡང་སྲིད་སྐོར་གྱི་ཆེད་དོན་འགྲེམས་སྟོན་ལ་གཟིགས་ཞིབ་དང་། མི་རིགས་ཀྱི་ལོ་རྒྱུས་དངོས་མཚོན་པའི་ཆེད་དོན་གློག་བརྙན་<<མི་ཡུལ་གྱི་དག་ཞིང་>>ཞེས་པ་གཟིགས་འབུལ་ཞུས་ཡོད་པ་དང་། དེ་བཞིན་མིང་དང་ཆིང་རྒྱལ་རབས་ནས་བཟུང་པེ་ཅིན་དང་སོག་པོའི་ས་ཁུལ་གྱི་བོད་ཡིག་ཚད་ལྡན་ཡིག་ཆ་ཁག་འགྲེམས་སྟོན་གནང་ཡོད་པ་རེད།
རྒྱ་ནག་གཞུང་འབྲེལ་མི་དམངས་དྲ་བའི་ཐོག རྒྱལ་སྤྱིའི་བོད་རིག་པའི་དཔྱད་གླེང་ཚོགས་འདུ་ནི་ཕྱི་ལོ་ ༡༩༩༡ ལོ་ནས་འཚོགས་མགོ་བརྩམས་ཏེ་ད་བར་ཐེངས་ ༥ ལ་ཚོགས་ཡོད་པ་དང་། འདས་པའི་མི་ལོ་ ༢༥ རིང་དཔྱད་གླེང་ཚོགས་འདུའི་གཞི་རྒྱ་རིམ་བཞིན་རྒྱ་སྐྱེད་བཏང་བ་དང་། རིག་ གཞུང་ཆུ་ཚད་མཐོ་རུ་ཕྱིན་པ། རིག་གཞུང་གྲུབ་འབྲས་ཟམ་མ་ཆད་པར་ཕུན་སུམ་ཇེ་ཚོགས་སུ་ཕྱིན་པ། ཆ་འཕྲིན་སྤེལ་རེས་རྒྱུན་མཐུད་ངང་གཏིང་ཟབ་ཏུ་སྤེལ་བ། དཔྱད་གླེང་བྱ་གཞི་རྒྱུན་ཆད་མེད་པར་མང་དུ་སོང་བ། ཞིབ་འཇུག་ཁྱབ་ཁོངས་ཟམ་མ་ཆད་པར་རྒྱ་བསྐྱེད་པ། ཚོགས་འདུའི་རིག་གཞུང་ཚན་ཁག་གི་ཚོགས་ཆུང་བགོ་སྟངས་ཉིན་བཞིན་ཞིབ་ཏུ་གྱུར་པ་བཅས་ཀྱིས་རིག་གཞུང་ལས་རིགས་དང་སྤྱི་ཚོགས་ལས་རིགས་ཁག་ གིས་བོད་ཀྱི་ལོ་རྒྱུས་དང་རིག་གནས་ལ་རྒྱུས་ལོན་སྔར་ལས་གཏིང་ཟབ་བྱས་ཡོད་པ་མ་ཟད། རྒྱལ་སྤྱི་ཐོག་རང་རྒྱལ་སྲིད་གཞུང་གི་བོད་སྐྱོང་སྲིད་ཇུས་དང་བོད་ལྗོངས་ལ་ངོས་འཛིན་ནོར་འཁྲུལ་བྱས་ཚུལ་ཡོ་བསྲང་བྱས་པ་སོགས་ཀྱི་ཐད་ནུས་པ་གལ་ཆེན་འདོན་སྤེལ་བྱས་ཡོད་སྐོར་བསྒྲགས་འདུག
གསར་འགོད་པ། པདྨ་རྒྱལ།
